الأعضاء الإشتراك و التسجيل

الملتقيات
ADs

كم فيه سعودي بالمعهد؟ هل السعوديين كثير؟ لما هذا هو اكثر سؤال متداول؟!!

كم فيه سعودي بالمعهد؟ هل السعوديين كثير؟ لما هذا هو اكثر سؤال متداول؟!!


NOTICE

تنبيه: هذا الموضوع قديم. تم طرحه قبل 1662 يوم مضى, قد يكون هناك ردود جديدة هي من سببت رفع الموضوع!

قائمة الأعضاء الموسومين في هذا الموضوع

  1. الصورة الرمزية FAHAD ALTAMIMI
    FAHAD ALTAMIMI

    مبتعث مستجد Freshman Member

    FAHAD ALTAMIMI الولايات المتحدة الأمريكية

    FAHAD ALTAMIMI , ذكر. مبتعث مستجد Freshman Member. من السعودية , مبتعث فى الولايات المتحدة الأمريكية , تخصصى Financial , بجامعة California State University Bakersfield
    • California State University Bakersfield
    • Financial
    • ذكر
    • Bakersfield, CA
    • السعودية
    • Aug 2012
    المزيدl

    July 1st, 2013, 12:05 AM

    السلام عليكم ورحمة الله وبركاته ..

    انا مبتعث في أمريكا منذ ما يقارب 3 شهور .. قبل أجي وبعد ما جيت اسمع هذا السؤال " فيه سعوديين ؟" "كم سعودي فيه" خصوصا لطلاب اللغة.

    ليش حنا مانبي بعض؟!! ليش حنا مب مثل شرق اسيا مثل اللاتينوز او الاوروبيين كلهم يجتمعون ويساعدون بعض ويحبون بعض ؟؟

    طيب حنا مانبي سعوديين والسعوديين ما يبوننا .. ما نسأل انفسنا ليش؟؟ وش نسوي لبعض حنا؟

    للأسف انا الاحظ أكثر شيء منتشر هنا "الحسد" والتقليل من الغير.. هاجس أغلب السعوديين للأسف بعيدا عن الدراسة!!

    هلا نظرنا بأنفسنا شوي .. نعدل نظرتنا بأنفسنا قبل نتساءل ليش الناس تناظرنا بنظرة غريبة !!

    اتمنى اشوف قروب سعوديين كذا وهم يتعلمون لغة يتكلمون بالانقليزي .. اتمنى انهم دايم مجتمعين على خير ... يساعدون بعض .. ويتركوون الحسد والمقارانات اللي مالها داعي

    كلامي كله لا يعني ان مافيه ناس كويسة .. لا فيه شريحة ممتازة ولكن بكل صراحة وللأسف هم قلة قليلة .


    اسأل الله لكم التوفيق في الدارين.
  2. والله معه حق
    ومعه ستين الف حق

    مريت بتجارب لا تعد ولا تحصى

    خصوصا فئه الحريم لما أمر بمكان لا سلام ولا شئ كنهم شايفين يهودي

    والله وهذاني احلف اني اكره نفسي لا شفت أمريكي كافر مايعرف الشرعيه يبتسم بوجهك ويقولك صباح وحنا يالمسلمين نناظر من تحت لتحت .

    انا بغض النظر عن الديانة ، التوجه هذا مطلوب بدينا الإسلامي ( الابتسامة بوجه أخيك صدقه) قلت منب مبتسمه بس على الأقل لما أشوف عربي اقول السلام عليكم ، بس عشان ارضي ربي وضميري.

    قطعت على نفسي وعد اني القي تحيه الإسلام بدل " قود مورننق" حقتهم ونفذت لكن صراحه لااااااااااااااا تعلييييييييييق
    اركب الترين أشوف المحجبة جالسه أقولها السلام عليكم ، ترز الجوال بوجها يعنني ماسمعت
    طيب مب مشكله لا تردين اصلا عادي !

