الأعضاء الإشتراك و التسجيل

الملتقيات
ADs

*** قصص حصلت لي اثناء دراستي في امريكا ***

*** قصص حصلت لي اثناء دراستي في امريكا ***


NOTICE

تنبيه: هذا الموضوع قديم. تم طرحه قبل 4119 يوم مضى, قد يكون هناك ردود جديدة هي من سببت رفع الموضوع!

قائمة الأعضاء الموسومين في هذا الموضوع

  1. الصورة الرمزية ابو عابد
    ابو عابد

    مبتعث مجتهد Senior Member

    ابو عابد غير معرف

    ابو عابد , تخصصى accounting محاسبة , بجامعة university of south carlina at columbia
    • university of south carlina at columbia
    • accounting محاسبة
    • غير معرف
    • غير معرف , ساوث كورلينا south carlina
    • غير معرف
    • Jun 2006
    المزيدl

    September 8th, 2006, 09:45 AM

    بسم الله الرحمن الرحيم


    السلام عليكم


    هذي بداية قصتي في امريكا اثناء الدراسة


    طبعا انا كنت متررد في كتابة هذه القصة وقلت من باب العبرة والعظة اكتبها لكم بيدي ابو عابد

    طبعا انا الحمد لله انقبلت في البعثات والان ادرس معهد لغة منذ 4 اسابيع تقريبا

    طبعا المكان ولاية ساوث كورلينا مدينة كولمبيا تخصص محاسبة


    نبدا منذ نقطة الوصول


    طبعا بعد عناء ( الله لا يجيب العناء ) ورحلة شاقة والحمد لله على السلامة وصلت الى كولمبيا ولقيت باستقبالي محمد ولد عمي وسلطان خويه واثنين متعرفين عليهم هني جدد نادر و منصور المهم الشباب ما قصرو استقبلوني استقبال حار واخذو شناطي واوراقي الي باقي ما خلصت وسوها لي ...

    :120:


    ورحنا ( ذهبنا ) الى سكن حقهم كان جميل ولقيت القهوة والعلوم السفرة المهم حلفو يعشوني ( وقلت في صدري هالحين تهقى بيذبحون لي طلي ولا ما فيه هنا ) و انقز و احلف عليهم ما يجيبون شي من برى الا من اكلهم المهم ما سمعو كلامي وجابو ذاك العشا الي ريحته تفتح الشهية والله نسيت اسمه بس المهم تعشينا الحمدلله والشكر وشربنا شاهينا وقمنا نسولف واعلمهم بالاخبار االجيديد والعلوم الي ما درو عنها ويسالوني عن الشلة المهم جاء دوري الا اتذكر اني قبل ما اروح كاتب في اورقة 163 سوال هههههههههههههه المهم ويقعدوني يعلموني بذيك القصص الغريبة الي حصلت لهم ويقولوي عن السعوديين الي يدرسون هنا وعن الحي والسكان الخ .. من الاسئلة والمعلومات المملة:111:

    قام واحد وقالي هذا الكبت لك حط اغراظك فيه قلت زين وافتح الشنطة الاولى الي فيه ملابسي وارتبها وافتح الثانية فيها 6 حبات شامبو بانتين و2 معجون كرست و احد سقنال2 حجم كبير وفرشتين اسنان وصابون تايد حجم كبير وفليت ريد وفيري :121:
    هههههههههههههههه اخذ احتطياطاتي كلها المهم خلصت اموري الا راسي دايخ ابي النوم


