شرح تطبيقات برنامج Excel2007 المستخدمة في المحاسبة والتحليل المالي

August 28th, 2010, 12:40 AM

السلام عليكم ورحمة الله وبركاته

مقدمة
برنامج Microsoft Excel هو أحد برامج Microsoft Office الذي لا يوجد أي موظف في العالم يستغني عنه مهما كانت وظيفته، ولكن نحن هاهنا سناقش بعض الادوات والدوال التي تكون شائعة الاستخدام في مجتمعنا المحاسبي مثل :
PivotTable
Sort
Filter
الدالتين : V-lookup + H-lookup
وبعض الدوال المرتبطة بها

أنا الصراحة أحب احيي واشكر جميع الأخوان والأخوات الي شجعوني وساندوني في تنزيل هذا الموضوع...

انا كنت في حيرة من أمري طيلة الايام الي راحت انه من فين اجيب البيانات – كنت افكر اجيب البيانات الي حأشرح عليها من الملفات الي عندي من شركات اشتغلت معاهم قبل كدا – بعدين قلت يا خي هذي معلومات سرية وانا كنت الوحيد الي اطلع عليها لاني من الادارة المالية – وما يجوز ان اظهر اسرار الشركة واسماء عملائهم والامور دي –

وجلست افكر اني اعرض بيانات في نفس الوقت مفيدة للاخوان والاخوات الي حيقروا هذا الموضوع
واخيرا وليس اخرا ربنا ألهمني وأرشدني الى موقع الهيئة السعودية للمحاسبين القانونيين – واتذكرت اني كنت ادخل على الموقع كثييير اول ما تخرجت من الجامعة لاني كنت ادرس الزمالة – وكنت دايما اطلع على المعايير و اقراها واتمعن فيها لكي اطبق بمقتضاها في مكتب المحاسب القانوني من خلال اعمال المراجعة والفحص واعداد القوائم المالية للشركات والمؤسسات –

لا أطيل عليكم لقيت عندهم جدولين- أي احد في العالم يقدر يفك الموقع ويطلع أسماء المحاسبون القانونيون السعوديون المرخصون في 21-7-1431هـ - ومكاتب المراجعة المعتمدة من الهيئة في نفس التاريخ.. وهي كالتالي :
1- أسماء المحاسبون القانونيون وبعض بيانات عنهم.

2- أسماء مكاتب المراجعة


طبعا في مهارات اساسية قبل ما اخش في لب الموضوع لازم تكونوا عارفينها لذلك حأسردها لكم على سبيل التذكير فقط
في الجدول الاول : اول شي لازم نرتب الجدول على اساس نبغ نحصل على عدد المحاسبون القانونيون في كل مدينة
أول شي نظلل الجدول فقط الي يحتوي على البيانات الي نبغاها من أول (المسلسل ) م حتى آخر عامود وهو رقم الهاتف او الفاكس ومن ثم ننزل الى نهاية الجدول
وفي طريقة سريعة باستخدام key board بدلا من Mouse وهي انكم تروحوا عند أول خلية في اول عامود(م) ومن ثم تضغطوا
Ctrl+Shift + السهم اليسار - وبكده تكونوا ظللتوا اول صف بالكامل
ومن ثم تضغطوا Ctrl+Shift+ السهم الي على تحت
وبكده تكونوا ظللتوا الجدول كله

بعد كده نروح ونضغط في اعلى الصفحة ونختار (بيانات DATA( ونلاقي شي اسمه فرز (Sort)


طبعا حتختاروا فرز حسب المدينة على اساس يرتب جميع الاسماء بحسب مدينتهم وبعدها تضغطوا موافق


زي منتو شايفين الاحساء فيها واحد والخبر فيها عدد اكبر وهكذا
بعد كده تظللوا الجدول كله مثل ماعملنا اول
وتروحوا في اعلى الصفحة وتختاروا إدراج (Insert) وحتلاقوا في أول شي خانة اسمها PivotTable
تضغطوا عليها حتظهر لكم زي كدا


