مساعده يااهل الخير لازم اصفي رصيد اجازاتي على نهاية 2011

السلام عليكم ورحمة الله وبركاته

اخوني طلاب وطالبات امريكا انا موظف وعندي اجازه اربع شهور وحاب اخذ دوره لدراسة اللغه في امريكا وتحديدا في لوس انجلوس او اي مدينه قريبه منها او شيء قريب منها..

قريت كثير وسالت كثير لي اكثر من شهرين ماستقريت على شيء اللي يقولي مليانه سعوديين لا تقربها واللي يقول غاليه كثير واللي يقول الدراسه الاكاديميه ماتنفع تدرسها اربع شهور..

الموضوع ومافيه انا لغتي تعتبر معقوله درست في الرياض في المعهد المصرفي مستويين وفي معهد بيرلتز ثلاث مستويات ودرست في نيوزيلندا حوالي شهرين كلها لغه بس كنت بادي من الصفر والحين نوعا ما لغتي معقوله..

بالنسبه كم ميزانيتي انا معي حوالي 30 الف راح تكون معي وممكن يوصلوا 40 الف غير راتبي 11 الف ريال شهريا مدري هذولي يكفون او لا بالنسبه للمده اللي يقولي اربع شهور ماتكفي انا ممكن اخذ الشهر الخامس اجازه بدون راتب مدري عاد كيف بيكون الوضع..

واحد من زملائي يدرس في تكساس في مدينة اوستين يدرس في University of Texas at Austin ويقول المعهد تبع الجامعه مره قوي ويقدر يفيدك و يقول المدينه حلوه وهادئه وفله ومو غاليه والسعوديين قليل بس جوها لك عليه برد..
وانا بصراحه محدد اجازتي على بداية سنه 2012 يعني على يناير قلت لوس انجلوس تكون اجوائها روعه بالنسبه لي..

اخواني واخواتي اي شخص يحس انه يقدر يفيدني بمعلومه او نصيحه لو بسيطه تكفون لا تبخلون علي انا لازم اخلص كل اجراءاتي خلال فتره شهر من الان

تبي تتعلم وتفلها ؟
تبي تستانس ؟
تبي تعيش حياتك ؟
تبي ترجع انجليزيتك ممتازة ؟
تبي احلى ولاية بامريكا ؟
تبي احلى مدينة بالولاية ؟
تبي ارقى منطقة بالمدينة ؟
تبي مكان الامريكان يتمنون يعيشون فيه ؟

اذا كنت تبي هالمميزات تعال :
الولاية : كاليفورنيا
المدينة : لوس انجلوس
المنطقة : ويست وود
اسم الجامعة : UCLA
المعهد التابع للجامعة : ALC

واذا احتجت اي شي لا يردك الا لسانك

اخوك دفتر بو عشرين وفي رواية كشكوول :D

ماتقصر اخوي دقتر ابو عشرين بس الله لا يهينك..

حبيت بس كذا نقطه توضحها لي:

هل المبلغ يكفي اعيش وانا مو مضيق علي نفسي؟؟

انا لغتي تعتبر معقوله درست في الرياض في المعهد المصرفي مستويين وفي معهد بيرلتز ثلاث مستويات ودرست في نيوزيلندا حوالي شهرين كلها لغه بس كنت بادي من الصفر والحين نوعا ما لغتي معقوله..

هل مدة اربع الى خمس شهور تكفي لدراستي مع العلم اني موظف وعندي رصيد اجمعه لي اربع سنين كلها علشان اللغه..

شاكر ومقدر سعة صدرك اتمنى تقولي رايك ومشورتك..

باذن الله بتكفيك وزيادة
خلنا نقول راس مالك ٤٠٠٠٠ ريال
٢٥٠٠٠ ريال بتكفيك لمصاريف المعهد للفترة كاملة (٤ شهور)
بيبقى ١٥٠٠٠ ريال سعودي تكفي للسكن للفترة كاملة ، لانك شخص واحد بتكفيك
بيبقالك راتبك ١١٠٠٠ ريال شهريا ممتااااااازة جدا جدا جدا لانها بتصير بالدولار ٢٩٣٣ يعني تقريبا ٣٠٠٠ دولار محد يحلم فيها بامريكا

اقولك توكل على الله وميزانيتك ممتازة وجاية حسب المتطلبات سبحان الله

ادري كثرت عليك اخوي وازعجتك لكن والله لي يمكن اكثر من فتره وانا محتار ومتردد انا ابي بس واحد يشجعني..

