اسأل عن بينانغ ..

هلا بك أختي عبير ... حياك وان شاء الله توصلين بالسلامه..
انا تحت امرك باللي تبينه وماعليك زود ..
اسألي وانا اجاوب ولا يهمك راح اخصص هذا الموضوع لطلاب بينانغ
لأن جاتني رسايل كثير تسأل نفس اسئلتك ..
لذا خلي الفايده تعم واكتبي اسألتك المحدده هنا
وانا اجاوبك وبنت السعوديه والكل مابيقصر معاك .. بالتوفيق
واعذريني غيرت عنوان الموضوع ..

فعلا سارا الرياض وبنت السعودية (دار الخير )
أناس يستحقون التقدير

الله يجزاك خير ياسار الرياض
خدماتك واضحة وجليه
وربي يوفقك
الاخت بنت السعودية (دار الخير )
الله يعطيك العافية على ماقدمتي من خدمة
ولا يهون الجميع

يعطيك العافية يا ساره على الرد .. ولو عادي تمونين .. يامشرفتنا

بالنسبة للسكن .. اكيد عندكم خبرة عن المجمعات السكنية اللي قريبة من الجامعه .. انا ابي شقة مفروشه يكفي غرفة وصالة .. واهم شي عندي تكون نظيفة وفيها سيكيورتي.. ابي اعرف الاسعار واسماء المجمعات السكنية ..وهالشقق يكون كل شي فيها .. مواعين وكواية وغلاية .. واللا يحتاج احسب حسابي ..؟؟

ثاني شي .. وش صار على القنوات العربية .. ما صار شي جديد ؟؟

شريحة الجوال من وين طلعتوها ؟؟

اذا كانت دراسة المعهد تبدأ 10 سبتمبر .. متى يكون امتحان تحديد المستوى ؟؟ بنفس اليوم واللا يحتاج اروح قبل ؟؟

هذا اللي على بالي الحين .. واذا ذكرت شي جديد .. بقولك .. وما راح تقصرين

السكن القريب من الجامعه اغلبنا سكن فيه .. وتقدري توصلي الجامعه مشي 20 دقيقه او بتاكسي 5 دقايق ياخذ منك 5 رينجت..
نظيفه وفيها سكيورتي والمصاعد تشتغل ببطاقه ومسابح وبعضها فيها جيم واماكن للعب الاطفال
الاسعار على حسب
الغير مؤثثه من 1000 الى 1200 رينجت
المؤثثه من 1700 الى 2000
وبالنسبه للوحدات متساويه كل الشقق عباره عن صاله كبيره واخره المطبخ وثلاث غرف صغار ودورتين مياه وانتي بكرامه وحده منهم بداخل غرفة النوم..
اسماء المجمعات IVORY هذي اكبر وافضل وحده واي تاكسي تركبي معاه يوصلك لها وموقعها ممتاز والمناظر اللي تطل عليها مره حلوه ..ومتكامله الخدمات وفيها جيم واماكن لعب اطفال ..
الثانيه DESA AIRMAS
هذي جديده واقرب للجامعه ومو كبيره مثل الاولى يمكن تلاقي شقق بصعوبه وخاصه مؤثثه الحين مافيه ابدا .. بس نظيفه جدا لكن مافيها جيم ولا اماكن لعب اطفال ..
وفيه مجمع ثالث جنب الثاني واقرب منه للجامعه نسيت اسمه.. وفيه كثير ساكنين فيها الطلاب بس مااعرف اسمائها ولا مواقعها وعلى فكره لو سألتي الجامعه على طول يفيدونك بالنسبه للسكن ويقدمون لك مجمعات واسعار ..
الشقق المؤثثه فيها كل شي بالنسبه للاجهزة لكن اوني الطبخ مو بذيك الكثره ترى يعني اذا بتجيبي شي قليل يساعدك غي البدايه او اذ جيتي تشتري من هنا الباقي..
والله ماجبت خبرها لكن باسأل لك بس ماسمعت جديد ... الي معانا باقي زعلانين على القنوات


اول ماوصلنا الجامعه عطونا شرايح بس غيرتها غاليه للسعوديه طبعا شركات الجوال في ماليزيا كثيره تبدأ من 012 الى 019 ماادري عن الأفضل لكن انا شريحتي 017 رخيصه مره داخل ماليزيا و للسعوديه الدقيقه ب1 رينجت و20 سنت والرسايل مررره رخيصه ب25 سنت ..
واسمها HOTLINK
اسألي تلاقيها بكل مكان وبالسوبر ماركت اهم شي جيبي جوازك يسجلونها فيها و5 دقايق والشريحه معك ...
اول ماتجين يسكنونك الجامعه بالفندق 3 او 4 ايام وكل صباح يجي لك سواق يوديك ويرجعك
للفندق طبعا هم راح يختبرونك ويفتحون لك حساب ويسوون لك امورك .. تطمني ..

