[حلول مبتعث] النظـافه .. مشـاكل وحلول ....!

July 8th, 2013, 09:12 AM

بسم الله الرحمن الرحيم ..

اولا أحب أن اهنئكم بهذا الشهر الفضيل .. والله يجعلنا واياكم من صيامه وقيامه ...


سبق وطرحت موضوع : [بديـل مبتعث]
وكان بداية لمعلومات وحلول لمشاكل وبدائل مختلفه في حياة المبتعث اليومية ..

واليوم حبيت اطرح هذا الموضوع .. وحبيت اتكلم عن النظافه وادوات النظافه الخاصه وايش المنتجات الافضل في هذا المجال ..
لان كما تعرفون .. منتجات النظافه بالاسواق كثيره .. ولكن يبقى السؤال .. ايش افضلها ؟

ومن هذا المنطلق .. أحببت أن اكمل ما بدأته .. واخصص هذا الموضوع عن النظافه بشكل عام ..

فمن منا لايحب النظافه ولا يهتم بها .. بل إن ديننا دين نظافه .. .!

وأعرف ان الكثيرين من الممكن أن يخجلوا للتطرق بهذه الامور ..! ولا يحب ذكرها ..

فلذلك دعونا نبدأ بالموضوع ..



اولا المطبخ وغسيل الصحون :
من اهم الامور في المطبخ هو غسيل الصحون .. والصابون المستخدم في غسيل الصحون له انواع كثيره ..
ومن افضل هذه الانواع صابون Dawn


صابون Dawn من افضل المنتجات في هذا المجال .. وهو يعادل كفائة "صابون فيـري" في السعودية ..

هذا لو كنت تقوم بتنظيف الصحون بالطريقة التقليدية ...

اما لو كنت تستخدم الـ Dishes Washer (غسالة المواعين) ..

فهنالك نوعين من الصابون وتعتبر افضلها بامريكا ..

هنالك Cascade :


وايضا Finish:


الشركتين ممتازه كلها بنفس الكفائه .. ومن الممكن سبق وشاهدتم بعض الدعايات التي قد تقنع مشاهدها بافضلية المنتج عن الاخر .. ولكن في الحقيقه .. كلها بنفس الكفائه واي منهما يفي بالغرض ...

وطبعا كل منهما لهم انواع من الصابون .. ففيه مكعبات وفيه سائل ...
والافضل اختيار المكعبات .. لانها تكون افضل من السائل بسبب التركيبه الممزوجه ..



هذا من ناحية الصابون ..

اما من ناحية استخدام سلك المواعين (سلك نحاس) ... فتسمى Scrubber ...
وفيه نوعين منها النحاس .. ومنها البلاستك ...

البلاستيك :


النحاس :



طبعا الافضل تستخدمون البلاستيك .. مثل النحاس ولكن اخف على الصحون من النحاس .. فلا يسبب خدوش على المواعين ..


نصيحه: دائما اغسل الصحن بعد الانتهاء منه .. لاتخليه لليوم الثاني حتى ماتتنشف عليه بقايا الاكل وتصير يحتاج لها دعك .. وغير هذا راح يصير بالبيت ريحة زفر وتجمع عليه الحشرات .. لان النمل مايجي الا على ريح الدسم : ) ...

اذا كنت تبي تغسل مثلا الصحون ثاني يوم .. على الاقل افتح عليه الماء واغسلها بالماء وحط عليها صابون واترك الماء يصب عليها لدقيقه ثم بعدها سكر الماء وارجع ثاني يوم واغسلها .. كذا بيكون الصابون مغطي على الزفر ..



واذا كنت بتستخدم غسالة الصحون .. لازم تغسل الصحون اول شي بالماء .. واذا كان فيه بقع ماراحت بالماء .. افركها بيدك لحتى تروح .. ثم حطها بمغسلة الصحون ..
لان بعض البقع اللي تكون بالصحون ماتروح الا بالدعك .. وغسالة الصحون ماتغسل هذه البقع .. !





