مسآعدة

السلام عليكم .. أنا ادرس موارد بشرية ( جامعة كوانتلن ) و نسبتي بالثانوية ٧٧٪ و جبت القبول بكل بساطة و لله الحمد، و اذا تفكر تجيب منها قبول نصيحة روح للجامعة بنفسك و راح يعلمونك كيف الطريقة و توفر على نفسك نصب المكاتب و هجولتهم. و لكن اللي لازم تعرفه انه الدراسة في كندا مو دجة زي ما انت متخيل، و التخصص يتطلب منك مذاكرة يومياً و لو لمدة ساعتين على الأقل .. طريقة التدريس مختلفة تماماً .. الدكتور يعطيك المحاضرة و يتكلم خلال ساعتين و انت مطالب بأنك تقرا و تراجع و تذاكر الفصل كاملاً (Chapter ) لانه راح يختبرك فيه المحاضرة التالية .. ايضا لازم تكون محضر للمحاضرة قبل ما تجي للكلاس .. انت طالب مبتعث و لازم تسعى على مستقبلك .. أزيدك من الشعر بيت انه نظام الملحقية اختلف عن السابق .. اول كان لمن تفتح ملف اكاديمي يممدون لك فترة الصرف سنة كاملة، أما الان يممدونها فقط لين ما ينتهي السمستر و ترفع نتايجك و يشوفون اذا نجحت او لا .. الله يوفقك و ييسر أمرك .. تحياتي

الله يجزاك خير اخوي ما قصرت بس بالنسبه للجامعه شرايك فيها وين موجوده فيه في فانكوفر وكيف قوتها وبالنسبه للقبول بيني وبينك اللغه حقتي مو قويه يعني اخاف اتوهق وما ادري وش السالفه وغير عن كذا وش المعاهد اللي تتبع لها وهل فيه معهد للغه بنفس الجامعه وموقع لاهنت يالذيب

السلام عليكم .. اقرب فرع لفانكوفر هو فرع ريتشموند - ٢٥ دقيقة بالكندا لاين من محطة Water Front - بالنسبة لقوة الجامعة ما راح اقولك انها خورافية و الكلام اللي ما منه فايدة .. بس التعليم الكندي بصفة عامة حكومي .. يعني جودته عالية سواء في جامعة كوانتلن او غيرها .. و في الاخير بترجع السعودية و معك شهادة من كندا بإذن الله و لا احد بيسألك وش قوة الجامعة .. و لكن الدولة معروفة بسمعتها في التعليم. و بالنسبة للقبول حتى لو لغتك صفر روح لمكتب الـ Registeration و قولهم كيف اقدر احصل على Conditional Acceptance Letter في تخصص Human Resources و على طول بعلمونك .. و اذا نويت تجي للجامعة و احتجت مساعده عطني خبر عالخاص و ابشر ،، تحياتي

طيب حلو اخوي ما قصرت لكن انا ابي ادرس كان عندهم انجليزي يعني ابي ادخل المعهد حق الجامعه واخلص عندهم انجليزي بعدين علطول ادخل الجامعه بس المعهد حقهم بالجامعه نفسه صح والا انا غلطان ودراستهم باللغه سمعت ان معهدهم موقف من الملحقيه او بالاصح تدرس 4 ايام بالاسبوع ومن الساعه 10 الى 2 ما ادري اذا الكلام صح او لا هذا بالنسبه للمعهد وبالنسه للتخصص الموارد البشريه بما انك تدرسه شرايك فيه وهل الموارد البشريه اقوى من البزنس او الماليه لاني محتار بينهم ادري تعبتك معاي وقروشتك بس وش نسوي وانا خوك هذي اخر استفساراتي وانشالله ما ثقلت عليك

