طبعا ما بتكلم عن النسخ اللي سويتيه وكيف اني جلست ربع ساعة احدث في الصفحة على بالي ان فيه خطأ ,, الين اكتشفت انك ناسخة بطريقة خنفشارية تعفس راس اطلق كمبيوتر <<< حقد وعصب
شوفي وانا اخوك ,,, الموضوع بسيط جدا جدا جدا ,, وتراي خبرة ابتعاث من عام 2007 ,,
دام ماعندك وقت ,, ولازم تختارين معهد عشان تقدمينه بكره ,, انتي ركزي على المكان اللي تشوفين انه يناسبك ( ناس تدور الرخص وناس تدور الفلة وناس تدور الاجواء ... الخ )) ووتوكلي على الله وطبي على اي معهد معترف فيه من الملحقية واختاريه ,, صدقيني لو اخترتي احسن معهد او اسوأ معهد مابتفرق كثير ,,, لأن معاهد امريكا من خلال تجربتي ما بتعطيك في احسن الظروف والاحوال اكثر من 30% ,, والباقي كله مجهود شخصي ,, اتقان اللغة ماهو علم تدرسينه وتذاكرينه وتتقنينه ,, اللغة مهارة لازم لها ممارسة و محيط كله انجليزي في انجليزي ,, وهذا الشي تقدرين تخلقينه بنفسك ,, انا ملاحظ كثير من الشباب والبنات مركزين على سالفة وش احسن معهد ,, وعلى بالهم ان المعهد بيزرع اللغة فيهم زرع << اكل نفس المقلب زمان ,,,, المعهد بيعطيك قواعد اللغة اللي درستيها في المتوسط والثانوي ,, وبيعطيك شي اسمه بارافريزنق حق انك تصيغين الكلام اللي في الكتاب بطريقة ثانية ,, يعني لو تدرسين على النظام هذا سبع سنوات ما بتتقنين اللغة زي ماتتخيلين ,, كل اللي عليك انك تفهمين القرامر من المعهد ,, وبعد كذا عليك بالافلام اللي يكون فيها كتابة للكلام بالانجليزي ,, واجلسي شوفي الفلم او المسلسل عشر مرات واجلسي رددي معاه كل الكلام اللي ينقال الين تحسين انه قرب يجيك فصام في الشخصية ,, ولازم تقرين على الاقل ساعتين في اليوم كتب او جرايد او مجلات او اي شي وتتأملين في تراكيب الجمل وتترجمين الكلمات الجديدة ,, وهذا الشي اللي يعلمك لغة ,, اما المعاهد والله مابتطلعين منها باللغة اللي تبغينها ,,,,
ادري اني طولت عليك بالكلام ,, بس محد قال لك تشتكين لنا هههههههههههه
نرجع لموضوعنا ,, بعد ماتختارين لك معهد وتداومين فيه ,, بتقابلين سعوديات بالهبل ,, واحلى شي في امريكا ان الميانة تطيح خلال ربع ساعة بالكثير ,, وهم بيدلونك على اشياء كثير وبيجاوبونك على كل الاسئلة اللي تدور في راسك وبيختصرون عليك المسافات ,,, ولو ما عجبك المعهد او الولاية ,, النظام يسمح لك تغيرين المعهد مرة وحدة ,, يعني بتقدرين تختارين على اقل من مهلك ,, وبالنسبة للجامعة لا تقدمين الا من امريكا ,, لأن عندك سنة كاملة تدرسين فيها لغة ,, وخلال الستة شهور الاولى بتلقين لك جامعة تحبينها وتحبك ههههههههه ,, واحلى مافيها انك لما تحتارين في شي ,, في اقرب ويك اند تروحين انتي وزوجك للولاية وتزورينها وتشوفين بنفسك ,,,
كل اللي عليك الحين انك تختارين لك ولاية مبدئيا ,, وسجلي المعهد حقها في الملتقى ,, واختاري لك معهدين ثانية احتياط لو كان فيه تكدس او شي من هالقبيل ,,,
majed170 December 10th, 2011, 12:04 PM
7 "
الناس تدوّر معاهد كويسة تابعه لجامعات فيها تخصصها وأنا أدور معهد في مدينة تناسب محرمي ولاّ ما في روحه
على الله بس