الأعضاء الإشتراك و التسجيل

الملتقيات
ADs

الغش مرض ملازم لأكثر الطلاب السعوديين

الغش مرض ملازم لأكثر الطلاب السعوديين


NOTICE

تنبيه: هذا الموضوع قديم. تم طرحه قبل 3933 يوم مضى, قد يكون هناك ردود جديدة هي من سببت رفع الموضوع!

قائمة الأعضاء الموسومين في هذا الموضوع

  1. الصورة الرمزية Linguistics Consultant
    Linguistics Consultant

    مشرف ملتقى أمريكا و بريطانيا و المعيدين

    Linguistics Consultant الولايات المتحدة الأمريكية

    Linguistics Consultant , ذكر. مشرف ملتقى أمريكا و بريطانيا و المعيدين. من السعودية , مبتعث فى الولايات المتحدة الأمريكية , تخصصى Linguistics NOT English , بجامعة University
    • University
    • Linguistics NOT English
    • ذكر
    • غير معرف , Wisconsin
    • السعودية
    • Aug 2008
    المزيدl

    June 22nd, 2013, 12:31 AM

    السلام عليكم

    أعتقد أن البعض راح يدخل ويرد بمجرد رؤية العنوان
    لذلك آمل آن تقرأ موضوعي ثم تناقشني بما شيئت أن تناقش


    راح أكتب على سجيتي بدون أن ألتزم بطريقة مقالية
    وبدون أن أتبع طريقة علمية وإنما هي خواطر وقصص

    عندما كنت في المرحلة الجامعية، كانت ظاهرة الغش مزعجة
    لدرجة أن أكثر الطلاب لا يتركك تحل في الاختبار من إزعاجه
    يريد منك أن تقوم بمساعدته في الإجابة عن بعض الأسئلة

    بعد تخرجي من الجامعة درّست في الجامعة على فترتين
    فترة كانت عام 2007، والفترة الثانية كانت عام 2011

    الطالب يستميت في محاولة الغش بأي طريقة ممكنة ولا يتورع
    وكنت أضطر إلى اختراع طرق محاربة الغش اختراعاً

    في الجامعات البريطانية عندما كنت أدرس مرحلة الماجستير
    بعضكم لا يعرف أن معظم الجامعات البريطانية تعتمد في التقييم على البحوث
    وكانت هذه فرصة لكثير من الطلاب السعوديين للتلاعب وشراء البحوث

    أعلم أن هذا يسيء لنا جميعاً كسعوديين ولكن هذا الواقع هناك
    كنت أجلس أكتب بحوثي، وكان أحد الشباب يتصل علي ويقول:
    "أنت مسوي فيها مخلص تكتب بحث على بالك بتطلع باحث
    عطه أي آدمي ولا تكون بخيل بفلوسك ريح راسك"

    وهذا مما جعل هناك سمعة غير طيبة لخريجي بريطانيا
    بل وكان أحد الأسباب التي جعلتني أفكر بالانتقال لأمريكا
    بعد أن رأيت أن الكل أصبح يعتقد أنك اشتريت بحوثك
    وأن شهادتك إنما هي مجرد فترة جلستها هناك في بلد الابتعاث
    ويقال إن هذا مما دعا وزارة التعليم العالي توقف الابتعاث لها

    هنا في أمريكا لدي بعض الأصدقاء والأقارب يدرسون لغة
    في معهد ELS أكاد أقول إن أغلب السعوديين يتناقلون الأسئلة
    ولذلك في الفصل الماضي تغيرت الأسئلة وكان هناك رسوب فضيع