    المهم جاء وقت النوم قلت لهم على اذنكم انا تعبان وابي انام قالو خذ راحتك قالي محمد تعال هذي الغرفة فيها سريري وسريرك قلت لهم زين لقت بطانية ومفرش وكل شي جاهز كل الله يجزاك خير المهم واخمدها نومة ما صحيت الا بكرة هم سهرو ونامو متاخرين واقوم اشرب موية واصلي واحمد الله طبعا فيه منبه يعلمك اوقات الصلاة واروح اصحيهم الا ادش ذيك الغرفة الي اكبر من غرفتنا والقا فيها ثلاث اسره ومكتبة وكمبيوتر ثاني غير الي في الصالة ويقمون يصلون وانا اروح البلكونة واقعد اتفرج وكان جو يجنن المهم هم رجعو نامو قلت الحين انا بنزل وادور لي بوفية افطر فيها واجيب لهم فطور معي وكان همي الوحيد هو كيف اذا جيت احاسب لاني مو متعود على الدولار والسنت :109:


    والقى الباب مقفل حق الشقة وادور المفتاح ما القاه موجود في الباب واطالع الا فيه زر على اليمين الا هو القفل واظغط وينفتح القفل وافتح الباب وارده عشان مايسكر علياذا جيت برجع

    طبعا هم ساكني في بيت صغير وحليو الي يجيك من فوق على شكل مثلث مدري شلون اظن اكثره خشب والحي الي هم فيه كل كذا طبعا ما فيه حوش على طول الباب على الشارع يوم طلعت

    اطالع يمين يسار ما فيه لوحة بقالة ولا بوفيه واقعد افر شوي لين دخت وانا همي الوحيد ما ودي اضيع البيت

    الا اشوف شارع بعيد شوي قلت اكيد هذا الشارع التجاري واروح الا هو تقريبا زي ما قلت الا ما فيه الا محلين او ثلاث وكلها مسكرات ( مقفلة ) واشوف ذيك اللوحة من بعيد والباب حق المحل فاتح واروح الا هو مطعم واجلس على الطاولة ادور ورقة الي مكتوب فيها انوارع الطعام ما لقيتها الا جاتني ذيك الشقرا :122:

    قلت لها ابي بيض بالجبن لاني ما اعرف الا هو


    قالت شنو قلت

    انا : لا لا أي شي ( اني ثنق )

    طالع فيني

    الا ذاك الواحد جاي يضحك مدري وش كلمها وضحكت وراحت


    المهم جاء وسلم علي الا هو شاب خليجي جاي يفطر حاله حالي ويوم شافني سعودي قصدي عربي حاء عندي وقعد يسولف معي المهم قلت لنفسي انتبه يا ابو عابد لا يضحك عليك ويجرك بالحكي

    المهم اسولف معه وانا متحرص المهم جاء الفطور وافطرت قالي انا طالب ماجستير هندسة كيميائة انا من الدولة الفلانية قلت يا هلا ومرحبا والله كان شاب حبوب ومحترم وانا ظلمته يوم شكيت فيه المهم عطاني كرته فيه رقمه وايميله قال اذا بغيت شي اتصل علي ولا تتردد قلت ابشر وعزمته وعيا حاسبت ما ادري كم يرجع لي المهم خذيت الي عطتنياه البنت

    وطلعت الحين جاء دور البيت واروح مع الشارع الي جيت معه الا الفات تشبه بعض زبدة الكلام ضعت ودقيت على ثامر الي قبل شوي تعرفت عليه وما قصر جاني عند المطعم طبعا هو معه سيارة وركبت انا وياه وفر فيني لين لقينا البيت المهم ما قصر الرجال كد طفش بس انه تحملني انا ودلاختي دخلت البيت الا تذكرت اني ما جبت لهم فطور قلت بلاش لا تعلم احد انك طلعت ولا افطرت ولا ضعت خلها سكاتي واستر على نفسك واروح للتفلزيون واقلب المحطات الا ما اعرف فيها شي ادور mbc ادور العربية الخ ...

