يجب مراعاة فارق المكان

كل بنك هوليدي وانتم بخير


هذا الله يسلمك مواقف تحصل دايم

مرات اقول : يافاهي استوعب .. بس اذا علمت بعض الشباب السعوديين القاهم طاحوا بنفس المواقف واقول الحمدلله الحشر مع الناس عيد ..:)

هالمواقف تحصل لاني كنت احسب نفسي بالسعودية .. فاهي بقوة خخخخخ



باول ايامي جيت مرة داخل الكلاس وفيه سعوديين والتيتشر الانجليزية والصينيين وشوية اوربيين وجنسيات ثانية وداخل وانا على جوي بالسعودية وبدل مااقول قود مورننق قلت : السلام عليكم ورحمة الله وبركاته ... واشوف علامة التعجب فوق روس الطلاب والتيتشر كنهم يقولون وش يقول الاخ والسعوديين منهم من رد ومنهم من تبسم

هذي اهون منذ مبطي قبل كم شهر كنت ساكن بهاوس فميلي وادخل الصاله مافيها الا الشايب وعجوزة ومعهم كلبهم اكرمك الله يناقز بينهم ويلاعبونه واخوكم في الله داخل مبسوط هاك اليوم واسلم عليهم : السلام علييييييكوم ...بس حمدلله مسك البريك ماكملت
وهم يرفعون روسهم ويطالعون يمي كنهم يقولون : هو قال قود مورننق والا حنا واهمين ... خخخخخخخ

ومرة طلبت اوراق من تيتشر ثاني وبيدي اليمين شايل شنطة اللاب توب ويدي اليسار فاضيه المهم هو مد لي الاوراق عشان اخذها وانا على طول نقلت الشنطة من اليمين لليسار واخذت الاوراق بيدي اليمين ولاحظت انه استغرب ليش مااختصرت على نفسي واخذتها باليسار .. مدرى اني كنت خايف يقول يمناك لا عدمناك .. :)


وفيه حاجه اشوش وينقطع التفكير لحظتها ... اذا جاني اتصال من رقم مااعرفه ومن داخل بريطانيا مدري وش اقول : هلا مرحبا .. والا ... هلووا .. لان احيان تجي اتصالات عشان فواتير و اشتراكات او حتى طلاب بالمعهد

مرة نسيت مفتاح السيارة في الباب وجاء ولد جارنا ودق باب البيت وقال انت نسيت مفتاح سياراتك وهاك .. واطير به ثنكيو وهو عمره يمكن 15 سنه ولا ارادياً قلت له تقهوا هاف اكفي وقلتها من باب المجامله .. الا الولد نقزت عيونه واتذكر انه اندرايج ومهوب باين عليه بغل طويل وعاد بسرعه املحها واقول ثنكيو تو متش متش يلحقه متش ويللا يللا رح لبيتكم لا يجي ابوك ثم ابلش بك .. ههههههه


هذي مواقف بسيطة غير اللي مااذكرها الان


ماتوافقوني .. او ماقد مر عليكم نفس هالمواقف ؟






*

ههههههههههههههه ..
فاضي وعلى اليوتيوب اتابع مسلسلات وصباح فخري قلت ياولد اقلط وشف وش الجديد ..
انا مر علي اقوى من هالموقف والشكلة انه تكرر من غير قصد .. مثلا وانا اتناقش مع المدرس في الانجليزي والطلاب اجانب والجو اكله انا وماشي مزبوط الا وتخش بعض الكلمات اللي ماتخلى مثل لاااا.. والا صح عليك .. والا اقصد .. بس هم متفاهمين

حياك يالشلباق واحلا مقلاط تقلطه وتسلم على مرورك


شكل الربع اليوم بالمنتدى عندهم طلبات وشغلات قبولات وبرسيشنال كان الله بعون الجميع


هالموضوع بس للي وده يوسع صدره ولا مانع من ذلك

أحمد ربك يارجل .. بعض الاحيان امد يدي بسلم على التيتشر ولا غيره .. وأجلس ساعه ماداً يدي ولا من خبر مطنش ولا ساحب علي ههههههههااااي

يوه يووووه اما احراج

فعلا السلام بالمصافحه او باليد ياكثرها وياشين مواقفها

بس اذا حسيت انك مطول وانت ماد يدك وهو مطنش سوي انك تمغط واصرفها باي شي خخخخخخ


تسلم يالحربي على موقفك هذا قصصي كلها طلعت معك مزح عيال خخخخخخ
*

ههههههههههههه مواقف حلوووووه

انا احيانا اذا كنت استمع لاحد وهو يكلمن مادري عن نفسي الا وانا اقوله صح صح صح وهو يستغرب وانا مانب جايب خبره اذا خلص انتبهت وش انا قاعد اقول لاني متعود اقولها بالعربي...... ومن ناحية السلام فحدث ولاحرج كنا داخل الكلاس يوم حنا ندرس لغه كان اغلبنا سعوديين وكان فيه جنسيات ثانيه وكان اي واحد يدخل لازم يسلم بصوت مرتفع فصارت عادة للطلاب والمدرسين الثانين يفهمون علينا ويردون خخخخخ.....

هاااااااي

هو الظاهر يابو جبل بيجي يوم تشوف الانجليزي الاشقر يقول : يستردي ماي فاذر كلمن اند سيد تو مي وير انت بوه ؟

هههههههههههههههههه


تحياتي لك ياعسل

ههههههههههههه ذكرتي اول ماجيت .. ماكنت اعرف كلمه ( باردن ) .. المهم واخبص واليس عند وحده باكستاني كانت معي بالشيرنق هاوس .. المهم يوم انها تقولي باردن .. احسب معناها ( اها فهمت الله يقطع سوالفك ) وانا اسكت خلاص يعني خلصت السالفه .. اشوف البنيه وجهه يتغير يوم اطنش هههههههههههههههههههههههااااي

الله المستعان والله وضع مزري مع هالانقلش .. ياتصير مقالب قويه .. بس ياااخي ماتلاحظ عندهم شي وربي رهههههيب انهم مايضحكون حتى لو غلطت او زليت بكلمة ..

شف عندنا ماشاء الله تبارك الله جرب فك اليو تيوب .. اكتب غلطة مضيع ولا فضيحة ... يطلع لك .. استديو كامل كل امه افلام .. عن زلات اللسان ..

الله يستر بس .. ويهدينا ..

موضوعك جدا سوالي ريفرش ..

حياك اخوي الحربي مرة ثانية وثالث ودايم بعد

حلوه سالفة باردن تحتريك تعيد الجمله وانت تحسب معناها خلاص فهمت خخخخخخخ

بس وش اللي خلاك تتوقع معناها كذا من شكل الكلمة والا احد معلمك غلط :(



*