!! ليـتك بكـفك تـتل القلب و اتـفله ** و اتشوف عشقٍ عذابه ما يبارحني !!

يا متعب القلب و انت الين عباد الله
دخْـلَـك -على قولة الاشوام- ريّحني

وشلون سيف الهجر في وجهي اتسله
وشلون و انا اهجر اللي عنك ينصحني ؟!

أنا اكتبك في يمين الوصل و الخله
و انت بيسار الجفا و الصد تمسحني !

حبل الموده متى ترخيه و اتحله ؟
حرام و انا بزهر العمر تذبحني

بالعين جمره وفي وسط الحشا مله
ما تنطفي لين تسهدني و تطرحني

ليتك بكفك تتل القلب و اتفله
و اتشوف عشقٍ عذابه ما يبارحني

شرّعت لك باب حبي يالغضي كله
واضح بليا مراسيل ٍتوضحني

و ان جيت اخفّي غرامك و اكظم العله
سجات فكري و دمع العين تفضحني

من وين ما دجت بالدنيا على مله
أشوف زولك مع الطرقات ناطحني

لو ذقت دق الأسى ما اقول لك جله
شقيت ثوبك و قلت ارجوك سامحني

حالي كما من قواه البحر و اذعن له
مجدافي الصبر و الامواج تـندحني

و اردتني بخالي ٍ يـبعث على الخله
لهايـبه تـاكل بجسمي و تـلفحني

أنت البحر و الخلا و الدرب و الضله
بعد الله بيدك تـمْحَـني و تمنحـني

و مادمك انت الدوا و دام انك العله
وش في يدي غير قول ارجوك ريّحني