ثانيا: منظفات المنزل :

منظفات المنزل كثيره .. وكل منها يختص بأمر معين ...

فلو كنا نريد منظفات لكل الاسطح (القزاز - والطاولات بجميع انواعها) فافضل حل هو استخدام منظفات الـ Windex
الويندكس يأتي بعدة انواع .. فيه منها اللي متخصص لاسطح معينه مثل القزاز .. وفيه منها اللي متخصص بجميع الاسطح All Purpose Cleaner..
والافضل ان نستخدم المتخصص بجميع الاسطح .. وعادة مايكون عليه اسم MutliSurface.

وطبعا هنالك انواع منها .. ولكن الافضليه تكون للانواع اللي تكون مضاده للبكتيريا Anti-Bacterial ..

وهذا النوع اللي افضله :
Windex Antibacterial MultiSurface



ايضا هنالك الكلوريكس .. وهو نوع معروف بالتنظيف .. وله عدة منتجات ..
من احد منتجاته هو مناديل كلوريكس .. وهي ممتازه للاستخدام ..



وانا اجدها جدا ممتازه في التنظيف ...

اما عن تنظيف الارضيات ... فإذا كنت تبحث عن منظف لارضية "سراميك" ..
ففيه Swiffer ..

السويفر فيه نوعين .. نوع يكون يعتمد على المناديل المببله Swiffer Sweeper .. ويكون لون العصا حقته اخضر ..
ونوع يعتمد على علبة فيها سائل التنظيف Wet-Jet .. واللي عليك ترش وتنظيف بالمناديل الناشفه ... ويكون لونها بنفسجي ..
وانواع اخرى جديده .. مثل اللي تكون فيها مكنسه كهربائيه وغيرها .. وهذي ماتلزمنا .. لانها شوي غاليه ..

ولكن طبعا كلها تفي بالغرض .. واي منها يعجبك تقدر تستخدمه ..

بالنسبه لي افضل النوع الاخضر اللي يعتمد على المناديل المببله .. اشتري مناديل مبلله (علبه من 24 حبه) ..
وامسح الارضيه .. واذا خلصت منها اقطها .. واستخدم جديده ... وعلى هذا الحال ..

والارضيه تنشف في غضون دقايق يعني ماتطول ...

طبعا مناديل الـ Swiffer Sweeper فيها نوعين .. فيه المبلل .. وفيه الجاف (لتجفيف الارضيه) ..

من اذا كنت تبي تستخدمها على الارضيه .. لازم بعد ماتمسح الارضيه .. ترش الارضيه بماء وتستخدم المناديل المجففه حتى تجفف الارضيه ..

ايضا من منتجات الـ Swiffer .. فيه فرشة الغبار .. وهي جدا ممتازه .. خصوصا للي يتحسس من الغبار مثلي : ( ...
ولها انواع كثيره .. واي نوع ايضا يفي بالغرض ...


أما عن تظيف الاقمشه والسجاد .. فافضل نوع للتنظيف هو منتج Resolve .. وله عدة انواع .. منه البخاخ ومنه البودره وغيره ..
واللي عليك تستخدم اللي يعجبك ..


وبالنسبه لصابون اليدين .. فانصحكم باستخدام Dial وابحثوا عن Anti-Bacterial (مضاد للبكتيريا) ..




ثالثا: دورة المياه ( اعزكم الله ) ...

تنظيف دورة المياه من اهم الامور بالمنزل ..

وهنالك منظفات كثيره .. وراح ابين لكم كل منظف لكل شغله ..

لتنظيف المغسله والبانيو Bath Tube .. استخدموا Kaboom :


رائحته شوي قويه .. لذلك انصحكم بانكم تغطون خشومكم ...
بس قوي بالتنظيف .. وسهل الاستخدام ...


اما عن التواليت .. فالافضل نستخدم Clorox :


وافضل طريقه باستخدامه هو اننا نصبه داخل التواليت قبل النوم ونسكر التواليت ونتركه وثاني يوم نسوي Flush للتواليت ..



هذا بالنسبه للمنظفات ...

