استفسار سؤال عن الدراسه وعن ولاية اركنساس ليتل روك

مسألة إكمال الدراسه الجامعيه هذا يعتمد عليك ..
يعني يعتمد على كم لك تدرس في جامعة الامام ؟ او كم باقيلك على التخرج !
لانك لو بتكمل في امريكا بترجع من الصفر .. وماراح يعادلون لك شي "إلا" اذا كانت معك شهادة معتمده ! مو ترانسكربت!
هذا الكلام لمسألة معادلة الشهادات ...

اما مسألة مواد التخصص .. فهو يعتمد على ادفايزر التخصص اللي بتكون عنده .. تقدر تبين له أنك مثلا مخلص الماده الفلانيه وتجيب له اي اثبات يثبت أنك مخلصها ..
أو ممكن تقوله انك تعرف هالماده الفلانيه .. وهو راح يتفق معك على طريقه معينه حتى يعتمد كلامك ويعملك wave للماده ..

واما عن المدينه .. فهي جيده للمعيشه .. كويسه ماعليها خلاف ..
اسعار المعيشه فيها متوسطه .. ويمدي الواحد يعيش فيها وهو مبسوط ..
المدينه ماهي سياحيه مثل مدن نيويورك وواشنطن .. ولكنها جيده جدا ..
اجواء المدينه اجواء السعوديه .. "حر بالصيف برد بالشتاء " ...
والثلج عندنا وقت الشتاء مايطول ابو اسبوع او اسبوعين وينتهي ..

يعني المدينه تنفع دراسه للي يبي دراسه .. بس ماتنفع تمشيه للي يبي تمشيه ..
انا اتمشى برى الولايه .. اروح اتمغط بالولايات الثانيه وقت العطل ..
وهذا اغلب الشباب يسوونها يجتمعون ويطلعون تمشيات بين الولايات الثانيه ..

تقريبا اعطيتك نبذه مختصره عن المدينه واجوائها

هذا والله اعلم ..,

رائع يا ون كي ، مجهودك مشكور ومحل تقدير للأمانه أنت ومحاسبة المستقبل و بيت أبن هليلة تقدمون اجوبة كافية للطلاب في هالقسم ، وفقكم الله وسهل اموركم

قال النبي صلى الله عليه وسلم من نفس عن مؤمن كربة من كرب الدنيا ، نفس الله عنه كربة من كرب يوم القيامة ، ومن يسر على معسر ، يسر الله عليه في الدنيا والآخرة ، ومن ستر مسلما ، ستره الله في الدنيا والآخرة ، والله في عون العبد ، ما كان العبد في عون أخيه ).


والله وانا اخوك الكل يحاول يقدم اللي يقدر عليه من مساعده .. ولا نطمع الا باجر وثواب من رب العالمين ثم بدعاء المسلمين بظهر غيب ..!
والحمد لله أولا واخيرا ..

الله يعطييك العافيه .. والله ماقصصرت ..

انا في جامعة الامام هذا الترم الثاني بخلصها ان شاء الله ..

انا فهمت من كلامك اذا تخصصت نفس التخصص في ذيك الحاله اجيب اوراق انه تثيت اني مخلصها قصدك

لكن الحين بنعبي البيانات يسئلون تبغى تكمل ولا بس انجليزي مدري وش احط

وانت موجودفي ليتل روك

ايه عادي وانا اخوك .. تقدر تروح وتكمل دراستك فيها ..
والاثباتات اما يكون باوراق .. او باي شي تتفق انت ويا الادفايزر حق التخصص ..
لان كل تخصص يختلف طريقته .. مثلا انا حذفت بعض المواد فقط بكم برنامج صممته واعطيته للادفايزر لان تخصصي كمبيوتر .. فقبلت فيه عرفت اني عندي خلفيه بالموضوع !
وفيه ماده قالت لي روح للدكتور حقها وشوف الاختبار اللي يعطيك اذا عديته راح نحذف لك الماده ..
يعني شغلات بس تثبت ان عندك المعرفه الكافيه عن هالماده والقدره على تعديتها بس !

وهذا اكيد مايطبق الا بعد ماتدخل التخصص !
يعني بعد ماتخلص اللغه + السنه التحضيريه بالجامعه .. وتبتدي بمواد التخصص ! وقتها تفكر بسالفة الويف وغيره !

ومادامك بالترم الثاني ... الا قدم على الجامعه كإكمال دراسه جامعيه افضل لك ..
قبولهم بسيط ومافيه تعقيدات ..

اما عني .. ايه انا ساكن في ليتل روك < مغمض يقول ابد ماكأن معلوماته موجوده تحت اسمه

يعطيييك العافيه زالله ماقصرررت يابعدي
حسسيت اني فاهيي يع ههههه

السلام عليكم,,
حبيت اسأل عن جامعة UAMS لاني ناويه انقل لها,,
كيف الدراسه فيها؟ وفيها سعوديين او لا؟
شكرا.

وعليكم السلام ورحمة الله وبركاته ..
بالنسبه لجامعة UAMS مثل اي جامعه متخصصه بالطب !
الجامعه بشكل عام ممتازه .. وعلى حد علمي واللي سمعته من الطلاب اللي فيها نسبة صعوبة الدراسه فيها متوسطه ..
مشكلتها الوحيده بموقعها .. صحيح انها قريبه من الجامعه الرئيسيه UALR .. تقريبا عشر دقايق سياره ..
الا انها تعتبر في طرف المدينه (على مدخل المدينه ) ..
اما السعوديين .. ما ادري والله لاني ماسبق وواجهت اي سعودي يدرس طب ! كل اللي مروا علي بولايتنا اما بيزنس او هندسه !

لكن متأكد ان فيها سعوديين ولكن بيكونوا قله جدا ! لان اكيد بيسكنون قريب من الجامعه .. فبالتالي يكون السكن بعيد عن بقية الطلبه السعوديين لجامعتنا !
وثانيا ان طلاب الطب قليلين ..!

يعني اعتقد لو كانوا السعوديين فيها كثير ماراح يتعدون اكثر من عشرين شخص .. !

بعكس جامعتنا اللي السعوديين فيها كثير ...

هذا والله اعلم ..,