تخرجت من الثانوي وناوي ادرس بالصين طب

السلام عليكم ورحمة الله وبركاته

بحكم أن الموضوع يخص طلاب الطب بوجه الخصوص .. راح أتكلم بالموضوع إللي أعرفه

بالأول حاجز اللغة الانجليزية في الصين .. يعتبر ضعيف جدا مقارنة بدولة كأمريكا أو كندا أو دول أوروبا .
وللمعلومية إذا حضرت الدرس مع الدكتور الصيني .. ممكن تطلع بمعلومة تصل بك حتى 25 % - 35 % .. من أصل المعلومة
وهذا قد يكون ضعف توصيل المعلومة ..
ولكن للمعلومية الطب لا يعني فقط أخذ معلومة من الدكتور .. فيحتاج لك بحث ومراجعة وتقصي كل ما هو جديد في هذا العالم
عن طريق الانترنت ولو اقتصرنا على معلومة الدكتور في كل مكان كان التحصيل ضعيف جداً .

الثاني بخصوص المناهج والمصطلحات هي في كل مكان تقريبا نفسها ولا تفرق فيها شيء ففي الصين ندرس المصطلحات الطبية التي تدرس في جميع أرجاء الأرض فأنا لي خبرة عمل سابقة في المستشفى وخبرة دراسية في السعودية أيضا وحضور بعد الدورات الطبية و و
فما شفت مصطلح جديد اختلف هنا في الصين وحتى المراجع الطبية العريقة نفسها لولا اختلاف الغلاف فقط ولكن المنهج تقريبا واحد والمصطلح والصورة وحدة .. فأنا دراستي باللغة الانجليزية والمصطلحات الطبية بالاتيني ككل دول العالم .

الثالث بخصوص التحصيل الطبي لو طالب في أمريكا كان يحضر الكلاس ويرجع البيت ونهاية السنة يختبر ويأخذ أي درجة .. وطالب في الصين يحضر ويجتهد وأخذ أعلى الدرجات << فمن الأفضل في نظر الكل ؟؟

في نظري أنا كلهم دكتور وبالأخير كل الناس تروح له ولا شفت شخص سأل الدكتور أنت من وين شهادتك ومن وين متخرج أو أنت درست بالصين أو أمريكا ؟؟ وعن نفسي أنا في مستشفى ولا أعرف شهادة كل الدكتارة وهم شغالين معي !! فما بال المريض إللي يجي في السنة حسنة للمستشفى ويأخذ علاجه ويمشي ولا يدري من عالجه أصلا .. فما بالكم هل يسأله أنت من الصين جاي ؟؟

خلينا نكون واقعيين شوي .. يعني بالأول والأخير الطب أصلا علم يعتمد على الطالب أكثر من الدكتور فالدكتور فقط عليه كلاس أو لاب ويطلع والباقي عليك أنت في كل شيء لازم تحضر درسك قبل تروح للجامعة وتراجعه بعد ما ترجع .. وعلى هذا كله لازم أفلام طبية ومراجع طبية .. والناجح الطبي بالأول والأخير يعتمد على الشخص إللي طموحه يكون طبيب مو على غيره .

رابعاً بخصوص المستشفيات في الصين طبيعي تتعامل بلغة البلد في كل شيء وهذا لا يعني أنها فاشلة .. ولكن قوة علم طبي لديهم بلغتهم كفاهم الاعتماد على الغير .. فالسعودية مثلاً تجي للمستشفى تحصل الدكتور الهندي يتعامل مع المريض باللغة العربية ويشخصه أيضا بالعربية .. ولكن المكتوب فقط على الورق باللغة الانجليزية .. يعني أنت عندك إلتهاب حنجرة ويلزمك ما تشرب باارد ولا تتعرض لمكيف و و وخذ هذا المضاد ثلاث مرات ... وش الفرق بين المستشفى السعودي والصيني ؟؟ غير أن الورق يفرق فقط ..!!

خامساً أنا ما أقول الصين أفضل دولة طبية .. ولكن لا يعني أن أهضمها حقها الطبي !! .. ولا يعني حاجز اللغة يدمر مستقبلي الطبي
فكل الدول الغير ناطقة بالانجليزية تعيش نفس الوضع وفيها طلاب كثير ومتخرجين والآن في مستشفيات السعودية على أعلى مستوى وأولهم طلاب السعودية ومصر والآردن .. وعلى هذا الأساس

كلامي هذا توضيح نقطة بحكم أني طالب طب في الصين
وحتى الكل يأخذ في باله أن الطب ليس بالأمر السهل ولكن ليس بالصعب
يعني تجي تدرس طب أحسب في حسابك أن يومك وأسبوعك وشهرك كله طب في طب
مو كل ليلة سهرة وجلسة مع الشباب وبالأخير تضيع حياتك ومستقبلك


بالتوفيق