اما بالنسبه للوضوء .. ولمن يبحث عن شطاف ..

ففيه حلين ..

الحل الاول هو شراء الشطاف عن طريق eBay وله عدة انواع .. وهذا احدها ...
White Hand Held Diaper Sprayer Shattaf Bidet | eBay

هذا الحل لمن هم بولايات الغير بارده ...
اما الولايات البارده .. فانصح ان يستخدمون جالون رشاش ماء ويسمونه Hand Pump Pressure Sprayer .. مثل هذا :
1 Gal Hand Pump Pressure Sprayer | eBay

علشان يقدرون يعبونه ماء دافي ... لان بامريكا نظام تقسيم الماء يختلف عن اللي بالسعودية ..
فالماء الحار مايوجد الا فقط بالشاور و المغاسل .. والغسالات فقط ! باقي الماء بالبيت بارد ! ..

علشان كذا لو استخدمنا الشطاف الاول في الولايات البارده .. الماء بيكون بارد وصعب الاستخدام ... اما لو استخدمناه بالولايات الدافيه فالماء راح تكون برودته عاديه ...



اما عن الشاور .. فطبعا كلنا نعرف ان الماء بامريكا مخلوط فيه مادة الكلورين .. وهذي الماده لها سلبيات كثيره على اجسامنا منها تساقط الشعر وحرقة بالعين واحمرار البشره وظهور حبوب على الجسم .. وحكه دائمه بالجسم .. وغيرها من الاعراض اللي يتحسس منها الجسم من مادة الكلور ..

فافضل حل لهذه المشكله هو شراء فلتر للشاور .. وهذا الفلتر راح ينظف لك الماء من الكلور وبقية الاوساخ اللي تكون بالماء ..

وافضل فلتر استخدمته ولازلت استخدمه هذا :
Rainshow'r CQ-1000-MS Shower Filter with Massaging Shower Head - Amazon.com

تركيبه سهل .. وتغيير الفلتر يكون على حسب الاستخدام ....
فإذا كان الاستخدام لشخص او لشخصين بمعدل مرتين او ثلاث مرات باليوم .. يكون التغيير كل تسع شهور مره ..
اما لو كان فيه اكثر من شخص .. فالافضل يتم تغييره كل ست شهور مره .! (تغيير الفلتر فقط ..)..


رابعا : النظافه الشخصيه ...

طبعا من منا ماجرب يستخدم شامبوات كثيره بانواع مختلفه ..

لكن الاهم .. ايش الافضل ؟!

فيه انواع جيده .. وفيه انواع ممتازه ..

ولكن كتجربه شخصيه .. فيه ثلاث انواع ممتازه ..
الاول : Garnier Fructis


والثاني : TreSemme


والثالث : Dove


وكلها ممتازه .. والافضل ان الواحد يغير كل فتره بين هالثلاثه .. حتى يبقى شعرك اكثر اشراقا وجمالا <- ماتحسون انه متاثر من الدعايات ...



اما بالنسبه للصابون الجسم .. فانا انصح ان الواحد يبتعد عن الصابون المعطر او اللي فيه ريحة عطور .. والسبب ان اللي بالسوبرماركت عادة تكون عطور كيميائيه غير صحيه للجسم .. فبالتالي لو استخدمها صارت فوق البشره وصكرت المسامات .. ومع الوقت راح يصير الجسم يفرز روائح ..
فإذا كنت تبي تستخدم صابون للجسم بروائح عطريه .. لابد أنك تستخدم مستحضرات طبيعيه مثل اللي عند بودي شوب .. ولابد للشخص انه ماينام الا وهو ماخذ شاور ... حتى مايختلط العطر مع العرق بالجسم ويسكر المسمات .. يعني الامور هذي لابد للشخص انه ينتبهه لها ..

الكلام ينطبق ايضا على بخاخ الجسم .. (هذي احد اسباب المناطق السودا للمعلومية) ..
ولكن اذا كنت تبي تستخدم بخاخ الجسم .. استخدمه قبل الشاور .. وبعدها اخذ شاور .. بيبقى ريحته على جسمك لكن راح يكون افضل من انك تبخ على الجسم بعد الشاور ...

