شريت سيارة جديدة ورفضوا يسلمونياها!!
السلام عليكم ورحمة الله وبركاتة ,,,
أخواني الأعزاء قبل يومين شريت سيارة أودي جديدة من الوكيل في مدينة سياتل في ولاية واشنطن ,, والوكالة رفضت تسلمني السيارة واشترطت اجيب صوره من التأمين على السياره من أي شركة تأمين وقالولي هذا من قانون الولاية وما نقدر نطلع سيارة من الشركة ونسلمها للعميل بدون تأمين ,,
كلمت شركة Allstate علشان اخذ تأمين ولما كنت انقله المعلومات قالي من أي ولاية مطلع رخصتك؟؟ قلت له ما معي رخصه امريكيه ,, معي رخصة دولية (الي هي الرخصه السعودية الجديدة) ,, وقال انا آسف ما اقدر اخدمك لازم يصير معك رخصه امريكيه طوط طوط طوط!!
انا طالب بجامعة واشنطن ستيت ومالي غير شهر بأمريكا فـ ياليت تدلوني على شركات تقبل بالرخصه الدوليه او ما تهتم للرخصه علشان أأمن على سيارتي واستلمها ,,
أخوكم سعود.
رد: شريت سيارة جديدة ورفضوا يسلمونياها!!
والله غريبة موضوعك
طيب اخوي انت حاول تروح تشوف على اكثر من شركة ( سوري على المداخلة خخخ لاني من كندا ) بس لاتقول لهم ان عندك رخصة دولية ,, قول ان رخصتك سعودية وبس لان الدولية العادية ماحد يعترف فيها حتى بعض مكاتب التاجير مايعترفون فيها
انا مثل موضوعك بالضبط لكن في كندا ,, شريت سيارة وكالة من سوبارو وقالوا لي لازم اسوي تأمين
التأمين قالي مانغطي رخص دولية ,, بس عندك رخصة من دولة ثانية نعطيك وتقدر تقدم على رخصة كندية خلال 3 شهور
والله يعينك اخوي ,, اتمنى اني آزرتك بردي وعطيتك شوي من التحفيز
تحياتي لك
رد: شريت سيارة جديدة ورفضوا يسلمونياها!!
الله يكون في عونك عند ذا الامريكان
إن شاءالله الشباب يفيدونك
رد: شريت سيارة جديدة ورفضوا يسلمونياها!!
طيب اش المشكله لو تطلع رخصه امريكيه وتأمن ؟؟
رد: شريت سيارة جديدة ورفضوا يسلمونياها!!
اقتباس:
المشاركة الأصلية كتبت بواسطة حجازي
طيب اش المشكله لو تطلع رخصه امريكيه وتأمن ؟؟
ايه بس هذي مهب ماخذه أقل من شهر .. وأنا ابي السياره الأسبوع هذا ..
أخواني ما عندكم خلفيه عن شركه ما تسأل عن الرخصه او على الأقل تقبل الرخصه السعوديه ..؟؟
شكراً لكم ,, أخوكم سعود.
رد: شريت سيارة جديدة ورفضوا يسلمونياها!!
شوف انا كنت بطلع رخصه دوليه بس ما انصحوني اخوياي قالو يخافون انها مزوره
عشان كذا سوق برخصتك السعوديه مسوح فيها 6 شهور
وعلى ما تقدم على رخصه امريكيه الا ممشي حالك بالرخصه السعوديه
وان كانك ما جبتها معك خل اهلك يرسلونها لك بالـ DHL
والله يعيينك
تحياتي
رد: شريت سيارة جديدة ورفضوا يسلمونياها!!
اقتباس:
المشاركة الأصلية كتبت بواسطة Abdullah_usa
شوف انا كنت بطلع رخصه دوليه بس ما انصحوني اخوياي قالو يخافون انها مزوره
عشان كذا سوق برخصتك السعوديه مسوح فيها 6 شهور
وعلى ما تقدم على رخصه امريكيه الا ممشي حالك بالرخصه السعوديه
وان كانك ما جبتها معك خل اهلك يرسلونها لك بالـ DHL
والله يعيينك
تحياتي
شكراً على ردك اخوي ,, لكن للأسف ماله علاقه بالموضوع ,,
أنا معي رخصه سعوديه هنا,, بس ما قبلوها شركة التأمين..
رد: شريت سيارة جديدة ورفضوا يسلمونياها!!
شوف يا طويل العمر ,,,
اول شي الله يعطيك خيرها ويكفيك شرها السياره الجديده ,,,
انا كنت مامن على الدوليه من شركة SAFE AUTO
يقبلون التامين على الدوليه بس الله يعينك مدبلين السعر على الدوليه ,,,
واذا ما قبلو السعوديه روح على هالموقع http://www.idlicense.net/
واسحب السعوديه سكانر واعملها سبمت بالموقع وتدفع 30 دولار بالفيزا وتجيك على بريدك في 3 ايام وهي رخصه دوليه تقبلها Allstate انا كنت مامن عليها عندهم ,,,
وبعدين ان تبي نصيحتي لا تشتري بوليصه بالتلفون روح لاقرب ايجنت لشركة التامين ,,,
وان شاء الله ان امورك ماشيه وانتبه لا تتجاوز السرعه تراهم عيال كلب في هالمخالفه بالذات ==> اسال مجرب :D
رد: شريت سيارة جديدة ورفضوا يسلمونياها!!
اقتباس:
المشاركة الأصلية كتبت بواسطة ابو رعـد
شوف يا طويل العمر ,,,
اول شي الله يعطيك خيرها ويكفيك شرها السياره الجديده ,,,
انا كنت مامن على الدوليه من شركة SAFE AUTO
يقبلون التامين على الدوليه بس الله يعينك مدبلين السعر على الدوليه ,,,
واذا ما قبلو السعوديه روح على هالموقع
http://www.idlicense.net/
واسحب السعوديه سكانر واعملها سبمت بالموقع وتدفع 30 دولار بالفيزا وتجيك على بريدك في 3 ايام وهي رخصه دوليه تقبلها Allstate انا كنت مامن عليها عندهم ,,,
وبعدين ان تبي نصيحتي لا تشتري بوليصه بالتلفون روح لاقرب ايجنت لشركة التامين ,,,
وان شاء الله ان امورك ماشيه وانتبه لا تتجاوز السرعه تراهم عيال كلب في هالمخالفه بالذات ==> اسال مجرب :D
الله يعطيك ألف عافية,, لكن للأسف SafeAuto ما يقدمون الخدمة في ولاية واشنطن..
ما تخبر لنا شركة ثانية لأني لازم اخلص الأمور بكرا ,,, الله لا يهينك ,, وسالفه الرخصه سجلت عندهم والظاهر انها بتطول ..
أخوك سعود.
مشاركة: شريت سيارة جديدة ورفضوا يسلمونياها!!
حبيبي شوف شركه progressive انا متأكد انها تغطي ولايتك لانها من اكبر الشركات في امريكا ويقبلون الرخصه الدوليه و تقدر تأمين اون لاين وعلى طول تبطع الأوراق وتروح تستلم سياراتك والله يعطيك خيرها ويكفيك شرها