استفسار عن ماستر ؟؟

وعليكم السلام ورحمة الله وبركاته
بجاوب ع السؤال الاول
اكيد شهادة الماستر اقوى من البكالوريا خصوصا اذا كان تخصصك في الماستر امتداد لتخصصك القديم

بشكل عام الجامعات الكندية أفضل من الأمريكية

إذا بتقدم على برنامج البعثات الحالي فهو مرتبط بوظيفة و بالتالي دراستك للماجستير أفضل لأنها شهادة أعلى و ترجع تكسب خبرة عمل مباشرة

عدا ذلك فالبحث بشهادة البكالوريوس أفضل لمن لا يوجد لديه خبرة لأن الشركات تقدم الفرص للخريجين الجدد برواتب مؤهل بكالوريوس و قد يتجنبون توظيف حامل الماجستير عديم الخبرة لأنه مؤهلاته أعلى من الوظيفة overqualified

الوظيفة و أخذ الخبرة و الاطلاع على الواقع العملي لتخصصك شي ممتاز و يفيدك في الاختيار الدقيق لتخصصك في الماجستير
لكن اللي عندك الآن فرصة كبيرة و ما ندري تلقى زيها لو أجلت الموضوع سنتين ثلاث
أنا رأيي ابحث عن جامعة متميزة و ابحث عن برنامج الماجستير المناسب لتوجهاتك و توكل على الله
إذا توجهك العمل في القطاع الخاص أو خلنا نقول العمل في هندسة الشبكات من الناحية العملية و تساهم في تطوير الشبكات في المملكة ، فالأفضل التوجه لبرامج ماجستير عملية و تطبيقية أكثر مثل ماجستير الشبكات في جامعة نورث كارولاينا
طبعا إذا توجهك أكاديمي و تبي تصير محاضر و دكتور فالبرامج الأكاديمية البحتة كثيرة

الأوفر كواليفايد عادة للحاصلين على الدكتوراة أما الماجستير فما ينطبق عليهم هذا الشي

الحلو في اختيار طريق الدراسة في الخارج أن المرحلة هذا مرحلة بعثة و وظيفة ، يعني الحمد لله ما انت خسران شي ، تبي تسافر و تدرس و تتعلم ثم تتوظف 5 سنوات و بعدها انت حر
الا اذا انك والله بحثت عن وظيفة بالبكالوريوس و لقيت شركة و طبيعة عمل ممتازة و رائعة و فعلا العمل فيها تعطيك خبرات عظيمة من خلال مشاريع متميزة في الشبكات و طاقم مهندسين خبراء ، فيعني إذا انت تأكدت من هذا الأمر قد أقول أن أخذ الوظيفة هذي أفضل من البعثة ، و الدراسات العليا ممكن تؤجلها ثلاث أربع سنوات بعد ما تكتسب خبرات كبيرة في تخصصك

الموضوع فيه جوانب كثيرة و يعتمد على أمور ، فأنت أدرس وضعك و استشر الناس و صل صلاة استخارة و توكل على الله

الله يعطيك العافية
انا ما تحمست للابتعاث الا بعدما قعدت عاطل لسنة كامله وما لقيت وظيفة
الله يكتب اللي فيه الخير

موضوعك عندي ..
انا حالياً طالب دكتوراه في IT في امريكا .. درست بكالوريوس علوم حاسب في جامعة الملك سعود .. ماجستير IS من بريطانيا ..
الموضوع وما فيه ياخوك ( انا ابقول لك تجربتي وتجربة زملائي ) والرأي في النهاية لك انت ..
لما خلصنا بكالوريوس على طول طلعنا ودرسنا ماجستير في بريطانيا .. وكان بحياتنا ما اشتغلنا ولا نعرف وش الوظايف والعمل ووو ...
لما خلصنا ورجعنا للسعودية ( كان معدلاتنا جيدة جداً في البكالوريوس والماجستير) قلنا الحين بنختار أطلق شركة ونروح لها ..
والله وكيلك جلسنا حوالي ٨ شهور بدون وظائف! .. الي يقولي ما اقدر على راتبك .. والي يقول أنت over qualified ( يقولون الوظيفة هذي محتاجة دبلوم او بكالوريوس، ما اقدر اجيبك انت يالماجستير وادفع راتبك على شيء ما يسويه لي اي عامل! ) ..
الي فعلاً كان ينقصنا الخبرة .. الخبرة الخبرة ...
ومن الطفش والكآبه الي وصلت لها مرة رحت انا وزميلي ودخلنا على "معالي" هيئة مكافحة الفساد .. ما شاء الله مكتب تطرد فيه الخيل ..
قلنا له يا طويل العمر ما نبي راتب .. نبي نشتغل أي شيء عندكم بس نبي خبرة .. جلس يقرأ في السيرة الذاتية حقتنا ابو عشر دقايق .. وقال ابشروا ان شاء الله خير .. خليكم على تواصل مع السكرتير وان شاء الله يبلغكم بالجديد .. وعليها من سنه ٢٠١١ تقريباً .. تواصلنا معه اكثر من مرة ولكن بدون فائدة ..
المهم مالك بالطويلة، خويي توظف في شركة، وبعد اسبوع نصحهم فيني وجابوني على طول ( براتب تقريباً ٨ الاف !!! ) وانا قبلت فيها من الطفش والضيم الي كان فيني .. وبعد فترة ولما تعرفت على الموظفين بالشركة .. اشوف معنا مصريين ما يعرفون شيء بالحاسب، ومؤهلاتهم كلها دبلوم .. وشغالين شغلات بدائية جداً ... ورواتبهم على ١٥ وطالع ..
تخيل هذولي يجون ويرجعون لي في الكثير من الأمور ... وصرت تقريباً مرجعهم في كل ما يتعلق بالسستم .. وانا اقل راتب فيهم ...
المهم صار الي صار .. جلست معهم ابو سنة وشوي ومشيت ... كرهت الدوام والشغل على الاستغلال الي كنت اشوفه منهم .. لكن الحق لله استفدت فائدة كبيرة ولعل اهمها اني صرت مرجع لهم في برنامج SAP وصار لي شأن كبير فيه ... وانا تنازلت عن اشياء كثيرة بس عشان اتعرف على هذا النظام ..
المهم في النهاية .. انا طلعت امريكا اكمل الدراسة .. زملائي الان الي منهم موظف في الخطوط السعودية .. وبعض الوزارات .. ورواتبهم مو اقل من ١٦٠٠٠ (الاساسي) ما شاء الله تبارك الله ..
فالموضوع يحتاج شوية صبر بعد الشهادة .. وخبره ( مو أقل من سنتين ) .. وبعدها راح تحس بفرق ان معك شهادة ماجستير عن بقية زملائك ..


السموحة على الاطالة .. لكن حبيت انقل لك التجربة باختصار .. والموضوع في الأول والأخير يتطلب منك ( الخبرة ) سواء معك بكالوريوس او ماجستير ...
والشهادة تراها مطلوبة جداً(ماجستير فما فوق ) .. خصوصاً شبكات ما شاء الله عليك ..

والله يوفقك ان شاء الله ،،،

الله يبيض وجهك ويجمل حالك الله لا يهينك بغيت حساب لك في اي موقع تواصل اجتماعي ولا عليك امر عندي اسئله وابغى استفيد من خبرتك ويعطيك العافيه ..

وجهك ابيض ..
facebook.com/majed.almotairi
instagram.com/majedalmotairi
الله محييك بأي وقت ..وخصوصاً (وقت الفضوه) الان مثل منت عارف اجازة الصيف الى منتصف اغسطس ..
والله يوفقك ان شاء الله ،،