    قبل يومين اتصل بي أحد الطلاب السعوديين الذين يدرسون في المعهد
    وقال لي: عندي كتابة مقالة، وما أمداني أعرضها على المصحح
    ممكن أرسلها لك تدققها ما عندي وقت!
    قلت له: أنت طالب لغة كيف تبغى أحد يصحح لك المقالة؟
    يفترض أنك تتعلم من أخطائك وإلا كيف راح تتطور؟
    قال لي: يا أخي ما اتصلت بك تعطيني محاضرة
    أنا على طول كل المقالات أسوي لها تدقيق لغوي
    وأسلمها لمدرستنا، وما عمرهم قالوا لي أي شيء
    قلت له: يا حبيبي هم يعتقدون أنك كاتبها بنفسك
    لو كانت مقالة علمية ممكن نقبل أنك ترسلها لمدقق
    بس أنت تدرس مادة رايتنق معناه لازم تتعلم
    اليوم عرفت أنه رسب في الرايتنق وأعاد المستوى
    والمشكلة أنه زعلان وينظر لي من طرف عينه
    لأني رفضت أساعده في لحظة حرجة بالنسبة له
    طبعاً هذي طريقته في كل المستويات وينجح بها

    هنا في أمريكا أيضا عندما يأتي سعودي للقسم
    يبحث عن طالب سعودي سابق أخذ مادة كذا وكذا
    يبدأ يقول لك يا أخي أبغى أشوف الواجبات والبحوث
    وإذا عندك نسخ من اختبارات سابقة أبغى أطلع عليها
    هذا نوع من الغش وإن كان غير مباشر

    جلست مع نفسي وأفكر
    ليش حنا بهذي الطريقة
    شغلنا يقوم على الغش والتلاعب
    نجاح بالغش، ووظيفة بالغش، وعمل بالغش

    أنا ماني لا مطوع ولا متشدد لكن عندي مبدأ يمنعني
    ما عمري فكرت في يوم أعتمد على الغش أو أعين على الغش
    ومع ذلك أشعر أني أنا اللي خطأ وأن كل الناس ماشية بنفس الطريق.


    أسئلتي اللي مدوخنني:
    وش سبب غش السعودي في دراسته وتحايله؟
    من زرع فينا هذي الطريقة، ومين خلاها مرجلة في نظرنا وشطارة؟
    هل الشعوب الأخرى مثلنا أو أنها ظاهرة خاصة بنا ولش حنا بالذات؟

  2. انا اتفق معك بكلامك ..
    وفي امريكا ترى نفس الكلام لاتروح بعيد ..
    اللي عندي هنا الاغلبيه يمشون على نفس النظام ..
    في معهد اللغه وفي الجامعه ..

    يتناقلون الاسئله من جيل لجيل !
    المشكله ان مسألة الاسئله مفيده لو كنت تبي تاخذ نظره عامه بطريقة الاسئله يعني تتدرب عليها من دكتور معين حتى تكون مهيأ له !
    بس الطلبه استغلوا اسألة الدكاتره اللي اخذوها من طلاب قبلهم .. لاجل الغش بس !
    غالبية الدكاتره نظامهم يعطون نفس الاسئله لكل فصل .. يعني نادرا يغيرونها .. وبعضهم يغيرها بشكل مستمر ..

    وفيه طرق كثيره يتبعونها علشان فقط النجاح ...

    انا من وجهة نظري .. الطالب الاكاديمي ممكن أنه يستخدم اي طريقه تخليه يخلص غالبية المواد العامة اللي فرضت عليه وهي مو في تخصصه !
    لاننا مثل مانعرف ان الجامعه تفرض على الطلبه مواد عامه اجباريه وغالبها ماتكون في التخصص !
    في هذي الحال .. انا اشوف مثل ما الجامعه فرضت هذه المواد العامه خارج التخصص لاجل مصالح ماديه .. فما في مشكله لو ان الطالب لقا له طريقه يتخلص منها بشكل اسرع حتى يركز في تخصصه !

    لكن هذا مو معناته انه يستخدم هذه الطرق في تخصصه ! لان لو استخدمها وش الفايده اساسا يدرس بالجامعه اذا حتى تخصصه مايبي يدرسه !

    بس المشكله ان الان الكل يستخدم اي طريقه لاجل بس يخلص اكبر عدد ساعات يقدر عليه في الجامعه .. فمثلا تلاقيه طالب بكالريوس مخلص 90 ساعه كلها بالغش والحيله .. وبقية الساعات جهده الخاص (لانه مجبور) ..
    فهذا لايعقل .. يعني بالنهايه بيتخرج بشهاده لايفقه في تخصصه شيء ! .. ويصير مثله مثل هالمسؤولين اللي عندنا بالدوله شهادات بدون عقل !


