هل يؤمن جانب الوزارة ...؟

السلام عليكم

قد يبدو العنوان مستفزاً للبعض لكنه سؤال صريح للكثيرين جدا ومانتج الا عن سبب رئيس وهو اختلاف الكلام في الوزارة ومايتبعها مما يؤدي الى خسارة احيانا تكون جسيمة للطلاب

فكم مرة سمعنا وقرأنا عن عشرات ان لم مئات اتصلوا علوزارة وسمعوا كلام بعدين كلموا الملحقية كلام كللش غير .

كم مرة سمعنا عن ناس في اللغة وحصلوا قبول وناس خلصوا الدراسة بستمسر وماحصلوا شي ، لا والطامة الكبرى هنا اختلاف الكلام عند الملحقيات فملحقية كندا وامريكا الانضمام لها سهل ، اما استراليا فالانضمام عسر ، اما ماليزيا فمساكين

تصدقون كنت جالس مع احد طلاب ماليزيا وهو يدرس على حسابه يقول : رغم اني خلصت سمستر واتصالااااات باكثر من ملحقية ، مااااحد لك ، كل ملحقية تقول كلام مختلف تماااما ً، هذا طبعا اذا ردوا على الاتصالات ، والمضحك المبكي يقول لي انو جا يبغى يشوف وش اخرتها معاهم فاتصل الى الملحقية وكان الموظف من جنسية عربية وسأله سؤال و جاوبه الموظف ، وفي نفس الوقت كان خوي صاحبنا في الانتظار على التلفون لنفس الموظف وهم جنب بعض فسأل الموظف نفس السؤال لكن الجوال كان مغاااااير تمااما ً !!!!!
يعني المسألة مزاااااااج موظفين مش قرارات صارمة اكيدة! ، يعني التسيب و الاجتهاد العبثي والفوضى اللي تصير عندنا صارت في الملحقيات بالخارج !!!!

سمعنا ان ناس تقول - خللللك وراهم اتصل عليهم كل يوم وبيطفشون منك وبيضمونك بسبب القلق اللي عملته لهم وانا مجرب -
فلان يقبل فهو رجل محترم وعالي الاخلاق بينما الاخرين ماتعرف لهم .


الحين الجماعة في ماليزيا بالجملة متعلقين لان الوزارة يبدو انها ماهي عاجبتنهم ماليزيا بعد الان ، انا كنت في مكتب الموسى من فترة وواحد قدامي سأل شي عن ماليزيا ورد الموسى رد يفهم منه ان ماليزيا من الدول اللي عليها اكس من قبل الوزارة فلا ابتعاث اضافي وربما لا الحاق اضافي حتى !!.

الوزارة لايؤمن جانبها لان الواسطات شغالة زي الحلاوة وشفنا اناس بمعدلات هابطة لهم ابتعاث واخرين بمعدلات عاااالية مالهمش حاجة .

الوزارة لا يؤمن جانبها لان القرارات فجائية بدون ايييي تمهيد مما يكلف الطلاب خسائر قد تكون جسيمة . ومثال على ذلك اخر قرار اللي الغى الاعتراف المؤقت بجامعات بسبب تكدس الطلاب - اكياس طحين مو طلاب - وهالقرار جا بشكل مفاااجيء مما اربك الكثيرين جدا اللي عندهم قبول في هالجامعات او من يدرسون على حسابهم الخاص - والمواضيع في المنتدى تشهد -
مما حذا للبعض بأن يبدأ رحلة البحث عن جامعة من جد وجديد والسبب كله "" قرار فجائي " بدون اي تمهيد او تلميح حتى من الوزارة من قبل مدة كافية .

يعني مشروع ضخم زي الابتعاث مفترض فيه ان يكون واضح البنود لعدة سنوات للامام مش فجأة قرار وفجأة نقبل طوالي وفجأة مااافيي قبووول

مثال اخر
جاي قريب برنامج الابتعاث الرابع والى اللحظة عشرات التساؤلات تطرح في كل مكان عن الشروط والدول و خلافه و حتى اللحظة كل الكلام مش اكيد فاكثر الكلام " سمعت - واعتقد - ويمكن .." مافي شيء اكيد رغم ان عشرات الالاف من الطلاب يعولون على البرنامج القادم الكثير لكن من يدري قد تكون تخصصاتهم غييير مطلوبة او الدول المطروحة ليست مما انتظره البعض بحيث تكون الافضل لتخصصه فيذهب الانتظار الطويل سدى ويضيع عليه الاولي والتالي والسبب ( مافيه خطة واضحة مسبقة - كل الموضوع مفاجآت ) . لكن الظاهر الوزارة تتعمد المفاجآت في القرارات ولو كان الثمن اشهر وسنين من اعمار الدارسين ، ولازالت المفاجآت مستمرة في الوزارة والملحقيات !!!!.