    ما حولك احد




    نختصر ونقول جاء وقت العصر قالو الشباب يله قلت وين قالو بنطلع بنمشيك ونعرفك على الحي والمراكز الي في المدينة ونوريك المعهد
    قلت لهم زين عاد ما معنا سيارة ( بنروح مشي قلت مو مشكلة ما حنا مطولين ) المهم مرينا على المطعم الا يعلموني يقولون هذا المطعم وتراها جيد ... ( قلت في صدري بلاكم ما تدرون ) المهم ركبنا تكسي ورحنا ذاك الحي الي ناطحات السحاب فيه وش كثرها وننزل ونمشي شوي وانا رقبتي انكسرت وانا اطالع في العمارة (الفندق) ضحكو قالو تعال

    ودوني عمارة قريبة سلمو على واحد يعرفونه هناك وقالو نبي نطلع فوق للمطعم قالو خلاص طلعنا في الفت ( الاسن صيل ) وردد يا ليل ما اطولك تعبت وان واقف المهم في الزاوية كاميرا وانا مفهي فيها واضحك واطالع فيها قلت ( تعرفون الواحد ما يترك اللقافة ) خل الي يشوفني يقول ما شاء الله على هالانسان هذا مرح ودايم مبسوط ...

    وفي نص الرحلة توقف الفت ويجي السكرتي ويطلبني ويقعدون يسالوني ... وت زيور نيم ؟ وفتشوني ...الخ ..



    تصدقون يمكن خذينا اكثر من ربع ساعة على بال ما وصلنا ( الحمد لله على الوصول ) ونطلب ذاك العصير ونجلس شوي وقالو تعال خلنا نطالع في الناس تحت

    طبعا كان المطعم هذا تقريبا في الادوار الاخيرة فوق وكانو حاطين حديد بينه وبينا الزجاج عشان البعض يتكي والي مثلي يتمسك فيه من الخوف


    واطالع تحت ياووووووووووووووووووووووووووووووووووو



    الا بغيت ارجع العصير الي شربته .... خلاص خلونا ننزل واقعد اصارخ عليهم وهم ميتين ضحك



    تصدقون انا الفندق الي حنا فيه كان الي بجنبه اطول منه بواجد يعني شلون لو رحنا للثاني ......




    ورحنا للمجمعات تجارية ( اسواق ) وفرينا لين دخنا وشفنا واجد من الشباب الي من نفس حالتنا ( عرب ) يتمشون


    رحنا الملاهي والله انها شوي بعيدة بس حلوة مره وشيقة ودوخوني بالعابهم ( طبعا بتقولون انت رايح تدرس ولا تلعب بقول لكم لا رايح ادرس بس تعرف واحد جاي من سفر يرفه عن نفسه شوي ويتعرف على المدينة ويحتك باهلها ... )



    وشفنا المعهد ......

    كان احسن شي ان كل يوم سبت كل الشباب العرب يتجمعون يا عندنا في حديقة البيت (لانا اصحاب الفكرة )او نعزمهم يطلعون برى وكان صاحب هذه الفكرة الاخ العزيز سلطان ...

    ( كان شغل قطة )



    عموما بدت الدراسة الحمد لله بدأت بسرعة بتعلم المحادثة وتعرفت على ناس واجد كثر شعر راسي وكان المقربين الي قليل
    منهم : اخووياي الي في الشقة – ثامر ( الي في المطعم ) – سيليفيا – ويل ( هذا واحد دب بس حبوب ) – ياسر- نايف ....




    كنت بكلاس لحالي ما معي احد من اخوياي ولا عربي الا واحد ما ادري وش فيه دايم ساكت .. طبعا انا اكثر سوالفي مع اثنين هم ويل و سيليفيا بدت العلاقة تبدا تمتن بينا احنا يا هالثلاثة لين ما نقل ويل ما اجري وين راح

