الشغالة او الخادمة في امريكا

اليوم أتكلم مع وحدة أمريكية على مراكز العناية بالأطفال وقلت لها أنها غالية بالمرة

قالت لي أختها عندها طفلين في المركز وتدفع عليهم 30 دولار في الأسبوع لأنها من الدخل المحدود ... وإذا كنت طالب فأنت من الدخل المحدود وتنطبق عليك الشروط

صراحة هالكلام اليوم وبروح لهم وأستفسر أكثر

لأني أشوف أسعار الحاضنات بالنار من 500 إلى 700 دولار

.... أتذكر واحد جاب خادمة تنظف له البيت الظاهر 3 ساعات بـ 100 دولار

يازين العزوبيه زيناه
انام وغرفتي حوسه وسراويلي وملابسي منثوره في كل اتجاه لدرجه انه في سروال معلق فوق المروحه من شهرين !!ولاشيل هم

مرحبا أختي

سبحان الله لسى هذي اليومين أفكر في خدامتي وكيف لو باخذها معي هناك وكيف النظام ..!
بصراحة الحضانات أسعرها فووق وبالذات الي عندهم أكثر من طفل مثلي
الله يعين ويسهل ..

يا ريت لو تفيدنا كيف جاب تخفيض على الحضانات

وهل هي اي حضانة اقدر اجيب فيها تخفيض بهذه الاسعار ام لا؟

حياك الله أخوي محمد
شكرا على النصيحة حتى أنا استفدت منها وكنت ناوية أستفسر لكن سبقتني الأخت صاحبة الموضوع الله يجزاها خير

شدني بكلامك : الخدم الي بأمريكا ..!

بصراحة أول مرة أعرف إنه في خدم بالساعة وجازتلي هالفكرة لكن ما أدري هل ممكن إني أأمن الخدامة على بيتي وعيالي ؟
وهل كل ولايات أمريكا عندهم خدم بالساعة ؟

والشئ الثاني : اش تقصد البيبي ستر أو الناني ؟ هل تعني الحضانة ..!!

بالمختصر أنا ودي بخدامة تجي بالساعة تنتبه لعيالي أثناء غيابي وبعدين تتوكل ؟
فما أدري الي تقصدهم الخدم هل شغلتهم للتنظيف والطبخ وغيره ولا ممكن ينتبهون على الأطفال بعد ..!

ياليت توضح أكثر والله يجزاك خير .

والله يا اختي مو بس الحضانة

مسؤولية البيت ونظافته والاطفال وملابسهم واغراضهم

ولا تنسي اهم شي الدراسة احنا مبتعثين عشان ندرس وان شاء الله نتفوق

مو نرجع بخفي حنين

الله يسهل للجميع كل اموره

وبجد يا بخت العزوبية على رأي غربـ9

صح البيت وشغل البيت بحد ذاته مسؤولية
والأطفال مسؤوليتهم أعظم وأعظم خصوصا اذا عندك طفل بيدرس
لكن الله المستعان يارب تتيسر .. اللهم آمين

الخدم اختي غير عن الحاضنه ..
وبالنسبه للأمانه .. فايه تقدرين تأمنين لان بينك وبينهم عقد وماراح يخلفون هالعقد ..
لان اغلبهم فقط يبي دخل ثاني ولاهو مستعد انه يخسرها .. ولو حصل شي لاسمح الله الشرطه ماتقصر ..
فهالامر يخافون منه ..

ولكن برضوه الواحد لابد يكون محتاط .. مثلا الاشياء المهمه تحطينها بغرفتك وتسكرين عليها ..
مثل ماكان يسوي ابو العائله اللي كنت معهم .. كنت اشوفه يقفل غرفة النوم ويطلع لدوامه ومايبقى بالبيت غيري ..
اطلع للجامعه الساعه 9 واخلص الظهر الساعه 2 .. ارجع الاقي الخادمه على وشك تخلص شغلها ..
حتى مقاضي البيت كان يحط لها لسته بالمقاضي اللي يحتاجونها ومعها الفلوس .. وتروح هي تشتريها وتجيبها للبيت وتسنعها ..
يعني هو كان متفق معها وصارلها معه مده ماهي البسيطه .. ويعدها وحده من البيت ..

وايضا واحد اعرفه سعودي كان متفق مع وحده ساكنه قريبه من عنده بنفس الاسكان اللي هو فيه ..
تجي بس تنظف وترتب البيت وتاخذ ملابسه وتوديها المغسله وثاني يوم تجيب الملابس من المغسله ومعها فاتورتها ..
واذا جا هو دق عليها وشاف الفاتوره واعطاها قيمة الملابس وقيمة شغلها وزاد عليها عشرين او ثلاثين دولار ..


والبيبي ستر او الناني هم الحاضنات ..
الفرق بينهم ان البيبي ستر بس تنتبه على الاطفال .. وتتشغل بالساعه ...
اما الناني فهي المربيه بمعنى انها تنتبه على الاطفال وتدرسهم وتربيهم مثلها مثل اي ام .. بس بعقد سنوي ..
بس هي تكون متخصصه بهالمجال ..
تقدرين تشوفين الفرق بينهم تقرين هالمقال :
Babysitters and Nannies in Morehead City and Raleigh NC


وفيه مواقع متخصصه بهالمجال .. ويعطي معلومات مفصله عن الحاضنه قبل ان تقبلين فيها ..
ومن اكثر المواقع شهره هالمجال موقع Babysitters, Nannies, Child Care and Senior Home Care - Care.com



وبالنسبه لك .. اذا كنتي بس تبين شخص ينتبه لعيالك وقت معين لحتى ترجعين .. فانتي تحتاجين فقط Babysitter ..
بس لابد انك تكوني مجهزه لعيالك مثلا اكلهم وكل شي يحتاجونه بغيابك .. وتحددين مع البيبي ستر اوقات اكلهم واوقات نومهم ..
حتى اذا جا وقت الاكل تروح تعطيهم الاكل اللي انتي جهزتيه .. واذا جا وقت النوم تروح تنومهم وتنتبه لهم لحتى ينامون ..
وتبقى عندهم لحتى تنتهي الفتره اللي انتي حددتيها معها .. حتى وان كانوا نايمين ...


هذا والله اعلم .

شكرا جزيلا لك أخ محمد
الله يجزاك خير ويوفقك ويستر عليك دنيا وآخرة

ما انصحك اختي ابد ابد لن هناك راح يعرفون حقوق لهم غير معترف بها بالسعوديه وهذا شي متفق عليه بين البلدين لا كن هنا بامريكا لهم حقوق وهي حقوق العمال ممكن انك تطلعين عليها ابعدي عن المشاكل ووجع الراس