الوزارة لا يؤمن جانبها والسبب كلام الجرايد اللي مادري صاير كانها جرايد صفراء تكتب فضايح مش جرائد اخبار محترمة ، واللي زاد الطين بلة ان الكلام تلقاه في الجرايد بس على الرغم من ان الوزارة لها موقع رسمي تقدر تبث اخبارها فيه بكل تفصيل مباشرة وبدون الاعتماد على خبطة صحفي لكن الى اللحظة الجرائد اهي المصدر الاول للاخبار .


انا اخاف من شي والله يستر
اخاف من اليوم اللي يطلع فيه القرار المفاجيء بايقاف الحاق الطلبة الدارسين على حسابهم الخاص لاسباب مثل - الاكتفاء او الميزانية ماعادت تسمح او اسباب تعرف الوزارات تخترعها كويس ، وبقرار مثل هذا راح يحطم الكثيرين الكثيرين اللي هم بالالاف وراح يرجعون لانهم مو قادرين على مصاريف الابتعاث والسبب قرار فجائي او تستر على قرار او خطة مستقبلية من قبل الوزارة .

خصوصا وان من فترة كثيرين من طلاب الدول العربية غير ملحقين رغم اكتمال الشروط بسبب ان ميزانية الدول العربية او عدد المقاعد الممنوحة للدول العربية لاتستوعب كل هؤلاء - وهذي سمعتها من عبدالله الموسى يوم كنت في مكتبه وواحد كان يسأله عن هالنقطة - ، فلا استبعد اطلااااااقا ان يكون هذا المقلب من نصيب الطلاب المبتعثين الى الخارج - الدول العربية ومصاريفها مقدور عليها اما في الدول برا وحوالي 140الف ريال سنويا فهذي والله مصيبة . الله يستر على الطلاب من مقلب الوزارة ان حصل .

الان اعود لنواة الموضوع وهو السؤال هل يؤمن جانب الوزارة ...؟

هذا الموضوع انما رسالة للوزارة يتمنى جميعنا ان تصل تلك الرسالة ليكون هناك مصداقية في التعامل ، لكن كالعادة لن تصل الرسالة ولن يكون هناك مصداقية كما عهدنا ، وان قرأ احد من الوزارة هذا الموضوع هذا وجهي ، فالوزارة تزداد غروراً يوما بعد يوم والله يستر من نتيجة هذا الغرور .

تحياتي

صــدقـــت أخـي الـعـزيـز .!.!.!

ووالله الـذي لا إلـه إلا هــو - قـسـم أسـأل عـنـه يـوم الـقـيـامـة - إن جـانـب الـوزارة لا يـؤمـن جـانـبـهـا ابــدا , وســل أكـثـر مـن 10.000 طـالب - كأكبر مثـال - كـانوا عـلـى بـعـد خـطـوة مـن الـسـفـر ورفـضـت الـوزارة إكـمـال إجـراءات ابتـعـاثـهـم وهم الـمـسـمـون بـمبـتعـثري الـمـرحلـة الأولى.

أتـدري بـمـا ذا ذكـرتنـي ؟؟

ذكـرتـني بالـمــثـل الـمصـري والذي ساحـرف فـيه لأقـول (( يـا مأمـن الـوزارة يـا مأمـن الـمي بالغـربـال ))


ولا بــد مـن يـوم مـعــلوم تـنـرد فـيـه المـظــالـم @@@@@@@@@@

صدقت
وانا احد اقرب اصحابي انضرب بالصميم في هذي والسبب اجتهاد احد الاسماء الكبيرة في البعثات بكلام لما عمله صاحبي بكل بساطة قال له : انا ماقلت لك هالشيء !!

ناهيك اللي راح عليهم اماكن انقبلوا فيها هنا ولا ضاع كم سمستر من حياتهم والسبب ان البعثة كانت طالعة لهم اساسا ً

حبايبي أختصار للموضوع كله اللي عندة واسطة هو اللي تمشي أموره

ماعندك واسطه أجلس الما ربك يكتبلك والنعم بالله.

((الشكوى لغير الله مذلة ))

اي والله ذكرتني بالايام قبل ما اسافر لامريكا

كنت رايح جاي على الوزاره احاول فيهم يمين يسار اول ما يذكرون لي واحد بالوزاره انقز له وبالاخير ما اطلع منه بشي

ثم بالاخير طفشت من الروحه لهم وقلت ابد مالك الا مخباتك

والله واروح واسالهم واحد ورا الثاني ولكن كل واحد يعطيني خبر غير



ثم قلت مالك الا مدير الدارسين على حسابهم الخاص هو راس الهرم على ما يقولون
اكيد بيصير عنده العلم الاكيد

واقول له لازم صير معي قبول مشروط عشان التحق بالبعثه قال لا

ورحت له كذا مره عشان اتاكد من المعلومات الي قالها لي

المهم يوم جيت هنا قالو الملحقيه ما نفتح لك ملف الا بقبول مشروط وهذا انا الحين ماكلها ادور لي على قبول مشروط حسبي الله عليهم

كلامكم كله صحيح

ولكن الى متى الواسطات والمحسوبات تعمل وتشتغل فوق الانظمة والقوانين

والى متى نبقى في تخلف المحسوبات وكأنه لا يوجد هناك مراقبة وحساب

والى متى تبقى ادراتنا هكذا بلا هوية

والله عند بدايات الملتقى قلت ان الكل سواسية والكل سوف يأخذ حقه بالنظام وبالقوانين الموضعة, ولكن للاسف ارى الان غير ذلك.

