استفسار...عن الجامعات الي ممكن ادرس فيها طب

يا ختي العزيزه المسأله مش اننا مو قادرين نفيدك او ماعندنا معلومات بخصوص الطب يعني انا بأبحث في هذا المجال الطبي ليه اكثر من سنه ونص يعني ممكن اساعدك بالي تبغيه بس المشكله انه اسألتك مو محدده يعني اذا تبغي لازم تقرري الاول تبغي تدرسي طب فاي مكان ولا ضروري اميركا..تبغي نظام 4سنوات ولا 7سنوات..تبغي تروحي للمدن الممتعه الكبيره زي شيكاجو وسان فرانسيسكو...وغيرها من المدن الكبيره...ولا تبغي مدينه رخيصه...تبغي دراسة قويه ولا تبغي جامعه سهله وقبولها سريع...عنك مشكله مع شرط إختبار MCATولا ماعندك مشكله... تبغي قبول مشروط ولا قبول نهائي..حضرتك خريجه ثانويه ولا عندك شهادات اخرى ...ححدي اختياراتك واعطيني اساله محدده وانشالله اساعدك

يا طويل العمر ..

انا معي شهادة الثانوية .. ابي ادخل طب في امريكا ..
طبعاً اللي ابيه .. جامعه حلوه قبولها سهل وتكون في ولاية حلوه وماتكون الولاية او المدينة غاليه من ناحية مستوى المعيشه .. لاني بدرس على حسابي .. وطبعاً ماتكون ممله وتجيب الطفش !
وياليت اذا احد عنده تجربة مع الطب في امريكا يعطينا معلومات اكثر عنه ..
وهل من الممكن اني ادرس معهد اللغه في ولاية والجامعه في ولاية .. !!
ويقولون ان فيزة الطب تختلف .. مو F1 !! هل الكلام هذا صحيح ؟؟؟

ياليت اللي عنده معلومات لا يبخل علينا .. والله يجعلها في موازين حسناته ...

أول شي .. حطوا في بالكم دراسة الطب في أمريكا مو سهلة أبدا
من ناحية الدراسة ومن ناحية القبول ( الأولوية للأمريكان والسكان الدائمين) .. وفيه منافسة مرتفعة عند التقديم .. يعني لا تتصوروها بهالسهولة .. عشان تكونوا عارفين بس
ومعظم كليات الطب في أمريكا معترف بها بالسعودية يعني الخيارات جدا كثيرة

ثانيا : وهذا السؤال دائما يتكرر وينرفزني بصراحة .. أسئلة عامة وكبيرة وتبون أجوبة متخصصة جدا ..
حددوا ايش تبون بالظبط عشان الناس تعرف تساعدكم ..
وبعدين كقاعدة عامة
المدن الحلوة (نيويورك, لوس انجلس. واشنطن, سان فرنسيسكو, سياتل, شيكاقو ..وغيرها) = غالية
هادية ومملة = رخيصة

مافيه شي كامل ...مدينة ممتعة جدا ورخيصة وآمنة وجوها حلو وقريبة وزينة والقبول سهل والدراسة سهلة ومدري ايش .. هذي مدينة الأحلام ..
انتم فكروا بالجامعة والتخصص اللي تبية وقوة الدراسة هناك هذة هي الأولوية اللي بسببها انت مبتعث .. انت رايح تدرس وتخدم بلدك .. مو رايح تتمشى

سووا بحث كامل واقروا المواقع المتخصصة عن كل ولاية وجامعة وحددوا اللي تبونه مبدئيا .. بعدين قلصوا عددها على حسب مناسبتها لمتطلباتكم وامكانياتكم

وعلى فكرة .. دراسة الطب جدا جدا غالية .. كثير من الخريجين يتخرجون وهم عليهم ديون كبيرة
هذا الكلام للي بيدرس على حسابة طبعا

أختي الفاضله اول شي دخول الطب فأمريكا لابد من ان يكون لديكي بكالوريوس بمعدل لايقل عن 3من4 وتتجاوزي اختبار الـMCATبما لايقل عن 85(اختبار الـMCAT الأمريكان يحتاجون احيانا الى قواميس لترجمه بعض مفردات الإختبار)وان تحصلي على توصيتين وان تتجاوزي المقابله الشخصيه ...وبالنسبه للغه مومشكله تاخديها بولايه مختلفه...وطالما انك ثانويه روحي ادرسي بكالوريوس اول شي وخلصي بمعدل حلو وخشي اختبار الـMCATوتوصيتين والمقابله الشخصيه وانشالله تدرسي طب

عفوا درجه MCAT المطلوبه 9

BDS & shadyrno ,,,

ألف ألف شكر لكم وماقصرتوا كفيتوا ووفيتوا ..

