انتهوا كل الطلاب من كامل التمرين ،، وانا
وهي مابدينا في الفقره الثانيه !!! والمدرس (
ديفيد ) قال وش فيكم ماانتهيتوا ؟؟ قلت بصوت راااخي ، آسك ذا مون ،،،، قال سوري ؟؟؟ قلت اقصد يعني هي سالتني وحبيت اقولها اجابه مفصله
،، قال طيب هي جاوبت على سؤالك؟ ،، قلت نوت يت (
يعني لسا ) ،، البنت فطسسست ضحك دقيتها بكوعي وقلت اسكتي لاتفضحينا وحنا ماسوينا شيء ،،
ديفيد قال اجل الحين تطلع
انت وماكرينا على
السبورة هي راح تسال وانت تجاوب ...
انا انبسطت واقول بنفسي جاك يامهنا ماتمنى وطلعنا عالسسبورة قلت هااااي للكل نتمنى انا وماكرينا نعطيكم معلومات مفيدة <<< طبعا نوع من التميلح واوريها اني وشسمه
قامت وذكرت الاسئله ليين وصلت قبل الاخير ..
قالت عطنا كم عادة تسوونها في ليله الزواج !!!!!
قلت السؤال ذا مو بالورقه !!
قالت ايه بس حبيت اسال ومايخالف استخدم الحاضر التام في القرامر ،،،
نظرت في المدرس وشفته يستمع زي اللي يقول جاوب ،،،
قلت اوكي .. تبدو حفلاتنا بشكل عام مختلفه عن الوضع عندكم وخاصه في حفلات الزواج اللي تتجهز فيها العروس من الافتر نون حتى وقت خروجها للحفل تروح للمكان المخصص للحريم والعريس بطبيعه الحال يكون في المكان الخاص للرجال ثم يبدا لعريس يستقبل قرابه ٨٠٠ الى ١٠٠٠ رجل و....... مادريت الا والفرنسي من اخر الفصل ( وااااااااااااووو توووووو متششش ) ،،، قلت شيء طبيعي احنا تعودنا بمثل هالاعداد والتفاف كللللل الاقارب والاصدقاء وكللللهم يجون بزي وااحد اما الحريم اشكال والوان والهوايه المحبببه عندهم الرقص الشششرقي ،، << انا اشرح كاني مطرود على فكره انا لمااشرح ابذل مجهود بدني ونفسي مررره صعب بسبب الانقلش وانا من الناس اللي اهم شيء عندي القرامر ماارتاح الا اذا قلته صح ،،، كملت كلامي :
ماتدرون ان الهوايه الاكثر متعه عند بناتنا هي الرقص والبنات خاصه يعيشون احلى ايامهم في حفلات الزواج ذي ....... هنا سالني المدرس قال طيب مثل مااعرف مافيه نوادي او بارات خاصه بالرقص في السعوديه !!! ليش ؟ .....
قلت طبيعي راح تترتب اضرار كثيره على هذا ، لانه اذا سمحنا بهالشيء لازم نسمح بالخمر والبير وهذا فيه ضرر كبير .. انت مايعجبك اكيد لما يطلعون الناس من البارات اللي ينام بالشارع واللي يترنح في الطريق واللي يصبح عليه الصبح وهو مو ببيته .... <<< اذكر عكت معي ذي الجمله ماعرفت معنى يتمايل او يترنح فااااا بطبيعه الحال اضطريت اشرح واسوي زيهم ههههههههههه
قلت لهم هو غير ان ديننا يمنع هالشيء الا ان عقولنا ترفضه على الاطلااااق ،،،
هنا جاني سؤال مااااشي مليووون من الفرنسي قال ،،،، ليه بناتكم يلبسون حجاب ؟؟؟
انا نظرت في ماكرينا جنبي بنظرات تعب وعتاب قلت ... سؤالك مررره حلو ..... ضحكت علي بنت الذين من قلب وقالت اااي نوووو ،،، هنا قالنا ( ديفيد ) اجلسسوا ...
عدت اليومين الثانيه على خييير الا ان ( ديفيد ) قال ترا بكره بتجيكم مدرسه جديده ،،، بدا على الوجوه شيء من فرح بهذا الخبر ،، الا انا ،،، ياخوووفي أفل ان لووف تواااايس ،،،،، قالي ايميليو الفرنسي واللي صار خويي الجديد ، شيء حلوو يعني من بكره بتصير تحضر بدري ،،
قلت ترا مايهمني ،، اللي يهمني انك بتروح فرنسا نهايه الاسبوع وماعاد اقدر اقابلك ،،
قال لااا خلك على وعدك تجي باريس السنه الجايه ونتقابل ،،
قلت اكيد ان شاء الله <<< على فكره حصل لي معه موقف جدا محرج بقوله لاحقا اذا جا وقته ،،،
كعادتي جيت متاخر نص ساعه عن الكلاس فتحت باب الفصل وانظر في المدرسه اللي اعطيها ٢٨ من عمرها وكان في وجهها حماس لتعليم الانقليزي ،، قلت قود مورنينق للكلاس كله وقلت لها سوري ،، I slept on ،،،،راحت علي نومه قالت مو مششكله ،، معك ( هولي ) ،،، قلت ( احمد ) من السعوديه قالت نايس تو ميت يو ومن الخرابيط ذي ،، وانظر في زملاااي واشوفهم مندمجييييييين يحلون شيء مدري وشو ، كأن على رووسهم الطير نظرت في ( هولي ) قلت وش اللي صاير ؟
قالت تشوف هالاوراق اللي معلقه على جدران الكلاس ،،، تلقى فيها معلومات عن ايرلندا ،، زملاك قرووها والحين يحلون الاسئله ،، على بال مايحلون انت اطلع عليها واي شيء منت فاهمه قولي ،،، قلت حلوو قريت الاوراق ومع كل ورقه اناديها وهي ياحلييلها تشرح من قلب ،،، انهيت القرايه وانهوا الطلاب الاجابات ،،،
قلت لهولي طيب وش اسوي الحين مامعي احد وكنت انظر في ماكرينا ،،، قالت لااا انت راح تكون ( حكم ) وتطلع عالسبورة تسجل نقاط كل فريق ،،،،،،، قلت فكره حلوة طلعت عالسبورة وسجلت اسماء الفريقين وبدا كل فريق يلقي على الثاني سؤال ،، ولازم كل فريق يجاوب عالسؤال المطروح ،،،، مشت الاسئله الثلاثه الاولى زي الفل ،،، جا سؤال من الفريق الثاني لفريق ماكرينا كذا كذا وكذا ،،، ماجاوبت عليه خويتنا ولا اللي معها من فريقها ،،، انبسسسطوا الفريق الثاني وفله وصياح وكل واحد يدق يد الثاني ،،،، .....قلت لحظه ،،،،،
وش الجواب ؟؟؟ قال الفرنسي مايهم ،، اهم شيء ماعرفوا الجواب !!
