وصلنا سياتل واي استفسار انا جاهز وابشركم كل شيء تمام
السلام عليكم ورحمة الله وبركاته
اللهم صلي على محمد عليه افضل الصلاة واتم التسليم
الحمدلله وصلنا سياتل يوم الاحد على الخطوط الاماراتيه وكانت رحله جيده ومثل ماتفضلوا الشباب في بعض المواضيع
الراحه فيه الطياره مو على الطيران نفسه ولكن على الدرجه اللي انت فيها لانه السياحيه تقريبا تتشابه في كل الخطوط والاختلاف يكون بسيط
اما بالمسافه او نوعية المقعد وانصحكم احجزوا مقاعدكم قبل الاقلاع وخلوه حول المخرج حق الطواريء او اول المقاعد لانه يكون فيه مساحه تمد رجولك فيها
وبالنسبه للاكل ايضا جيد وكل شوي يجيبون لك وجبه او فواكه يوزعون تفاح وقبل الوصول اذكر وزعوا بيزا ولكن ما اعجبتني من شكلها مدري ليش
المهم وقبل الوصول بس تبغى تناظر الثلوج على كندا وجبالها سبحان الله مناظر جميله جدا جدا
وبخصوص الفورم حق الجمارك والناس اللي يكتبون هنا انتبه وانتبه تشيل وتشيل
ابي اقولكم نقاط مهمه : اللي مايجيب اكل وخضروات وفصفص وليمون اسود حق الطبخ راح تمشي اموره تمام ان شاءالله وحتى لو جبتها وكتبتها راح تمشي امورك ولكن
يمرون عفشك على الجهاز ويمكن يفتحون الشنط
المهم احنا من نزلنا لقينا الجوازات وقبل نوصلهم سالني عسكري انت معك فيزا وقلت ايه وقال روح رقم 5 او 6 بالاخير ورحنا ومسكنا سرا
واحنا بالسرا جهزت الايتوني والجوازات والفورم حق الجمارك وفورم العائله اذا معك عائله تطلبه بالطياره واللي معه مبلغ فوق 10000 دولار هو بس اللي يكتب وبخصوص اخر فقرتين بالفورم
اللي فيها مربعين وجنبها علامة الدولار $ خليتها فاضيه لانها ماتخصنا وانا قريت في بعض مواضيع يقولون عبوها ولكن لما ترجمتها شفت انها ماتخص الطلاب
ونرجع لموضوعنا وانتم بالطابور مجهز الجوازات يجيك عسكري او بلبس عادي وحاط بطاقه برقبته معلقه ويقولك وش عندك وتقول طالب وتعطيه الجوازات والايتوني والفورم حق الجمارك ويكتب عليه وتنتظر يجيك الدور عند الموظف اللي على الكاونتر وفيه خط اصفر لا تتعدونه الا لما يخلص اللي قبلك
وبعدها يسالك وش عندك وسو نفسك ماتعرف الا انا طالب جديد وجاي ادرس بالمعهد الفلاني وراح يبصمك وياخذ بصمة عيونك وبعدها يقولك مع السلامه وانا قام يسولف معي قال اي منطقه بالسعوديه وقلت بالشمال وقال انا كنت اعمل بالجبيل وقلت وش اسوي لك ؟ارقص لك ههههههههههه لا والله قلت وشرايك بالجبيل وشكله جاملني وقال مدينة جيده ههههههههههههههههه
وبعدها تنزلون للفش ومن تنزل تلقى موظف جمرك يقول وش معك وتعلمه ويقرا الفورم اللي عبيته بالطياره ويوقع لك ويختم وتستلم شناطك واحتمال وانت تنتظر شناطك يجيك عسركي ومعه كلب الله يكرمكم ويشم الاغراض اللي معك
وبعدها تتوجه مع الناس ومن هناك تلقى مكتبين واحد يمين وواحد يسار وهناك يقررون وشوف اوراقك ويمكن يقولك مع السلامه ويمكن يقولك مرر عفشك على الجهاز
وبعدها تلقى سير ويسالك تبغى تاكسي وتجاوبه عشان يحط عفشك وتستلمه من الدور العلوي وتركب القطار ويوقفك عند بوابه ومنها تنزل وتطل السلم وتلقى عفشك على احد المسارات
ونصيحه لاتشغل جوالك الا باخر نقطه ..
