عطوني الورقة الصفراء وطلبو كشف حساب 3 شهور ... سواليف

اكتب الموضوع وانا توي جاي من السفارة..


طبعا نود ان نلفت عناية قراءنا الكرام بان المراحل منظمة جدا وليست عشوائيه حتى دخول الأشخاص الواقفين في الطابور للسفارة كل واحد لحاله يعني ليس على شكل مجموعات

1- الساعة 6:35 دقيقة تقريبا وصلت السفارة ووقفت بالطابور وكان قدامي 30 شخص تقريبا
(التفتيش الخارجي حق حي السفارات نظامهم محد يدخل قبل 6:30 حسب كلام العسكري. لكن ما اتوقع ثلاثين شخص قدامي دخلو خلال خمس دقايق)

2- الساعة 7:30 فتحت ابواب السفارة وتحرك اول شخص واقف في الطابور الى الكااونتر الخارجي اللي يتأكد من موعدك وياخذ جوالك يحطه في ظرف ويسلمك الظرف ومعه رقم.( طبعا انا واقف بالطابور انتظر لما جاء دوري )

3- تتوجه الى الباب اللي يدخل لغرفة التفتيش الأول والدخول مع الباب واحد واحد ( وعند التفتيش الأول اي شي معك لازم تدخله مع الجهاز حق الشنط حتى ( الحذاء ) اكرمكم الله. ويستلمون الظرف اللي فيه جوالك) وبعدها تطلع من غرفة التفتيش باتجاه المبنى الكبير للسفارة.وانا ماشي قابلني حارسين معهم سلاح مدري وش يبي لا وشرق اسيوي اللي معه السلاح من الخوف حسبته جاكي تشان.

4- تدخل المبنى الكبير وتمر بالتفتيش الثاني على السريع وتتوجه للغرفة اللي فيها الكاونترات اللي يشيكون على اوراقك , فيها كاونترين رقم 1 و 2 والثالث الكاشيير للتسديد (اول مادخلت الغرفه كان هندي واقف عند البوابة وعطاني رقم ثلاثين وكانو واصلين رقم 17 وانتظرت لما جا دوري رحت رقم 2 وحد مصرية اعتقد, اشوفها رجعت ناس يعدلون على اوراقهم ونفسيتها وهي تتكلم معهم مثل وجهها , المهم سلمت اوراقي لما شافتها ناظرتني وضحكت قالت ايه الحلاوة دي اول مره شخص يجيني اوراقه كاملة . قلت شي يبشر قالت ان شاء الله الله يسهل عليك وقالت انت عارف الجامعه اللي رايح لها وتخصصك والمدينة قلت ايه قالت لان اللي يقابلك بيسألك خلك جاهز وجلست تتكلم, انا شفتها تسولف طقيتها ميانه وقلت كم تتوقعين تاخذ الفيزا قالت حسب المقابلة هي اللي تحدد تكلمت معها كلام نسيته . المهم عطتني اوراقي بعد ما دبستها وقالت رح سدد , الكاشيير جنبها على طول وسددت 380 ريال على طول ماكان فيه احد قبلي بعدين عطاني رقم للمقابلة اللي هو 40

الاوراق اللي سلمتها ( الاستمارات لا تخلي فيها ايييي فراغ 156.157.158 + ورقة تسديد السيفيس + I20 + الضمان المالي(شخصي) + الجواز+صورة 5*5 مكشوف الراس بخلفيه بيضاء).
( طبعا الفضل يعود لله ثم لمشرفين وأعضاء الملتقى جميعا في ان اوراقي تكون كاملة اشكرهم وادعوا لهم بالتوفيق واخص بالذكر الأخ Help ).

5- بعد ما سددت طلعت من هذي الغرفة ورحت للمكان اللي جنبها وفيه تجرى المقابلات وكان واصل رقم 23 وفيه تقريبا 8 كاونترات وجلست انتظر على الكراسي الى ان حانت اللحظة الحاسمه << بحرب الأخ
كان فيه شخص قبلي مقدم ومعه ضمان مالي من المرحلة الأولى طلع رقمه على كاونتر رقم 7 ورفضه اللي يقابل قال الضمان المالي اللي معك قديم .
وبعد انتظار لم يدم طويلاً!! ويطلع رقمي على كاونتر رقم 7 واحد امريكي شكله من الخارج حبيب لكن ..

