لماذا لغتي الانجليزية لم تتطور
السلام عليكم ورحمة الله وبركاته
اسعد الله ايامكم بكل خير ومودة
حاب اخذ منكم الفائدة والنصيجة لاني تقريبا لي سنة الان في امريكا ولم تتحسن لغتي بذلك الحد الكبير مازلت اعاني في الكتابة والمحادثة
وللاسف اجد في صعوبة انه الناس هنا تفهمني مادري ليش والكلمات بالصعوبة تخرج حتى اذا بغيت اتكلم لازم افكر فيه بالعربي بعدين اترجمه بالانجليزي
ونفس الشي بالكتابة لازم افكر بالعربي بعدين اترجم وهذي مرة صعبة
اكيد في ناس كثير مرو بنفس تجربتي واجتازوها فااتمنى انكم تنصحوني وش اسوي لاني ابي احس من لغتي كثير رجاء عطوني نصايح تفيديني وتفيد اشخاص اخرين يمكن مروا بتجربتي ولم يجتازوها
رد: لماذا لغتي الانجليزية لم تتطور
امممممممممممممممممم
يمكن الاختلاط بالسعوديين بكثره وعدم الأهتمام باللغه وتطويرها
او انك ما متوحد يعني ما توسلف مع احد من الأجانب << متعوب على كلمة متوحد :D
جرب تسكن مع عائله واقعد سولف معهم ان شاء الله تمشي امورك
تقبل مروري:)
رد: لماذا لغتي الانجليزية لم تتطور
شئ طبيعي اخي العزيز ولكن انصحك ماتحفظ كلمات .. احفظ جمل .. وماتجي الجمل إلا من القراءه ..
انا انصحك بالقراااااءه القرااااءه لانها بتطور الفوكاب وبتطور السبلنق واضف على ذلك تكون خبره الخبره في الـ Essay
بالتوفيق عزيزي
رد: لماذا لغتي الانجليزية لم تتطور
اخي العزيز من واقع تجربه من احدى معاهد اللغه في السعوديه كان يدرسني استاذ امريكي كان يقول مشكلتكم انكم تفكرون بالعربي بعدين تحاول تترجم للانجليزي اذا بغيتوا تتعلموا لازم تحلم بالانجليزي بمعنيى حتى لوكنت لوحدك كلم نفسك بالانجليزي الشي الاخر الكتابه انت الي راح تطور نفسك سواء من كتابه ما تقرأ في وقت فراغك او بالمراسله في المواقع التي تتحدث الانجليزي .والبنسبه للمحادثه خل ثقتك في نفسك كبيره واغلط واغلط حتى تتعلم وحاول تسولف و تبربر كثير مع الامريكان وبكذا راح تتعلم
اسئل الله ان يوفقنا واياكم و ان يحقق امانينا
رد: لماذا لغتي الانجليزية لم تتطور
اقتباس:
المشاركة الأصلية كتبت بواسطة abdulaziz20z
امممممممممممممممممم
يمكن الاختلاط بالسعوديين بكثره وعدم الأهتمام باللغه وتطويرها
او انك ما متوحد يعني ما توسلف مع احد من الأجانب << متعوب على كلمة متوحد :D
جرب تسكن مع عائله واقعد سولف معهم ان شاء الله تمشي امورك
تقبل مروري:)
لا والله مااختلط بسعوديين بس يمكن اني مااسولف مع الاجانب لانه تعرف صعبة اتحصل شي مشترك بينا وبينهم اختلاف العادات والثقافة
شاكر مرورك حبيبي
رد: لماذا لغتي الانجليزية لم تتطور
اقتباس:
المشاركة الأصلية كتبت بواسطة CERESTY
شئ طبيعي اخي العزيز ولكن انصحك ماتحفظ كلمات .. احفظ جمل .. وماتجي الجمل إلا من القراءه ..