وش باقي .. المهم انا وقتها لقيت واحد كاتب اسم العائله على ورقه وانا اضحك له واسلم عليه وقلت له ترا لغتي مو ممتازه وقام يضحك وقال خلك بجنبي ووين شناطك ولاتشيل هم << تراه امريكي ههههههههههههه بس انا فهمتها يعني لاتشيل هم
المهم اخذنا العفش وللفندق ثلث ساعه او 25 دقيقه يمكن من المطار للنورث قيت لانها كانت شوي زحمه على الهاي وي
والحمدلله تسهلت الامور لانه كلمت واحد وجاني ورحنا للبنك وفتحنا حساب وبعدها طلعنا شرايح شحن لانها افضل شيء ومافيه عقود تلتزم فيها ..
والجو هنا بارد شوي ويمكن بعضكم يشوفه بارد بقوه وهذا على حسب المنطقه اللي عايشين فيها
ولقيت بقالات عربيه ومطاعم وكل شيء متوفر حتى رز بسمتي وجبنه بوك لقيتها هههههههههههههه
واي سؤال او اي خدمه انا جاهز وان شاءالله مانقصر معكم ..
وما ابغى منكم الا الدعاء لنا والدعاء لوالدي
رد: وصلنا سياتل واي استفسار انا جاهز وابشركم كل شيء تمام
حمد للة على السلامة اللة يسهل دربك :cool:
رد: وصلنا سياتل واي استفسار انا جاهز وابشركم كل شيء تمام
ألف ألف ألف الحمدلله على السسسسلامةة
ما شاء الله ، واضح أموركم كانت متيسرة الحمدلله
أهم شي جبنة بوك
والله طمنتني ههههههههه
يلا كلها إسبوع و جايتكم بإذن الله ❤❤❤
رد: وصلنا سياتل واي استفسار انا جاهز وابشركم كل شيء تمام
كم شنطه مسموح لك في العفش وكم أوازانها ؟؟ وشنطة الاب توب فتشوها ؟
رد: وصلنا سياتل واي استفسار انا جاهز وابشركم كل شيء تمام
يعني ماناخذ معانا بهارات .... ممكن توضح اكثر ؟؟
رد: وصلنا سياتل واي استفسار انا جاهز وابشركم كل شيء تمام
الحمد لله على السلامه
جزاك الله خير تفاصيل مفيده لطلاب كندا
بالتوفيق
رد: وصلنا سياتل واي استفسار انا جاهز وابشركم كل شيء تمام
الحمد لله ع السلامة
كل ذا صار بالمطـــــار.. والكلاب التي تشم الشنط شـــــيء ثاني :confused: رعب صاااار
طيب اذا باخذ معي اكل هل اذكـــــره ولا مايحتأأأأج؟؟؟
رد: وصلنا سياتل واي استفسار انا جاهز وابشركم كل شيء تمام
الحمدلله على السلامه وان شاءالله تنبسط يارب وترجع لأهلك سالم غانم .
اقتباس:
المشاركة الأصلية كتبت بواسطة مبتعثة ماستر
الحمد لله ع السلامة
كل ذا صار بالمطـــــار.. والكلاب التي تشم الشنط شـــــيء ثاني :confused: رعب صاااار
طيب اذا باخذ معي اكل هل اذكـــــره ولا مايحتأأأأج؟؟؟
ايه اختي لازم تذكرينه
رد: وصلنا سياتل واي استفسار انا جاهز وابشركم كل شيء تمام
الف الحمد لله ع السلامه
طمنا اخوي كيف صر معاك على السكن هل رحت لفندق و لا لقيت شقه
و بالنسبه للمبلغ االي نحتاجه بحكم المعيشه حدود لشخصين
رد: وصلنا سياتل واي استفسار انا جاهز وابشركم كل شيء تمام
الحمدلله على السلامة الله يسهل أموركم ويوفقكم ويحميكم من كل شر يارب ....... كلها كم يوم باذن الله نلحقكم هناك .... الله يوفق الجميع ويسهل أمورهم