6- قالي بالانجليزي قود مورنينق رديت علىه قال هاو آر يو رديت << منب فاضي احول الكيبورد انجليزي
وكالعادة قالي ليش اخترت الجامعة قلت دكاترة نصحوني فيها والجامعة تصنفيها حلو ومن هالكلام بعدين سافرت برا والى أين , وهل سافرت سوريا او ايران او العراق << ما عندهم غير هالاسئلة
وسألني عام كم تخرجت قلت 2006 قال اوووه قود بعدين قال من اي جامعة ووش تخصصك جاوبت عليه بعدين طلب السجل الاكاديمي ( قالي ابغى درجات جامعة ) واعطيه اياه وطلب شهادة الثانويه واعطيه اياها. طبعا انا جايب كل الاوراق اللي عندي الى اسئلة الاختبارات بغيت اجيبهن.
بهاللحظه نادى مترجمه مصرية اعتقد
فتح السجل الأكاديمي وجلس يحدد المواد اللي آخذ فيها مقبول انا بالقلم الفسفوري مدري وش يسمونه المهم الصفحه الأولى كانت كل ترم فيه تقريبا مادة مادتين لكن الصفحة الثانية اللي هي حقة الاترام الأخير الحمد لله مافيها شي قالي عن طريق المترجمة انت وش كان وضعك اول سنوات الدراسة ليش ماكانت جيده مثل السنوات الاخيرة قلت كانت دراستنا باللغة الانجليزية ولا كنت اجيدها وقتها لكن تحسن لغتي وجلست اتفلسف عليه شوي .
قالي طيب وش بيضمن لك انه راح تأدي بشكل ممتاز بامريكا قلت يالحبيب تراخ مصختها عاد << لا لا تصدقون
قلت انا راح ادرس لغة هناك قبل وغير كذا انت شايف ان مستواي تحسن بالاخير وكل شي ممتاز قال اوكي.

بعدين قال لا زم تجيب كشف حساب لآخر ثلاث شهور وعطاني ورقة صفرا وجوازي وايصال الدفع وقال تعال اي يوم الساعة وحده وجب معك كشف الحساب والجواز والورقة الصفراء وسلمها لكاونتر رقم واحد . قلت عسى خير ان شاء الله
ومشيت ورحت استلمت جوالي وطلعت.

سؤالي هنا هلا لازم يكون الحساب حاليا يحتوي على مبلغ معين او يكفي ان الحساب يكون فيه حركة يعني فلوس طالع وداخلة وكم تقريبا ياليت تفيدوني؟؟؟
والسؤال الثاني سمعت ان الوزارة ممكن تعطي ضمان قريب هل اقدر انتظر الوزارة اسبوع اسبوعين مثلاً واقدم جوازي والورقة الصفراء ومعها الضمان حق الوزارة ؟؟؟

وشكرا لكم مقدماً

موفقـ اخوي ... ان شاء اللهـ ...

أخي "saleh I " والله إنهم تعبوك وسولك فيلم لكن أنصحك أنكم تلتزم بما قالوه لك وحسب معرفتي أن كشف الحساب حتى يعرف هل تستطيع أن تصرف على نفسك وتوفر مصاريف الدراسة أو لا, وممكن هناك مبررات أخرى ولكن قدم كشف الحساب وزيد عليه الضمان المالي لأنه إذا كان يبي يعرفون هل تستطيع تحمل المصاريف فالضمان المالي يكفي أما إذا كان غير كذا فلن يضرك وجود الضمان, ولكن عطهم كشف الحساب ولا تتركه ولا تتعب نفسك في التفكير الكثير. وأسأل الله لك التوفيق والسداد

كــــرز _ سعــودي

electronics

شكرا لكم وبالتوفيق للجميع وراح اسلمهم بكرا كشف الحساب وتتسهل ان شاء الله

انا قلي الموظف مو شرط مبلغ معين المهم مبلغ يثبت للسفارة انك قادر على تكفل نفقات الدراسة والمعيشة

saleh I
عزيزي سوي اللي اقولك عليك

انا طبعا طلعت ضمان مالي على حسابي الخاص

وطبعا اخذت الفلوس من الوالد الله يحفظة ووضع بحسابي الخاص مبلغ (100000)مية الف

ريال تكفي وتوفي ومشى الوضع بالسفارة والحمدللهة استلمت الفيزا

وهذاني كل يوم اتصبح وامسي بالفيزا لاني شبة فقدت الامل من وزارة التحطيم العالي

ولكن املنا بالله كبير ماعلينا المهم سوو اللي قلت لك وبس وان قدرت تحط مبلغ اكبر من كدة

مافي اي مشكلة اهم حاجة مايقل المبلغ من مية الف ريال وطبعا مافي اي مشكلة ان سويت

الضمان المالي حتى لو اسمع الوالد او اخوك اهم حاجة تذكر اسمع فية ورقم جوازك

واذا عندك اي استفسار قول ولاتستحي تراني حامي ومستعد لاي استفسار

تحياتي اخوك عرب نبراسكا

شكرا لك اخوي ok4b على الإفادة


هلا اخوي عرب نبراسكا انا سويت نفس خطواتك بالظبببببط لكن زيادة على ذلك طلب كشف حساب فوق الضمان المالي اللي بـ 10000 ريال تعرف هم حسب اللي يقابلك يعني مسكات

والله يعين

ابشركم سلمت كشف حساب لهم وجوازي وعطوني كرت ازرق وقالو راجعنا الاسبوع الجاي والله يوفق الجميع ان شاء الله

مبروووووووووووك ,وبالتوفيق

أخوي عرب نبراسكا

عندي سؤال أنا معي ضمان مالي شخصي موجه للجامعه وجبت به قبول من الجامعه وخذو الأصل وعندي صور منه هل ينفع أقدم به للسفارة , ولا لازم أسوي ضمان جديد باسم السفارة وش رايك .