بوابة السفارة الهندية (كل ماهومطلوب عن الفيزا الهندية)

اقتباس:

---

المشاركة الأصلية كتبت بواسطة ITpioneer

السلام عليكم

وعليكم السلام ورحمة الله وبركاته

يا اخوان انا موجود في الهند واقامتي قربت تنتهي
ابغي اممد الاقامة وجواز سفري باقيله حوالي 7 شهور وتنتهي الصلاحية
فهل مدة الصلاحية ما تسوي مشاكل عند التمديد من داخل الهند
مدة التمديد سنة

ومشكورين

---

أخي إذا إنت طالب جامعي إرسل جوازك لسفارة بلدك في نيودلهي أو سافر لهناك جدد جوازك وبعدها جدد الإقامة حقتك .. بس أتوقع والله أعلم إنهم راح يجددون لك لمدة 6 أشهر بحكم أن جوازك بنتهي بعد 7 أشهر .. بس يفضل عشان تتأكد تذهب لمركز الهجرة F.R.R.O اللي في بنغلور وتسألهم راح يفيدوك

السلام عليكم
انا عندي استفسار
اقامتي سنجل وانا بسافر قبل ما تنتهي الاقامة بـ 6 شهور الى السعودية وقد سافرت من قبل
يعني لو رحت المطار بيسحبوا مني الاقامة وبيخلوني اسافر ولا كيف ؟؟

مرحبا اخوان سؤال بسسسيط على السريع .. الحين الضمان بنكي 7000 ريال أو 7500


وشكرا :)

اقتباس:

---

المشاركة الأصلية كتبت بواسطة سعود الرشيدي

مرحبا اخوان سؤال بسسسيط على السريع .. الحين الضمان بنكي 7000 ريال أو 7500


وشكرا :)

---

7000 ريال الضمان البنكي + عمولة البنك تختلف مابين الراجحي والاهلي الاهلي اتوقع 1000 ريال والراجحي 500 ريال

اخوي البشر انسى موضوع العمولة للبنك .. انا اقصد كم نحط بالضمان الموجه للسفاره 7000 او 7500

السلام عليكم ورحمه الله وبركاته ...

عندي سؤال ....

انا مقيم في الرياض وادرس في الهند في الجامعه العثمانيه , وطبعاََ سويت الضمان البنكي في اليمن لانه ارخص بكثير وهو عباره عن 300 دولار فقط او 200 دولار ما اذكر اهم شي 75000 ريال يمني , المهم عطوني الضمان البنكي ...

الحين انا في الرياض والفيزا حق الهند انتهت وايضاََ الاقامه حق الهند انتهت , يعني لازم اسوي فيزا من جديد ... حالياََ عندي صوره من الضمان البنكي بينتهي شهر 4 -2013 ....

انا قلت بخلي واحد في اليمن يسوي لي امور الفيزا وارسل له جوازي ولكن هل يقدر يسوي اموري بدون ما اجي انا شخصياََ , ثانياََ هل اقدر اقدم الضمان البنكي الي باقي فيه 4 شهور وينتهي وهل بيقبلونه , وهل يقبلون صوره من الضمان البنكي ولا لازم الاصل .. , الصراحه انا ناسي ( هل السفاره الهنديه تاخذ الضمان البنكي الاصلي ولا تاخذ صوره منه فقط ) , لان الي معي الحين صوره وليست الاصل , واخاف السفاره تطلب الاصل , واذا طلبت الاصل لازم انا شخصياََ اروح البنك واجدده , واخذ الاصل ...


* هل يقبلون صوره من البنوفايد ولا لازم الاصل , لاني بخلي واحد من الشباب يسويه لي من الجامعه , لكن ما اعرف هل ياخذون صوره من البنوفايد ولا لازم اخليه يرسل الاصل بالدي اتش ال ...

ياليت المساعده وخصوصاََ اهل اليمن

سؤال ثاني يا شباب معليش استحملوني :)

لو بسوي الفيزا من الرياض ... هل يجب ان يكون لدي حساب بنكي لاصدار ضمان بنكي و شيك سياحي ولا ما يحتاج , انا اخوي عنده حساب بنكي في الراجحي هل يقدر يسويه لي ويسوي لي الشيك السياحي باسمي ...

ثانياََ :- كيف اخلي الوالد يكتب لي عدم ممانعه للسفر , وش يكتب بالضبظ ...

