الأعضاء الإشتراك و التسجيل

الملتقيات
ADs

أهل الخبرة في استخراج الفيزا السياحية ؟ والتأمين( يوجد اسئلة دقيقة والعشم فيكم كبير)

أهل الخبرة في استخراج الفيزا السياحية ؟ والتأمين( يوجد اسئلة دقيقة والعشم فيكم كبير)


NOTICE

تنبيه: هذا الموضوع قديم. تم طرحه قبل 5629 يوم مضى, قد يكون هناك ردود جديدة هي من سببت رفع الموضوع!

قائمة الأعضاء الموسومين في هذا الموضوع

  1. يالبى قلوووبكم كلكم !!
    تصيرون اصدقاي ؟؟ <<-- ما يعرف يعبّر اذا انبسط ..

    أبشكركم قمت اليوم .. الصبح واتجهت للبنك الفرنسي فرع الرحمانية ..و مرتز عند باب البنك قبل يجون اللي ينظفون .. من قو التبكير صادقت كل الفلبينين .. وتعرفت على اثنين سكيورتيين .. طاقين البالطو اللي يشوفهم يقول بالاسكيمو !! يا شين ربعنا اذا جتهم تفلة براد !!

    المهم .. دخلت اول واحد واخذت كشف حساب ختمته .. وبيني وبين السفارة اقل من عشر دقايق .. الحمد لله سرا السفارة الى مبنى السفارة الامريكية ما اخذ مني ولا ثلث ساعة ..

    وصلت واثري جاي قبل الوقت بعشر دقايق تقريبا .. انتظرت بعدين جت الاوفسر اللي في الكشك الخارجي .. وشيكت اوراقي وقالت لي شكرا <<-- بالله وفرحان بها ؟!

    دخلت ولقيت ذا اللي واقف هو ورشاشه كننا في الحرب العالمية الاولى .. من اللخمة قلت السلام عليكم صديق !!

    دخلت وعطيت التفتيش .. وعطيته اوراقي ..

    قال ما نحتاج : تأمين طبي ولا صحي !! قلت كويس زيادة الخير خيرين <<-- وش دخل هالجملة !!

    قلت والجواز القديم ؟! قال ما نبغاه !!

    وانا فيني حرص شيبان !! ما بقى ورقة الا وجبتها معي .. حتى وانا افتش في الاوراق لقيت ورقة مغسلة ملابس .. ولقيتين فاتورة كهربنا وراء صور جوازي !!


    المهم شيّك واخذها ورصيّت في السراء رصة محترمة ما هون السراء الا ان ابو عبدالله ( سامي الجابر ) فيه قعدت اسولف معه !! ما فيه شي ما سألته عنه !! جاء رقمي 522 والنداء على اللي رقمه 488 .. صراحة ضاق صدري .. وكل واحد تقريبا ياخذ له سبع دقايق وفيها !! ما بين رايح وراجع !!

    المهم نادوني النداء الأول : بصمت !!
    النداء الثاني بصمت ابهامي !!
    وقال لي انتظر شوي .. ونناديك عشان المقابلة !!

    جلست يمكن عشر دقايق .. ونادتني ذيك الشقراء اللي اللهم انا نسألك حسن ثواب الاخرة $

    قامت تسألني كن فيه أحد لاحقها .. ولقت في جوازي تأشيرات استراليا .. قالت لي اووه تحب استراليا اجل :$ قلت موب عشانها عشان اهلها $ ضحكت .. وقالت انا ما عمري رحت !! يوم شفتها فالتها وتسولف !! قلت حلو !! ذي وراء ما أقول لها ما تبين كوفي وكل واحد يحاسب عن نفسه :$

    المهم قالت : انا احلم اروح لاستراليا !!
    قلت لها : وانا احلم اروح امريكا !! وهالكشك هو نقطة تقاطعنا !!

    ضحكت ضحكة !! والله لو اسوي عمليات تقويم بكل الفلوس اللي بروح بها لامريكا !! ما صارت ضحكتي مثلها !! والله يا جماعة ان الانسان الجميل يشجعك ويبعث التفائل !!

    قامت تسألني عن شركتي وانها بادية تحترك ومن هالكلام .. قلت الشكوى لله !! ولنا الفخر انك من زبايننا :$

    قالت .. جيد .. وعطتني وصل ( وقالت فيدكس راح يرسلون لك الجواز فيه التأشيره بعد اسبوع تقريبا ) !!

