بخصوص الفيزا الممنوحة للطالب هل هي خاصة بالدولة أم الشنغن ؟
يعني لما أطلع فيزا لدولة ألمانيا هل أستطيع ان اخرج فيزا الشنغن معها لو بغيت أسافر برا ألمانيا ؟
وبالنسبة للماجستير في ألمانيا لو قدمت على طب عيون بيجيني قبول ؟ او فيه س و ج ؟
عرض للطباعة
بخصوص الفيزا الممنوحة للطالب هل هي خاصة بالدولة أم الشنغن ؟
يعني لما أطلع فيزا لدولة ألمانيا هل أستطيع ان اخرج فيزا الشنغن معها لو بغيت أسافر برا ألمانيا ؟
وبالنسبة للماجستير في ألمانيا لو قدمت على طب عيون بيجيني قبول ؟ او فيه س و ج ؟
الفيزا تبع ألمانيا هيا فيزا شنجن وتقدر تدخل بيها البلاد الأوروبية ما عدا بريطانيا أكيد لا وسويسرا أعتقد.
أخوي ليش ما يجيك قبول؟ وايش قصدك بسين وجيم؟
أهلين ياخوي فيه واحد من الشباب طالع لبولندا وعطوه فيزا بولندية مش شنغن وقال ما يقدر يسافر برا بولندا ؟؟
علشان كذا سألت مع العلم إن بولندا منظم للإتحاد الأوربي من 2004 ؟ السؤال لو طلعت لبولندا أقدر أطلع فيزا شنغن ؟
وبالنسبة للماجستير عندنا هنا بالسعودية اللي يقدمون عالماجستير عيون مثلا يسوون لهم إختبار الهيئة الصحية إذا عديته تخش مقابلة شخصية اذا عديت يختبرون كل الناجحين من المتقدمين إختبار وآخر شي يمنحوا 10 طلاب و3 طالبات على مستوى المملكة
فا هذا الشي مخوفني أخاف أقعد طبيب مقيم طول عمري
والله ما أدري كيف عن وضع بولندا ولكن على كل حال يمكن يعطوا هما تأشيره مؤقته لمدة ثلاثه شهور والتأشيره هذي تكون لها بنود معينه الين ما تقيم وتأخذ تأشير طالب مقيم. وفعلا حسب ما أذكر حصل انه حتى هنا في المانيا بعض الشباب ما كانوا يقدروا يسافروا باول فيزا أخذناها ولاحظ بعضهم كان عندهم تأشيره تانية وكانوا يقدروا يسافروا ما أدري والله كيف اللخبطه هذي، الين ما أقمنا هنا وجددناها وأنحلت المشكلة. الكلام هذا قبل 4 سنين عشان كدا ما أذكر التفاصيل.
الصراحة ما عندي فكره عن التقديم لطب العيون وما أعرف أحد ممكن يفيدك. أتمنى أحد من الأخوان يتجاوب معاك.
بالتوفيق
مشكور وما قصرت وفالك التوفيق إن شاء الله
يعني من آخر إذا انحدينا على فيزتهم اللي محكورة على الدولة !! أقدر اطلع أنا وشايبي وننقز للقنصلية ويكفلني ويطلعلي فيزا شنغن ؟
يعني تكون معي فيزتين ؟ يصلح كذا ؟ فيزا لبولندا وفيزا شنغن ؟
وكم أقصى مدة لها ؟ ما أبغى أنحشر في بولندا أبغى أعيش جو الدراسة صح كرررف بعدين ألف أوربا لف
ياهلا أخوي حياك الله
المفروض انه ممكن. الأفضل انك تسال نفس السفاره اللي بتطلع منها الفيزا عشان تتاكد
وممكن حتى لو تسأل مكاتب السياحة اللي يطلعولك تأشيره شنجن وانتا قاعد في البيت تعطيهم الجواز وهما يتكفلوا بكل شي. ما أدري اذا سألتهم يعرفوا عن هذا الشي هما أو لا.