    ترا منب ميته اذا مارديتي وترا مابي أتعرف عليك ولا ابي مصلحه ترا كل الموضوع أننا مسلمين بس.


    لكن الأدهى والأمر !

    اني اجلس بحديقه يركض فيها الخيل ، وتجي سعوديه ببزرانها وتشوفني قاعده تقوم تكشر وتدق على خوياتها وتقول " خلونا نشوف مكان ثاني ؟ "
    وأقسم بالله ماكان بالحديقة مخلوق غيري حسيت فيني عنقز ولا شئ لدرجه انها غيرت المكان كله لاني قاعده

    وبعد فتره شفتها مع مجموعه جالسه بنفس الحديقة وكان فيه كم عائله امريكيه حوالينهم

    عاد انا يوم شفت الدعوة كذا قلت انا أوريها وانزل واقعد جنبهم كذااااا بسسسسسسس تنكييييييييييييد
    7 "
  3. ههههههه آنسة هيفاء تعجبني ردودك دايما لا شفتها أقراها سطر سطر
    .
    .
    المهم
    في الغالب أن الاهتمام بوجود السعودين يكون في مرحلة المعهد يعني ما نشوف أحد يسأل اذا الجامعة الفلانية مليانة سعودين أو لا لأن مثل ماقال الأخ Biomedical Eng اذا لقينا بعض مستحيل نتكلم انجليزي وهادا عن تجربة شخصية.
    أما لما نجي للسكن فتلاقي السعودين يدوروا على بعض ومااااشاء الله السعودية فاتحة فرع بكل دولة

    بس كمان أبغى أقول شيء يمكن تقولوا عباطة لكن من جد كثير سعوديات اللي تكون طالعة مع زوجها ابتعاث وخصوصا اللي فاضية ما تدرس عندها وسواس قهري أن كل البنات ميتين على زوجها ، أصلا ضافت الدنيا ماعاد باقي غير ذا اللي يركض وراه كوم لحم
    والله كش عليكي وعليه
    عاد تصدقون
    أنننننننننننبسط لا شفتها تغلي هههه
    7 "
  4. وعليكم السلام ورحمة الله وبركاته
    بالنسبه لي المسأله مو مسألة انه سعودي وما ابغى امشي معاه طبعاً اغلب طلاب المعهد اللي بالجامعه مايواطنوني لكن طلاب الجامعه يعرفوني ونسولف مع بعض دايم
    انا شخص احب اقعد بالشقه كثير يعني ماحب اروح وااجي واجمع ناس عندي بالشقه
    علشان كذا اسلم وبس ماحب اسولف مع الشخص اللي قدامي اذا كنت ما اعرفه علشان مايقول لي تعال لشقتي واذا رحت له لشقته بيجي لشقتي
    ونبدا نسهر ونفلها
    اول شي خل يعرف نظامي بعدين حياه الله

    فيه اشياء كثيره تخليهم كذا يكرهون بعض
    يعني فيه شباب تحب تشرب ولا يحبون يجلسون مع ناس ماتشرب
    فيه شباب تحشش ويبغون دايم يصيرون مرتفعين والصراحه هم افل ناس خخ لان كل النكت عليهم
    فيه بعض الشباب يترك كل السعوديين ويتبرى منهم لانه صاحب له بنت
    فيه بعضهم يحس ان السعودديين يبغون يتمصلحون معه وهو ماعنده ماعند جدتي
    فيه بعضهم عاقل جداً وهو من النادرين

    وفيه ملاحظات كثيره على الشباب السعودي بعد
    اذا سمعت سواليف صراخ وبمكان غلط تعرف انهم سعوديين
    اذا شفت عشرين واحد يدخنون اعرف انهم سعوديين
    اذا فيه واحد دافور ولا غششهم يخربون سمعته
    يتجمعون كل يوم كأن مافيه وقت للدراسه او انهم جايين سواح مو طلاب