انا انصحك بالقراااااءه القرااااءه لانها بتطور الفوكاب وبتطور السبلنق واضف على ذلك تكون خبره الخبره في الـ Essay
بالتوفيق عزيزي
والله صادقة يبيلي ازيد معدل القراءة من جد والله سويت اكثر من هو مطلوب مني من ناحية القراءة بس شي غريب والله
رد: لماذا لغتي الانجليزية لم تتطور
اقتباس:
المشاركة الأصلية كتبت بواسطة عبدالهادي محمد
اخي العزيز من واقع تجربه من احدى معاهد اللغه في السعوديه كان يدرسني استاذ امريكي كان يقول مشكلتكم انكم تفكرون بالعربي بعدين تحاول تترجم للانجليزي اذا بغيتوا تتعلموا لازم تحلم بالانجليزي بمعنيى حتى لوكنت لوحدك كلم نفسك بالانجليزي الشي الاخر الكتابه انت الي راح تطور نفسك سواء من كتابه ما تقرأ في وقت فراغك او بالمراسله في المواقع التي تتحدث الانجليزي .والبنسبه للمحادثه خل ثقتك في نفسك كبيره واغلط واغلط حتى تتعلم وحاول تسولف و تبربر كثير مع الامريكان وبكذا راح تتعلم
اسئل الله ان يوفقنا واياكم و ان يحقق امانينا
والله يااخوك ماادري و اقولك المشكلة انه مافي موضوع تتحادث وياهم ولا ودك تطلع سخيف بحيث انك تتكلم عن الجو ولا عن مواضيع تحس انها مالها داعي
تسلم يالغالي على المرور والنصيحة
رد: لماذا لغتي الانجليزية لم تتطور
والله ياخوك كنت مثلك في السابق اتلعثم وحالتي كسيفة ولكن بعد ماخليت محيطي كله انجليزي في انجليزي الحمدالله تطورت بشكل كبير جدا اول حاجة حول جوالك انجليزي اذا كان عربي
ولاتترجم العربي الى انجليزي تراه اكبر غلط وبعذره ماراح احد يفهم عليك لان المعني يختلف مع صيغة الكلام والموقف او الموضوع الي بتتكلم فيه لأن أغلب الكلمات لها اكثر من معنى على حسب صيغة الجملة والموقف مثل ماقلت قبل ومثل ماقال الاخ احفظ الجمل واعرف معناها لأنك راح تستفيد منها كثير راح تتعلم من الجمل كيف تضع كل كلمة في محلها ولاتتخلى عن الكلمات احفضها بجميع صيغها مثل الفعل والحاضر والماضي لاكن لازم تتقن القرامر زين لانه بدونه ماراح اتكون جمل صحيحة وماراح تستفيد من الكلمات ولاتستحي من احد خلك جريء سولف معاهم عن اي موضوع حتى لو انه تافه ماعليك منهم الحاجة لك وانت الي بتستفيد وماردك بتتركهم وبتسافر يعني مافيه اي احراج وهم عارفين ظروفك واكيد بيقدرون المهم انت تستفيد
ديرة ماتعرف اهلها..........عاد انت تعرف الباقي اذا مرعليك هالمثل
وبعدين افتح موضوع حتى لوكان تافه لأن موضوع يجر موضوع وترى حفظ بدون ممارسة كنك يابو زيد ماغزيت واتوقع هذا الشئ الي اثر عليك
لازم اطبق الي تحفظه ولا راح تنساه ويروح هباء منثور خالط الي معك بالمعهد قط وجهك لاتستنى عزيمة ماراح يعزمونك انا كنت زيك قبل استحي واقول ماعندي سالفة لكن تعرفت على واحد ذيبان الله يذكره بالخير والله يالربع ساعات انه يتصنع انه ضايع عشان بس يسولف يوقف العالم بالشارع ويسألهم وبالباص يسحب علي ويقعد بجنب واحد ويقوله انه جديد على المدينة ويبي يعرف الاماكن الزينة وكيذا سالفة تجر سالفة وكل ماشاف احد سوى نفس الطريقة وهو يمكن يعرف الديرة اكثر منهم لاكنه ذيب جاي على حسابه ويبي بس لغة ويرجع السعودية يكمل جامعة ولايبي فلوس ابوه تروح خسارة قالي بالحرف الواحد والله لحلل كل ريال قطه ابوي وكل دقيقة بستغله بتعلم شي جديد باللغة لين اسافر مشاءالله عليه وبعدها سافر ورجع للسعودية ومشاءالله لغته مافيه احلى منه بسبب هالحركة الي ورثني اياها من بعده والحمدالله اتقنت القرامر ومع حفظ الكلمات وممارستها يوميا صارت اللغة عندي جيدة جدا ماقولك ممتاز لان الرايتنق عندي لك عليه شوي ولاتنسى الافلام الانجليزية مع الترجمة الانجليزية +دفتر صغير وقعد على الفلم واي كلمة جديدة وقف وسجلها وكمل راح تستفيد كيف تنطق الكلمات يعني اي كلمة اعجبتك وقف وعدها مع الممثل اكثر من مرة وراح تستفيد قرامر وكل هذا بفلم يعني حتى اوقات المتعة لازم تستفيد منها
اسف على الاطالة وهذا كله مع الاختصار طبعا
ربي يسهل عليك ويسهل علينا وعلى جميع المبتعثين والي على حسابهم بعد وينول كل واحد مراده ان شاءالله.