    وانا اعتقد ان سبب الغش السائد بين السعوديين هو البحث عن الحلول السريعه .. والابتعاد عن الاجتهاد ..
    لاننا بالسعوديه بكل بساطه مايعودونا على القرائه من الصغر !
    يعني حتى بالبيت ماتلاقي احد فاتح كتاب يقرا .. اما تلاقي الشايب فاتح هالجريده يقرا والا فاتح هالتلفزيون على الاخبار !
    اما أنك تشوف احد فاتح كتاب يقرأه ليستفيد .. فهذا نادرا جدا !
    البيئه اللي مثل هذي تخرج اجيال لاتحب القرائة .. فبالتالي يلجأون للغش لانهم بكل بساطه "مايحبون يقرأون" ..

    ولا تنسى أن عندنا بالسعوديه ضغط من الاهالي على الاطفال بالمدرسه .. لدرجة أنهم يكرهونهم بالمدرسه اكثر من انهم يحببونهم فيها !


    بعكس الشعوب الاخرى (بالاخص الغربيه) ..
    غالبيتهم أجزم أنه ماينقصهم الا بس يطبع اسم الكتاب بجبهته .. من كثر ماهو مصمغ هالوجهه بهالكتاب !
    فبالتالي عياله يتأثرون منه لان البيت كله يقرأ ..
    غير هذا فيه شغله فيهم حلوه .. انهم يحمسونهم على القرائه ..

    احنا مانقرا قصص لاطفالنا .. ولا نشتري لهم كتب قصص يقرأونها بشكل دايم ..
    هم لابد يقرأون قصه لاطفالهم بشكل يومي .. ومتى ماصار الطفل يقدر يقرأ .. اشتغلوا عليه بكتب القصص ليقرأها ..

    اذكر العائله اللي كنت ساكن معهم .. بنتهم الصغيره حبت تساعدني بالقرائه .. فدخلتني على غرفتها وفتحت المكتبه حقتها ..
    كل الدنيا عندها كتب قصص .. الكتب كثيره فوق المية كتاب تقريبا .. فسألتها اذا هي قرتها كلها .. قالت ايه وكلها قصص ..
    فيه بعضها علمي .. وبعضها للاطفال الصغار مره ..

    فمثلا هذي لما تكبر .. تكون متعوده على القرائه وعندها معلومات مسبقه عن غالبية الامور ..
    فبالتالي راح تجدها مجتهده في دروسها .. لانها بس تحب تقرأ وماعندها مانع بانها تقرأ الكتاب كله !


    بينما حنا بالسعوديه .. بزرانا تفتح دواليبهم تلاقا خلاقين والعاب وحصاله مافيها الا كم ريال !
    واما الكتب .. اذا مايدرس مو لازم يكون عنده كتب !

    واذا كبر وهو على هالحال .. اصبح حاله مثل حالنا الان ! ..


    ايضا المجاراه ! يقولك المثل الصاحب ساحب .. يعني لو قرناء الشخص كلهم مجتهدين ومايلجأون للغش .. هو راح يجتهد .. واذا شافهم يغشون راح يغش ..
    لان الاصحاب لهم تأثير على بعض بطريقه مباشره ...

    فحتى نقضي على هذه الظاهره .. لابد أن تكون فئة المجتهدين تزداد ويبتعدون عن المساعده المباشره بدون النصح والارشاد .. وراح يكونون مثل الـ "الإبره " للقضاء على هذا الفايروس ! ..

