مقابلتي بالتفصيل الأحد 2 اكتوبر بالسفاره الامريكيه بالرياض ..

السلام عليكم ورحمة الله وبركاته

اخخخباركم علومكم .. ماحب المقدمات خخخ

حبيت اقولكم وش صار لي بالمقابله عشان الكل يستفيدون ,,

أولا .. بعد المقابله اكتشفت ان الشعب السعودي يحبون التهاويل والتخويف

طبعا انا توي طالع بكالريوس ان شالله موعدي كان 2 اكتوبر الاحد الساعه 9 .. وصلت السفارة على 8 ونص كذا
وصلت وصفيت طابور مع العالم قعدت حوالي ثلث ساعه لين جاء دوري تناديك اللي بالشباك وتطلب منك ثلاث أوراق ..

1 - نموذج الأبلكيشن DS-160 اللي فيه صورتك كأنه فيزا
2 - إيصال سامبا ..
3 - جوازك

ترتبها لك وبعدين يفتحون لك الباب وتدخل غرفة التفتيش ينخخخلونك نخل انا عن نفسي حتى الجزمه وانتم بكرامه قالو لي
شيلها وحطها بالجهاز يعني زي تفتيش المطار ..

المهم خلصت تفتيش تروح وتدخل السفارة جوا اول ماتدخل تلقى قدامك طاوله واحد جالس عليها يطلب منك صفحة الابلكيشن DS-160 اللي تشبه الفيزا
ويمشي عليها بالجهاز حق الباركود بعدين يعطيك رقم ويقولك ادخل الغرفة وانتظر .. طبعا انا كان رقمي بعيد شوي بس يمشوون بسرعه مايطولون
يوم جا رقمي طبعا فيه واحد ينظم يقولك رح الكاونتر الفلاني جا رقمي وقالي رح الكاونتر الفلاني قلت اوك .. رحت لواحد لبناني اتوقع .. بس حبيب واخلاقه عسل ..
طلب مني ورقة الابلكيشن DS-160 اللي تشبه الجواز والـ I-20 اللي قبول المعد اول الجامعه وايصال سامبا والجواز والضمان المالي وقالي معك كشف حساب قلت ايه قال كويس عطني اياهـ وعطيته وسألني سبق ورحت امريكا قبل ؟ قلت له لا .. قال اوك رتب اوراقي وحطها في ملف وخلاني ابصم بالجهاز بكل الاصابع وقال روح انتظر حتى ينادو عليك للمقابلة الثاني قلت اوككي ..
رحت جلست وفيه لبناني متعاون جدا يرتب وينادي بالارقام طبعا بنفس الرقم اللي كان معك يعني حاول تحفظه يمكن يضيع او اي شي ..
المهم يوم جا رقمي قالي اللبناني رح للكاونتر الفلاني قلت اوكك اول مارحت طلع امريكي .. وجهه بشوش ويطمن صراحة اخذ مني الاوراق اللي رتبها لي هذاك وسألني اسأله ماحفظتها بالترتيب بس بقولها لكم ..
سألني ..
أول شي .. ماهي الولاية التي ستذهب لها .. وجاوبته .. قالي اوك
وسألني ماذا ستدرس في امريكا .. ؟ قلت له اول شي معهد بعدين بدخل جامعه قالي اوكي ..
وش تفكر اي تخصص قلت له مادري قال ايش هندسه طب ؟ قلت له ممكن هندسه .. قال اوكك
وسألني أخبرني عن الدول التي سافرت اليها من قبل ؟ وقلت له اياها كلها .. قالي اوكي ..
وسألني هل الوالد اللي راح يتكفل بمصاريفك .. ؟ قلت له نعم .. اوكي
ايه وسألني عن درجاتي في الثاويه قالي كم نسبتك قلت له معي الشهاده تبيها قال لا موب لازم بس علمني كم .. وجاوبته ,, ايه وخلاني ابصم بعد ..

ثم قالي اوكي كل شي تمام رح سدد فيدكس والفيزا راح توصلك بعد اسبوع ان شالله ,, واخذ الجواز

رححت سددت فيدكس ومشيت طبعا رسوم التسديد 65 داخل الرياض .. خارج الرياض ميه وشوي ناسي كم بالضبط
وبسس وسلامتكم وياناس ترا والله انها تساهيل ومافيه شي يخوف ابدا خلك واثق من نفسك ولا يهمك احد ولا يهمونكم اللي يخوفونكم هنا تهااااويل تراها ..

جلست في السفاره من 9 ل 10 ونص تقريبا طبعا اكثر الوقت انتظار المقابلات كلها على بعضها 5 دقايق تقريباَ


وسلامتكم والله يوفقنا وياكم ..

الله يوفقك ويطمنك


بالتوفيق ياغالي :)

الله يوفقك يارب في دراستك ويسهل أمرك

زي ماريحتنا وطمنتنا ...


بالتوفيق

الحمد لله , الله يوفقك يالغالي ويعجل بفيزتك

عالبركة إن شاء الله و على فكرة اللي في الرياض سفارة مو قنصلية