ازدواجية تعامل الملحقية مع المبتعثين

السلام عليكم ورحمة الله وبركاته

قبل فترة كنت من الناس اللي يقولون الملحقيه ماتنلام على عدد الطلاب اللي هم مسؤلين عنهم
لكن الحين ما اقول الا حسبي الله ونعم الوكيل

اذا تبغى تتوظف في الملحقيه
لازم يكون معك القرين كارد
او الجنسيه الامريكيه
طبعاً غير الشروط التعجيزيه الثانيه
حصولنا كسعوديين على القرين كارد بحكم الوظيفه بالملحقيه امره سهل
لكن المشكله اذا توظفوا سعوديين فاهمين ومتخرجين من جامعات راقيه مايقدرون يتحكمون فيهم مثل مايتحكمون بالاجانب
شروط التوظيف بالملحقيه تعجيزيه وصعبه جداً

انا ما اقول ان الملحقيه كلها تعبانه لان فيها اكثر من موظف يردون عليك بشكل يخليك تقول الحمد لله الدنيا باقي فيها ناس طيبه
لكن هالموظفين حاطينهم في اماكن ماتسمح لهم اصدار اوامر على كيفهم

حالياً انا من اشد الناس ضد الملحقيه الثقافيه والتعليم العالي وطرق تعاملهم مع المبتعثين
ومثل ماذكرت اخوي شخص تمشي اموره وشخص ماتمشي اموره
ماتدري هي مزاجيه او ازدواجيه

مشاكلي معهم كثيره من دون اسباب وانا من الناس اللي يرفع الاوراق اول بأول ولا عندي اي مشاكل مع الجامعه وماشي سيدا
مشرف اللغه وخلصنا منه وجاء بعده المشرف الجامعي اللي بداية كل فصل دراسي لازم هولد والاحق وراه لين يفك الهولد وطبعاً الهولد اللي يجيني هولد عن الراتب وعن التكاليف الدراسيه
وبعد مشاكل مع المشرف ضبطت الامور وصار مافيه مشاكل وامورنا تمام وتصافينا
تم تغيير المشرف الدراسي مره ثانيه والمشرف الجديد مستقعد لي بكل صغيره وكبيره
يوافق على تسجيل المواد وبعدها يلغي الضمان المالي بحكم عدم تسجيل المواد والهولد قبل المكافأه بيوم يجيني وانذارات من الجامعه
وبعد شد واخذ وعطا قدمت شكاوي ورجعت للسعوديه وتم الموافقه على تغيير المشرف بأمر من التعليم العالي
لكن المشكله الاكبر المشرف الجديد صاحب المشرف اللي قبله
والحين كملت اكثر من شهر من الفصل الدراسي والمكافأه موقفه لان عندي هولد والضمان المالي ملغي
السبب اني طلبت تذكرة عوده وانا رجعت لفترة اقل من الفتره اللي رجعوا فيها الشباب اللي معي بالجامعه بالعربي ما فيه سبب يخليه يسوي كذا
لكن لاني شكيت صاحب المشرف بيمرمطني معاه
والاوراق حالياً موقفه بالملحقيه والمشرف الاقليمي مايرد لا على اتصالات ولا على ايميلات
رفعت اكثر من استفسار عن طريق البوابه والرد يجي "For Tickets"
واستفتسر عن طريقة رفع الهولد وطلب الضمان يجني الرد "For Tickets"
اكلم المسؤلين بالملحقيه ما احد يرد ارسل ايميلات
يجيني الرد بأن معاملتي عند المشرف
واشرح لهم بأن المشرف يقول "For Tickets" ولا يرد علي
يحولوني على القسم الفلاني والقسم الفلاني يحولني على قسم ثاني وعلى هالحاله

طبعاً ما تم اخباري ان عندي ايقاف بالصرف او الغاء الضمان المالي من قبل الملحقيه
المكافأه تأخرت علي وجاني اتصال من الجامعه ان الكلاسات ملغيه لاني مادفعت لهم
وبعد ما رحت للجامعه وشرحت لهم وضعي مع المشرف وانه مو اول مره تحصل لي سمحوا لي اني ادفع لهم علشان ماتنلغي الكلاسات

وابقدم نقل من مدينتي لمدينه ثانيه علشان المشاكل مع المشرفين


طريتهم بالتعامل معنا راح تخليهم يندمون في المستقبل
انا سعودي وافتخر واتمنى الخير لوطني من كل قلبي
لكن ليش هذا التعامل من الوطن وغيري قاعد وحاط رجل على رجل ويحذف ويسجل مواد ومعدله نازل ولا عنده اي مشكله
وانا اللي اتعب واجتهد واحاول المحافظه على المعدل تجيني المشاكل

فيه ناس تقول ان هذا مشروع تغريبي
وش المشرع التغريبي اللي فيه يبنى بالطالب كره الدراسه خارج السعوديه
ويقول ليتني بالسعوديه اقلها فيه احترام للي محترم نفسه
صحيح ان بالسعوديه نظام "مش كويس" لكن المعامله اللي كنت اقابلها بالسعوديه افضل من المعامله اللي اقابلها في امريكا
كانت عندي مشكله وحده بالسعوديه فيه دكتور موقف لي بماده ورحت تفاهمت معه وجه لوجه وتقبلني لاني جيته بأسلوب محترم ومقدر للشخص اللي قدامي انه دكتور اكاديمي
لكن بالملحقيه لو تجي بأسلوب او بدون اسلوب وما عندك واسطه ما راح تمشي امورك الا بأمر من الله سبحانه وتعالى

قرار واحد فقط كفيل بأن يحل جميع مشاكل جميع المبتعثين بأمريكا وهو استبدال جميع العرب العاملين فيها بموظفين امريكيين
في هذه الحاله قد يخجل المسؤل من اختلاس القرارات لصالح شخص دون الآخر

لكن طالما نجلا وفاطمه و الما و شلة المهجرين من العرب يعملون في الملحقيه فلا تطمع بالرقى ابداً.

والله ياجماعه انا باختصرها لكم بكلمتين
البشر لو تمسكت بالنظام ما عاش احد ما عندنا إلا النظام الرباني واللي يحصل في الملحقية استثناءات لبعض ظروف الطلاب ولا بد يكون فيه مرونه. واهم شئ ما ظلموك وان ظلموك رجعولك حقك

قال انفخ يا شررريم قال ما من برررطم بذن الله لا حطوني على الشجره العايله اني انا الجد السابع عشر وجات الاجيال القديمه واحد من احفادي راح يفتح موضوع في مبتعث بنفس هل الموضوع عن الملحقيه انا ما ادري ليش شاغلين عمركم في شي عقيم يعمي استانسوا العمر يطوي ونشيب ومشاكل الملحقيه والدواير الحكومه ما تخلص .