متحطمين يآئسين من القبول .. أورآقكم وعفشكم ماكملتوهـ ..تعآلو ابيكم بكلمة رآس

السلام عليكم ورحمة الله وبركآته

<< ياكثر ماتسلم هذا ثاني موضوع بنفس الساعه

ياحلووين المكتوب مبين من عنوآنه .. يمكن كلامي موجديد على الكل ..

لكن مآخلاني اكتب هالموضوع إلا ضيقتي من الكلام اللي اقراه..

والناس اللي تتفنن في التحطيم سواء تحطيم نفسها او غيرها

موضوعي هذا اعتبروه نصيحة لوجه الله ..نصيحة من اخت لأخوانها وخواتهآ ..

واول نصيحه لاتتركون اوراقكم ناقصه الى فتره التدقيق بحجة (( أخاف ماانقبل وجهدي يروح على الفاضي ))

ياحلويين ابذلو الأسبااااب اللي عليكم سووه والباقي على الله

على الأقل لو ربي ماكتبها لك تكونين مرتاحه نفسيا انك سويتي اللي عليك بس الله ماكتبها لك

مو تتركون أوراقكم ناقصه وبعدين تقولون ماانقبلنا هذا اسمه اهمال مانقبلتو لانكم ماخذتو بالأسباب بغض النظر عن اي شي ثاني

فيه فرق بين التوكل والتواكل .. لما اتوكل على الله واخذ بالأسباب .. ولما اتواكل واقول الله يسهل ويعيني وانا حاطه رجل على رجل وماسويت شي..

أنا وفيه غيري كثيير معدلاتنا اقل من المطلوب صح خايفين بس مايأسنا صح أحيانا نتحطم بس نرجع نتفائل ..

تواجهنا مشاكل ماتخلص من محرم وجواز واوراق ناقصه وبيانات خطاء و و و و بس نحاول نسعى فيها..

انا والله لي ثلاث ايام ماانام الا ثلاث ساعات بس عشان اروح الجامعه اخلص اوراقي ..

صح اني متأخره بس انا ماكنت ادري عن هالأوراق الا من المنتدى هنا وانا لي فتره بسيطه متعرفه عليه شوفو تاريخ التسجيل

هو نفسه اليوم اللي عرفت فيه المنتدى قبل هالتاريخ ماكنت ادري عن اي شي في البعثه غير الإستماره

ودخلته حايسه بس شوي شوي تعلمت والله ان كل واحد فينا يواجهه يوميا مشاكل الله اعلم فيها

بس مانيأس .. من عرفت حاولت اجمع كل شي ناقصني الأخوان والخوات هنا فادوني بنصايحهم وخبراتهم

ومثل مااستفدت حبيت افيد غيري .. الى الحين فيه مشاكل عندي معلقه والله ماانحلت بس الله كريم واللي فرج اللي راح يفرجهم بإذن الله ..

::

تذكــروا هذي فرصة تجي مرة في العمر يمكن ماترجع تتكرر بحياتك مره ثانيه

حاولو تغتنمونها ان انقبلتو الحمد لله والشكر واسجدو سجود شكر لرب العالمين على هالنعمه

وإذا ماانقبلتو لاتكتئبون فكرو انها خيره والحمد لله على كل حال ( وعسى أن تكرهو شيئا وهو خير لكم )

والأهم بكل الحالتين ضميركم بيكون مرتاح لأنكم سويتوا اللي عليكم

ولو ماكسبنا من هالبعثه الا معرفتكم الطيبه ..
::

هالايام بداء العد التنازلي للمرحلة السادسه ومابقى على انتهاء فتره التسجيل الا 48 ساعه

وكلها كم يوم وتوصل رسائل الوزارة

في الهفتره ارجوكم مابي ادخل المنتدى واسمع اشاعات تحطم الناس النفسيات والله ماعادت تتحمل أكثر..

خلو إيمانكم وأملكم بالله كبييير .. ووآسطتكم رب العالمين فوق كل وسيط ..

ولا تنسون حديث الرسول صلى الله عليه وسلم ..

رمضان قرب وحتى في غير رمضان اوقات الإجابه معروفه للكل ..

أخيرآ اعتذر على الإطاله بس شي بخاطري ومن محبتكم قلته ..

أتمنى ان أثر فيكم لو شي بسيط ..

بالتوفيق للجميع والله يسهل لنا جميعا ويوفقنا دنيا وآخرهـ ..

همسهـ ..

لآ تحطم لو تحطم لكـ أمل .. أعرف إن الله يحبك وإبتسم ..

لآ تقول الحظ عمرهـ ماكمل .. قول أنآ حاولت بس الله مآ قسم ..