    نسيت اقول لكم تهاوشت مع وحدة كوينية المهم زمرت علي وتسب فيني واقوم ناويه بالشر واصقعها ركبه ( اما ركبة ترى قوية ذي) على بطنها واقوم اضحك عليها ( مبسوط لانه طق له بنت ) واقول لها- بي هيف يور سلف- احترمي نفسك وخليكي عاقلة وما دريت الا وهاك البقس على عيني اخس يالعبدة وتقفل معي واصكها ذاك الطراق الكف المخمس الي ماشي طبلونه ( وطلعت فيني قوة غير طبيعية قوة خفيه – وانا القوة الخفيه فيني 2 وحدة في الكف والثانية اذا بغيت انحاش ما احد يقدر يصيدني ههههههههههههههههه) المهم وامسكها مع شعره الي كنه ليفة غسيل وادزها لين هي على الارض وامشي واخليها زين انا الادارة ما عرف بالهوشة ولا كان رحت فيها


    قلت في نفسي قم علم العيال لان اكيد البنت بتجيب اخوانها العبند وبتروح علي ....... ( تفكير واحد خطير )


    وعدت على خير ..........


    طبعا هالكلام خلال فترة قصيرة و كنت انحرج اذا احد سالني ما اعرف وشو يقول لاني لغتي ضعيفة مش ولا بد وكانت ترد عني سيليفيا كنت انا زي الاطرش في الزفة لان كان عندها لغة احسن مني المهم البنية ما قصرت طلعت نشمية وشقردية ...



    طبعا مرة وانا جاي من المعهد وهذا كان ثلاث يوم قلت لش ما اختصر الطرق وانقو هالشبك هذا واطلع للشارع الثاني يوم جيت في المنتصف ما دريت الا والعجوز تصيح حرامي حرامي ويجين ولدها وكان عملاه تقريبا في الاربعينات ويمسكني وكان يبي يطقني لان معه عجرى ( عصى ) وفهمت الموضوع والحمدلله صدقني وقالي رح ولا تعودها مرة ثانية .........


    في يوم من الايام كالعادة وانا رايح للمعهد وانا عيوني مسكرة ابي انام الا السيارة شطفتني وقف قدامي واطالع اصدق اكذب الا هالسيارة الزينه الكشخة كلاسيكية زي القديمات بس نظيفه وسيارة هاي وكشف واطالع من الي بداخلها الا هي سيليفيا كاشخة بذيك النظارة الي زايده حلاها حلى قالت هاي قلت لها هاي قالت هل تريدني ان اقلك ( اوصلك ) الى المعهد ؟
    قلت نو ثنك يو ( طبعا انا مسوي ثقل )
    قالت انا سوف اذهب الى هناك ( تقصد على طريقي )
    قلت لها يو شور هل انتي متاكدة من ذلك
    قالت يا ه ( ايه ) وراكب معها وسوالف الا هذولي اخوياي يطالعون فيني


    من هذا ما كنه خوينا ابو عابد اخس يا........ وش عرفه بذي والله انك خطير يا ابو عابد منت بهين وانا اطالعهم بنص عين هههههههههههههههههههههههههه ( لا والله ما اتخلى عن ربعي لو املك الدنيا كلها – ما عليكم شقردي ـــ ) الزبدة قالت وش رايك نشرب شي قبل ما ندخل المعهد كوفي او أي شي قالت هاه قلت خلاص مو مشكلة تذكرت اني ما جبت فلوس واجد ومدري شلون احاسب ونتقهوى ونعي من الله خير قلت يالله تاخرنا خلينا نمشي ضحكت قالت اوكي


    جيت عند الاكونت ابي احاسب


    الا طالع فيني قالت وخر هناك وطلع من شنطة اليد حقت هاك الخضر وتعطيه قالت احتفظ بالباقي ( قلت في نفسي حنا اولى منه – امزح لا تصدقون - ) عاد تذكرت انا اذا جيت احاسب انشبلهم واعد الفلوس اربع مرا ت عشان اتاكد هههههههههههههههههههه