    اسف على الاطاله .. ولكن اعجبني الموضوع وحبيت اشارك ..
    7 "
  3. بوجهة نظري الموضوع موب قصة مرض او ادمان.. وانما هو نتاج ثقافة التعليم عندنا..الطالب منذو الصغر ملقن بانه (يجب) ان ينجح ويجتاز مواده .. موب مهم يفهم مو مهم يستوعب مو مهم يفكر اهم شي النجوح.. السبب الثاني بوجهة نظري غياب ثقافه مسؤولية ورقابه الفرد ع نفسه.. لم نزرع هذه الثقافه ابد.. لو جيت وحطيت كم طالب سعودي بكلاس وخليتهم يختبرون وطلعت.. بيغشون.. عكس اليابانيين ع سبيل المثال.. لانه عندهم ثقافه ومسؤوليه شخصيه ومبادئ وقيم..كذلك الحال لو كنت مدير مدرسه او مدير دائره حكوميه وقلت للموظفينك انك بكرى منت مداوم ولا فيه احد بيغطي مكانك.. فطلبت منهم ان يأدوء العمل كالمعتاد.. صدقني الغالبيه لن تحضر .. اعتقد الخلل بالمجتمع.. بالمدرسه.. بالبيت..اتمنى الاجيال القادمه تكون اكثر مسؤولية والالتزام.. فالظاهره تتعدى الغش لابعد من ذلك بكثير..
    7 "
  4. حتى انا ممما عمري غشيت ، او فكرت فيه ، الحمدلله ، بس اشوفها مو مرا ظاهرة لكن يوم دخلت الكلية حسيت انها موضة عند البعض فقط .
    مرا يوم انا بالمتوسط جتني بنت قالت لي انا كنت تعبانه وماذاكرت ومدري ايش وحتى شكلها كانت تعبانه قالت ابيك تساعديني ، قلت طيب ابشري بساعدك ، قالت شوفي اذا حليتي وخلصتي لا تسكرين ورقتك حطي الورقة على جنب الطاولة عشان اشوف ، يمآآ قلبي خفت وسكت وقلت طيب عشان ما اكسر كلامي
    ويوم جاء الاختبار سويت اللي قالت لي ، ما ادري ماكنت احسبه غش كنت اعتقد انو مساعدة .. ومن بعدها كملت اسكر الورقة اذا خلصت لاني اخلص بسرعة وشفت صديقاتها يقولون لها قولي لها وهي تقول لا كأنها مستحية مني لكني ما استوعبت ناظرتهم ومشيت ولا طلبت مني بعدها .
    والحمد لله ما عمري غشيت ولا احد طلب مني طوول الثانوية
    وبالكلية هههههه جتني وحدة كان علينا تسميع قران ، تريدني ان ادخل بدل صديقتها لان صديقتها تعبآآنه ومدري ايش ، نفس الجزئية انا توني مخلصة تسميعها وهي استاذتهم غير ، لكن للاسف كنت اعرف الغش الان مو مثل بالمتوسط اصدق قلت: لا ماراح ادخل لانه حرام وغش مع ابتسامة ساخرة ، استغربن من ردي ، مرا رفعن ضغطي ودي اهزئهن زيادة لانهن ماهن صديقاتي ولا شيء ممما اعرفهن الا بس سلام لكن هذا اللي طلع مني ، ابتسامة ههههه
    وصديقتي رسبت بمادة لانها قبل ما تدخل قالت لها وحدة ساعديني وكذا قالت لها اوك يعني تسلك لها ودخلت القاعة ، قامت البنت وكل شوي تسالها بالاختبار قامت صديقتي وسلمت ورقتها من الزعل هههههه ولا حلت . ما قدرت تستحمل لانو اول مرا يصير لها قلت لها انا بالمتوسط صار لي وسويت مثل ماسويتي قلت طيب مثلك قالت صدق ، وجلسنا انا وياها نضحك هذاك اليوم بلا سبب كنا فاصلات .



    أسئلتي اللي مدوخنني:
    وش سبب غش السعودي في دراسته وتحايله؟
    اعتقد ضعف الوازع الديني ، واعتقادة انو اللي يحفظة شيء ماله فايدة وانو مو مستوعبه وحتى لو هو يستوعب كيف راح يطبقة بوظيفته ، ومو واثق من نفسه وقدراته .