قلت الجواب وشووو ؟؟
قال ماكتبناه ،، قلت يعني كاتبين سؤال ماتعرفون اجابته ؟!! وعطيتهم صفر الييييم قام الفرنسي والاسباني يحتجون ويشتكون للمدرسه هولي ،، قالت هو الحكم انا مالي شغل وبعدين لازم تعرفون الاجابه << وقدر الله وجا السؤال الرابع وفريق ( ماكرينا ) قال السؤال لفريق الفرنسي ،، وماعرفوا الاجابه فريق الفرنسي،،،،،، فقالوا لها طيب وش الاجابه ؟؟
قالت احمد عطنا نقطه ماجاوبوا ،،،،
قال الفرنسي لا مافيه ماتعرفونها ووحدة بوحدة وصفر تاخذون ،، قلت انا الحكم محد يتدخل لا انت ولا هي !! <<<( لاانت ولا هي ) كنت اقولها لهم بالانقلش دونت سبيك يو اند يو مع حركات بيديني مثل اللي كان يسويها خليل جلال في مباراه فرنسا والمكسيك ،، قمممممه الصرامه ، قلت يلا ماكرينا وش اجابتكم ،، سدحت اجابه ومن حسن حظها كانت قريبه من الاجابه الصح عطيتها نقطه وقت احتجاجات تعم المكان ان النطق خطأ هههههههههههه
انتهت المسابقه وفاز فريق ( ماكرينا ) ،،، باركت لهم كثييييير ومن قلب ،،،، قال الفرنسي انت متحيز للفريق الثاني ،، قلت طبيعي ،، وعطيته غمزه ههههههههههههههه
مرت الساعتين طبيعي ولما جا وقت طلوعنا من السكول تفاجانا بشدة المطر وانا الاهبل اللي كل يوم أأجل اشتري مظله ويطلع ماعندي سالفه ،، قلت ل( جيلسون ) البرازيلي اللي كان معي في المستوى اللي قبل ، معك مظله ؟؟؟ قال معي سيكل ،، تمنيت وقتها اعرف ترجمه ( بشر امك طيب ) ،،،
نظرت في الفرنسي لقيته جالس بصاله الاستقبال ينتظر القيرل فرند تطلع ،،، واقول ياارب لاتشغلنا الابطاعتك ،،،
ناداني قال اجلس لما يروح المطر ،، قلت فيني النوم ،،
قال اجل تدري !! بما انه بكره اخر يوم لي في ايرلندا بعد السكول خلنا نتغدا مع بعض ،، قلت وااااااااو ذاااتز سااااااوندز قرييييت فكره ولااحلى منك بس وين تبينا نروح اي مطعم؟ <<< وانا ناااااسي اني برمضان ،،،،،، قال وش رايك نتغدا سمك مع شبس في مطعم انا اوريك هو بكره ؟؟ قلت تم اللي تشوفه ، نظرت برااا ولا المطر بنفس شدته ،،،، الا شوي تطلع ماكرينا ومجهزة المظله حقتهااااااا ورايحه جهه الباب بتطلع ،، قلت يلا اميليوو باي باي ، فطسس ضحك على شكلي وعرف نيتي هههههههههه طلعت برا وقلت ،، اللللللله هذا المطر حديث عهد بربه ، بلا امبريلا بلا خرابيط ،، والتفت على ماكرينا قلت لها جووو حلوووو ( ازنتت ؟ ) ،، قالت متأكد ؟ قلت ايه احب المطر،،،،، قالت بس صعبه تمشي يمكن تمرض ،، جات ومشت جنبي وتقاسمنا المظله <<<< هنا تتوقف عقارب الزمن .. ويبدو كل شيء حولي صافيا نقيا .. الا لظى الاشوااق .. يلفحني ويسعر من براكيني ،،،
وصبري لم يعد يقوى على اخماد مافيني ،،،
المطر وشدته ،، والجو وبرودته ،،،، لم يعودا كفيلين لاخماد ذاك اللظى ،،،،،،
دعوني أخبركم ماحدث في وقت لاحق ... مع هذا الموقف ( ... ) .. ومع غداء الفرنسي في اليوم التالي اللي يصادف يوم الجمعه ألقــاكم أحمد بلس August 16th, 2011, 06:29 PM
August 16th, 2011, 03:27 AM
^