مجلس أبو سليمان .

أبو سليمان وأبو صالح من شيبان ( بريده ) …
كانو يجلسون كعادتهم في مجلس ابو سليمان اللي على طرف الطريق …
ابو سليمان وخويه ابو صالح ناس من مسجدهم الى مجلس ابو سليمان
في أحد الأيام كان يسولف ابو سليمان على ابو صالح :-
ابو سليمان:يابو صالح الدنيا مدري وش صايرن فيها … العالم ماعاد عندها دين
ابو صالح : اي والله صادق يابو سليمان
ابو سليمان:الدين ماعاد هو موجود الا بالدول العربيه … ولا اللي باوروبا وبشرق آسيا ماعاد عندهم دين … ماغير فسق وفجور
ابو صالح : اي والله صادق يابو سليمان
ابو سليمان:وبيني وبينك يابو صالح … حتى ماهو كل الدول العربيه … عندك المغرب العربي ومصر والصومال … تراهم ماعادهم زي أول … أشوف كثر عندهم لبس البنطلون وطلعات البحر والسهر … والله ان كان بغيت الدين يابو صالح فتراه عندنا بالخليج وبس
ابو صالح : اي والله صادق يابو سليمان
ابو سليمان:والله بعد ماهو كل الخليج يابو صالح … أشوف الامارات والبحرين وقطر عندهم هالخمور منتشره والمراقص أعوذ بالله …. والله ان بغيت الدين تراه بالسعوديه والكويت وعمان واليمن
ابو صالح : اي والله صادق يابو سليمان
ابو سليمان:والله بعد ترى الكويت وعمان اليمن ماشوفهم زي أول … كثر فيهم الفسق والفجور والسينما وهاليمنيه ياكلون بذا “القات” … والله يابو صالح ان كانك بغيت الدين فتراه في السعوديه وبس
ابو صالح : اي والله صادق يابو سليمان
ابو سليمان:والله بعد ماهو كل السعوديه …. عندك هالشرقيه وجده فيهم ذا البحور وفيهم من ذا الطلعات الزايده اللي مالها سنع … وحريمهم بالسوق 24 ساعه …. وبالنسبه للشمال والجنوب فيها من ذا البدع اللي ما أنزل الله بها من سلطان … والله يابو صالح ان كان بغيت الدين … فتلقاه هنا عندنا بالقصيم
ابو صالح : اي والله صادق يابو سليمان
ابو سليمان: والله مع اني أشوف اهل عنيزه واهل القرى ماعادهم على خبري وخبرك يابو صالح … طاحو بذا التلفزيون وبذا الدش والعياذ بالله …. إن كانك بغيت الدين يابو صالح فتراه هنا عندنا “ببريده”
ابو صالح : اي والله صادق يابو سليمان
ابو سليمان: بس الزمن تغير العالم ماعادها زي قبل ذكر وعباده … أشوفهم مقصرين كثيررررررر …. والله ان كان بغيت الدين يابو سليمان تراه هنا( بحارتنا )
ابو صالح : اي والله صادق يابو سليمان
ابو سليمان: والله ماهم كل الحاره … الدين الصدق الصدق يابو صالح مانت لاقيه الا هنا في مجلسنا أنا وياك ولا باقي الأمه يالله سترك بس..
ابو صالح : اي والله صادق يابو سليمان
ابو سليمان: وان كانك بغيت الجد بعد يابو صالح
ابو صالح: خير يابو سليمان
ابو سليمان: صلاتك هاليومين ماهي عاجبتني !!!!

__________________________
القصه : فلكلور
السيناريو والحوار : إبراهيم
أبو سليمان : الشخص المعتز برأيه وبنظرته ومهمش للغير
أبو صالح: مثال للشخص الإمعه … وهم من يصدقون و يتبعون دون أن يسألون
مع إحترامي لكل المناطق التي ذكرتها …. مجرد أسامي لمدن ولشخصيات ….

" منقول "