    انا ما اكره السعوديين ولا ادور عن مكان مافيه سعوديين لكن ماحب اني ادخل مع الشخص ويصير يمون علي وانا ماعرفته الا من عشر دقايق
    علشان كذا احاول اني ما اكثر السوالف
    7 "
  5. هذي عقده ما اعتقد راح تنحل لان اسباب كثيره مو كل اللي يتعلمون الغه جادين وهذه الواقع
    حتى الدليل لمن تشوف الطالب يلتحق بالبعثه تلاقيه دارس على حسابه سته اشهر او اكثر ولغته لسى سيئه!! وبالاضافه تجيه البعثه ويدرس سنه ونفس الشي ولمن يجي بوقت الضيق
    والملحقيه توقف عنه الراتب ويبقى له سته اشهر فقط تلاقيه يحاول بكل شي حتى الطرق الغير صحيحه..

    اما للاخوات اللي يقولون البنات يتصددون عنها انا مالي دخل لان انا شاب لكن كانت اختي تكلمني من الجانب هذه ولاحظت هذي الاشياء وتقول الاسباب للاسف في بعض البنات المبتعثات فالينها يعني لا حجاب ولا شي
    وانت لازم تعرف انك مسلمه وتمثلين الاسلام...! انا ما اقول انه فيك هذه الشي لكن هذه المشاكل اللي سمعتها من اختي معي مبتعثه

    وغير كذا انا انحطيت بموقف محرج اذكر معنا مدرسه لغه امريكيه تجي تسألني لمن تناظر بنت سعوديه لابسه حجاب كامل! وحده ثانيه كاشفه وماخذتها فله
    فتقولي ليه مو انتم عندكم نظام البنت تتغطى وهذه الاسلام!! والله اني ماعرف وش اجاوب وهي صحيحه .. لازم كلنا شباب وبنات صح الغلط والسيئات نسويها بينا وبين الله راح يحاسبنا لكن لاتنسى انه فيه غير
    مسلمين جالسين يتصيدون علينا الزله ويتصيدون الشي علشان يقولون هذه الاسلام غريب!
    7 "
  6. انا الحمدلله بحجابي وستري وثقتي بنفسي وبالله اقوى من كل شي

    بس مادري وش سر التصدد والتكشر والنظرات من تحت لتحت.

    يعني لو فيني شي يستاهل هذا كله كان مافتحت خشتي كان سديته وسكت ، وبعدين ولنفرض فيني شي طيب من باب أولى ينصحوني صح ولا لا؟
    مب اشلم عليهم يشكرون بوجهي !

    ولا نبي الامريكان يسلمون بعد

    الدين المعامله قبل كل شي ،

    انا ما اقول اني معصومه عن الخطآ بس فعلا يمكن فيني شي غلط بس انا مب داريه عنه واستاهل احد ينصحني بكون شاكره له اما ذا الاسلوب ابدا ما ينفع

    اقولك موقف ركز معي

    ذاك اليوم صحيت الصباح بدري مره تقريبا الساعه ٧ الصباح جهزت لي صحن كورن فليكس وجلست اكل فيه عند شباك البلكونه ،
    فجأه اشوف ذيك البنت المحجبه تمشي وتقطع الشارع وتجلس بكرسي حق انتظار الباصات

    انا جلست جواتي ادعي لها اقول ياحليلها بالجامعه شكلها وقايمه من الصبح شكل عندها اختبار الله يعينها يعني كرف كلنا هنا نكرف

    فجآه اشوف البنت تتلفت يمين يسااار ، يسااار يمين ، يمين يساااار يساااار يمين ، قلت وش السالفه وش فيه حوالينها ليه تتلفت

    شوي الا اشوفها دخلت يدها جوا الشنطه وطلعت شي واشوف بخار يطلع من فمهااااا ، اثاري البنت تدخخخن وتشيك حوالينها هل فيه احد يصيدها ولا لا .