    من زرع فينا هذي الطريقة، ومين خلاها مرجلة في نظرنا وشطارة؟
    المرحلة الابتدائية يمكن لانو هي الاساس على حسب مدرسة الشخص فإذا كان عنده احد يقرب له بالمدرسة او بنت مدرسة او شيء يغششونها عشان امها او زي كذا يعني يقولون صغيره .
    صح لكن الحين نقدر نكسرها ونهزئهم عششان يعرفون قدرهم ، مو مرجلة ولا شطارة انا عندي بنظرتي احسبهم ينظرون على انها مساعدة وانو اللي ما تسويها انانية ولا تحب الخير لغيرها لكن يوم صرت اقول حرام وغش بالوجه ، صاروا ما ينظرون لي انو مو انانية ولا احب الخير لهم صاروا ينظرون لي اني انا الصح وهم الخطأ اللي جالسين يكسبون ذنووب وانا ما ابي اكسب ذنوب زيادة على ذنوبي ، واحب ديني اكثر ،
    يعني اكبر شيء بيسوونه ايش ؟؟ حتى التحضير ما احضر لاحد لو هي اعز صديقاتي وطبعا الكل يعرف بس وحده تكرهني عشان هذا الشيء وكم مرا تقط كلام على السالفة بس من الكلاس الثاني مو عندي الحمدلله وما تهمني .
    ما ينفع تعتذر لهم لااااا قول حرام واتركهم يراجعون انفسهم ومن ارضى الناااااس في سخط الله ، سخط الله عليه واسخط عليه النااس ، ومن اسخط الناااس في رضى الله رضي الله عليه وارضى عنه الناااس ترا البنات اللي قلت لهم حرام يحبوني بعد هذا الموقف اكثر ممما ادري ليه

    هل الشعوب الأخرى مثلنا أو أنها ظاهرة خاصة بنا ولش حنا بالذات؟
    هههههه يب شفت صينيين او يابانيين يغشون بمقاطع باليوتيوب اوما الشعوب الاخرى ما ادري ، ليست خاصة بنا .
    اما حنا بالذات لاننا نحب الناس اكثر من انفسنا ، وهذا غلط المفروض نحب الله ثم الرسول ثم انفسنا ولنفسك عليك حق ، وهم يجوننا بطريقة مؤدبة تحرجك شوي ما تقدر تهزئهم

    اسأل الله لنا الهداية موضوع ممتع .
    اهم شيء نركز على حلهاا اذا كانت موجودة بدروس زيادة الثقة في النفس والقدرات البشرية وزيادة الوعي بفائدة المعلومات على الانسان وانها تنشط الذاكرة وتخليك اكثر ذكااء ... الخ
    7 "
  5. والله يا اخي انت تتكلم عن قيم وعادات زرعت في عقول بعض الجيل و اذا كنا نريد البحث كيف وصلت لهم لازم نرجع للوراء...

    على أي حال انا متأكد ان الشخص الي يغش لا يتمنى ان يعرف أي احد انه لجأ لهذا الأسلوب لتحقيق النجاح.
    والي انا ايضاً متأكد منه ان فيه اشكال غير مشرفه للوطن ولا تستحق الأبتعاث وصرف المبالغ الطائلة عليهم وبالأصل فيه من هو أولى منهم لكن للأسف الموضوع يمتد الى جذور عميقه ...
    يا اخون احنا بلدنا مافيه معايير
    نعم المعايير الي تضبط كل شي في الصحه و التعليم و جميع الوزارات المدنية و العسكريه ومن هنا بدأ التحايل على الأنظمة و القرارات لتحقيق المصالح..

    يا اخي عميد البحث العلمي في احد الجامعات الي مستأجر له واحد هندي وشغال بحوث بأسمه من يقدر يقول له من اين لك هذا
    عمدا الكليات الي يستغلون المتعاقدين من أعضاء هيئة التدريس المتميزين لمشاركتهم بحوثهم من يقدر يقولهم من اين لك هذا
    فقط معيار من اين لك هذا ما قدرو يطبقونه

    خلونا نرجع للوراء اكثر كلنا نتذكر أيام ما كانت اختبارات الثانوية العامة من الوزارة وكان بعض الطلاب المقتدرين يذهبون للدراسة في بعض القرى المجاوره للحصول على معدلات مرتفعه
    وكانو يترشحون بعد ذلك لأفضل الكليات الطب و الهندسه و الكليه الأمنيه و أرامكو وووو ويتولون مناصب عليا يعني يقودون البلد الا يعتبر هذا غش.

