غيور جدا

يا اخوي انت لا تتوقع انك تطلع من السعودية وتدخل في السعودية ؟ انت اذا بتروح امريكا لازم تتوقع هالاشياء ,, بالنسبه للشعب الامريكي متفتح جدا وممكن يتكلم بكلام بالنسبه لهم عادي جدا واحنا نعده من الموبقات !!
في الكلاس او في اي مكان ثاني لابد من الاختلاط والكلام بين الرجل والمرأءة وبالنسبه للكلام البذئ وماحوله توقع انك تسمعه في اي مكان ,, اما المضايقات اعتقد ان الامريكان ماراح يتعرضون بسوء للمراءة المسلمه ,, لكن زين اذا سلمت من شباب بلدها !!
في الاخير وجهه نظري الشخصيه ان المرأءة ماتدرس في الخارج !! ولا انقص في حق الطالبات المبتعثات بالعكس اكبر فيهن الطموح الي خلاهن يتحملون الغربة ,, لكن استر وآآمن وأحفظ لهن لو يدرسون في بلدانهن والله الحافظ ,,
واذا انت إنسان غيور صك الباب من اوله بدل ما تقعد تشك ولا تنقهر ولا تندم بكره النهار ,,
الله يوفقك ويوفق حرمتك ,, الغيرة صفه حميده وما احد يقدر يلومك عليها لانها فطرة منتأزه ,!

بالنسبه للملابس القصيرة كثرتها حسب المكان الي بتروح له ,, اذا مثلا بتروح اورلاندو عاد الله يعينك العالم كلها من غير هدوم في الصيف !! لكن اذا بتروح مكان بارد مثلا الناس متستره اكثر ,!


بحفظ البأرئ !

أخي الكريم ...
كلامك كلام العاقل الذي يخاف على أهله من الفتن ...
نعم الاختلاط موجود في الكلاس وفي غيره .

ولله الحمد والشكر بناتنا وزوجاتنا متربين ويخافون على انفسهم أكثر من خوفنا عليهم ويخافون من الله في السر والعلن ..... وأنت أخي الكريم ستكون موجود مع من ترافق وستكون الحامي لها بعد الله والسند والعون ان شاء الله ...

فكر واستخير قبل أن تقدم على اي خطووووه ....

وبالتوفيق ....

انا ما ودي اقول شي يضر زوجتك لكن للأمانة بتكلم

الاختلاط والله فيه اختلاط

والطالبات معنا في الكلاس لازم يشاركون وتطلع تتكلم , وفي بعض الكلاسات يطلبونهنا نسوي قروب نتناقش و نحل رجال مع حريم

أنا هنا اشرح ما حصل معي ( يعني ممكن يخص جامعتي )

انا في جامعة اوهايو ستيت قالوا من يبي يشارك معنا في الزيارات داخل وخارج الجامعة طبعا شاركت


اول مره ودونا معرض للرسم والصور ( متحف ) والله انهنا دخلنا , قسم خاص بتصوير الأوضاع الجنسية رجال ونساء , صور رسومات افضح منها مافيه واللي ما تعرفه تتعلم ... والمدرس معنا عادي كل الصور ما فيه ولا قطعة ملابس ويقولون متحف وفيه صور اخرى , المهم نص الطالبات يتمشون ولا همهم شي تعرف بيئتهم كذا

وللأسف فيه وحده عربيه ماخذه راحتها مسنتره في ذاك القسم ( العلم نور ! )

انا مشيت ولا عاد شاركت وقاعد الغي اوراقي من النشاط ( اللي هذا اوله ينعاف تاليه )


لكن لا تحرم زوجتك من الدراسة هنا فيه سعوديين يدرسون حريمهم , مثل ما حنا ندرس , لكن اختار افضل مدينة ( اقل الضرر ) الا اذا كنت تخاف تفتح على نفسك باب ففيه دول غير امريكا

والاختلاط كل مكان من اول ما تطب رجلك المطار الين تدخل الجامعة وفي الصيف طبيعي ( يشيلون ملابسهم ) والله ان الجو عندنا بارد درجة الحرارة 1 ولابسين شورت !!

