استفسار السكن في كندا

انا مبتعث نفسك
في نفس المنطقه وفي نفس المعهد

ياليت هالاجابات من ذوي الخبره يقولون لنا

وبخصوص السكن مع عوائل ؟؟ كيف القى عائله ماهي الطريقه ؟؟

السكن بفانكوفر يبدا من اول الشهر الميلادي انا توهقت وجيت بنص الشهر وجالس بفندق لازم اللى بيجي يجي قبل بدايه الشهر ب4 ايام بالقليل علشان مايتوهق بالسكن والنظام هنا بس عن طريق النت تحصلي سكن اول الايام لازم فندق لان السكن لازم تشوفيه واهم شي خليك قريبه من معهدك فى السكن لان البرد قوي وصعبه التنقل مسافات مشي وتحصلي سكن مفروش وغير مفروش حسب رغبتك والاسعار حسب المنطقه تختلق وحسب الاثاث

الله يعين بس الحين ابدو باجرات الفيزا والامور الثانيه والسكن الله ييسر

السكن هنا سهل سواءً بآثاث أو بدون وإذا بدون أثاث سهل إنك تشتري أثاث حبه حبه أو مره وحده حسب إمكانياتك مع إحاطه بأن الثلاجه ومغسلة الملابس وغشالة الصحون والفرن غالباً تكون موجوده خصوصاً بالشقق الجديده وبالنسبة للإيجار ممكن تحصل شقه بأية وقت بس هنا العقود تكتب من أول يوم بالشهر يعني ممكن تدقع فرق 10 أيام وتسكن وفيه موتيلات بالداون تاون ب 1600دولار إذا أخذتها شهري وتكفي ل2أو 3 أشخاص مثل هذا الفندق Tropicana Suites On Robson
وعنوانه
1361 Robson Street, Vancouver, BC V6E 1C6
وبالنسبه للي تسأل أو يسأل عن السكن مع عائله هذي فكره جيده لتطوير اللغه والتعرف على ثقافات الغير وفيه عوائل ما تآخذ إلا بنات فقط وفيه قروبات بنات يسكنون مع بعض بحيث كل وحده تسكن بغرفتها ويمنعون دخول الشباب مع إنهم بالغالب من أمريكا الجنوبية بس أنا أتذكر كم وحده قالت لي عن الكلام هذا وأشوف إعلانات كثير عن سكن للبنات فقط فيه موقع ممكن تحصلون فيه سكن وأثاث وكل شي وتقدرون تنسقون قبل ما توصلون وهذا مره مشهور بأمريكا وكندا الرابط حقه
craigslist: vancouver, BC classifieds for jobs, apartments, personals, for sale, services, community, and events
وإذا فيه أسئله جاهزين
وبالتوفيق

آسف يا إخوان كنت أحسب الأول ولد والثاني بنت طلع العكس أعذروني لكن بالنسبه للسكن مع عوائل جيد بس حاول يكون السكن قريب من القطار الجوي "السكاي ترين " هذا مهم جداً لأن الجو بارد وبالنسبه لأكثرية العوائل الكندية اللي لغتها الأصليه إنجليزي عندهم حيوانات بالبيت مثل كلب أو بسه إذا ما عندك مانع راح تحصل بسرعه وإذا ما تتبي فيه عوائل كثيره لكن للأسف لغتهم الأصل ليست إنجليزيه حيث 55%من سكان فانكوفر يتكلمون لغات مختلفه ببيوتهم .وحسب تجربتي أحسن وأنظف العوائل الفلبينيين وأحسنهم أكل الهنود على إن أكلهم حار شوي بس زين والكنديين ممتازين بس عيبهم شوي وساخه ويحبون يجمعون الكراكيب والسيارات القرنبع وقطع الغيار ويربون بالغالب كلب أو إثنين بس أنا سبق وأن سكنت عند عائله وكانوا عسل بس عندهم كلبين وبستين شوي ويجيبون فيل بس أنا موسع صدري وقلت لهم أهم شي غرفتي ما تدخلها الكلاب علشان الصلاة والقطاوه تمشى عندي عادي .

تعالي كولونا ارخص واحسن اوهدى في عائله عراقيه محافظه مكونه من ام وبنت عمرها 19 سنه واخ بالمدرسه وبيتهم قريب من الكولج

حسب خبرتي الطويلة في كنداالاستقرار في فانكوفر او اي مدينة اخري يجب ان يتم علي ثلاثة مراحل:
المرحلة الاولي النزول في فندق قريب للمعهد على الأقل فى االسبعة أيام الأولى ريثما تأخذون بعض الراحة من السفر الطويل وتقومون بتكملة اجراءات التسجيل بالمعهد واجراءات صرف المنحة مع الملحقية الثقافية فى السفارة السعودية
فى تلك الأثناء تقومون بخطوة مهمة جدا وهي فتح حساب محلي في البنك وشراء شريحة موبايل وفتح ملف في الملحقية
الخطوة الثانية البحث عن شقة مفروشة لايجار لمدة شهر واحد وانا انصح بالتعامل مع مكتب عقاري او سمسار يعرف نظام البلد والشقة ايضا يجب ان تكون قريبة من المعهد

المرحلة الثالثة هي السكن في شقة غير مفروشة بعقد ايجار ثلاثة الي ستة شهور في مكان مناسب بعد معرفة المزيد من المعلومات عن البلد ومعرفة اين سيكون قبول الجامعة او المعهد الاكاديمي

عموما انا مستعد للمساعدة في اي خدمة
فقط اتصلوا على الرقم

001-604-700-7897

او ايميل

internationalcanadian@yahoo.com

Skype:
international.canadian

ابو محمد

بعد اذن صاحبه الموضوع

بس ياليت تفيدونا عن الحضنات وكيفيت اجراءاتها في فانكوفر وكم اسعارها بصراحه عند بحثتي تفجاءت باسعار مبالغ فيها 1000 دولار

طبعا العمر سنتين عند وصولنا لكندا

يالله ياخوانا افيدونا ربنا يسهل علينا وعليكم

طيب شرايكم لو اسكن بشقه لمدة اسبوع هلا بتكون ارخص؟؟
وبعدها نبحث عن شقه مفروشه للايجار الشهري

شكرا لك اخوي ولجميع الاخوه الي شاركو بموضوعي
سؤال اخوي هل الملحقيه بفانكوفر ام بتورونتو؟
يعني لمن اجي احجز هل احجز لفانكوفر ام لتورونتو لإستكمال بياناتي؟