نصيحتي:الشهور الأولى أهم شهور لك. أستغل وقتك فيها ولا تشغل نفسك بأفكار السياحة كرس جهدك في دراستك. الاجازات جاية كثير ان شاء الله
يعطيك العافية أخوي على إهتمامك
والله من ناحية جد اكيد بكرف لكن ظلم كذا غجازة 3 شهور لازم أقضيها ببولندا ولا السعودية ؟؟ ليه ما يحقلي أسافر فيها ؟
عاد طول بالك انت كمان المده حتعدي بسرعه. والله ماهي طويله بغض النظر عن امكانية سفرك أو لا لدول أوروبا أم لا. يعني كم حيكون عندك مجموع اجازة في الثلاثه شهور دي كلها؟ تاني شي أنصحك ما ترجع السعودية بالذات الفتره الأولى. ولو تتعرف على البلد اللي انتا فيها أفضل لك بكثير من السفر في أوروبا. زي ما قلتلك قبل. السفر لاحق عليه، ما بأقلك لا تسافر. بس حيجيك وقت مناسب. انتا لسه توك تطلع ان شاء الله وقدامك وقت تصيع فيه على كيف كيفك ^_^
ههههههه مرسي أعجبتني ذي أصيع على كيفي
بس حاب أسأل هل فيها نظام روميت ومن هالحركات ؟ في السكن وهل فيه عوائل تتكلم إنجلش ؟
في ألمانيا في كل المدن عندهم نظام اسمه WG اختصار كلمة Wohngemeinschaft ومعناها السكن الجماعي. تلاقي ناسي يكونوا ساكنين في شقة حسب حجمها يتشاركوا فيها عدد معين من الاشخاص، اثنين وانتا طالع. تكون عادة طريقة توفر بها، لكن قبل لا تسكن لازم طبعا تتعرف على الشخص او المجموعة اللي حتسكن معاها(على اساس مثلا لو كنتوا ثلاثة تتقساموا شقه) وتعرف هل نظامك زيهم؟ هل انتا تهتم بالنضافه بشكل كبير؟ تحب تجيب اصحابك كثير....الخ
سكن العوائل ما هو شيء شائع لكن على كل حال موجود في كل مكان. انت وحظك اذا كانت العائلة تعرف انجليزي ولا. والأفضل انهم ما يعرفوا، عشان تتورط وتضطر تتعلم اللغه.
عز الله إن اللي مثلك ينحط عالجرح يبرا
يعني ما شاء الله ما أمداني أرد إلا وانت راد علي
حبيت أسألك أنت تدرس بألمانيا ؟ الراتب 1800 يورو ولا ؟ ممكن تفصلي كيفي صرفية الراتب هناك وكم أقدر أوفر
يعني لو سكنت مع روميتس 2 او 3 ؟ كم يكفي حق أكل وملابس وتمشيات في الويك إند يا ليت تفصلها ؟
وبالنسبة للإجازة لو أنزل السعودية تصرف لي تذكرة مجانية سنويا ؟ والإجازة مدفوعة الراتب ولا بدون ؟
عموما كم اقدر أوفر أكثر شي من الراتب ؟ سمعت واحد منا لشباب يقول ما يصرف إلا 600 يورو بألمانيا معقوله ؟؟
حياك الله اخوي بأي وقت. كلامك صحيح، الراتب 1800 يورو. وتقدر توفر، ألمانيا غاليه، لكن أجمل مافيها انك تقدر توفر. السكن هوا الشيء الوحيد اللي يكلفك. طبعا سعر السكن في اختلافات شاسعه حسب المدينة. على سبيل المثال برلين في الشمال الشرقي يكون اسعار السكن فيها أرخص من مدينة فرايبورغ في الجنوب الغربي لأسباب كثيرة. لكن المعدل حيكون 250 الى 470 يورو بالكثير يعني. لو تتعلم الطبخ هيا اكتر طريقة توفر بيها. زي ما وصلك كلام سليم 600 يورو بين صرف واكل اقل شي طبعا غير السكن يعني هدي عالحدود تزيد حسب تمشياتك في الويك اند بس ما تنقص الا لو تطبخ كل يوم، ومارح تكون فايق ولا عندك وقت أصلا. واذا حصل اعتبرك فنان هههههه. لاتشغل وقتك كتير في الحساب، لأنه في عوامل كثير تأثر فيه. لب الموضوع يمديك بالراحة تخرج من الشهر وفي فلوس زيادة في جيبك.
