فواصل الجامعة الخليجية عند مايكروسكوب

September 15th, 2007, 02:55 AM

فواصل .........

أنا سألت قبلج عن الجامعة الخليجية ولا حصلت رد في أكثر من منتدى أقصد رد وافي وكامل والكمال لله ...

فكانت المواضيع متعددة ومتضاربة في الكلام والحقائق .....

أنا سافرت للبحرين في يوم الاربعاء الموافق 12/9/2007 وعلى طول من المطار للجامعة الخليجية

وكان الحوار التالي :

** (قسم التسجيل)

مايكروسكوب لموظفة التسجيل : صباح الخير أختي أنا تم قبولي عن طريق الانترنت وقمتم

بارسال رسالة القبول لي عن طريق البريد الإلكتروني وانا جاي أكمل إجراءات التسجيل واعرف طريقة وكيفية المواد التي تم معادلتها لي ...

موظفة التسجيل : حياك الله أخوي اذا ممكن تعطيني الرقم الجامعي .
مايكروسكوب : تفظلي رقمي هو ***********

أها أوكي أخوي أول شئ لازم توقع على انك تختار نوع الدراسة انتظام والا يوم بالأسبوع والا 3 ايام بالشهر .

وبعدين لازم اتسوي امتحان مستوي لمادة اللغة الإنجليزية بقيمة 75 دينار بحريني .

مايكروسكوب : أختي أنا مجتاز 6 ساعات لغة انجليزية بمعدل ممتاز .

موظفة التسجيل : لا اخوي لازم اختبار المستوى هذا .شرط من شروط التسجيل

مايكروسكوب : يا اختي ان مجتاز 6 ساعات وانتم تبون 6 ساعات للمادة يعني أنا مخلص هالمادة أساسا بالكويت ومرفق لكم شهادة من نيوهورازن انتي دارس 3 سنوات لغة انجليزية .

موظفة التسجيل : أخوي تقدر تراجع الدكتور يحي نائب مديرة الجامعة بخصوص هالموضوع . عموما في رسوم 25 دينار لزوم بداية أجراءات التسجيل .

مايكروسكوب : أختي انا دافع عن طريق DHL مبلغ 20 دينار كويتي مو بحريني يعني انا باقي لي عندكم 3 دنانير وانا مسامحكم فيهم ، هذا اللي اعرفه عن رسوم التسجيل .

موظفة التسجيل : لا هذا كان لبداية التسجيل بس كنوع من القبول المبدئي للأوراق .

مايكروسكوب : أنا حاب أعرف جميع الرسوم المطلوبة مني في هذا الكورس من إلى اذا سمحتي ؟

موظفة التسجيل : اوكي .

مايكروسكوب : اوكي أنا بروح نائب مديرة الجامعة بشوف مادة اللغة الإنجليزية وارجع لج .

:95:

ذهبت إلى نائب مديرة الجامعة :

مايكروسكوب : صباح الخير دكتور ويعطيك العافية

نائب مديرة الجامعة : حياك الله ابني

مايكروسكوب : دكتور انا من الكويت وابي ادرس حقوق وهالتخصص مو معترف فيه بالكويت .

هل ستعترف الكويت بالتخصص .

نائب مديرة الجامعة : أبني الكويت راح تعترف في الحقوق بس بدها وقت .

مايكروسكوب : دكتور اخاف اسجل وادفع هالرسوم النار اللي عندكم وبالأخير ما يعترفون .

نائب مديرة الجامعة : انت سجل واهم اكيد راح يعترفون .

مايكروسكوب : طيب واذا ما اعترفوا اقدر أحاول لتخصص الإدارة المعترف فيه مع تقدير وضعي يعني دكتور اتسوون معادلة خاصة لي في هذه الحالة .

نائب مديرة الجامعة : ابني ما اقدر اعادل ادارة بحقوق .

مايكروسكوب : دكتور والحل اذا ما اعترفوووا

نائب مديرة الجامعة : ابني انت سجل ولا يطوفك الوقت .

(مدير الجامعة قمة في الأخلاق ولكن العملية تجارية ) :102:


ويرجع مايكروسكوب لموظفة التسجيل :

مايكروسكوب : مرحبا أختي ، ها خلصتي من اجراءات الرسوم .؟

موظفة التسجيل : هذا الجدول اللي حطه لك الدكتور ...

مايكروسكوب : بس مو لازم انا اللي اختار المواد ؟

موظفة التسجيل : لا هني الجدول احنا نحطة لنظام ال3 ايام في الأسبوع ..

مايكروسكوب : يعني واذا مادة ما حبها من أول ومابي أدرسها مثل القانون التجاري ؟

موظفة التسجيل : مايصير اخوي جدول ثابت هذا .

:94:

مايكروسكوب : أوكي وجم الرسوم ان شاء الله ؟

موظفة التسجيل : رسوم المواد 1200 دينار .
رسوم بداية تسجيل 25 دينار .
رسوم اختبار تحديد مستوى 200 دينار .
عند رسوم كتب هذي بعدين تدفعها . :95:

مايكروسكوب : يعني جم التوتال ؟ دوختيني وبصراحة دايخ من الطيارة ...

موظفة التسجيل : المجموع 1425 دينار بحريني ...


مايكروسكوب :111: يفكر بالنحشه بكل صراحة ويقول : اوكي اختي انا بدفع باجر


-----------------------------------------------------

عموما يا فواصل الجامعة مو معترف فيها في الكويت إلا في تخصصين فقط و السعودية احتمال ما تعترف فيها ...
____

الجامعة بكل صراحة صغيرة وموقعها موشئ والطلبة اللي فيها مع احترامي للبحارنه كلهم ..

موشئ من بنات وشباب ... لا حظت ملابس ومادري شنو وسوالف بالمممرات يعني الوضع مو شئ ..

يعني أنا شخصياً بعد الوضع اللي شفته بعيني أنا ما أنصح ...

وللعلم الكويت معترفه اعتراف كلي بجامعة الخليج (حكومية) بالبحرين بكل تخصصاتها ... جامعة البحرين معترفة الكويت بتخصص طب بشري فقط .....

وآسف على الإطالة

• نشر عبر تويتر
• نشر عبر فيسبوك
• نشر عبر جوجل