    رحت اصرف دوا من الصيدليه وقالي تبغا تبغا الأصلي ولا بدل الأصلي قلت له لا بديل الأصلي ما يكون بنفس الجوده انا اعرف هذا من زمان عندنا بالسعوديه شركة فارم و الجمجوم و تبوك للأدويه تسوي شغلات عجيبه
    بعيده عن التركيبه الأصليه – قالي الصيدلي لا لاتخاف ليس في هذا البلد يحدث مثل هذا الشي نحن عندنا على الأقل لابد ان تكون جوده المنتج المصنع اكثر من 95% والله بعدها حسيت بأحتقار لنفسي اني قلت له على المعلومه

    على أي حال انا احس مع كثر الكتابه اني اخلط المواضيع على بعضها وانزل عن الخط كثير
    المعايير الأكاديميه غير متبعه من قبل اغلب المبتعثين وشغلهم كله تلخيص و إعادة صياغه و استأجار مدرسين وهذا كله غش في غش
    و للأسف نحن الضحيه لمثل هذه التصرفات بدأت سمعتنا تسؤ بسسب هذه التصرفات.
    7 "
  6. السلام عليكم ورحمة الله

    فعلا ً ، الغش مرض وليس على المريض حرج ..!
    ومثل ما ذكر الأخ نادر .. الغش أصبح من العادات والتقاليد المتوارثة كابر عن كابر

    وبالتأكيد صعب جداً تغير العادات والتقاليد ..!!

    الأب كان يغش .. تزوج وأنجب عيال زرع فيهم روح الفكاهة في الغش وحكى لعياله عن مغامراته في الغش
    وأصبح الغش ضيف ظريف يزورهم في إجتماعاتهم العائلية الودية وأصبح جزء لا يتجزء من الأحاديث اليومية لفترة القيلولة والسمر ..

    إيش النتيجة المتوقعة بعد استظراف هذي العادة القبيحة .. وتهوين فعلها !!

    أكاد أجزم إنه أثناء دراستي في الجامعة في السعودية إنه كله الشعبة غشاشات ما عدا ثنتين أو ثلاث << وكانوا من الشواذ عن القاعدة
    طبعا لكل قاعدة شواذ << والي ما تغش أو تغشش هذي شاذة عن القاعدة والله يعينها ع النظرات بعد الاختبار وعلى ذب الحكي عليها إنها نجسة و أنانية وحرام عليها بعد ..!!

    والنتيجة يتخرجون من الجامعة وهم في وادي ودراستهم في وادي ..! و المشكلة يتوظفون بعدين و يدرسون الطلبة غلط ..! لأنهم أساسا فاهمين غلط ..!

    وصار الغش أمر جداً عادي و طبيعي حتى وصل معهم لمقر بعثتهم وخاواهم على مقاعد اختباراتهم .. والله عيب !!

    يعني ممكن أسأل عن طريقة الأسئلة .. لكن أعتمد على هذي الأسئلة ولا أذاكر المنهج أبدا .. صعب جداً !!

    المشكلة ليست في الغش .. المشكلة بل المعضلة الحقيقية في تهوين الغش على إنه أمر هين ..!!

    ممكن تتغير هذي العادة إذا تغير تفكير الجيل الجديد ..
    يعني يصير الوالدين يعلمون عيالهم يتجنبون الغش .. ويحسسونهم بالمسؤولية تجاه دروسهم .. وإن الواحد فيهم ما يدخل الاختبار إلا وهو مذاكر المنهج كامل
    .... بالتالي ما راح يضطرون للغش نهائيا ... وبيكبرون وعندهم مسؤولية وراح ينقلون المسؤولية لعيالهم ... وهلم جرا
    الين تتنظف العقول وتشفى النفوس من مرض الغش

    الحمد لله الذي عافانا مما ابتلاهم به وفضلنا على كثير من خلقه تفضيلا ..

    شكرًا لك أخ ابن بيت آل هليلة على الخاطرة المنتشرة لعل الأخوان الي يتصفون ب هذي الصفة يدركون ويعرفون مصلحتهم وهدفهم الحقيقي من الغربة والدراسة من أجل الدراسة .

    في أمان الله '''
    7 "
ADs

قم بتسجيل دخولك للمنتدي او

الانضمام لمبتعث

Search Engine Optimization by vBSEO ©2011, Crawlability, Inc.