تضغطوا موافق تجيكم صفحة جديدة انفتحت زي كدا


طبعا هذا الجدول الي قدامكم انتوا الي تتحكموا فيه يعني تختاروا البيانات الي انتوا تبغوها مو شرط تستخدموا كل البيانات – وفي نفس الوقت بيطلعلكم تحليل شامل ووافي لكل شي تبغوه :
طبعا خلونا نراجع هدفنا من عمل هذا الشي الي هو اننا نبغ نطلع عدد الاشخاص الي عندهم ترخيص محاسب قانوني في كل مدينة
فأول شي تروحوا تختاروا من الحقول المذكورة( المدينة) وتشدوا كلمة المدينة بالماوس وتضعوها تحت كما هو مؤشر بالسهم في حقل تسميات الصفوف Row Labelsومن ثم رقم الترخيص ومن ثم الاسم ومن ثم الهاتف نفس الطريقة تشدوهم واحد واحد الى نفس الحقل تحت
وانتبهوا على الترتيب عند شد الحقول الى تحت :
1- المدينة
2- رقم الترخيص
3- الاسم
4- الهاتف
لانه اذا حطيتوا ترتيب اخر ما حتجي بالترتيب او بالنتيجة الى احنا نبغاها
بعد كده نحط الحقل الاول والاهم الي حيجمع جميع الاسماء ويحطها كمجموع جنب اسم المدينة في اخر عامود
وهو حقل م(مسلسل) ونشده ونحطه في في خانة القيم (Values)
بعد كده في اعلى الشاشة تجدون خياراتOptions لتنسيق عرض البيانات بشكل مناسب اضغطوا عليها



بعد اختيار خياراتOptions يفتح مربع الحوار – بعدها تختاروا عرضDisplay
ومن ثم تختاروا تخطيط كلاسيكي Classic PivotTable layout
ومن ثم موافق – فتجدون الجدول اصبح بالشكل التالي :



بعدها تروحوا لاعلى الشاشة وتختاروا بيانات DATA وتلاقوا في ايسر الشاشة علامتين + وتحتها – بالاحمر والاخضر

طبعا هذي علشان اذا تبغوا بس الاجماليات تضغطوا ال (-) الاحمر مرتين او ثلاثة فيصير شكل الجدول:



طبعا حتقولولي معقولة عندكم 18145 محاسب قانوني ماشاء الله
اقولك لا في خطوة نسيناها – وصدقوني الواحد اذا مايغلط مايتعلم
تروحوا للحقل الي شديناه في القيم و تضغطوا عليه بزر الفارة اليسار



تختاروا اعدادات حقل القيم



حتلاقوا انه مختار مجموع Sum – تقوموا تختاروا الي تحته وهو عدد ( Count) على اساس يجمع الاسماء وليس الاعداد بدون أي عمليات اخرى
وتضغطوا موافق



وتروحوا على الجدول الاساسي على اساس تتأكدوا انه المجموع صحيح وحتلاقوه بالفعل 190 محاسب قانوني فقط
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــ

تقدروا تستفيدوا من الجدول هذا انه تخلوا لكم كمرجع رسمي تدقوا على مكاتب المراجعة اذا انكم تدوروا وظائف


اوفف تعبت اليوم – وأخيرا خلصنا الدرس الاول – ابغ اسمع ارائكم يومين كده ونكمل بعدها الدروس

واذا في ملاحظات او اسئلة فلا تترددوا

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ
طبعا ممكن البعض يتسائلوا اش حنستفيد احنا لمن نعرف عدد المحاسبين القانونيين في كل مدينة في السعودية
طبعا هذا مثال – من ملايين الامثلة فكل شركة فيها بيانات مختلفة فقد تطلب منك الادارة العليا تحليل تفصيلي ومجمل بمبالغ المديونيات التي على العملاء في تاريخ معين
طبعا مع تغيير الارقام والاسماء والاعمدة والصفوف
احيانا او في اغلب الاحيان تجدون البرامج المحاسبية فيها شي اسمه Export to excel
فاحيانا تنزل معلومات كثير انت ماتحتاجها بس تحتاج تحليل لبعض البيانات الي فيها

فهذا الجدول سوف يساعدك بشكل كبير وسيوفر عليك وقت ثمين الشي الي حتسويه في يوم حتسويه في اقل من ساعة
وانتوا عارفين قد ايش الوقت مهم جدا في حياتنا
اتدربوا عليها في اجهزتكم – وامتعوني باسئلتكم واستفساراتكم – سائلين الله عز وجل ان يوفقنا لما يحب يرضى

• نشر عبر تويتر
• نشر عبر فيسبوك
• نشر عبر جوجل