واذا على استقبال المطار اذا وصلتي بينانغ قبل 5 العصر بتلاقين من يستقبلك, بس بعد 5 العصر يخلص دوام الموظفين ومايستقبلك احد بس تاخذي تاكسي وتطلعين الفندق وتلاقي غرفه محجوزه باسمك ..
رقم الموظف اللي ياخذ رقم الرحله وتاريخ وموعد الوصول اسمه أنيد ويتكلم عربي
0060194220175

الى الاختين الفاضلتين السلام عليكم ورحمة الله وبعد من زمان وانا ادور احد يرد علي ماحصلت بس ان شاء الله انه الرد عندكم يابنات السعودية (سارا و بنت السعودية ) بنات الاجواد طلبي هو كالتالي :
1- ايش الافضل لدراسة الماجستير والدكتوراه في جامعة um ولا usm
2- طبعا انا متزوج وعندي ولدين وحجيبهم معاي فما هو الافضل للسكن من ناحية النظافة وقلة التكلفة في كوالالمبور(جامعة um) ولا في بينانغ (جامعة usm)
3- كيف سمعة اعضاء هيئة التدريس في جامعة usm
4- تقريبا كم حتاخذ مني دراسة الماستر والدكتوراه علما بانني معيد في احد الجامعات بالسعودية وودي اكمل دراستي العليا في ماليزيا في تخصص الرياضيات
5- وهل بكل صراحة التعليم في ماليزيا ممتاز
6- كم تقدر المكافاة بالنسبة لي مع عائلتي
7- وودي اضم زوجتي للبعثة فما هي الاجراءات (حاصلة على بكالوريوس احياء)
8- متى تبدا الدراسة ةمتى يمكن التقديم متمنيا ان اكون في ماليزيا باسرع وقت مؤملا فيكم سرعة الرد
آآآآآآآآآآآآآآآآآآآآآآآآسف جدا على الاطالة ولكن اسئلة لم اجد لها جوابا
وفكم الله الى كل خير وسعادة

1-بالنسبة لي طالبه في usm من اربع شهور وباقي في مرحلة اللغه لذا سؤالك الاول عن المقارنه ماعندي له جواب لأن ماعندي خبره في UM
2-اذا اولادك في مرحلة دراسه ترى بينانغ مااااااااافيها مدرسه سعوديه العوائل هنا يدرسون اودلادهم بمدرسه عالميه غير معترف بها لحد الان ومضطرين كل نهاية ترم يودون اولادهم المدرسه السعوديه اللي بكوالالمبور يختبرون حتى يمشون مع طلاب السعوديه .. ..
بس السكن في بينانغ سهل ان شاء الله تلاقي نظيف ورخيص نوعا ما .. اعطيت الاسعار بردي على الاخت عبير ..
3- سمعة الاعضاء والله ماعندي خبر عنها لاسمعنا زين ولا شين .. بس معانا ناس تدرس هنا ولا سمعت منهم شي سيء بصراحه يعني امورهم ماشيه و ان شاء الله الامور تمام ..
4-الماستر من سنه الى سنه ونصف اذا كورسات فقط والدكتوراه من سنتين الى ثلاث.. هذا من غير اللغه .. لكن احاول ابحث عن اجابه ادق ان شاء الله..
5- دراسه اللغه لك عليها هنا لأن الشعب مايتكلم انجليزي وان تكلموا فهم ناس قليل والاكنست مو واضح مره معاهم يميل الى البريطاني .. باختصار دراسة اللغه تتعب في ماليزيا لازم تبذل مجهووود كبير كبير فيها .. .. بس اذا على المعهد والله برنامحهم الاعدادي للغه لابأس وبالعكس فيه صعوبه واختباراتهم مو سهله يعني تطورنا باللغه الحمد لله من بعد اول شهر كثير..
اما الدراسه الاكاديميه والله في ناس تدرس صيدلة وفيزياء من سنتين ويمدحون الدراسه وعلى فكره USM قويه في الصيدله والحاسب والرياضيات .. هذا نائب مدير الجامعه قال لي كذا و انا رياضيات..
6-المكافأة ممكن من رابط الملحقيه الثقافيه باستراليا طلاب ماليزيا تبعها هنا تشوف المكافأة بالتفصيل بالجدول الثاني لأن ماليزيا فئة (ب) ..
http://www.sacm.org.au/cultural.aspx?m=229
وهي تقريبا لك متزوج مع ولدين 7195 ريال سعودي.. وعلى فكره المكافأة تصرف من الدولار الاسترالي لأن الملحقيه باستراليا الى الرينجت الماليزي وغير ثايته تذبذب كل شهر مع سعر الصرف هذا الى ان تفتح ملحقيه بماليزيا ..
7- اجراء ضم مرافق للبعثه سهل كل ماعليها ان تترجم شهاداتها وتجيب توصيات وكل الاوراق حتى تقدم على الجامعه وبعد ماتوصلون بالسلامه تراسل الملحقيه وتروح لكليه تجيب القبول وفيه اجراءات بموقع الملحقيه تسويها وان شاء الله يضمونها للبعثه..
8- هذا سؤال مااعرف اجابته بالضبط .. لكن اذا التقديم بحث فالتسجيل طوال العام اما الكورسات اوقات محدده ان شاء الله احاول اطلع باجابه بكره او رقم شخص مسؤول بالجامعه ممكن يفيدك..
الله يوفقك وييسر امرك وتوصل بالسلامه ..

