تفاصيل رحلتي على الخطوط السعوديه بالطيارات الجديدة لعام 2014 وبعض الفوائد والأخطاء

السلام عليكم ورحمة الله

مساكم / صبحكم ربي ب الرضا والسرور

استفدت من هذا المنتدى الكثير وودي ارد الجميل له ب اي معلومة او فايده افيد فيها رواد هذ الصرح العظيم ..

اليوم بتكلم عن تجربتي وسفرتي ع الخطوط السعوديه

اولا" الموضوع ابغى آخذ راحتي فيه وافصل بالمعلومات واسولف بعد خخخخ

ف يحتاج منكم رواقه وكوب كوفي ولاحليب زنجبيل ولا شاي ومخمخه 😋

طبعا" كانت رحلتي في ١١ ديسمبر من واشنطن الى الرياض دايركت

وبما انها اول تجربه لي ع الخطوط السعوديه جلست ابحث عن مستوى الراحة فيها

وانصدمت من المواضيع والردود الي كانت تسيئ للخطوط السعوديه وخدماتها

شلت هموم الدنيا سفره طويله ودايركت
والحجز مؤكد مايمدي اكنسل ، توكلت ع الله وقلت شوفة الأهل بتنسيني التعب ..

مشيت من مدينتي منسي ب ولاية انديانا بسيارة الى انديانا بوليس عاصمة الولاية وركبت طيران داخلي الى واشنطن
ملف مرفق 30123

ملف مرفق 30124

هاذي الصور من مطار انديانا بوليس مطار جيد ونظيف ومتطور

الطيران الداخلي كان ع الخطوط :



U.s AIrwys

ملف مرفق 30126


ملف مرفق 30125

وهنا ب إنتظار للإعلان عن الرحلة
وسافرت الى واشنطن بحمدلله
ووصلنا مرتاحين وكانت رحلتنا من واشنطن للسعوديه باقي عليها 5 ساعات

ف اقترحت نرتاح ونآكل لنا شي ونتمشى ولاحقين ع البوردينق

لآكن آصر زوجي الا نقطعه ونرتاح

وهنا غلطنا غلطه ماجت ببالنا

جلسنا ندور الخطوط السعوديه عشان نقطع البوردينق تفاجأنا مافيه الا الخطوط الامريكيه

ف بعدها جتنا الصدمة ان لازم نروح لمطار ثاني ..

الحمدلله كان عندنا وقت وماتهاوننا ب الموضوع

آخذنا سوبر شتل

عبارة عن مايكرو باص بس اكبر واوسع
وتقريبا" ماني متذكرة القيمه بالضبط بس اتوقع حسبوا لنا احنا الاثنين ب ٣٩ دولار

وتوكلنا ع الله ع مطار واشنطن دي سي.

وصلنا بحمدلله ضبطنا امورنا وودينا الشنط للشحن ودخلنا ع صالة المسافرين

طبعا" وقتها من الخرعه والتعب مالحقت اصور ..

الحمدلله كانت رحلتنا إقلاع ٨ المساء صلينا وتوكلنا ع الله
ملف مرفق 30127

شاشة وريموت تحكم
مدخل يو اس بي شحنت الآيفون تبعي

تفاجأت

الطائرة كبيرة المقاعد مريحة التكيف ممتاز

الشاشات ممتازة

النظافه ولا اروع

ملف مرفق 30128

وزعوا علينا منيو للأكل

سماعات رأس
حلوى ومناديل معطره عند الإقلاع وصحف سعوديه

محفظة جوارب وفرشاة اسنان وغطآء للعين

اكمل لكم ب الرد الثاني عشان الصور رجاءٍ لاحد يرد الين اخلص الموضوع ب الكامل وبعدها خذوا راحتكم ..