    انا كل الي حسيته اني اشفق عليها وبس ، لكن مرت الايام ومرت وربي يجمعني فيها عند محطه الترين

    انا توني جايه للمحطه واشوفها واقفه تنتظر ، واجلس اقول بنفسي هذي نفس البنت ، فرصتي انصحهاااا حقها علي النصح وبس .

    لكن ربي ماكتب اني اكلمها لان الترين حقها جا بدري وركبت ومشت وانا تريني باتجاه ثاني.

    وبس

    انا ادري اني يمكن اتهزأ لو نصحتها بس ولو انصح ماقعد اكشر وامد بوز واتصدد واناظرها من فوق لتحت .

    محد معصوم عن الخطأ.
    7 "
  7. ألناس اجناس .. ولكل شخص عذره ..

    كثرة السعوديين بالمعاهد يعني كثرة المشاكل فيها ! وايضا كثرة السعوديين بالمعاهد .. تعني كثرة الغش و قلة التعليم والاجتهاد .. والنتيجه .. يتخرج بلغة اقل من المتوسطه !

    شخصيا انا مادرست بالمعهد لكن كنت اعرف سعوديين كثير بالمعهد .. واسمع بسوالفهم وامورهم بالمعهد ..
    واحيانا اشوف ناس تشتكي من الدكاتره وكيف هم متشددين نوعا ما معهم .. وانا بصراحه على معرفتي فيهم ..
    اشوف ان هالامور كلها من مصلحتهم .. ومعاملة الدكاتره بالتشديد هذا بسبب السعوديين نفسهم .. لانهم ينقلون من بعض ولا احد يقدم شي من مجهوده !

    السعوديين بكل مكان .. ولكن المشكله انهم على حسب ماشفت مسووين احزاب !
    والحزب اللي مثلا تكون معهم .. الحزب الثاني مايجونك او يمرونك لان بينهم مشاكل من الفين سنه ههههه

    غير هذا .. سكن كله سعوديين .. غالبيته تكون مشاكل ! ...

    كنت اجتمع مع اصحاب في كل ويك اند يجتمعون يسوون عشا وجمعه وسوالف ووناسه ..
    وبصراحه .. كل ويك اند السكن حقهم تصير فيه مشاكل ! ماني عارف وش سالفتهم ..
    لدرجة ان مره من المرات وصلت الى شرطة السكن .. ودخلت بالسالفه وانا مالي شغل بالموضوع ! ولا حتى اعرف اسم راعي المشكله ههه

    والمشكله كلهم صغار بالسن .. واذا نصحتهم قالولي "ومن انت يوم تنصح ؟ ". . وكأنهم تناسوا ان الدين دين نصح !

    واخر مره اللي خلاني اقاطعهم .. صارت مشكله ودخلت فيها افرق بينهم .. بس بصراحه هههه انا الغلطان لان الطق كله جا علي هههه
    قالوا اترك القراده لايجيك اللي اقرد منك ! ..

    فانا تجنبتهم بس ابتعد من المشاكل لا اكثر ..

    حتى السكن .. نقلت بسكن مافيه الا عوائل امريكيه والعزاب فيه قليلين .. غالي شوي لكن مرتاح فيه لا مشاكل ولا هم يحزنون ..
    وقعدت في هالسكن سنتين .. ولا واجهت اي مشاكل فيه لله الحمد ..
    وقبل تقريبا ست شهور .. فتحوا السكن للسعوديين .. واللحين السكن نصه سعوديين .. وصار السكن مايرحمنا ..
    اذكر اذا تاخرت بس اسبوع عن السداد يسمحون لي .. اللحين .. والله بس يعدي كم ساعه على التاخير مايقبلون الشيك يقولون ادفع 69$ ضريبة تأخير !
    (يعني قالولي مثلا تاريخ 5 من كل شهر الساعه 5 العصر اخر موعد للسداد .. لو اجيهم في تاريخ 5 الساعه 6 مايقبلون الشيك ! .. )

    قلت وشذا الحظ ..