رد: لماذا لغتي الانجليزية لم تتطور
اذا كنت حاب تطور لغتك من خلال الكتابه , فـ انا ادخل قيمزر ( روم امريكا ) الي هناك كلهم سعودين وعرب بس ما يتكلمون الا انجلش ,
من ناحية المحادثه , حاول انك تختلط مع الامريكان في اي كلمة لو احد يقولك ثنيكو قوله ولكم ؛؛ وشوي شوي تصير outgoing على قولتهم ,
وعلى فكره انا صار لي سنه بعد .. وآلحمدلله بديت تدريجي من اللفل الاول في المعهد حقي , والحين انا في اللفل الخامس من ستة لفلات , وخلصت اختبار اللغه .
رد: لماذا لغتي الانجليزية لم تتطور
اقتباس:
المشاركة الأصلية كتبت بواسطة قنصل العرب
لا والله مااختلط بسعوديين بس يمكن اني مااسولف مع الاجانب لانه تعرف صعبة اتحصل شي مشترك بينا وبينهم اختلاف العادات والثقافة
شاكر مرورك حبيبي
طالما أنك تريد العيش بثقافتك هنا فماراح تنجح الا بجهد ومشقة ووقت طويل جداااا
أنصحك تتخلى عن ثقافتك وتعايش المجتمع بثقافته وتخالط الناس وتكون صداقات.. أو بعتقد ان مافيه فرق كبير بين وجودك ودراستك هنا ووجودك في الخبر بين أهلك ودراستك بمعهد انجليزي هناك
يا جماعة صدقوني بعض المعاهد بالسعودية أفضل من معاهد أمريكا وبكثيييير
وجودك هنا هو للمارسة فقط.. أو ارجع ياخي خذ اللغة بالسعودية وتعال هنا بالآيلتس خذ الجامعة وما تغلب حالك
تحياتي للجميع
رد: لماذا لغتي الانجليزية لم تتطور
تابع انميات يابانيه مترجمه انجليزي .. تستفيد كثير بس المشكله ما يتطور الاستماع عندك لانهم يتكلمون ياباني
رد: لماذا لغتي الانجليزية لم تتطور
اقتباس:
المشاركة الأصلية كتبت بواسطة ahmed gh
اذا كنت حاب تطور لغتك من خلال الكتابه , فـ انا ادخل قيمزر ( روم امريكا ) الي هناك كلهم سعودين وعرب بس ما يتكلمون الا انجلش ,
من ناحية المحادثه , حاول انك تختلط مع الامريكان في اي كلمة لو احد يقولك ثنيكو قوله ولكم ؛؛ وشوي شوي تصير outgoing على قولتهم ,
وعلى فكره انا صار لي سنه بعد .. وآلحمدلله بديت تدريجي من اللفل الاول في المعهد حقي , والحين انا في اللفل الخامس من ستة لفلات , وخلصت اختبار اللغه .
ماشاءالله عليك ربي يوفقك ان شاءالله
عندك مواقع حقت محادثة بالانجليزي غير الموقع الي قلت عنه
رد: لماذا لغتي الانجليزية لم تتطور
لا تلعب على نفسك انت تطورت بس يبي لك تشد حيلك اكثر
لان اغلب المبتعثين يدمر نفسه نفسيا فما عاد يقدر يتعلم لأنك اذا اقنعت نفسك انك فاشل والله تجلس فاشل طول حياتك والعكس بالعكس
فالشخص لازم دائماً يعطي نفسه رسائل اجابية
واذا تبي تتاكد قارن بين نفسك اول ما جيت والان
اول كنت تدخل الكلاس وتطلع منه وانت ما فهمت والان؟
انا ولله الحمد كنت دائماً متفائل وعارف اني اضعف واحد بالكلاس من ناحية اللغة وبعد سنة وكم شهر جبت الدرجة المطلوبة ودخلت الجامعه الحمدلله فانت صدقني لو تجتهد على نفسك اشوي تجيب الدرجة المطلوبة وتدخل الجامعه وربي يوفقك وين ما رحت