راتبك يستمر كامل طول السنه، ولك كل سنه ميلادي تذكر مجانية تروح بيها لبلدنا الحبيب
ميغسي بوكوب
طيب واحد من الشباب يبغى يكمل دراسته على حسابه الخاص أيش تنصحه ( بولندا _ المجر التشيك ) أيش الاوفر فيههم ؟
طبعا هذي الدول أرخص من ألمانيا ولا ؟
واسف جدا أتعبتك معي لكن كل جواب منك يدشني ويذكرني بسؤال
وهل فيه عيديات ؟ وبالنسبة للعمل هل يقدر يشتغل مثلا لو طلع لأحد هذي الدول بالاجازات الصيفية
أغلب الظن إن ألمانيا الأغلى بين هذي الدول اللي ذكرتها. الصراحة ما أعرف مين الأرخص بين (بولند والتشيك والمجر) ولكن ناحية السمعه على الأقل في الطب المجر أعتقد الأفضل.الأسعار ما عندي أي فكره عنها للأسف.
ايش قصدك بعيديات؟ يقدر يشتغل بس في ألمانيا مثلا لك عدد معين من الساعات تقدر تشتغل فيه لأنك طالب. ما أدري كيف بالنسبة لهذي الدول. زي ما قلتلك المعلومات اللي عندي تشبه المعدومة بالنسبة للدول الأوروبية. اذا حابب أجوبة مضمونة شوف دور شباب في المنتدى يكونوا عايشين هناك يعطوك الجواب الأكيد.
بالعكس كل ما تسال كل ما تعطيني فرصة إني أساعدك. وهذا الشي يسرني
بيض الله وجهك مشكور وما قصرت وانا نزلت موضوعين علشان الرجال ذا
وبالنسبة للعيديات سمعت انها اجي مكرمة من الملك بالأعياد راتبين او شي زي كذا ؟
أجل تقول ألمانيا أرخصهم تقريبا ؟
ههههههه والله شككتني بقدراتي
عالعموم أنا لي قريب يشتغل بالملحقية حقت المجر بكلمه بكرة وبسأله
اخوي يعني تشووف انه المانيا بلد ممتاز لدراسة الطب من ناحيه الراحه النفسيه وهل من الممكن ان نواجه مشاكل مع اللغه بما انه يدًرس الطب باللغه الالمانيه ولا اغير البلد احسن نبغى رايك لاهنت؟؟
وعندي سؤال برضه كم تخصص لوقت الدراسه كحد ادنى يوميا؟؟
والله يعطيك العافيه
ارى انه المانيا بلد ممتازه لدراسة الطب. وبالنسبة لحكاية الراحة النفسية اهم شي تكون صداقات هنا مع الشباب الي انتا جاي معاهم وتتعاونوا على الدراسة. بهذي الطريقة يسهل الصعب باذن الله. أم موضوع اللغه، فلن تكون عائق ابدا بحيث انك توقف دراستك. اذا كرست وقتك في مرحلة اللغة لدراستها، واتعلمتها. فصدقني رح تتعلم بسرعه. أكيد في ناس يتعلموا أسرع من ناس. أما لو تخاذلت وما سويت شي، فالنتيجة حتكون بطبيعة الحال واضحه. لأنه لا تنسى انها لغة جديدة. يعني مهو كانك رايح امريكا او اي بلد ثانية بحيث انه عندك فكره عن اللغة وتمشي فيها بالطول بالعرض. وبعدين اعطيك مثال بسيط، هوا مضحك لكنه حقيقة. شوف السواقين عندنا والخدامات. يجوا السعودية في خلال سته شهور يفهموا كل شي، يتكلموا بصعوبة لكن يوصلولك اللي يبغوه مع انهم ما ياخدو لا كورس لغه ولا شيء.
فمابالك بيك انت كطالب اكاديمي تدرس وتتعلم اللغة بقواعد واسس سليمه؟ أكبر دليل على صحة هذا الكلام أولا تجربتي الشخصية وثانيا عندك ما شاء الله مبتعثين في اليابان والصين والمانيا وفرنسا وهولندا وأغلبهم ماشي حاله.
بالنسبة لوقت الدراسة يختلف من شخص لأخر ومافي معدل معين، لأنه في عوامل كثير تدخل في هذا الموضوع. نوع التخصص، الجامعة، المواد اللي تاخذها في الترم.
الكلام هذا ليس تحبيط وفي نفس الوقت ما أبغى أحمسك زيادة عن اللزوم، حبيت أشرحلك الوضع فقط عشان يكون عندك صورة على ايش انت حتكون مقدم. أكيد حيكون في صعوبات على كل حال، ولكن بالصبر والاجتهاد حتعديها.