    شكرا .. ثم قلت شكرا !! وطلعت !!
    ولقيت سامي بالانتظار .. وسألني كيف الوضع !! قلت والله الحمد لله .. وطحت على بنت حمولتن طيبة !! ووعدت ( سامي الجابر ) الانسان المتواضع !! الاسطورة !!


    وانا عاد الحين بانتظار الفيزا !!

    -----------------------------------


    نقاط من هاليوم المتعب !!


    - لقيت شخص مهايطي يا جماعة بشكل ما عمري شفته بحياتي !! ومخمرّ راسه بـ جل !! ويقول لـ خوجلي وخّر انت وجل شعرك والله ما تجي نصي !! وجالس بجنب سعودية ويعلمها عن امريكا !! وانهم شعب مترمي وودود ويحبون المبتسم !!
    ومحلق شعره تحليقة .. كنه واحد مخلص من مضاربة !! معفوس شعره .. لدرجة بغيت اطلع اشتري له مشط !!
    ولابس بنطلون من قو الضيق اللي فيه يالله يقدر يفحج رجوله .. باقي له خيط على فوق ويصير نفس ذيك اللعبة اللي يحركونها بأسلاك !! ومطلع شعر صدره مسوي تامر حسني !! ومدري وش يقول وامريكا وامريكا !!

    واخر شي مسكين !! قالوا له اسمح لنا ما نقدر نعطيك الفيزا !!
    والله اني رحمته !! بس دايم الثقة الزايدة مثل الربكة الزايدة !! حلو الواحد يصير واقعي !! ويقدم اوراقه زي ما طلبت !!

    ولا هوب معنى انك تحب امريكا بقوة وتمجدها يعني انهم راضين عنك ويخلونك تروح !! لانهم شعب systemic .. يعني تجي على النظام هلابك !! غيره ما عندنا !!


    -----
    ايضا الصور ما اخذوا مني الا صورة !!
    بس مطلوبة ومهمة !!

    جوازي القديم رغم انهم من البداية قالوا ما نبيه عند التشييك !! بس سألتني عنه بالمقابلة .. وعطيتهياه وفتشته !!

    قالت لي : رحت ايران و سوريا !! قلت اطلاقا !!


    لقيت سفرة لكوريا !! قلت لها لا تخافين الجنوبية !! وترا ما عندهم نووي وتراي رايح رحلة عمل .. ضحكت وقالت جيد !!

    -------
    ايضا كنت جايب معي ( ايميل مطبوع من صديقي اللي في واشنطن ) وسويت ايضا له برنت سكرين !!

    اخذت عنوان صديقي وايميلي وقامت تشيكهن في النظام عندها !! وما سألتني عنه الا انها قالت وش يدرس .. قلت له ماستر اخر سنة هندسة برمجيات !! ونبي نقضي العطلة سوا !!


    هذااااااااااااااااااااا كل شي صار ويوم جيت اطلع لقيت واحد توه يدخل .. سألته عن الساعة قال لي : الساعة 2 وربع !! الظهر !!<<---------- بالله الظهر ؟! اشوى حسبناها بالليل !!

    ----------------

    سألوني عند البوابة اذا معي اي شي ممغنط ؟! او مفتاح السيارة ريموت او جوال !! لانهم يحتجزونه عندهم الين ترجع !! بس انا مضبط وضعي ولا اخذت معي الا ( مفتاح الماي باخ حقتي <<------ اشوى انها هوندا كحيانه ) !!

    واخذت معي 75 ريال ( 65 ريال لفيدكس ) وعشرة شريت بها كوفي ومويه وترا الكوفي بأربعه .. والموية بريالين بس شريت مرتين كوفي <<------ يا شين اللي ما يعرف يكون مخلص في الشرح !!



    استودعكم الله .. وقسم بالله فيه كذا شخص هنا :

    سوسو !!
    وفيصلني !!

    يعجز اللسان عن شكرهم !! الف الف شكر سوسوو !! وبيض الله وجهك !!

    الف شكر فيصلني وتحية اجلال واكبار !!
    7 "
  2. يطوووول عمرك فيصل (النييوركي) .. ويسلمك ويخليك ..
    فيصل كم تبعد واشنطن عن نيويورك ؟
    والله يبي لها زيارة اذا هي ميب بعيدة ..
    تحياتي لك ويكفي اني طلعت من هالموضوع بمعرفة معرّفك .. وشخصك الكريم ..

    الف شكر .. ويبارك بعمرك
    7 "
2 من 2 صفحة 2 من 2 12
ADs

قم بتسجيل دخولك للمنتدي او

الانضمام لمبتعث

Search Engine Optimization by vBSEO ©2011, Crawlability, Inc.