( تمت المشاركة باستخدام تطبيق مبتعث )

وهنا جت وجبة العشاء
ملف مرفق 30129

سمك

ملف مرفق 30130

دجاج 😋
كان الأكل طيب الحمدلله

ملف مرفق 30131

وهنا بعد ماخلصنا وجبة العشاء جاء وقت النووم 😴😴

تقفلت الانوار وبقت الإضاءه الرومانسيه

الي يشرب شاي ، والي نايم ، والي يلعب العاب ، والي يتابع فيلم
😃

الشاي الكوفي متوفر ع مدار الوقت بس يحتاج تنادي المضيفه او تروح لها برضوا فواكة وزعوها وفطاير ب آخر اليل

وزعوا هدايا للأطفال حقائب فيها الوان ودفتر رسم وملحقاتها

تعامل المضيفات ولا اروع مليت من الجلسه رحت اسولف معهم خخخخخخخ ..

ياحليلهم استانسوا علي 😜

طبعا" في مصلى ب الطائرة واتوقع هاذي ميزة طيبه الحمدلله مغلق من الجهتين بستاير

تمنيت اني صورت ب التفصيل لاكن المزاج له دور كبير

جاء وقت الصباح وكان وقت وجبه لاكن الذاكرة شوي مضروبه وماصورت ووصلنا بعدها بحمدلله لمطار الرياض

ملف مرفق 30132

رحلة كانت ممتعه ولله الحمد وصلنا ونشوف الاهالي والحبايب في إنتظار احبابهم

الي يبيكي والي يضحك والي يزغرد ع خفيف ههههههه لووووليييش.

والي معه باقة ورد المشاعر كانت مختلطه اشوف اشكال والوان الكل طالع من الطياره مستانس ومبسوط ❤

انتهت رحلتي من واشنطن الى الرياض ..

ارتحنا يوم وسافرنا اليوم الثاني الى الدمام ❤💜💚💛

ملف مرفق 30133

وهنا حصل لي موقف قوي بعد مانزلت لمطار الملك فهد ب الدمام

شنطة العفش حقتي بغت تروح مني بغمضة عين

حسبي الله ونعم الوكيل في الي مايخاف رب العالمين 😔

السالفه ومافيها طلعت من الطيارة لقيت وحدة ع عربه ومعها رضيع ووراها ٢ بنات صغار

ساعدتها ببنتها الصغيره شلتها ونزلنا للعفش وزوجي فوق ينتظرني

المهم جاء عامل وركب عفشها واطالع شنطتي مو على السير الكهربائي منزله ومعها مجموعة شنط والسير فاضي

توقعت زوجي منزلها لمحتها وجلست اساعد الحرمة ..

والتفت فجأه مالاقيها 😳 واطالع زوجي مو موجود

والا فيه عربه فيها شنط راقيه ومعها شنطتي وعندها ٢ شباب طوال واشكالهم مريبه وماتريح

واجي عنده قلت هاذي الشنطه لكم ..؟

قال ايه ايه لنا <~ وبكل ثقه يتكلم ..

قلت متأكد ؟

قال ايه وين وين مدري وشو فيه رقم العفش او زي كذا <~مدري وش طلب ب الضبط

واطالع ب الشنطة الا فيه استكر ماشلته من السفرة الاولى

انا شبهه مصدقتهم من شدة الثقه الزايده

قلت طيب معليش ابي افتحها اتأكد ....!!!

وبكل ثقه وبرود قال افتحيها وفتحتها وطلعت له حلاو الكريسمس

قلت شنطتي هاذي ..

ويأشر ع الي معه قال هذا بغى يوهقنا اعمى مايشوف 😣

وبسرعة البرق اختفوا عن الأنظااار

الصاله الي فيها العفش للأسف مافيها اي موظف اقدر ابلغه

مافيها الا المصباح وعدة مقاهي

المكان اتوقع غير مراقب بكاميرات

بغيت اقدم شكوى واطلع فوق عشان غيري مايتضرر لاكن وقتها معاي شنطتي ثقيله ولا اعرف مداخل ومخارج المطار كويس فجلست في مكان محدد حتى جاء زوجي وطلعنا

انتبهوا لا تحطون اشياء ثمينه ب الشنط

ماقدر اقول غير حسبي الله عليهم قطعوا قلوب الناس ع ممتلكاتهم

وصلنا لبيت اهلي بعد صلاة العصر وتغدينا وتقهوينا وكان إستقبال حار الحمدلله تمالكت دموعي ونفسي ..