على فكرة انا اعزب

موضوع هاااااااااام جدا

اتمنى نرى رد الاخوات المبتعثات

ننتظر وجهة النظر العقلانيــــة من المتميزه دائما مسافرهـ

واتوقع معها نجد الجواب الشافي

أخوي غيور بصراحة حاول ما تكبر الموضوع !!! بالعكس الاختلاط شي لابد منه سواء في امريكا ولا حتى لو راحت زوجتك بعثة لمصر راح تقعد في كلاسات مع شباب وشابات

والله شي جميل أنك تغير لهذي الدرجة بس انتبه من الغيره الزايدة عشان انتوا راح تكونوا في غربة وممكن في الغربة مع الضغوط النفسية تحصل مشاكل ولو جيت بعدين تراجعها تشوفها مالها داعي

فكر بإيجابية واقلب الغيرة لثقة سواء ثقة في نفسك أو ثقة تامة في زوجتك

وربي إن شاء الله يسهل امركم في الدراسة

تقبل مروري

قال لي ان كثير من السعوديين لايسمحون لزوجاتهم بالدراسه ذلك لان الشباب دائما يحاولو
وخصوصا في الكلاس مغازلة البنات وشد انتباههم واللف عليهن وغيره من الامور

ولا قد صارلي الشي هذا والحمدلله رب العالمين وانا بدرس ومنتظمة.. يعني بالعقل بيسيبوا البنات اللي لابسين اشكال والوان وميك اب وبيجوا عاللي لابسة حجابها!!!!! كمااااان عاد... وبعدين انا شايفة انه الشعب الامريكي محترمين جدا وقت الكلاس يعني بجد كلاس ممكن تلقى البعض ينام او يستخدم اللاب توب او الاي بود لكن ابدا ما يتعدوا على بنت في الكلاسات



group discussion.. هذا لازم منه وشي عادي يعني مجموعة بنات واولاد .. مو كل بنت وولد لحالهم!!!! وموضوع النقاش بيكون عن الدرس وفي حدوده.. فايش المشكلة؟؟

وصدقني انه انا بتعاكس في السعودية ولكن ولا عمري من اول ما طبيت امريكا احد اتعدى علي من الناحية دي.. ودايما هنا الحق مع المرأة عشان كدا كتير بيخافوا يتعدوا عليها..


اذا على الملابس..هنا كل واحد حر بلبسو.. في الصيف كتير بيلبسوا قصير بس هل هذا معناتو اني ماادرس واحرم نفسي بسبب افعال ناس تانية انا لا ذنب لي فيها!!!!!!

عزيزي برشوت..

أحييك على غيرتك وعلى تحفظك من هالناحيه والداله على أصالتك ورجولتك ..معك حق تتساءل من هالناحية
لكن الأفضل أن تطغى عليك الثقه بزوجتك وبصراحة هي تعتمد على نفس المرأة وتقبلها للشيء هذا ..وعلى العموم ماراح أحد يسلم من المعاكسات والمضايقات لكن لابد من التكيف مع الوضع والتعامل معه بعقلانيه وعدم الانفعال بردة الفعل لأنك أنت رايح لدوله كل شيء فيها جايز ومو شرط لأمريكا الكلام هذا ينطبق على كل الدول ...لكن المبدأ واحد

الكثير من المبتعثين بصراحة يفكرون من هالناحيه وخصوصا اذا كان معاهم زوجاتهم أو محارمهم
لكن الحلول كثيرة ويمكن السيطرة عليها بحيث ان الزوجة تدرس في معهد فيه سعوديات ويكونوا قروب واحد وغيره وغيره..لكن السيطرة داخل الكلاس صعبه شوي ..وانت فاهم قصدي

الصراحه الموضوع كبير ووسيع وأتوقع والله يكون بعونك انك ماراح تطلع بفايده من هالموضوع ومن ردود الاخوان والأخوات واللي بالطبع ماقصروا وحاولوا يوصلوا لك الصورة لكن مثل ماذكرت الموضوع وسيع والآراء تختلف من شخص لشخص ..والحاسم بالأخير هو انت

الله يكون في عونك ..ويسهلك أمرك ..ويوفقك ويستر عليك

تحياتي

في الاخير يا طويل العمر الموضوع كله يعتمد على زوجتك انت اعرف الناس بها اذا كنت تحس ان شخصيتها من النوع الخفيف اللي ممكن يضيع مع هالامور او انها ثقيلة وعاقلة وفاهمة ولا يمكن تأثر عليها من هذا الباب اتخذ القرار والله يوفقك ..

الستر للمرءة افضل

والرصاص الي ما يصيب ... يدوش

وشوف انت ورايك ... هدي حرمتك ... وانت زوجها

وشوف مبدا الاهم فالمهم

وسلامتك