تقرير كرهت هذا النوع الحريم

المشكلة في رأيي لها اسباب كثيره

اهم سببين

1- النساء بصفه عامه يحبون التفاصيل ويهتمون فيها كثير ،، هذي بالفطره

لما تمسك منصب ، تصير تدقق في كل صغيره وكبيره ! لدرجة البيروقراطية والتعقيد تقول ارحميني ! يعني شيء خارج نطاق التحمل خصوصا مننا احنا الرجال اللي متعودين على الاهتمام بالصورة الاكبر فقط


2- الحريم عاطفيات ومايقدرون يفصلون بين العمل والشخصنه ! غير انو بعض الاحيان مزاجيات !

يعني احيان توقف الشغله على مودها فقط لاغير !! واذا كرهتك فالله يخلف عليك ! رغم انو شغلتك مالها علاقة نهائي في شخصيتك ولا علاقتك معها ! بس للأسف مستحيل يقدرون يفصلون !

راح أذكر لكم موقف حصل لي في السعودية:

مرة بخصوص تدريس مادة في القسم، رفضت أني أدرسها، ودخلت على رئيس القسم
وقال لي: ما عندنا أحد يدرس هذي المادة غيرك وأنت ما عندك إلا ساعتين بس لازم تدرسها
قلت له: ما عندي استعداد أدرسها والسبب كذا وكذا
قال لي: مو على كيفك تقول لي ما راح أدرسها
قلت له: أنت ما تشوف أنه بكيفي بس أنا ما راح أدرسها
قال لي: ترى عندي دكاترة في القسم ما عمر أحد قال لي ما راح أدرس هذي المادة
تجي أنت وتقول لي ماني مدرس هذي المادة
إذا ما بتدرسها اكتب لي خطاب أنك ما راح تدرسها
قلت له: مستحيل أكتب لك خطاب، تبي ترفع فيني هالخطاب
لكني أقولها لك بالفم المليان ماني مدرسها شف لك حل غيري
المهم: تهاوشنا لدرجة أنه من الحماس والمشادة طاح عقال أحدنا

في الأخير:
لقيت زميل لي قال لي صل على محمد يا أخي ودرسها وش يضرك
ترى المادة متعطلة لها أسبوعين من بداية الدراسة وأنت أقل واحد عنده ساعات
درسها يا أخي وافتك من المخاصم على الفاضي
وأخذني لمكتبه وقال لي شف ترى المادة حليلة وما عندك مشكلة
قلت له والله مو علشان المادة لكن السبب كذا وكذا

أنا في الأخير راحت شياطيني وقلت خلاص أوكيه راح أدرسها
ورحت لمنسق الجدول وقلت له خلاص أنا راح أدرسها حط اسمي في البوابة

في اليوم الثاني كان رئيس القسم يسولف ويضحك وقال:
رئاسة القسم مشكلة كل يوم تجيك مصيبة من دكتور والكل زعلان عليك
قلت له زي إيش مثلاً؟
ضحك وقال: زي إيش يا ولدي؟ ما يحتاج أعلمك

طبعاً وبعد أشهر بسيطة انتهت فترة رئاسته للقسم وصار عميد الكلية
ويعلم الله ما وقف معي في مشكلة ابتعاثي إلا هو بعد الله سبحانه وتعالى

وما زلت أتواصل معه وكأن شيئا لم يكن
وعلاقتي به مثل العسل...


الخلاصة:
أشك لو أني كنت تحت رئاسة امرأة راح ألاقي أنواع الانتقام!

انا درسوني داكتره سعودين وامريكان ..

السعودي متعطرش ولسانه طويل ويفرض شخصيته ع البنات
ولمن نقارن بين اسئله الاختبارات .. يقدم للبنات اختبار تعجيزي وظلم في التصحيح وكل الكلاس راسب ولاينجح منهم الا 5 او 6 وانا منهم ولكن نجحت بدرجه 60
ويقدم لشباب اسئله سهله او بمصطلح آخر تااااافه والسبب خوفا منهم!

( رفضتني جامعه بامريكا بسبب درجه ماده وليس المعدل ورغم حصولي ع مواد اخرى 95 درستها مع نساء )
كنا دايما نهرب ونغير الماده من دكتور الى دكتوره .. ولاكن العماده القسم الرجالي فرضت ع جامعتنا ولا تفتح بعض المواد الا مع رجال!!!
ورئيسه القسم حزينه لما يحدث ..تقول: لدينا معيدات وخريجات من امريكا والجامعه لاتريد تعيين احد منهم ،، يردون الوظائف للرجال !!
ويفتحون شبكات ويآتون بفنيات و مشرفات ويكلفون مبلغا ع الدوله .. وهذا كله بصالح الرجال ..
لمن نفتح كلاس وتدرسها مرأه ليس كتكلفه الرجل = فنيه + مشرفه + مراقبات للاختبار + مضاربات ما احد يبغى يتحمل مسؤوليه الدكتور الفلاني!!!

اما الدكتور الامريكي رائع بمعنى الكلمه ..

