طريقة تضمن لك سرعة الإلتحاق...

انا دخلت للبعثة مباشرة بدون ما اخلص اي ساعات اول ما باشرت الجامعة طلبت الالتحاق و جاني خلال شهر و الحمدلله

اخوي انت متى بدأت الدراسه وشنو تخصصك

بكمل سنتين الآن و ادرس هندسة كيميائية بكالريوس

اخوي سعد.. بالنسبه للرسوم وش سويت بها ؟ شلون سددتها ؟ مقدم او على دفعات او مؤخر ؟ وهل عوضوك الملحقية عن اول ترم ؟

جامعتي تقبل الدفعات و كانت أول دفعة بعد الدراسة 6 أسابيع و الحمدلله جاني القرار بعد حلول القسط الأول بيومين و كنت مبلغ الجامعة اني وصلت لمرحلة أخيرة للبعثة و كانوا متعاونين أما مصاريف السكن و الأكل دفعتها لأن ما يقبلون تقسيطها و البعثة ما عوضني عن أي شي

عوضوكـ عن رســــوم آلدرآسة ؟
أو ..
سحبت أللي دفعته من آلجآمعة ؟

انا ما دفعت رسوم كنت مسجل بنظام الدفعات و الحمدلله جات الموافقة بعد استحقاق اول قسط بيومين, و تكفلت الملحقية بالمبالغ مباشرة. اخوي حاليا له معاملة الحاق و اضطر لدفع الرسوم كاملة اول الترم ان شاء الله يجية الألحاق قبل نهاية السمستر و ابلغكم وش بيصير معه.

ماشاء الله , يعطيك الف الف عافية اخوي عالموضوع ,
انت حمستني كذا إني اعمل نفس هالطريقة , قبل عدة أشهر كتبت موضوع مشابه لموضوعك عن ارخص الجامعات للي يبغى يعمل هالطريقة
على هذا الرابط http://www.mbt3th.us/vb/forum178/thr...l#.VG8H7U0cTcs
ربما احد يستفيد من الموضوع باختياره الجامعة .
شكرا جزيلا لك وبالتوفيق للجميع

مساء الخير عليك وعلى الجميع

ما بلغتنا وش صار على اخوك.. عسى انضم وعوضوه..؟



أنا الآن بدأت هالسمستر بنفس طريقتكم والله يستر !

انا كنت ادرس على حسابي الخاص في الجامعة ..
وراح اضيف بعض المعلومات اللي راح تفيدكم بإذن الله ..


طبعاً انا ملتحق بالبعثة من المرحلة الثامنة (قبل نظام البوابة سفير) .. يعني كنت على النظام القديم !
وإلتحاقي بالبعثة اخذ مايقارب سنة و 6 شهور على ما تم إلحاقي وانا كنت طالب جامعي (مادرست لغة دخلت جامعة مباشرة على حسابي الخاص) ..
وهذا بسبب نظام الملحقية القديم كان كلام فاضي .. يعني الطالب مايعرف اصلاً وشهو عليه ولا تقدر تتواصل معهم واوراقك ماتمشي الا اذا جيتهم بنفسك !

حالياً ومن اللي شفته كنظام بالملحقية .. اهون بكثير من النظام السابق في مسألة الإلحاق ..
واللي انا اشوفه لو الطالب درس بالجامعة بيلحقونه مباشرة .. لان نظام الوزارة تلحق أي طالب حامل قبول نهائي من اي جامعة موصى بها مباشرة .. وهذا النظام موجود من قبل حتى النظام الجديد !

لان الملحقيات تمشي على نظامين بأنظمة الوزارة .. نظام الأنظمة الخاصة , والأنظمة العامة .. الأنظمة العامة اللي تمشي على كل الملحقيات وهذي غالبها تلاقيها في دليل الطالب او في موقع الوزارة ..
بينما الانظمة الخاصة فهي مخصصة فقط لملحقية دولة معينة .. وهذا يعني ان هذي الملحقية الوحيدة اللي تطبق هذه الانظمة بحسب مايتناسب مع مكانها وانظمة الدولة .. ولأنها انظمة خاصة .. فهي تكون متقلبة !
فممكن تطبق فترة معينة ثم تلغى , وممكن تكون دائمة !