بين قوسين( )

نريد وزارات ادارات معاملات صارمة, قوية, منظمة من جميع النواحي , بدون مجاملات ومحسوبات لاشخاص دون اخرين ولكن الحكيم من يساعد الكل بكل ما اوتي من قوة لوجه الله ومساعدة ابناءه واخوانه.

نريد نظام شامل
و
متكامل

برنامج حقيقي ناجح نهجه . كما رسمه وأسسه والدي خادم الحرمين الشريفين - حفظه الله ورعاه و ابقاه يااااااارب -

فلا تعبثون يا موظفي الوزارة بهذه الأمانة التي سلمكم إياها والدي
و تلقون كلاماً على الطلاب يعود عليهم بخسار فادحة
و الثمن ربما يكون حياتهم والأكيد أنه سيكون وقت وجهد

ونريد مسؤلين ومستشارين متخصصين في الرد على اسئلة الطلاب لكل قسم من الابتعاث
و يفتحون ابوابهم ليلا نهارا لخدمة الطلاب
ويضعون رقم هاتف و بريد الكتروني وبريد عادي لكل مستشار
و أجهزة بريد صوتي حـتــــــــى
لايكلون ولا يملون من خدمة العلم و يسهلون السبل و الطرق لطلاب العلم و يفتحون لهم المجال
و يبعثون في أنفسهم الأمل
كما أشرقت بنا الحياة وبعث الأمل إلى أنفسنا بعد اعتماد والدي خادم الحرمين الشريفين برنامج الابتعاث
وكله أمل أن يحتضن البرنامج جميع طلاب العلم على اختلاف مستوياتهم بدون تفرقة من أي نوع كانت فكل هذا في سبيل الوطن و الدين .

شكرا لكم على هذا الموضوع اتمنى أن يتم تثبيته

يااااااخي تعرفون ايش اللي باط شبدي و مأزمني وجايب لي الحكة في نافوخي

الوضع في الوزارة وكل توابعها ناقصه موظفين يتابعون الجميع ، الى متى والعدد قليييل ومعدودين على اصابع اليد الواحيد يديرون عشرات الالاف من القضايا ؟

ويقولووووووون مااااافيه وظايف

الملحقيات محتاجة موظفين بدل ماتجيبون موظفين عرب يتلاعبون او سعوديين يتلكعون في العمل وعندهم محسوبية ، جيبوا اوادم تشتغل زيدوا الموظفين ، البطالة على افى من يشيل في البلد !!!

لا تلفونات الوزارة احد يرد ، لافاكسات تتلقى رد انهم وصلوا والموضوع قيد الدراسة ، لا ملحقيات ترد عالتلفونات والايميل وش هالحالة ؟

هذا اللي يسمونه عبث !!! عبببببثثث

لما تزعط الوزارة انهم مطلعين جيل واعد عشان يتعلم وتتفاخر في الاعلام وخلافه وهم اتفه التفاصيل العادية غافلينها.

في الاجواء اشاعة تفيد بعدم ضم طلاب البكالريوس للبعثة في عدد من الدول والى الان الخبر لم يتم تأكيده او نفيه بشكل واضح

«الجزيرة» - ناصر السهلي

أوقفت إدارة البعثات ابتعاث الطلاب السعوديين الدارسين على حسابهم الخاص لدرجة البكالوريوس في بريطانيا ونيوزيلندا وأستراليا وماليزيا وتسلمت الملحقيات الثقافية في هذه الدول خطابات الإيقاف بعد ازدياد أعداد الطلاب السعوديين فيها بالنسبة للطلاب الدارسين على حسابهم الخاص.

وبينت الإدارة العامة للبعثات أن قرار الإيقاف يشمل الطلاب الدارسين على حسابهم الخاص فقط دون طلاب برنامج خادم الحرمين الشريفين وربطت إدارة البعثات وقفها الابتعاث إلى تلك الدول بارتفاع أعداد الطلاب السعوديين المبتعثين إلى تلك الدول، وخاصة بريطانيا التي تحتضن نحو 6 آلاف طالب وطالبة, إذ تعد إجراءات الابتعاث إليها الأسهل من بين دول الابتعاث الأخرى.



الـــمـــــــــــصـــــدر
http://www.al-jazirah.com/139236/fr2d.htm


ومسلسل الاشاعات والفوضى مستمر
مادري هل هذي الاشاعة جس نبض او تحذير او مجرد اشاعة ؟؟

ترى هل هناك طريقة لتوصيل رسالة كهذي للوزارة ؟