إلى كل من هم في كرايســــــــــــت شيرج .. للضرورة

مرحبا أخواني ..

انا ان شاء الله اسوع وبمشي لـ كرايست شيرج ..

لكن ماحجزت من معهد .. في صديقي هناك قدام يقول اذا وصلت انا اضبط امورك ..


لكن تكفووون بخصوص المعاهد .. هو يقول أفضل لك المناطق الريفية والقرى ..


بس اخاف يكون المعهد مو جيد .. او ماتوجد مواصلات ..


تكفون افيدوني بالمعاهد الممتازة .. وبنفس الوقت مايكون فيها عرب كثير ..

انا ما احب ابعد كثير عن وسط المدينه .. لتوفر الخدمات طبعاً ..


أو وش رايكم اسمع كلامه ..

انتظركم تكفوون .. لكم دعوة في ظهر الغيب ..

هلا والله اخوي حياك الله بين اخوانك

بالنسبه للمعاهد فيه معاهد جدا ممتازه مثلا عندك

Learn English at Languages International. Study in Auckland & Christchurch, New Zealand.

وكليه cpit

Christchurch Polytechnic Institute of Technology

ومعهد seafield على البحر
Seafield School of English


وفيه معاهد في الستي واسعارها جدا حلوه

واذا احتجت لشي بلغني وابشر بعزك

وعلى فكره الاجواء الان بارده جدااااااا... اليوم الصباح نزل ثلج يعني جهز نفسك بالملابس الشتويه

والجاكيتات


موفق ان شاء الله

اهلا اخوي

والله بجد من خلال ملاحظاتي : العرب اللي ماتطق بابه مايجيك يعني لاتخلون العرب عائق في مسار تعليمكم

اللي بيتعلم وعنده الطموح راح يتعلم لو كان داخل السعوديه.

انا جربت ودرست في فصل صديقاتي تايلانديات لكن للاسف النتائج كانت اني لما نطلع في البريك خارج الفصل يتكلون لغتهم الخاصه وانا جالسه متملله بينهم لا انا اللي اتعلم ولا انا اللي مع بنات جلدتي مبسوطه.

وفوق هذا كله السبيكنج عندهم مضروب فيخربون اللغه اكثر من يحسنونها.

داخل الفصل الواحد : يمنع منعا باتا التحدث بغير اللغه الانجليزيه وكنا انا وزملائي السعوديين نتكلم انجلش مع بعض وحتى لما اطلب منهم شي للاستعاره كنت اكلمهم انجلش وبالمقابل هم نفس الشيء.

اما العرب المهاجرين فكانو ماشاء الله فلونت بالانجليش فساعدوني كثير البنات بالذات في التعبير بالجمل الطويله وكانو يصححون لي التعابير على سبيل المثال : كنت لما اعبر عن مع الوقت اقول : with time

الين صديقتي العراقيه (ولا تقبل تكلمني عربي الا نادرا) صححت لي التعبير بافضل وهو قول : After while.

اما بالنسبه للمعاهد : من تجربتي افضل واحد كان : ELA معهد جامعة اوكلاند

بعده CPIT في كرايستشرش

بعده : CCEL في كرايستشرش.

حسب رأي الاغلبيه : ACG في اوكلاند

UNITEC في اوكلاند.

طبعا انا افضل المدن الكبيره لكثرة الخيارات في المعاهد والاماكن الترفيهية خاصة ان نيوزلندا بلد صغير لولا الطبيعه اللي ربي وهبها مافيها شيء يجذبك لها.

ماجد الرياض ..

بيض الله وجهك يالذيب ..

أفدتني كثير كثير ..

ولك دعوة بظهر الغيب ..ياتاج راسي ماقصرت ..

الف شكر وتحية لك ..

ولاتوصي حريص .. يقولون البرد يذبح في كرايست شيرج .. وباخذ أحتياطاتي معاي ..

دعواتك لي بالتوفيق ..

ودي ..

نجمة الفجر ..

قبل أرد عليك ..

احب اشكرك جزيل الشكر ..

يعلم الله استفدت كثير من معلوماتك القيمة ..

سواء لي في موضوعي هذا .. او حتى مواضيع الشباب ..

كثر الله من امثالك .. وجعلك بصحة وسعادة ..

بخصوص الاحتكاك ..انا معاك في كلامــك ..

لكن شخص شخصين .. سواء في المعهد او خارجـة عادي ما يأثر ..

ويمكن نتعاون انا وياه .. مثل ماصار لك ..

لكن انا اقصد مايكون أغلبه عرب .. بحيث مانقضي وقتنا في ممارسة اللغة ..



وجميع المعاهد اللي ذكرتيها دخلت عليها .. وبالفعل أعجبتني ..

لكن في فقرة ياليت تعلقين عليها ..

ان زميلي ينصحني في المناطق الريفية .. وش رايك انتي .. هل معاهدها جيدة ..

وحطي في بالك ان المعيشة بتكون صعبه لان اليوم ينتهي بدري هنــاك ..

فـ محتاج نصيحتك ..

واشكرك جزيل الشكر ..

عزيزي المنظم الى قافلة الطلبه بكرايست شيرش الاخوان ما قصروا اعطوك المفيد ... لكن في حال وصلت كرايست شيرش مجرد توجه الى ستار بوكس بجانب الباص اكسشينج في الستي . مجرد وصولك هناك اسال عن العمده او معاونيه .. سيخبروك الشباب بكل ماتريده ويساعدونك بكل شي حتى الاشياء الصغيره .. طبعا الشباب السعوديين هذا مكان تجمعهم . غير اللي بتلقاهم بطريقك.
من الاثنين الى الجمعه من الساعه 3 عصرا الى 9 مساء.
السبت والاحد من 10 صباحا .
توصل بالسلامه .

الف شكر لك أخوي ..


ماقصرت .. ورايتك بيضاء ..

واكيد الجميع راح يتعاون .. ماعندي شك في هـ الشيء ..

وفقك الله ...