    خلصت المعهد وانا طالع الا هذا الي ما ني قايل ... سميث الدب خوي سيليفيا عاد انا اذا شفته يرتفع ظغطي ما اطيه ودي اذبحه الا يوم ركبو السيارة وراحو وانا واقف مكاني مقهور منه الا العيال طالعين ونروح للبيت


    عاد خويكم

    << تذكر سيارة الكشف وقال لازم اشتري لي نظارة عشان لو ركبت مرة ثانية الهوا ما ياثر على عيوني
    ( يا لبى عيونك )


    وانا عاد النظارة ما احبها ولا اواطنها بس قلت لازم نعود انفسنا



    جلسنا والعيال يعطوني محاضرة لين عبو راسي المهم قلت كلامك على العين والراس ولكم الحق اذا شفتنوي مخطي تحاسبوني وتوقفوني عند حدي انا مثابة اخوكم الصغير ............
    واعطيعم من هالكلام الزين لين اقنعتهم اني .............



    واقيل ( اريح شوي ) يوم صليت وانا اروح ابي اشتري لي نظارة
    قلت يمكن القاه في البقالة الي قريبة منا
    ( اخبر البقالات الي في السعودية كل وحدة فيها درزن ورخيصة بعشرة ريال ههههههههههه )

    سالت الهندي لاحظو متعود على كلمة هندي قصدي الامريكي عندك نظارة شمسية طالع فيني قال لا شفها في المكان الفلاني قلت واروح الى المجمع وفي طريقي لقيت ..


    عيال يلعبون كورة اعمارهم من 10 الى 13 سنة ( اخبر ايام الحواري اذا لقيت ورعان الحارة يلعبون اجي اطقطق معهم شوي واذا خلصت شت الكورة في حوش الجيران وانحشت وخليتهم )

    <<<< اخس يا ابو الحواري ههههههههههههههههههه



    قلت لهم ناولو ابي اسوي نفسي حبوب ومرح وخلط وابي اوريهم المهارات الا يوم جات الطامة قام الولد يصيح وجاء واحد ومدري اشوفهم اختبصو الا يوم جاء العسكري ( هناك كل ركن فيه عسكري واقف ) الزبدة الا حطوها فوق راسي قالوووووو انت تبي تخطف الولد وداني المخفر ..



    هاه لا والله حرام عليكم و ....................... المهم تحقيق سين جيم وياليل مانت ليله العيال (الي ساكن معم ) شافوني تاخرت ما استغربو قالو يمكن عند العيال في السكن ياسر ونايف



    المهم يا دوب فكوني بعد ما عرفو ان وجهي ما هو وجه

    واحد راعي مشاكل

    قالو رح ولا تعدوها

    جزاهم الله خير ما قصر

    و حلفت انا اذا طلعت اني لاتصدق على الضعيفين الي في الزاوية والي على الرصيف طبعا هناك اشكال والوان يوم طلع واشوف ذاك الشايبالي منتف رايح فيها واجي واعطيه المقسوم ما امداني اطلع الفلوس الا هم ما سكيني الشرطة ردينا قلت يمكن يمزحون معي واضحك معه الا هو جاد رحت القسم قالو انت توك طالع قلت ايه قالو و تبي تشتري مخدرات هاه وامسك راسي كذب صدق المهم الحين العنو زيادة مو نفس الي اولى المهم قلت ابي اتصل قالو مكالمة وحدة يحسبوني بطل محامي وانا ما طرا علي محامي قلت ابي ادور واسطة



    نسيت ما قلت لكم سيليفيا اهل طنخة وابوها تاجر معروف وله نص الشركات

    عاد هي معطينها حصانة مدري وش يسمونها

    كلمتها خمس دقايق الا هي جاية ودفعت لهم غرامة وطلعتني ركبت السيارة الحين انا انبسطت وابي اشكرها


    الا هي شاينه معها الا خلاق وانا ابي اكلمها ابي اقول لها شي :93: راحت للشقة وقفت في المواقف وطفت السيارة وجلست شوي تفكر ونزلت ولحقتها لاني ماني عارف وش اسوي المهم قلطتني ( دخلت )

