الرجاء المساعدة ؛ محتار وابغى شوركم

السلام عليكم ورحمة الله وبركاته ؛


كيف حالكم جميعا ؟ امل من الله بأنكم جميعا بأتم الصحة والعافية ؛


أنا كنت طالب مبتعث ع حساب شركة ارامكو السعودية في جامعة مانشستر ببريطانيا ؛ حصلت لي ظروف صحية أبعدتني عن الدراسة لفترة (عافانا وعافاكم الله جميعا) وللاسف خسرت بعثتي ومقعدي في الجامعة.


الحمدلله ؛ الله أنعم علي بالصحة والعافية وانا ارغب بالعودة للدراسة واستكمال مسيرتي العلمية ؛


أنا درست سنتين في بريطانيا ؛ خلصت فيها السنة التحظيرية والسنة الاولى من التخصص والجامعة اعطتني شهادة بدراستي والساعات اللي خلصتها ؛


المفروض يكون باقي لي سنتين بس ؛


عموما زي ما قلت لكم خسرت مقعدي في الجامعة وبعثتي والحين محتار ايش اسوي صراحة ؛


وعندي شوية اسئلة ابغى أسألها والشكر جزيل الشكر لكل من يساعدني ؛


انا فكرت اني احول لجامعة ثانية ؛ وابدا الدراسة علطول من السنة قبل الاخيرة لان مو باقي لي غير اخر سنتين ؛ وقدمت لخمس جامعات ومنتظر ردودهم ؛ لكن زي ما تعرفون هنا رسوم الدراسة غالية جدا ؛ فسؤالي هو ؛


هل من الممكن اذا تم القبول في السنة قبل الاخيرة مباشرة ؛ هل استطيع اني التحق ببعثة الحكومة وهم يدفعون لي الرسوم ؟ لان ما عندي استطاعة الصراحة ابدا اني ادفع رسوم الجامعة ولا اعيش هنا ع حسابي للغلاء وعدم توفر السيولة المادية.


اذا مو ممكن ؛ فانا فكرت اني اطلع لماليزيا ع حسابي الخاص لانها رخيصة واسعارها معقولة الين ما يفرجها الله والتحق بالبعثة ؛


فخاطبت اكثر من جامعة ؛ وجالي رد من ٣ جامعات ؛ university putra malaysia, university of malaya؛ university technology mara


قالو لي انه في امكانية اني اعادل المواد والحد الاقصى هو ثلث عدد ساعات البرنامج ؛ يعني تتراوح بين ٣٠ ساعة الى ٤٠ ساعة ؛ بس ما اقدر اقدم ع معادلة المواد الا بعد بداية دراستي في الجامعة ؛


و تخصصي هو Materials Science and Engineering ؛ في ماليزيا حدرس سواء Materials Science UPM او Materials Engineering UM) او Materials Technolgy UiTM


بس كلهم نفس الشي ؛ والشهادة تكون اما بكالوريوس علوم او بكالوريوس هندسة ؛ فبغيت اسالكم ؛ هل تخصصي مقبول في التعليم العالي وهل سيتم قبوله في الالتحاق بالبعثة ؟


وابغى اسالكم برضو عن ارائكم في هالجامعات الثلاث ؟ وايها اسهل في معادلة المواد ؟


اذا التخصص مقبول وتمت المعادلة ؛ فمعناتها راح اكون مستوفي لشروط الالتحاق بالبعثة ؛ فهل اقدر التحق بالبعثة بسرعة ؟ وهل هناك امكانية في استعادة رسوم الدراسة اذا قبل التحاقي بالبعثة ؟


اسف ع الاطالة لكن اخوكم في الله في ازمة وحبيت استفسر ؛ واذا عندكم اقتراحات لحلول ثانية ؛ رجاء لا تبخلو علي بشوركم.


جزاكم الله خير الجزاء ؛ والسلام عليكم ورحمة الله وبركاته.