المعهد كان موقف ٢٠١٠ و انتهت المشكلة من زمااااان و لكن يستمر كذب و دجل المكاتب على الطلاب .. دراسة الانقلش ٤ ايام في الاسبوع .. لان كل مستوى في اللغة ما فيه الا مادتين اساسيتين و تقدر تضيف مواد اضافية .. اما التخصص يعتمد على عدد الساعات اللي مسجلها .. في مرحلة اللغة تطالبك الملحقية انك تنزل على الاقل ٩ ساعات حتى لو دوامك يوم واحد بالاسبوع .. المهم انه عدد الساعات يكون من ٩ و فوق .. اما بالنسبة للتخصص نفس الكلام الملحقية مالها اي علاقة في عدد ايام الاسبوع اللي تداومها .. ان شاء الله يكون ثلاثة اعشار اليوم .. اهم شيء تكون منزل ١٢ ساعة و اكثر .. اما بالنسبة للتخصصات و ايها اقوى من الثاني ما في شيء اقوى من الثاني .. ادخل الشيء اللي انت حابه و حاس انك راح تبدع فيه .. تحياتي

اخوي اللي حاب تتخصص نصيحة حاول انك تبتعد عن الموارد البشرية
انا متخرجة من هالتخصص وماعليه طلب كثير بسوق العمل بالسعودية
الادارة المالية مطلوبة والاقتصاد والتخطيط بكل فروعه
وعموما البزنس متشابك في بعضه بس بالنهاية الشهادة رح تكون باسم تخصص واحد
والاهم انك تختار الشي اللي انت تميل له وايضا يكون مطلوب بسوق العمل
بالتوفيق,,

الاخت Light Strings .. أحترم رأيك .. و لكن مو معناته انك انتي ما حصلتي على فرصة عمل يخليك تحكمين على التخصص كله .. هذا قياس باطل و محدود بنظرة شخصية. كم وظيفة قدمتي عليها و تم رفض طلبك ؟؟؟ هل قمتي بعمل احصائية لسوق العمل السعودي و احتياجاته لتخصص الموارد البشرية ؟؟؟ هل قمتي بعمل احصائية للخرجين بهذا التخصص في السعودية و عدد من حصل منهم على وظيفة؟؟ أم كلها هرطقات بلا دليل ؟؟!! ،، اختي الكريمة كل ما يتعلق بأمور التوظيف و ايجاد فرص عمل هو في الاساس توفيق من الله ثم بأجتهاد الشخص ( لكل مجتهد نصيب ) .. و مصداقاً لقول الله تعال : إن الله لا يضيع أجر من أحسن عملا. لو كل واحد دخل المجال اللي يحبه و اخلص فيه .. ما راح يضيع تعبه بإذن الله .. و لو كان تخصص سهل و بسيط .. تحياتي

الرزق من عند الله سبحانه اولا واخرا
وكلامي ليس هرطقات بلا دليل ؟؟!
انا كنت في ادارة التوظيف بالبنك العربي الوطني ورايت التخصصات اللي ياخذونها حتى فيه ناس جايبين ماستر من برا بس للاسف ماياخذونهم للاكتفاء من تخصص معين
وفي الادارات الحكومية ايضا الاف من خريجين التربية لم يجدوا وظائف واهم الاسباب لتكدس كمية كبيرة من الطلاب والطالبات في تخصص معين
انا ما احكم على وظائف او احدد قسم معين
ولكن احتاجات سوق العمل تختلف من عام الى عام وهالشي درسناه بالجامعة وعايشناه بالواقع
والله يوفق الجميع

البنك اللي كنتي تعملين فيه يبحث عن تخصص معين ( سواء ادارة - محاسبة - تسويق .. الخ )، عشان كذا ما كان يتيح فرص لحملة هذا التخصص .. هذه كل القضية .. أما بالنسبة للإدارات الحكومية ما يحتاج نذكرها من ضمن سوق العمل السعودي لأن أغلبها ماشي بالواسطات .. اسمحي لي اقولك مرة ثانية قياسك باطل و كلامك غير منطقي لانك تحكمين من على اساس المؤسسة اللي عملتي فيها .. و ما تدرين عن الشركات الاخرى و عن طبيعة اعمالها المختلفة سواء تجارية او صناعية و ما تدرين عن احتياجاتها .. المشكلة انه مافي اطلاع عام .. الواحد صار يحكم من خلال البيئة المحيطة فيه فقط .. تحياتي