طلب : مقارنة بين سفارة الرياض وقنصلية الظهران

موضوع مره حلو انا اليوم حجزت بالظهران وكنت مره محتاره وين احجز لانه سمعت ناس تذم بالرياض وناس تذم بالظهران في الاخير توكلت على الله وحجزت بالي اقرب لي وفي النهايه الي ربي كاتبه بيسير ...

الصراحة من خلال تجربتي وسماعي للأخبار حول المكانيين أشوف الموضوع كله يتعلق بالموظف اللي قدامك أهم شي لاتكون لبنانية فإذا فكك الله منها فأنت بخير سواء كنت في الظهران أو في الرياض , طبعاً أنا أتكلم عن معاملتهم معي وأنا أمريكي !! كيف اللي جاي يقدم على الفيزا ؟
عموماً أنا ماودي أخوفكم لكن هذي هي حقيقة الموظفات اللبنانيات في السفارة .
أهم شي لا تتمسكن قدامهم لأنهم ياكلونك كذا خل عينك قوية مادام مع حق .
مع تمنياتي للجميع بالتوفيق ,,,

ايه والله ياخوي CHANUTE والله كلامك صحيح أنا يوم رحت السفارة في الرياض في مكان ياخذون منك الاوراق حقتك ويدخلونها على اللي يقابلك ويعطونك رقم المهم انا عطيت اللبنانية الاوراق فقالتلي ليش ماسجلت اسمك بالعربي بصرااااااخ بس شتسوي مالك الا تمسك السانك

موضوع جميل وان شاء الله نستفيد كلنا منه



المهم
بالنسبة لي انا سويت المقابلة بالرياض

وانا افضله للي ساكنين في مناطق المملكة المختلفة باستثناء الشرقية

لان الشرقية عندهم القنصلية وهو قريب منهم


انا افضل الرياض لاسباب كثيرة
نضمنها ماحصل لي

انا احمل الجواز الباكستاني واعيش في مكة
رحت للسفارة بالرياض
واللي حصل ان المدققة قالت لي لازم اصلح اسمي في الجواز
وطبعا وجود السفارة في حي السفارات ساعدني
فخرجت مباشرة على السفارة الباكستانية وخلصت اموري والحمدلله
صحيح تعبت
لاني رديت ثاني للسفارة الامريكية وطلبة رسالة موجهة للسفارة الباكستانية
وبعدين رحت صلحت الاسم ورديت ثالث مرة للسفارة الامريكية بنفس اليوم
والحمدلله وبفضله اولا واخيرا خلصت اموري

الميزة في الرياض هي انها العاصمة وجميع الدوائر والسفارات موجودة فيه

وبالنسبة للمقابلة
فهي تقريبا نفس الاسئلة
واللي بيقابلوك ان شاء الله بيقدرون
هم بيحاولون يختبروك بس تهون باذن الله


وناس طيبين في الاخر ويقدروا الانسان


دمتم بود
عمور

بالنسبة ل اللبنانية
لاتظلموها يانس تراها طيبة


ومعاملتها معي يوم تعبت صراحة خلاني احترمها

هي صحيح كانت ترفع الصوت وقت تجمع الاوراق بس

يوم رديت ثالث مرة ماقصرت معي والحمدلله
طلبت مني اقعد في الكرسي قدامها قالت لي استريح
والحين نخلصك

غير كذا هي والانسة الامريكية كتبوا لي خطاب للسفارة الباكستانية مع اهم ما يعطون شي مثل ذا


لاتظلموا المراة تراها مسئولة قدام غيرها

عشان كذا تكون معصبة شوي


دمتم بود

عمور

برأيي تتوكل على الله
واللي كاتبه الله بيصير لك
وبما انك من الشرقية فالأفضل تجري المقابلة بالظهران
برايي ايضا مانقدر نعقد مقارنة بينهم لان انا جربت الاثنين السفارة والقنصلية
الاجراءات بتكون نفسها
اللي لاحظته الموظفات اللي من اصل عربي في الاثنين محتاجين بصراحة دورة مكثفة في الاخلاق وحسن التعامل مع بني البشر ومش الكل طبعا
اهم شي رتب امورك وخليك واثق من نفسك
والله يوفق الجميع

السالفه فيها صراخ وتطاول ؟؟؟ الله يصبرني بجد لاني عصبيه
بس يلا تلاقوا هذي فرصتهم عشان يطلعوا (الشعور بالدونيه) على روسنا ولازم يستغلوها

اخواني انا لااجد فرق في المكانين فمثل ماكتب اخويCHANUTE يعتمد على الى يسوي معاك
المقابله بس الي تفرق هو سرعت الحصول على الموعد والرياض بهذي الفتره تحصلك موعد اسرع من الظهران بالنسبه لي بغيتها بسرعه انا من الاحساء رحت للسفاره بالرياض مع انو القنصليه اقرب لي بس مثل ماقلت كنت مستعجل عليها

تساهيل..
انا سويتها بالرياض وانامن سكان الشرقيه لاني مالقيت موعد بالشرقيه بالوقت اللي ابيه..

موفقين