    بصراحه انا ماعندي مشكله لو اقعد مع السعوديين .. لكن ودي بناس عاقله مالها بالمشاكل والخرابيط الزايده ..
    او اسلم عليهم او حتى اشوفهم .. بالعكس استانس والله لما اشوفهم واستانس لو حلوا في محلي .. وابرك الساعات والله ..

    لكن هي كذا الدنيا مقلوبه ههههه

    احلى شي بالسعوديين شغله وحده وبكل صراحه ..
    اذا جا وقت الصلاه وقلت لهم يالله يا اخوان صلاه .. كلهم تناقزوا يتووضون ويصلوون ! حتى لو ماهم مواضبين على الصلاه .. على الاقل يصلون !
    يعني فيهم الخير .. لكن غرتهم الدنيا ! .. ويحتاجون بس رفقه صالحه ..!




    اسال الله لنا ولهم الهدايه والثبات والتوفيق والسداد .. ويحفظنا واياهم من كل الشرور ويقر اعيننا باهالينا يارب العالمين ..
    7 "
  8. المشاركة الأصلية كتبت بواسطة "عبدالعزيز"
    وتقول الاسباب للاسف في بعض البنات المبتعثات فالينها يعني لا حجاب ولا شي
    وانت لازم تعرف انك مسلمه وتمثلين الاسلام...! انا ما اقول انه فيك هذه الشي لكن هذه المشاكل اللي سمعتها من اختي معي مبتعثه

    وغير كذا انا انحطيت بموقف محرج اذكر معنا مدرسه لغه امريكيه تجي تسألني لمن تناظر بنت سعوديه لابسه حجاب كامل! وحده ثانيه كاشفه وماخذتها فله
    فتقولي ليه مو انتم عندكم نظام البنت تتغطى وهذه الاسلام!! والله اني ماعرف وش اجاوب وهي صحيحه .. لازم كلنا شباب وبنات صح الغلط والسيئات نسويها بينا وبين الله راح يحاسبنا لكن لاتنسى انه فيه غير
    مسلمين جالسين يتصيدون علينا الزله ويتصيدون الشي علشان يقولون هذه الاسلام غريب!
    هذا سبب من أسباب
    بس ودي أقول شيء
    أنا الحمدلله محجبة حجاب معتدل وللأسف لما أصادف سعوديات غير محجبات وفالينها بروحهم خارج المملكة يطالعوني باستهجان كأني وصمة عار عليهم

    أما بالنسبة للموقف اللي أحرجك، أنا صارلي مثله في الجامعة هنا، كانت الاستاذة البريطانية جالسة تتصل على مكتب حجوزات وحطوها انتظار وطبعا في موسيقى جتني مستغربة جدا وتقولي مو الموسيقى حرام ؟ طيب كيف هدول حاطين موسيقى وعلى قولتها
    an enjoyable music
    وكانت فرصة جيدة عشان أوضح لها أن الموسيقى صحيح حرام بديننا لكن الناس تختلف في قوة الإيمان
    نفس الشيء عندهم، في ناس متدينة وتروح الكنيسة كل أحد وعندهم عقيدة ومبدءة واحتشام وناس عايشة عيشة بوهيمية
    يعني لازم نفهمهم لأن للأسف الإعلام ينقل صورة مضللة على كل الأصعدة يعني تخيلوا استاذة كندية كانت تقول لنا : أنا قبل أجي السعودية كنت أحسب السعوديات مالهم حق يتعلموا ولا يطلع لهم صوت حتى الكلام ما يقدروا يتكلموا وبعد ما جيت وشفت الطالبات و الدكتورات وشفت حرصكم على التعليم وقوة الشخصية اللي عند المرأة السعودية تأكدت أن الاعلام ما ينقل غير الصور الخاطئة..
    والله المستعان <<< هادي من عندي مو الاستاذة الكندية
    7 "
ADs

قم بتسجيل دخولك للمنتدي او

الانضمام لمبتعث

Search Engine Optimization by vBSEO ©2011, Crawlability, Inc.