أو .. استخدم بخاخ الجسم على الملابس بدل جسمك .. وبيصير وضعك ميه ميه ..!


خامسا : غسيل الملابس ! ..

اذا كنت تستخدم غسالة .. فمن المؤكد انك تواجهه بعض المشاكل بغسيل الملابس ..

اذا كان الشخص يبي يغسل الملابس .. فلابد انه يستخدم مزيج من المنظفات ... لان هنا منظفاتهم مادري وش تبي بصراحه مهما غسلت مستحيل تنظف !

واحيانا بعض الملابس مهما غسلتها تكون فيها ريحه .. والريحه هذي ماتروح بالمنظفات العاديه .. سبب الريحه يكون من تراكم الباكتيريا على الملابس مع مرور الوقت .. والمنظفات العاديه ماتقتل هذه الباكتيريا .. فبالتالي يصير في الملابس ريحه مو كويسه ! وكل ماطولت هذه الملابس كل ماصارت الريحه اقوى !

ايضا بعض المنظفات تكون مخصصه لاوضاع معينه .. مثلا منظفات للغسيل في الماء البارد .. ومنظفات للغسيل في الغسالات الجديده .. وغيرها !

مو مثل عندنا بالسعوديه .. تايد وكلوريكس وترجع ملابسك جديده !


فعلشان تنهي هذا الموضوع .. لابد تكون المنظفات التاليه عندك :

- Clorox : فيه نوعين واحد للملابس البيضا وواحد للملونه .. لابد الاثنين يكونون عندكم .

- Tide : اذا كنت تملك غسالات من النوع الجديد .. فابحث على العبوه عن كلمة High Efficiency Machines .. وراح تلاقي صورة غساله جديده عليها ..
اما اذا كنت تملك غسالات من الطراز القديم ... فأبحث عن اي عبوه مايكون عليها كلمة High Efficiency Machines ..
وايضا اذا كنت تغسل بالماء البارد .. لابد تستخدم النوع اللي مخصص للماء البارد راح تلاقي اسمه For Cold Water ...


- Baking Soda : هذا يستخدم في كل شي بالتنظيف .. سواء ملابس او بالبيت عموما .. قوي جدا في التنظيف .. ويقتل الباكتيريا المسببه للروائح في الملابس .. واقوى من الكلوريكس ..



طبعا طريقة الغسيل .. لازم تخلط الثلاثه هذي كلها .. وتضيف عليها اي منتج للتعطير الملابس مثل داوني او غيره .. وتغسل بماء حار مو بارد !
وبهالطريقه ترجع الملابس كما كانت ..

وبالنسبه للملابس اللي يكون فيها ريحه ... اذا حسيت ان فيه باقي ريحه في الملابس .. قطها مره ثانيه واغسلها وزود العيار بالبيكنج سودا (يعني حطيت كاس .. حط كاس ونص ) .. وزيد عليه الماء .. ولا تنسى تعرضها للشمس افضل .. وان شاء الله تروح الريحه ..*


سادسا : المعقمات والباكتيريا وطريقة التخلص منها :

الباكتيريا تعيش في كل مكان حتى على اجسادنا .. ولكن فيه بعض من انواع الباكتيريا تسبب روائح كريهه .. وامراض وماخالف ذلك ..
وتكثر هذه الباكتيريا في الأماكن اللي مايوصلها ماء واللي ماتتنظف وتتعقم بشكل مستمر .. وغالبا هذه الاماكن يصعب التعامل معها مثل الكنبات والسجاد والوسائد !
فغسيلها اشبهه بالمستحيل لان احيانا يمكنك غسيل القماش "مثل تلبيسة المخدات او الكنبات" ولكن يبقى الاسفنج او القطن لايمكن غسيله ..
وهنا تأتي الصعوبه .. فحتى لو غسلنا الأقمشه يبقى القطن والإسفنج .. والتي تبقى فيه الباكتيريا والحشرات الصغيره والتي لاترى بالعين المجرده !