    ما راحت لبيتهم لان هي ساكنة مع صديقتها وسميث و ما تروح لبيتهم في الويك اند يوم السبت والاحد



    دخلت الا ذيك الشقة الي تفتح النفس وكبيرة وش مرة خيالي

    المهم الا هي تبي تبكي

    شوي الا طلع العير سميث ويقعد يتكلم عليها وياشر علي يسب فيني شانت الاخلاق معي
    واقوم وامسكه لك واسدد له طراق جامد
    الا يوم رجع وراه وصكني ذاك الهد
    ( صقعني براسه )
    ليني دايخ ما ادري ويني انا فيه المهم ما خلتني طويلة العمر وتقوم وتصقعه برجولها على ذاك المكان الحساس والله صقعه جامدة حتى هو طاح ما قدر يوقف وتطرده برى وانا دايخ وتروح داخل وتجيب منديل وموية ثلج وتحطها على راسي وتقعد تقولي انا اسفه دخلتك بمشاكلي الخاصة

    واقوم وقلبي متقطع

    <<< الولد حنين مرة ههههههه

    قلت لها لا انتي انسانة طيبة وحبوبة و ما عليك من الي يسويه هذا المعفن
    حرام الي يسوه فيك وانتي ما تستاهلين كل هذا وهو ما يستاهل وحدة مثلك ............

    واعطيها من هالكلام الزين وتنهار البنت وتقعد تبكي ودمعاتها يتسابقون على جبهتي المهم قمت وهديتها شوي

    واخذ رقم خويتها وادق عليها وتجي تجلس عندها وانا اقوم اطس للبيت و اكمل باقي مشوراي اليومي



    وفي النهاية احب اشكر كل القائمين على هالمسلسل الذي اتمنى ان يجوز على رضاكم

    قام بدور البطولة

    سيليفيا = رجاء بنت هيفاء يونس الاطرش

    ابو عابد = انا

    سميث = انطوني كارلس لؤي رمزي

    كوينية = قودين اترام

    وفي الاخير نشكر المخرج ابو عابد


    ( طبعا هذي قصة من نسج خيالي يعني ولا كلمة فيها من الحقيقة )
    اتمنى ان اكون ما غلطت على احد اثناء سردي للقصة
  2. وربي ابو عابد لو انك مو قايل خيال في اخر القصه اني اقول صدق ومواقفك والله صارت مع ناس كثير والله انت فله وكنت ابي اعلق علي اشياء كثير بس تجي تقول خيال والله تصلح كاتب افلام رومنسيه مع كلاسكيه بس عطني البطل وماعليك هههههههههههههه
    7 "
  3. ههههههههههههه ابو عابد ودي اجي اخنفك ,,
    الحين لي ساعه اقرا في القصه وداخل جو واخرتها تطلع خيال ,,,
    يالله بس اكشتفنا فيك موهبة فعلا انا اقولها واعني مااقول القصه تدل على ان عندك خيال واسع خاصه في بعض التفاصيل الصغيرة اللي ماتطري على اللي يحكي قصه واقعيه عاد كيف قصه من خياله ,,,,
    اهنئك على اسلوبك الرائع .....تحياتي
    7 "
  4. والله قصه من جد روعه بس الله يهديك ليت ماقلت خيال ولا كان مصدقك والله اني احسبك صادق الله يقطع ابليسك قاعد منسجم مع القصه قالت بنفسي اذا رحت اشوف المشاكل الي شافه ابو عابد واتجنببها بس في الاخير انك تصلح حق مسلسلات رومانسيه وشبه واقعيه .......تسلم يابو عابد ......
    7 "
ADs

قم بتسجيل دخولك للمنتدي او

الانضمام لمبتعث

Search Engine Optimization by vBSEO ©2011, Crawlability, Inc.