الله يجعلها في موازين حسناتكم .. ومشكوريييييييييييييييييييييين .....

بسم الله الرحمن الرحيم

طبعا اشكر اخي و حبيبي صالح الي دلني علي الموقع هذا و بالتحديد لي الموضوع هذا.

بداية كثرت الجدل حول دراسة الطب في أمريكا خذ الخبر اليقين من طالب طب سعودي في امريكا

بسم الله

اولا في امريكا لا يوجد بكلوريس طب بشري لازم تلحق باحدي الجامعات ودراسة أحياء لمدة 4 سنوات بكلوريس يعني وفي هذه المرحله يجب عليك المحافظه علي معدل عالي جدا جدا مثلا 3.8 من 4

بعد السنه الثالثه وقبل التخرج من البكلوريس تبداء اجرات التقديم علي كليات الطب الامريكيه
وهنا المرحله الاصعب الي هو اختبار MCAT
الاختبار هذا مقسم لي خمسة اقسام قسم الاحياء و قسم الكيمياء و الفيزياء و قسم الكمياء العضوية و قسم القراءه و اخيرا الكتابه
الاختبار صعب جدا و طويل مدة 6 ساعات تقريبا
دراسة الطب في امريكا 4 سنوات وبعد السنة الثانية تقدم علي اختبار الرخصة الخطوه الاولي في حالة نجاحك في اختبار الرخصه تقدر تمشي لي السنة الثالثه في الطب

يعني دراسة الطب مع اللغه في امريكا 9 سنوات

عدد كليات الطب في امريكا 150 كلية طب 50 كلية فقط تقبل الطلاب الاجانب
الطب محصور بشكل كبير لي الامريكان
قد قيل لي ان عدد الطلاب الاجانب الي يقدمون علي الطب كل سنه في امريكا 17 الف طالب اكثرهم من كوريا و الهند
للاسف عدد المقبولين كل سنه لا يتجاوز 150 طالب في احسن الاحوال هذا يعني كل كلية طب من ال 50 تقبل 3 طلاب فقط كل سنه

الان تعتقد ان الكلام الي فوق تحطيم صح؟ طيب فيه شي حلو في امريكا

القبول في امريكا لا يعتمد علي الدرجات فقط العمل التطوعي و كذالك الابحاث تلعب دور كبير في القبول
وايضا المقابلة الشخصيه
اختي اذا قررتي دراسة الطب في امريكا فا انصحك ان تبداي بجامعه سهله في مدينه صغيره عشان يكون معك معدل عالي و فيه فرصه تسوين ابحاث في معامل الجامعه

طبعا انا الان حاولت اوضح اذا فيه اسائله ثانيه انا جاهز
واعذروني علي الاخطاء الاملايئه لاني استخدم كيبورد عربي من النت

تحياتي

طيب ايش الجامعات الي تنصح فيها
لانه مهمه بالنسبه لي الحين
وشكرا...

اختي مافي شي اسمه بدرس طب مباشرة في امريكا !!!

اول لازم تكون معاك شهادة بكالوريوس في العلوم (يعني احياء مثلا -Biology ).. بعد ماتتخرجي بعد 4 سنوات تقدمي ع الاختبار .. ومثل ما قالوا الاخوة الاختبار صعب والاولوية للامريكان طبعا


بالنسبة للجامعة حاليا ماتفرق .. اختاري اي جامعة فيها تخصص احياء ومعترف من التعليم العالي ... وبالنسبة لافضل المناطق والولايات اقري في المنتدى هذا وراح تستفيدي ان شالله


بالتوفيق