وهنا خلصت تفاصيل الرحلة ولله الحمد



( تمت المشاركة باستخدام تطبيق مبتعث )

ماشاء الله تبارك الله رحلتك جميلة,توقعتها الاماراتية ولااسنغفورية!

الحمد لله على السلامة

كانت لي تجربة سيئة جدا جدا جدا اتعب وأنا أقول جدا
مطبات هوائية غير طبيعية والطيارة تهتز بقوة طول 14 ساعة
قلت خلاص جانا الموت وبتطب الطيارة فينا
والله للحين ينقبض قلبي اذا تذكرت الساعات الي عشتها

تجربة حلوة
انا من زمان انصح الشباب والعوائل الي قريبين من واشنطن او نيو يورك يسافرون ع السعودية
طول عمري اسافر بالسعودية وجربت الاماراتية (اكل هندي) وجربت القطرية والاتحاد ووالله العظيم مالقيت اريح من السعودية
مصلى ويقراون الاذكار وكل شي حلو
واهم شي انها عا الرياض او جدة او الدمام يعني شي حلوة بدل المرمطة

بس سالفة الشناط لو انا منك قلت لهم ترا انا حاطة اشياء ممنوعه وكان شفتي سرعة البرق خخخخخخخخخخخخخخخخخ

اقتباس:

---

المشاركة الأصلية كتبت بواسطة فرح وحزن

الحمد لله على السلامة

كانت لي تجربة سيئة جدا جدا جدا اتعب وأنا أقول جدا
مطبات هوائية غير طبيعية والطيارة تهتز بقوة طول 14 ساعة
قلت خلاص جانا الموت وبتطب الطيارة فينا
والله للحين ينقبض قلبي اذا تذكرت الساعات الي عشتها

---

على كلامك ان المطبات الهوائية مستقصدة الخطوط السعودية
مشكلة صراحة
ياخي المطبات الهوايى تصادف اي خطوط بالعالم مو بس السعودية
المشكلة الاغلبية ماجرب خطوط كثيرة عشان يعرف الفرق بين السعودية والخطوط الثانية

اقتباس:

---

المشاركة الأصلية كتبت بواسطة PLC.T

ماشاء الله تبارك الله رحلتك جميلة,توقعتها الاماراتية ولااسنغفورية!

---

ليش توقعتها كذا؟؟؟؟
بالعكس اخي صدقني الخطوط السعودية جيدة مقارنة بالخطوط الثانية بس المشكلة فينا حنا نعيب اي شي على اتفههة الاسباب

ياالله ان تحييهم نفر نفر ❤❤

جربت في رحلتي الاولى الخطوط القطرية مقارنة ب السعودية والله بدون تحيز او مجامله السعوديه افضل بكثيييييير ..

القطرية الإنتظار فيها طويل وممل

المضيفات : أخلاق مش ولابد ماعجبوني

الترانزايت يذبح يذبح كانت السعوديه قطر ، الدوحة روما ،

وبعدين طيران داخلي ل شيكاغوا

تعبت فيها تعب الووووويل

ب النسبه لي بإذن الله رحلاتي الجاية كلها ع الخطوط السعودية

راحة ماتشيلون هم عفش وشنط تسحبون فيها او اطفال

خصوصا" العوايل راحة راحة راحة ..

يكفيك الأكل طيب وحلال ، والي حولك منك وفيك

وماشاء. الله طاقين سواليف وتعارف مع بعض وضحك 😂

والي دايم متشائمين ومتحيزين لخطوط دولة معينه اقول محد كامل والسلبيات والعيوب في كل خطوط وكل مكان


( تمت المشاركة باستخدام تطبيق مبتعث )

جربت الخطوط مرتين
المرة الاولى كانت تمام بالعكس ماحسينا بالرحلة
المرة الثانية الطيار كان مطفوق

جربت البريطانية
تعامل المضيفات سىء

يعني ماتنصحونا ع القطرية ؟

جزاك الله خير أختي
تحياتي لك المناضلين المبتعثين