رد: لماذا لغتي الانجليزية لم تتطور
1.خالط الناس و افتح مواضيع معهم مثل ما تفضل بعض الإخوان في ردودهم
2. اقرأ و اقرأ و اقرأ يعني خلنا نقول ساعتين يوميا و طبعا القراءة تكون بهدف القراءة بحد ذاتها يعني مثل ما تفتح كتاب بالعربي و تبي تقرأه ليش تبي تقراه لأن الموضوع أغراك و تبي تتعمق فيه و نفس الفكرة شف لك شي يهمك و يجذبك و اقرأ فيه باللغة الإنجليزية بس حاول تستشير في نوعية الكتب أو المقالات اللي تبي تقراها علشان تتاكد من مسالة سلامة اللغة لأن مثل ما بالعربي كتب مكتوب بلغة سليمة و كتب أخرى مكتوبة بطريقة سيئة ( أقصد من ناحية اللغة و قد تجد هذا في كتب مشهورة ) كذلك بالإنجليزي هناك كتب مكتوبة بطريقة لغوية سليمة تفيدك في بناء معرفتك باللغة و أخرى لا
3. حمل الملفات الصوتية من هذا الموقع www.eslpod.com على جوالك و هناك غيره و لكن هذا اللي جربته و أثناء تنقلاتك ضيع وقتك في الاستماع إليها و ما فيه مانع من التواصل بالإيميل مع نفس الرجل
4. حاول تعود نفسك على استخدام قاموس انجليزي انجليزي مثل قاموس أكسفورد أو ويبيستر أو لونج مان
رد: لماذا لغتي الانجليزية لم تتطور
انا اخوي مثل حالتك تماما فاهم القرمر عن ظهر قلب
لكن بالكلام كاني مبتدى الاسباب مانختلط بالامريكان .. ولي اسبابي انا وعلى العلم اني كذلك ماختلط بالعرب نهائيا من جيت امريكا
ماعرف الا اثنين واحد بمدينه بعيده واحد بمدينتي وبالجامعه مانتقابل الا بالشهر مره
بصراحه وفي ناس بتزعل لكن هذه اللي اشعر فيه اذا ماصرت داشر وتمشي مع امريكان وتسوي زي سواياهم تشرب و دخن ولا مارح تتعلم
وهذه جالس اشوفه اعرف طلاب كثير لو تقوله اكتب اي كلمه انجليزيه مايعرف يكتبها لكن لمن يتكلم تقول نيتف سبيكنج!! السبب انه طول اليوم طلعات مع الامريكان ويسوي زي عمايلهم
وهذي الاسباب اللي تخليني ما اطلع الحمدلله اهم شي ديني وطز مولازم اعرف اتكلم انجليزي
وافضل شي تعوضها انك تتكلم بالمعهد مع الطلاب الاجانب صح وقت ضيق لكن مالك الاكذا ولاتنسى القراءه تحسن لغتك اكثر
رد: لماذا لغتي الانجليزية لم تتطور
وعليكم السلام
الحقيقه الاخوان اجابو عليك من واقع خبره وتجربه
انا ما راح اضيف الكثير على نصايحهم لكن راح احلل لك ليش انت كذا
اولا :
كونك انك ما تحسنت فهذا الكلام غير صحيح وراح اقولك ليش
الناس نوعين في تعلم اللغه ونوعك يحدده طريقة دراستك للغه
فيه ناس تتعلم بشكل تدريجي وتحس بالتطور مثل اللي يبني بيت لبنه لبنه طوبه طوبه
وفيه ناس واللي انت منهم تتعلم بشكل منفصل وستجد نفسك فجآه انك تعرف اللغه
مثل اللي يبني بيت كبير لكن ليس لبنه لبنه طوبه طوبه لا ..كل قسم تبنيه لوحده حتى اذا اكتملت جميع الاقسام ركبتها في يوم واحد وستجد ان امامك بيت جميل وتفتخر ببنائه
لكن لا تفرح وتقول ابنتظر حتى اجد نفسي متعلم لا ... لانك تحتاج انك تبني جميع الاقسام واذا لم يكتمل قسم واحد لن يكمتل البناء .