خلاصه الكلام
اغلب الرجال السعوديين يقللون من قدر المرأه ومن حقوقها ويفرضون سيطرتهم عليهم لآنها فقط مرأه
آمر محزززززن

عندي تعليقيات بسيطة لو سمحتي:

الأول: الحق ينقال أن الطالبات أكثر اهتماما من الطلاب، هذي ما أعتقد أحد يخالفني فيها، أنا سبق ودرست طالبات وطلاب، ما فيه مقارنة، الطالبات يهتمون ويحلون الواجبات ويذاكرون. ما أقول أن مستواهم أفضل من الطلاب فالمقارنة صعبة، لكنهم أكثر اهتماماً. الطلاب عندهم لا مبالاة (طبعاً باستثنائي كطالب ههه)

الثاني: أنا والله ما أشوف أن السعودي يفرض شخصيته ويتغطرس ويطول لسانه على البنات، سبحان الله أنا أشوف العكس تماما، تدريس الطالبات يحتاج إلى حذر كبير جداً، ومن تجربتي فقد كنت أكثر جرأة مع الطلاب ويمكن أن أخاصم وأتكلم مع الطالب إذا حصلت مشادة، وأزعل وأرضى، بس الطالبات، يحتاج المحاضر أن يكون جداً رسمي في تعامله معهن.

الثالث: طالما أنك تقولين إن الدكتور الأمريكي رائع بمعنى الكلمة، هنا مربط الفرس. معناه أن القضية كلها ليست قضية رجل أو امرأة، معناه القضية سعودي وغير سعودي. وكنت أقول: إن الشخص يبني أحكامه على تجاربه، ومن الواضح أن عندك تجربة سيئة مع دكتور سعودي.

الله يعيننا وإياك، وإن شاء الله تلاقين الجامعة اللي تقبلك،،،

هذا هو أنت وعلى مقولتك ( لو أني كنت تحت رئاسة امرأة راح ألاقي أنواع الانتقام! )

لاحظت ردودك هنآ .. كلها تجارب وتعمم

على العموم ..

الاختلاف في الرآي لا يفسد للود قضيه

صحيح والله، لو سألتوني عن شيء ما عمره مر علي، أكيد راح أقول ما عندي علم، بس طالما فيه شيء صار في حياتي له علاقة أكيد راح أتفلسف
بعدين أنا ما جزمت، أنا قلت: "أشك لو أني..."

تحياتي،،،

اتفق مع الاخت Abeer 511 في مسألة الاختبارات التعجيزية اللي يقدمونها
دكاترة الجامعه من الرجال لنا حنا الطالبات ..في حين انو الدكتور يدرس نفس المادة للطلاب نلاقي
الاسئلة عالم ثاني من السهولة ..!!!
وحصل مره ناقشنا دكتور في هالمسألة.. قالنا بكل صراحة وبفم مليان "انتو طالبات ..انتو غير لازم يكون مستوى الاسئلة اصعب !! "
ولمن قاموا عليه البنات في النقاش... قال لا لانكم انتو مهتمين وشاطرات اكثررر من الطلاب!!!!!! (يستهبل علينا ؟؟!!)
وهذا حالنا مع دكاترة الجامعة ...

في هالحالة الافضل انو محد يتهم النساء وخصوصا (السعوديات) انهم دقيقين في كل صغيره وكبيره ...هذا نتائج "التربية والتعليم" في مجتمعنا ..
في معظم الاشياء في مجتمعنا.. كل شي يفتترض فيه يطلع بيرفكت وتمام وبدون اخطاء اذا بيطلع من امرأة ..بس عاادي الاخطاء تطلع من رجال
مجتمعنا يسامح الرجل اذا اخطئ عادة واما المرأة مستحيل ينسى لها خطأ ابدا ..!! أين الانصاف؟؟ (قضية قديمة وما زالت المفاهيم نفسها ما تغيرت)

يمكن طلعت عن الموضوع شوي بس اشوف انو مسألة الادارة- ومنو كفؤا ومنو غير كفؤ لها- مو بس موجودة
في الجامعات والمدارس مسألة الادارة تتواجد حتى في حياتنا الشخصية وفي كل بيت يعني المسألة تبدأ من التربية قبل التعليم...

أكرر مجرررد وجهة نظر ..

اليوم الصباح سولفت مع الموظف الهندي "مسلم" في الدنكن دونات ..
يقول انا زرت السعوديه من زمان ،،، قلت ايش عجبك فيها والعكس ..
قال الي مايعجبني عن "النساء" .. قلت له قصدك قياده السياره .. قال لا مو بس كذا .. قلت اجل ايه
قال: stay at home .. وبعدين انا ضحكت ،،
قال: انا ما اقول نبي الحريه ،، قال بالعكس قوانين السعوديه حلوه بس اذا اعطى الحريه في شي معين لرجل .. لازم يعطى للمرآه ، واذا منع شي عن الرجل يمنع عن المرآه ..
قلت: لا موبس كذا .. هم مايحبون اننا نكون اداريات خخخخخخ .. قال: انا شايف البنات هنا فرحانين يروحوا ويخرجوا احسهم يحبون امريكا
قلت له انا عن نفسي حبيت حياتهم البسيطه بس اتمنى اجيب اهلي كلهم عندي ^^

انا مالي صلاح بوجهه نظره .. بس حبيت اعلمكم مو كل شي عن السعوديه يعرفونه ^^

بالبدايه تكلمت عن وضعي وش أنا عليه بعدهاااا خطر عبالي شهر رمضاان قلت يعني كلا يتكلم عن نفسه وكيف بيقضيه دااخل امريكااا كموضووع أو اطرحو اي موضووع مو شرط .
بس وسلامتك .

ابن بيت آل هليله << << حفظت اسمك بعد جهداا عليك بالمكافأه .
قلت تشك هاااه , لا أخي اقطع الشك باليقين لا يمكن نحمل اي نوع من الانتقاام << تبتسم.