فحتى موظفين الملحقيات بشكل عام فيه مايكونون على إطلاع في الأنظمة الخاصة ومايعرفها فيهم الا المدراء ..
اما بقية الموظفين مثل المشرفين وغيرهم من الموظفين اللي يكونون في الواجهه مع الطلبة .. مايكون عندهم أي فكرة بالأنظمة خصوصاً لو صدر نظام جديد .. او تم تعديل شرط او حتى تم إلغاءه ..
فالطالب حتى يعرف الأنظمة الخاصة , لابد يكون فدائي مثل مايقولون هههه لان فعلاً ماحد يقدر يعرفها إلا اذا غاص بالتجربة وقتها بيعرف الأنظمة الخاصة المطبقة في تلك الفترة !

هذي نقطة مهمة لابد الكل يحسب حسابها ويكون على دراية فيها اذا كان عنده نية بالدراسة بالخارج ...

اما مسألة الرسوم الدراسية وتكاليف المعيشة ..
فهنا أمرين ..
الأمر الاول ان جميع الجامعات عندها نظام الدفع الميسر (اقساط) وبإمكان أي طالب ان يقوم بسداد الرسوم الجامعية عن طريقها ..
وانا كنت أحدهم !
وطبعاً قيمة الرسوم الدراسية تزيد وتنقص بحسب عدد الساعات المسجلة للفصل الدراسي ونوع المواد المسجلة ..
فقيمة المواد العامة اقل من قيمة مواد التخصص .. وقيمة المواد عبر الشبكة أغلى من المواد اللي تتم دراستها في الحرم الجامعي !
وترتيبها يكون كالتالي ( من الأغلى إلى الأرخص)
1. مواد عبر الشبكة Web-Based Courses
2. مواد التخصص Major Courses
3. مواد البزنس Business Courses
4. مواد عامة General Courses - Core Requirements

ايضاً , كل فئة من الفئات السابقة يكون لها حد أعلى وحد أدنى في مبلغها .. وهذا الأمر يعتمد على مستوى المادة المسجلة ..
فالأرخص يبدأ من مستوى المادة 1000 والأغلى يكون على مستوى المادة 7000..
هذه المستويات تصنف كل مادة بحسب مستواها التعليمي .. ويتم وضع رقم المستوى لكل مادة في رمز المادة (مثال MGMT 3320) ..

طبعاً طلاب البكالريوس تكون مستويات المواد المطلوبه من 1000 إلى 4000 (ويسمح له بأخذ مواد من المستوى 5000 كمواد إضافية في حال إنتهائة من المتطلبات)..
اما المستويات من 5000 الى 7000 فهي لطلاب الدراسات العليا ..

فلذلك , لو أراد الطالب الدراسة في الجامعة على حسابه الخاص , يجب عليه أن يسجل مواد عامة من المستوى 1000 الى 2000 ولا يتعدى عدد 12 ساعة للفصل الدراسي الواحد ..
وبالتالي تكون الرسوم الدراسية لا تتعدى 6000 دولار بالضرائب ..

قيمة الفصل الواحد في الجامعات لعدد 12 ساعة للمواد العامة يكون مابين 4000 الى 7000 دولار تقريبا بدون ضرائب !


من الناحية الثانية , كليات المجتمع Community College بتكون ارخص على الطالب بشكل كبير جداً !
فاللي بيدفعه في كلية المجتمع بيكون تقريبا نصف اللي بيدفعه للجامعة وممكن اقل بعد !
وهذي السنة , اوباما صرح بأن كليات المجتمع في امريكا بتكون مجانية على نهاية سنة 2015 ..
وهذا يعني ان فيه احتمالين , ممكن ترخص اسعارها للاجانب , وممكن تزيد !
حتى الان ماهو واضح هالشي بالنسبة لي , ولكن مع الايام بنشوف .. بس حبيت اذكرها للافادة ..

الجامعات غالبها يطلب 30 ساعة , حتى يقدر الشخص يحول من الكومينتي كولج ويدخل الجامعة ..
فممكن ان الطالب يدخل كومينتي كولج ويخلص 30 ساعة , ويحول على الجامعة باقل التكاليف ...
وفيه احتمال انه يتم إلحاقه في البعثة اذا كان في كومينتي كوليج موصى فيها ..
لاني اشوف سعوديين يدرسون فيها على حساب الملحقية , ولكن مادري وشلون الطريقة !
فلو احد يبحث فيها ويشوف , يمكن يفيد نفسه ويفيد اخوانه معه بهالطريقة ..


هذي الاضافة اللي عندي وحبيت افيدكم فيها من خلال تجربتي !