فلذلك .. افضل طريقه لغسيل مثل هذه المناطق هي ان تقوم بنزع الاقمشه وغسيلها بالطريقه الموضحه اعلاه .. ومن ثم تستخدم الخل الابيض والليمون والماء لترشه على الأسفنج او القطن .. ثم تضع الاسفنج او القطن تحت الشمس لمدة لاتقل عن ثلاث ساعات !
وبعد الانتهاء من غسيل الاقمشه تقوم بوضع الاقمشه ايضا تحت الشمس .. حتى تنشف ..
وبهذه الطريقه تكون قد اكملت المهمه .. وستكون الحشرات الصغيره او حتى الباكتيريا ميته .. لان الشمس تقتل الحشرات والباكتيريا التي لا تقدر المنظفات ان تقتلها ..

اما عن الباكتيريا بالجو .. فعليك بإستخدام Lysol Disinfectant Spray وهو بديل عن معقم الجو "ديتول" بالسعودية ..
بإمكانك استخدامه لتعقيم الجو بشكل دائم .. وباذن الله سوف يحد من الامراض التي تنتقل بالجو مثل الانفلونزا وغيرها ..

ايضا احد الحلول بخصوص الوسائد .. بإمكانك أن تستخدم وسائد الريش بدل الإسفنج او القطن ..
لأن وسائد الريش يمكنك غسلها بالطريقه التقليديه .. ومن ثم تنشيفها تحت الشمس حتى تنشف ! ..


نصائح عامه :

- استخدم الماء دائما في تنظيف المنزل .. لان عند استخدامك للمنظفات المضاده للبكتيريا .. تبقى البكتيريا موجوده ولا تروح الا بالماء .. فاستخدم الماء بعد التنظيف ..
- بالنسبه للتواليت .. دائما اجعله مغلق .. ولا يفتح الا فقط للاستخدام ...
- ابواب المنزل لاتجعلها مفتوحه .. وخصوصا باب الحمام .. دائما اتركها مغلقه .. حتى لاتجعلها مدخل للحشرات وكل مالا ترغب به ..! < وايضا هذي من السنه للمعلومية !
- دائما جدد هواء منزلك بفتح النوافذ بالصباح .. حتى يتجدد الهواء .. ولا يصبح منزلك مكتوما فذلك يسبب روائح لا ترغب بها !
- لا تنام الا وانت رامي كيس القمامه .. او على الاقل مطلعها برى البيت .. لاتتركها داخل البيت ...
- القمامه لابد أن يكون لها غطاء .. اجعلها دائما مغلقه .. حتى لاتتجمع الحشرات عليها ! ..

- لصحتك : إذا دخلت المنزل .. قم بغسل يديك ورجليك بالصابون .. او طبق السنه وكن على وضوء بشكل دائم ..!
- لصحتك : ابعد يديك عن اي شيء في الاماكن العامه .. فلا تدري من الممكن أن تكون ملوثه بالامراض بسبب شخص قد لمسها قبلك !
- لصحتك : اذا صافحت "غير مسلم" .. قم بغسل يديك .. فأمريكا لاتعترف بالنظافه الا بالمظهر فقط !
- لصحتك : إبتعد عن إستخدام الحمامات العامه حتى وإن كانت نظيفه .. فالمنظفون لاينظفونها الا باليوم ثلاث مرات ! فهنالك أمور لاتراها بالعين المجرده !
- لصحتك : عندما تصحوا من النوم .. توضأ .. أو قم بأخذ شاور .. وإن أردت النوم .. لا تنام بملابسك ولا تنام الا وانت على وضوء .!


اتمنى اني افدتكم ..
وأي اسأله او إضافات .. راح أكون سعيد برؤيتها ..


اخوكم محمد بن فهد .,


تم التحديث بتاريخ : 7/10/2013 - أول يوم برمضان

• نشر عبر تويتر
• نشر عبر فيسبوك
• نشر عبر جوجل