ثالثاََ :- سمعت ان البنوفايد لازم يتختم من السفاره السعوديه في الهند عشان يقبلوه في السفاره الهنديه , هل هذا الكلام صحيح

رابعاََ :- التقديم على الفيزا في الرياض هل من السفاره نفسها ولا من المكتب الي في السليمانيه او الي في ام الحمام

خامساََ:- كم تاخذ وقت عشان تطلع الفيزا .

الله يعطيكم العافيه

اجوبة على بعض الاسئلة اللي فوق
الضمان 7000 فقط انا طلعتة من الراجحي دفعت رسوم 1000 ريال مدة الضمان 5 سنوات الموظف نصحني بهالشي عشان لو جييت اسافر السنة الجاية مرة ثانية ما يحتاج اسوي ضمان ثاني وادفع 1000 ثانية .......... استرجاع فلوس الضمان وما الى ذلك ما عنننننننندي اي فكرة عنها .......
طبعا الضمان يطلع من فرع الادارة اللي بشارع العليا يعني وانت جاي من خريص تمشي يكون بعد الاشارة الثالثة على يمينك.........

البونوفايد جاني من الهند ومو مختوم من السفارة ولا شي ....... صيغة الخطاب سواء كان من ابوك او من الكفيل ... تكون كالتالي

اقتباس:

---

بسم الله الرحمن الرحيم


السادة القنصلية الهندية
تحية طيبة وبعد...
فنفيدكم انه لا مانع لدينا من سفر ولدي ............................................ سوري الجنسية إلى جمهورية الهند للدراسة ارجو أخذ العلم و شكرا




تصديق جهة العمل .................................................. .....ولي أمر الطالب

---

ويختم من العمل وابوك يوقع عليه

اخذت اوراقي _الضمان والبونوفايد وخطاب ابوي والجواز واقامتي ما طلبو من صور مدري لية علما اني مطلع فيزا سياحية قبل هالمرة وما سافرت و_ ورحت لمكتب مقابل السفارة اللي بأم الحمام وعطيتهم 800 ريال بعد المكاسر وهم يترجمون الخطاب وما يحتاج شيكات سياحية هم يزبطونك ....... طلبو مني تأشيرة خروج وعودة وقلت ما عندي
واليوم الثاني طلعت الفيزا لكن كانت 6 اشهر فقط علما ان القبول حقي مدتة سنة قالو لي تقدر تمددها من الهند >> اللة يستر لا اتوهق هناك

هل بالامكان اني امدد الفيزا هناك بعد ما اوصل ...؟؟؟؟؟؟

السلام عليكم

اخوي البشر موضوع التجديد من الهند اتكنسل يعني لازم ارجع البلد واقدم على فيزا جديدة

لكن هل اقدر اقدم على فيزا جديدة بجرد وصولي او لازم انتضر مدة زمنية مابين عودتي والفيزا الجديدة

لان السياحية لازم مرور اقل شى مابين العودة والفيزا الجديدة

ومشكور اخوي ماقصرت

السلام عليكم ورحمة الله وبركاته


حبيت اساعد الشباب باني اكتب اللي صار معاي لما استخرجت الفيزا الهنديه للدراسه في مدينه تشيناي ( مدراس ) سابقا
فتحت اكثر من موضوع استفتسر عن المده والمكان اللي استخرج منه الفيزا والحمد لله الشباب ماقصروا
واحين جاء دوري ارجع شوي بالمقابل
الاشياء المطلوبة لاستخراج الفيزا :

1 ) آخر شهادة حصلت عليها (صوره)
سواء كان من الثانويه او من كليه او من جامعه
لازم تكون مترجمه للغه الانجليزيه


2 ) صورتين شخصيه ( الخلفيه تكون بيضاء )

3 ) صوره من بطاقة الهويه

4) الجواز الاصلي وصوره منه

5) ورقه مكتوب فيها عدم ممانعة الاب بسفرك وتحمله كافة التكاليف ( تم ارفاق الورقه في المرفقات )

6) ضمان بنكي بمبلغ 7000 ريال موجه للقنصليه الهنديه ب جده او بالرياض ( تفاصيل حصولي عليه بالاسفل )

7 )صوره شيك مصدق بقيمة 2000 دولار للقنصليه بالرياض او 50000 الف روبيه ( 3570 ريال وقت اللي طلعته انا ) للقنصليه في جده ( تفاصيل حصولي عليه في الاسفل )

8 ) تعبئه نموذج الطلب للفيزا وانا طبعته وعبيته بنفسي من موقع القنصليه في ناس يستخدموا هنود يعبوه ب 10 ريال