1- طيب وش احسن معهد برايك يعني اللي انت تشوفه مناسب؟
2- نسبة السعوديين بالمعاهد هل تسبب مشكله؟

واحد من الشباب يقول الكلاس فيه 16 طالب 13 واحد سعودي اذا دخل عليهم المدرس الصبح يقول صباح الخير بالعربي..

شاكر ومقدر انتظر ردك..

انا كنت ادور زيك
واخر شي قررت اني اروح المعهد التابع لجامعة UCLA الي اسمه ALC
وترا المصاريف حسبتها على هالمعهد
والسعوديين بكل مكان ، انا اعرف واحد درس سنة انجليزي وسنتين ماجستير ويحلف يقول من رحت ماطلعت مع سعوديين الا يوم الجمعة بعد صلاة الجمعة
يعني الزبدة انت وشخصيتك وقدرتك بالتعارف والكنترول بتحدد وضعك هناك

انا من ناحيتي ماشوف ان السعودي يعتبر عائق ، بالعكس انا اشوف ان السعوديين مفيدين لان اجراءاتهم ومشاكلهم وقضاياهم ومعاملاتهم كلها متشابهه مع معاملاتك وامورك فاكيد بتحتاجون خبرات بعض
لكن الفرق يجي بانك بتكون معاهم ٢٤ ساعة ولا ايام محددة

والله استفدت منك اخوي وماقصرت..

نقطه اخيره..

اللي اعرفه ان المعاهد التجاريه زي els , واللي زيه نظام مستوياتها شهري غير معاهد الجامعات واللي فهمته من الشباب ان معاهد الجامعه لها وقت معين البرنامج يبدا في تقريبا 18 يناير لبداية مايو تقريبا ثلاث شهور ونص وانا جاي لتطوير لغتي يعني ماابغى شيء ياهلني للجامعه لان انا ماابي ادرس جامعه انا جاي ادرس لغه وبس..

حبيب قلبي هذا اللي يهمني انك تستفيد ...

صحيح بس صدقني ماراح يجبرونك تتعلم ، يعني مشي حالك ، اسألني انا جربت بنيوزلندا معهد تجاري ما استفدت منه الا ٣ كلمات
المعاهد حقت الجامعات يعطونك واجبات وتقارير يخلونك غصب تتعلم
ولو جلست بمعهد جامعه ٣ شهور وكان بعدها اجازة طويلة روح سجل بمعهد تجاري شهر وبيكون مره رخيص
بس جد نصيحة لو تبي تطور لغتك بسرعة ادخل معهد جامعة ، والله المعاهد التجارية خسارة فلوس ووقت بدون فايدة

الشمالي

انا بطلع على امريكا على حسابي مجهز تكلفة 6 شهور 40 الف

ومنت محتاج راتبك

السلام عليكم ...

في معهد جدا رخيص في ولاية كاليفورنيا ... أعتقد أنه أرخص معهد في أمريكا ...

و المعهد مش بطال ... اللي يدرسنا فيه بنات معاهن بكالوريس إنجليزي و يدرسون ماستر إنجليزي و مأخذين الشغل هذا كدخل ...

يعني لو سألت راح تحصل جواب إكاديمي ...

قيمة المعهد لأربع شهور 2000 دولار ...

قيمة السكن تكلفك إذا بتسكن في فندق 950-إلخ لمدة أربعة أسابيع ...

قيمة السكن عند عائلة ( بدون وجبات ) 550 - 800 دولار ... > حسب المنطقة ... ( توستن - ارفاين ) ... أربعة أسابيع ...

قيمة السكن عند عائلة ( مع وجبتين ) 750-950 ... > حسب المنطقة ... ( توستن - ارفاين ) ... طبعا أربعة أسابيع ...

قيمة إيجار سيارة 700 - 1100 مع التأمين ... و أحيانا أقل و أحيانا أعلى ... حسب الموسم ... و لكن في الفترة اللي ناوي تجي فيها ممكن تكون أقل ...

البنزين ( فل ) يبدأ من 40 دولار حسب الأسعار السائدة الآن ...

المنطقة ( ارفاين ) أحلى منطقة في كاليفورنيا عامة ...

قريبة من لوس انجلوس 45-60 ميل شمالا ... و كذلك سان دييقو جنوبا ... خالية من الإزدحامات صباحا ... و عصرا و ليلا و كل وقت تقريبا الحركة المرورية جدا إنسيابية ...

هناك مطاعم عربية قريبة ... و أيضا إيرانية ...

الوجبات تكلف من 6-15 دولار > حسب المطعم و الوجبة ...

بما إنك ستأتي فقط لأربعة أشهر ... أجعلها لهذه المدينة و لا أعتقد إنك ستندم ...

بالتوفيق ...