السلام عليكم ورحمة الله وبركاته
هلا بالمبتعثين والمبتعثات
حبيت أعلمكم ألي صار معاي عشان تتأكدون أنه أموركم ماشيه تمام ولالا
طال عمركم أنا مبتعث على دولة نيوزلندا ولسه ماجاني قبول للحين وقاعد انتظر المسج
المهم قبل كم يوم مكتوب في موقع الوزارة أنه فيه ملتقى للجامعات في سفارة نيوزلندا
رحت أنا للملتقى والحمدلله كانت روحتي جداً مفيده وإلتقيت مع عدد من مندوبين الجامعات
وإستفسرت عن أشياء كثيره ،،،
بس ألي صار أنه جتني الموظفه بالصدفه (دينا المصريه ) ألي بالسفاره المختصه في التنسيق بين الوزارة
والجامعات هناك ،، وقالتلي أنت من ضمن طلاب برنامج خادم الحرمين
قلت أنا إيه
قالتلي كويس بئا بدور اسمك في الأوراق وبشوف على أي جامعه مسوين لك تقديم الوزاره
المهم وأثناء البحث أنا مستانس قلت ياسلاااام اللحين بعرف وين أروحله وأبرتاح نفسياً
المهم وتدور وتدور وتدور وتدور قلتلها آيه الحكايه آيه
قالتلي أنت أكيد ضمن برنامج خادم الحرمين
قلت أنا آآه أما الآيه أنا بهزر :115:
المهم آخر شي قالتلي مالقيت اسمك مع الطلاب ألي مرسله أوراقهم
قلت أنا كيف !!! يعني هذي اسماء جميع المبتعثين ؟؟
قالتلي آآآه كلهم
بس ممكن أنت ماعطيت أوراقك الوزاره
قلت كيف ماعطيتهم وأنا أول مارسلوا لي رساله نقزت لهم << حتى ياويلي جاي من الساعه 4
ومركز القبول يفتح 5
المهم وجزاها الله خير ماقصرت جلست تدور يمكن ساعه وبعدها عطتني الأورق وقالتلي دور
اسمك بنفسك إذا تحب تتأكد
المهم وأنا ألي أقوول في نفسي ياولد دور أنت يمكن هي ماتعرف
المهم وأدور وأدور وأدور
وآخر الشي نفس النتيجه حتى إني دورت بالرقم ونفس الشي
وطلعت يوم السبت المغرب من السفارة وأنا متحطم لأنه كنت أظن قبولي جاي للوزاره من زمان
ويعطون الطلاب القبول على دفعات عشان مايصير عندهم زحمه
وبعدها رحت لمكتب الترجمه عشان أترجم الأورق من جديد وقالي المكتب تعال استلم أوراقك
بكره قلتله ياحبيبي ألي فيني مكفيني تراني اليوم مداوم من الفجر واللحين الساعه 8 ومارجعت
لبيتنا ،، وقلتله أعطيك ألي تبي بس تطلعه اليوم
<< يقووول قصة حياته :103:
خلصت الترجمه وماوصلت بيتنا إلا 11 (الله يهدي ألي كان السبب)
يوم جاء من بكره طلعت من الدوام العصر ورحت للوزاره وقلت السالفه
قالي الموظف إيه اصلاً حنا نرسل الأورق على دفعات
أنا قلت في نفسي على دفعات !! (والدكتور عيسى قايل في الملتقى قبل شهر أنه مرسلين كل الأوراق)
المهم أنا ماقتنعت بكلام الموظف هذا ( حسيت أنه يصرفني )
رحت للموظف المطوع ألي في الزاويه اليمنى وماقصر الله يجزاه خير
قلتله السالفه وقالي اصبر بدور اسمك من بين أسماء الي ارسلنا اوراقهم
ويدور ويدور ويدور
ماحصل اسمي :116:
قالي يمكن أنت ماسلمت أوراقك
قلت أنا اول واحد مسلمها وووووووين ماسلمت اوراقي !!!
قالي طيب عطني أوراقك وأنا برسلها مره ثانيه وإنتظر أسبوع
وش رايكم ؟؟؟؟؟؟؟؟
يعني لو مارحت لملقتى الجامعات ولو ماجت الموظفه وسألتني بالصدفه !!!
كان وش يصير << يمكن يروحونه بطياره بلحاله بعد المبتعثين بسنه :106:
طبعاً هذي مو أول مره يضيعون أوراقي
بدون مبالغه هذي يمكن المره الثالثه أو الرابعه
لأنهم ضيعوها قبل أيام ماقالوا لنا جيبوا الأوراق بعد القبول المبدئي
الله يهديهم بس وإنتم تأكدوا وأنتبهوا لايصير لكم زيي