9 ) قبول المعهد او الجامعه الاصلي ( حاول تخلي المعهد او الجامعه ترسله عبر the professional couriers عشان يوصلك في يومين ) وتستلمه في ارامكس اللي في منطقتك

10 ) ورقه من الشركه اللي يشتغل فيها الوالد مكتوب فيها الراتب ومختومة من الغرفه التجاريه

استخراج الضمان النكي
استخرجت الضمان البنكي من البنك الاهلي بالدمام اللي عند مجمع الدانه قبل مااكمل انا رحت لفرع اصغر وماكان يعرف اصلا وش الضمان البنكي وقال لي اروح الفرع الكبير وصلت البنك وركبت الطابق الثاني قسم الضمانات عطاني ورقه عبيتها وهو بيعلمك بالضبط وش تكتب وسلمته الورقه وقال لي خلاص بكره تستلم الضمان
الضمان 7000 ريال مدته سنه و عمولة البنك 500 ريال = 7500 ريال


استخراج الشيك المصدق
من نفس الفرع قبل ماتطلع من الضمانات بتشوف صرافين في وجه قسم الضمانات قول لهم بتستخرج شيك مصدق باسمك وقول له المدينه اللي بتروح لها
في حالتي الشيك كان إلى مدينه مدراس اللي هي نفسها تشيناي بمبلغ 50000 الف روبيه
الموظف قال لي استنى شوي وفي 5 دقايق سلمني الشيك

استلمت الشيك والضمان ونسخه من كل واحد
.................................................. ..............................................


انا من الشرقيه وقررت اطلع الفيزا من جده لان ماعندي وقت اني انتظر 10 ايام عشان اطلعها من الرياض ورحلتي باقي عليها اسبوع فاستفسرت من الشباب هنا وطلع ان الفيزا في جدة تطلع خلال يومين و الاجراءات اسهل على عكس الرياض
حجزت رحله لجده ووصلت الفجر يوم الاثنين 7/1/2013 انتظرت لين الساعه 9 وطلعت مع صاحبي اللي ساكن بجده واتوجهنا للقنصليه الهنديه اللي مكانها خلف بنك الاهلي في شارع التحليه
وصلت القنصليه دخلت للتفتيش السكيورتي قال لي وش عندك قلت له فيزا قال تابع الخط الاسود في الارض وصلني الخط لشباك حق استقبال طلبات الفيزا بس ماكان فيه احد وانتظرت واقف 15 دقيقه لين ماطلع الموظف ( لا تستغرب اذا خلص معااملة شخص من الهند قبلك ولا تسوي مشكله عليها بس ابتسم حتى لو مأخوذ حقك عشان تمشي اوراقك ) عطيته اوراقي قام يدور فيها شاف صورة الشيك قال لي عندك الاصل قلت له اي وعطيته الاصل شافه ورجعه لي سالني كم مدة الكورس قلت له 4 شهور كتب الموافقه على ورقة الطلب وقال لي اتوجه الى مكتب BLS اللي هو نفسه فيفا في شارع المكرونه

وصلت مكتب BLS ودخلت على موظف استلام طلبات الفيزا ولما جا دوري قال لي تستلم الفيزا يوم 14/1/2013 وهذا يوم رحلتي يعني اسبوع انا استغربت يقول لي عشان ان جوازي من الدمام مو من جدة لما فضت الغرفه قلت له في حل اني ادفع اكثر وتطلع الفيزا اسرع قال اهاا يعني urgent one قلت له اي قال بس بتدفع اكثر قلت له مو مشكله قال متى تبيها الاربعاء قلت له اي قال خلاص 135 ريال زيادة اذا ماخانتني الذاكره عطيته المبلغ وكان (572 ريال ) وبالفعل يوم الاربعاء رحت المكتب على الساعه 6 ونص المغرب واستلمت الفيزا

تقديم الطلب يوم الاثنين 7/1 استلام الفيزا يوم الاربعاء 9/1

ملاحظه ماعليك من رقم التتبع اللي يعطيك اياه الموظف عشان تشيك حالة الفيزا اليوم اللي يقول لك فيه بتستلم فيزتك روح له المكتب انا رحت له المكتب مع ان رقم التتبع في الموقع يقول ان الفيزا ماخلصت
لو تلاحظوا انا ماقابلت القنصل اصلا و الاستقبال مشى لي اوراقي

اتمنى اني ساعدتكم ومانسيت شي واي استفسار تفضلوا واسالوا