الجامعه الكاثوليكيه في واشنطن؟؟

والله شوف ...الجامعه موقعها ممتاز من حيث المواصلات (فقط) ... هذا اللي استنتجته من زيارتي لها. الباقي مهما قلت لك مراح تاخذ به لين يطيح الفاس بالراس (يعني تسجل فيها و تبدا دراسه) ... عشان بس اريحك وما اقول لك ما ارتحت لها و بس, راح اشرح لك ان انطباعي ما جا بشكل مباشر (يعني ما شفت شي بعيني) لأنه ببساطه ماحد راح يقول لك من الجامعه (ترى جامعتنا فاشله) و هذا شي طبيعي ... بس الاستنتاجات بنيتها على عدة عوامل: اولاً موقعها كان ممتاز يمكن قبل ماانولد انا و انت ... بعدين صار اخطر مكان في واشنطن ... بعدين تم تنظيفه. يعني يكفيك كدليل محطة القطار اللي جمبها اسمها بروكلاند و جدران المحطه ما تقدر تشوفها من كثر شخاميط العرابجه اللي كانوا في المنطقه (وبعظهم لا زال موجود ... انا عشت في ذيك المنطقه بالذات لمدة شهرين تقريباً و اقول لك انها ولله الحمد امان لحد معقول. بس لحد الحين و لك عليها, بتقول لي وشدخلني في المنطقه بقول لك الطلاب الموجودين في الجامعه من المنطقه و راح يكونون متأثرين تأثر كبير بالبيئه اللي حولهم ... و الطلاب راح تشتغل معاهم في قروبات مدرسيه غصب عنك.. و عيب دراستهم هنا انك اذا جيت مع قروب فاشل خلاص راحت عليك ... السبب الاخر ان مبانيها متهالكه جداً .. حسيت هاري بوتر شوي و يطلع لي ..سبب اخر انهم يطلبون مبلغ خمسين الف دولار كظمان مالي لدراسة اللغه بس! طبعاً انا اول ما جيت كنت ع حسابي, بس وين يا عمي خمسين الف عشان لغه اجل الجامعه كم بتصير... يعني بيعقدونك و تصير شغلتك معقب بينهم و بين الملحقيه في كل شي بتسويه (هذا اللي اتوقعه عشان مبين عليهم امورهم الاداريه و تخطيطهم الاداري بعد قديم زي مبانيهم ... وما خفي اعظم بس ما حبيت اطول عليك انت روح و شوف