ابي اسأل عن التذاكر .. هل قصيتوا رجعه .. واللا سافرتوا يتذكرة ذهاب بس ؟؟ لاني فيه ناس صارت لهم مشاكل مارضوا يدخلونهم في مطار كولامبور ؟؟

الوزاره عطتنا تذاكر ذهاب فقط وتأكدي انهم تذكرتي وحده السعوديه-كوالا والثانيه كوالا-بينانغ
لأن كان فيه طلاب ماعطوهم التذكره الثانيه ودفعوا حقها في مطار ماليزيا
من السعوديه لكوالا 20 كيلو بس ترى مايدفعونك زياده ...
اما مطاركوالا ورحلة بينانغ بيحسب لك 25 كيلو ويدفعك الزياده ..
بطاقة العايله وعقد الزواج واي بطاقه بالسعوديه والرخصه جيبيها الاصليه
وترجميها افضل لك حتى ماتروحي للسفاره بكوالا الجامعه تطلب بطاقة العايله مترجمه
واظن بعد الترجمه تحتاج ختم من وزاره الخارجيه وحاولي تسألي عن المعلومه هذي ( الختم )
مو متأكده منها
ابي سلامتك توصلين بالسلامه يارب..

السلام عليكم


يعطيكم العافيه على المعلومات القيمه وبصراحه ماننسالكم هالمعرووف ابد

الشكر لمبتعث وكل القائمين عليه ..
وخاصة الاخت سارا وبنت السعوديه في هذا الموضوع
وكذلك روض نجد وكل البنات اللي يساهمون بنشر الفائده ..ولجميع الاعضاء بدون تحديد اسامي


......................

..... بينانغ ... وماادراك مابينانغ .. ماراح نخلص اسئله بس استحملونا شوي..

كيف الأمن فيها تقدرون تخرجون براحتكم في اي وقت والا لازم مجموعه معك او مرافق >>خوافه

المكافأت نزلت لكم على طول وباستمرار ,, والاتاخرت عليكم ..وتغطي مصاريفكم ؟؟؟

كم المبلغ الي احتاج اخذه معاي وانا مسافره ... تقريبا اذا كنت لوحدي ومعي فقط مرافق واحد

ان شاءالله بدخل ماجستير هل الجامعه تشترط توفل
الماجستير بالبحث كم مدته ..

جو بيانغ كلمونا عنه يعني برد والا حر رطوووبه .. .

كيف الا سعار عندهم الملابس اللاب توب الأدوات الكهربائيه والأكل >> (فيه رز عندكم)

لو جينا فيه أماكن شاغره بكثره في الفنادق اللي عند الجامعه .. والا بعد تعب واخاف زحمه ويمكن مانحصل .؟




انتم مسافرين الان ودعواتكم مقبوله باذن الله

ادعوووووولي بالقبوووول في الدنيا والاخره
تكفووووووووووووووووون


اختكم
سرور 2007