ثانيا:
بالنسبه انك تحتاج اذا بغيت تتكلم لازم تفكر فيه بالعربي بعدين تترجمه بالانجليزي
السبب لانك في الكلاس تستخدم القاموس انجليزي- عربي بكثره انصحك انك ما تستخدم القاموس في المعهد ابدا ابدا ابدا استخدمه في البيت فقط وللضروره القصوى
اذا كنت في الكلاس وواجهتك كلمه ما تعرفها لا تترجمها في القاموس لا ... اسال المدرسه وخلها تشرح لك معنى الكلمه انت دافع فلوس او الدوله دفعتلك فلوس حللها ولا تستحي منهم وقلهم انك دافع فلوس وجاي تتعلم هذا في حالة انهم ما ردو على اسالتك وهم يفرحون انك تسال
عندنا في المعهد يقولون لا تستخدم القاموس وقدامك قاموس متحرك خخخخخخ
اما بالنسبه انك تجد صعوبة ان الناس هنا تفهمك والكلمات بالصعوبة تخرج
السبب واضح انك ما تتكلم كثير ... تكلم وخذ نصايح الي ردو عليك
والسبب الثاني ان طريقه النطق عندك ضعيفه
اذا حفظت الكلمه انطقها بصوت عال وعندك المرايه .. تكلم قدامها وارفع صوتك ثم ضع الكلمه في جمله ثم انطقها بصوت عال وكانك تكلم واحد قدامك .... بعد فتره بسيطه راح تجد نفسك انك تتكلم بطلاقه
والعرب ما عندهم مشاكل في النطق لان الناطق باللغه العربيه يستطيع ان ينطق جميع مخارج الحرف وليس مثل الصينين او الكوريين
حنا العرب نواجه صعوبه( ليست صعوبه بل اقل من ذلك بكثير )بالنسبه للغه الانجليزيه في نطق حرفين فقط هما حرف P لان الباء عندنا ثقليه وهم خفيفه والحرف الثاني هو R الراء عندنا ثقيله وهم ما ادري وشلون ينطقونها بين الخفيف والثقيل .. ع العموم تحتاج ساعه واحده او اقل في تعلم نطق الحرفين النطق الصحيح وفيه مواقع لتعلم مخارج الحروف وانصحك بالموقع هذا
http://www.uiowa.edu/~acadtech/phonetics/#
وايضا عشان تنمي النطق الصحيح حاول انك تكرر ما يقوله المدرس وهو يشرح اي جمله يقولها قولها وراه بينك وبين نفسك ، وهذي الطريقه كان الرسول صلى الله عليه ويسلم يفعلها اذا نزل عليه القران لكن نهاه الله بقوله( لَا تُحَرِّكْ بِهِ لِسَانَكَ لِتَعْجَلَ بِهِ ) طبعا كان الرسول من حرصه على حفظ القران
والطريقه هذه اعتقد انها مفيده لتحسين النطق وليس للحفظ
ونصيحه اخرى اذا كنت تجد صعوبه انك تتكلم او تنحرج انك تتكلم مع ناس غريبن سجل في نادي التوست ماستر
هذا النادي ما يعلمك النطق فقط لا ... يعلمك حتى فنون الاقاء باللغه الانجليزيه ويطور عندك اجابه الاسئله المفاجاه
يعني يطور عندك المحادثه بكثير ويخليك متحدث لبق واغلب المسجلين فيه امريكان يعني ما يحتاج تسوي نفسك ضايع ع شان تتكلم خخخخخخخخخ
هذا رابط النادي
Find a Club - Toastmasters International
ادخل الزبكود ع شان تشوف اذا فيه نادي قريب لسكنك
وانا ما سجلت فيه الى الان لكني مراسلهم
وهذي مواقع متفرقه ممكن تستفيد منهن
Randall's ESL Cyber Listening Lab - For English as a Second Language
Idioms - ESL Basics
Best Grammar Checker and Proofreading Software by Grammarly
رد: لماذا لغتي الانجليزية لم تتطور
اقتباس:
المشاركة الأصلية كتبت بواسطة "عبدالعزيز"
انا اخوي مثل حالتك تماما فاهم القرمر عن ظهر قلب لكن بالكلام كاني مبتدى الاسباب مانختلط بالامريكان .. ولي اسبابي انا وعلى العلم اني كذلك ماختلط بالعرب نهائيا من جيت امريكا ماعرف الا اثنين واحد بمدينه بعيده واحد بمدينتي وبالجامعه مانتقابل الا بالشهر مره بصراحه وفي ناس بتزعل لكن هذه اللي اشعر فيه اذا ماصرت داشر وتمشي مع امريكان وتسوي زي سواياهم تشرب و دخن ولا مارح تتعلم وهذه جالس اشوفه اعرف طلاب كثير لو تقوله اكتب اي كلمه انجليزيه مايعرف يكتبها لكن لمن يتكلم تقول نيتف سبيكنج!! السبب انه طول اليوم طلعات مع الامريكان ويسوي زي عمايلهم وهذي الاسباب اللي تخليني ما اطلع الحمدلله اهم شي ديني وطز مولازم اعرف اتكلم انجليزي وافضل شي تعوضها انك تتكلم بالمعهد مع الطلاب الاجانب صح وقت ضيق لكن مالك الاكذا ولاتنسى القراءه تحسن لغتك اكثر
تقدر تخالط الامريكان عن طريق نادي التوستماستر
راجع ردي رقم ١٦
وهو نادي محترم وراح تتعلم احسن من الداشرين