اه ه ه يا دنيا والله مالي غيركم اشكي له

اولا سلام عليكم وكل عام وانتم بخير وجعلها الله سنه خير علينا وعلى كافه المسلمين في بقاع الارض
اخواني واخواتي من بعد ما ضاقت الدنيا علي وحسيت بطعم الالم مع طعم الغربه
انا مثل اي شاب طموح اني ارجع لاهلي ووطني بشهادة ترفع الراس وافرح امي الغاليه اللي تنتظر تشوفني باي اجازة
اول ماتخرجت من الثانويه طلعت بمعدل عالي وانقبلت في شركه سابك للابتعاث الخارجي وماكنت مصدق اني بدرس بره وبرجع والوظيفه جاهزة واكون رئيس على موظفين وابوي وامي يفتخرون فيني بكل مكان واني بشتري السيارة اللي قيمتها ب200 الف وبفتح بيت وبخطب وبتزوج وقلت يا حظ اللي بتاخذني كنت قبل لا اسافر امريكا كنت متحمس واخذت كورسات وكنت مستعد حتى الشنط جهزتها قبل السفر بشهر
وفعلا من وصلت امريكا عديت اللغه في 6 شهور مع ان المعهد صعب ودخلت الجامعه بس اول مادخلت شفت بنت هزت كياني من شفتها والله في اجمل منها بس هي من دخلت قلبي عموما صرت انتظر دوام الجامعه عشان اشوفها
واذا رجعت البيت اعد الثواني عشان يمشي اليوم انا بطبعي خجول من اشوفها ابتسم لها ما اكلمها بس يكفيني اني اشوفها حتى لو ما تناظر فيني المهم تقريبا صبرت اسبوعين ابتسامات ونظرات
وصرت انتظر الرجعه للبيت عشان اخطط واكتب في اوراق ايش اسوي بكرة بعد تفكير قررت اني اتقرب منها عن طريق الصداقه وامور الدراسه فعلا نجحت العمليه وكل يوم اجلس معها بخصوص دراسه ونتكلم عن الجامعه وعن بلدها وبلدي وانا بصراحه ماعمري لمست بنت بحكم عاداتنا بس كنت اسلم عليها بيدي ولما اشوف احد من الشباب الاجانب يسلم عليها او بيوسها او يحضنها يجيني قهر واقول ليه ما اصير مثلهم انا بعرف ان اللي بينهم صداقه وزماله بس كان الخجل مسيطر علي وارضى باقل شئ اني اكلمها وهذا با النسبه لي شئ كبير تقريبا صارلنا شهرين وانا اتكلم معها ومرة عزمتها على فطور ووافقت وانا خلال ها الشهرين كنت اهتم با الدراسه بس عشان تسالني او يكون عندي حجة اني اسولف معها وبعد ما قررت اني اصارحها بعد تفكير عميق حسيت انها تفاجات ومو عارفه ترد وبعدها طلبت ايميلي وبعد يوم ثاني وصلتني رساله منها انها رافضه ومستحيل تكون علاقه بينا بحكم انها مسيحيه و انا مسلم لانها متدينه وتهتم با الدين وكانت هذي الرساله صفعه في وجهي ومن يومها كرهت الدراسه وحسيت بااحباط اول مرة في حياتي احس فيه يمكن هذا الاحباط انها رفضتني وحسيت بعدها اني ماعرفت كيف اصارحها او صارحتها في وقت غير مناسب او لاني كنت اتكلم عن الاسلام كثيير واشرح لها مو عشان اني ابيها تدخل في الاسلام بس عشان تكون بينا سوالف والله هذا الاحباط اثر على دراستي بشكل كبيير صرت اكره البيت واكره الجامعه ومن اشوفها اكره الجامعه اكثر مو لاني كرهتها بس لانها حبطتني صرت من بعد ما كنت افضل طالب في الكلاس صرت اسؤء طالب لا احل واجبات ولا اركز و لااكتب بحوث
وبعد كل ها الاحباط تعرفت على سعودي ومع الاسف ان سعودي ويعتبر مسلم ومع اني ما احب احد يعرف اسراري قلت له وضحك علي وقال بنت تسوي فيك كذه !!! وحسيت ان كلامه صح
صرت اجلس معاه كثيير وعرفني على شباب اجانب وسعوديين حتى ايام الدراسه اجلس معهم بس يوم قال بنروح بار تجي معنا في البدايه ترددت خاصه بعد ماقال انه بيشرب بير
ورحت عشان اغير جو وطبعا في نفسي مستحيل اشرب معهم لاني بس رحت اغير جو رحت وبعد ما رجعت حسيت بتانيب الضمير وتذكرت نصايح ابوي وامي وان هذا اول بار ادخله في حياتي
بختصر الموضوع وبعدها صار الروحه للبار شئ عادي وللاسف اقولها بكل اسف ان شرب الخمر صار با النسبه لي شئ عادي ايضا وصرت كل ثلاث ايام اروح البار حتى لو بدونهم بس عشان اشرب
ودراستي في الجامعه صارت اسوء وحملت مواد ويوم شفت نفسي مو قادر اقطع شرب الخمر قررت الرجوع الى السعوديه وادرس باي مكان حتى لو اشتغل بس ما ابي اكون في امريكا
قررت الرجوع مو بسبب البنت لانها هي اللي فتحت باب شرب الخمر بقصد النسيان لاكن قررت الرجوع عشان امي وابوي اللي جالسين با السعوديه وينظروني ارجع بشهادة وانا في هذا الحال
بتعتبرها اسوء سنه مرت في حياتي او درس عمري ماراح انساه
والله انصحكم لوجه الله با البعد عن رفقاء السوء والله انهم بلاء
والله يغفر لي ولكم واتمنى تكون هذي السنه مع بدايتها سنه خير وتوبه لي ولكم

استغفر ربك الله يهديك
ولي استفسار على الخاص ياخوي

الشراب موجود بكل مكان يعني حتى لو رجعت على اساس تقطعه ممكن تلاقيه هنا

اذا لسا بعثتك موجوده افتح صفحه جديده

وعاهد ربك بالاول قبل ابوك وامك انك ماتشربه وكمل دراستك

وهاذي الدنيا

لاترجع وتترك شهادتك عشان بار

كبر مخك

طيب كويس انو صح ضميرك وانت لسى حي وفي مجال اتوب الله يغفر لك
ولو ان كل الي قلته مش مبرر بس شو بدنا نقول صار وانتهى
انت قلت قررت ارجع لسعودية كان الاحرى انا ترجع الى الله شرب الخمر من الكبائر
كثير ناس مرو بوضعك ولكن صحو في نص الطريق ورجعو لعقولهم واحسنو علاقاتهم بربهم وهذا هم افضل الناس
اولا توب من فعلك توبة صحيحه والتائب من الذنب كمن لاذنب له
كل ماذكرت انك لازم تروح للبار صلى ركعتين لله صدقني بعد كذا راح تبطل تروح كمل دراستك مانتب اول من حب ولا اخر من انكرش نص العالم هيك انسى هذا كله وارجع لدراستك وكملها ماهي بنهاية المطاف كل شخص يمر بمصاعب
خلق الانسان في كبد الناجح هو من يتخطى ذلك مش يوقف عند ذلك لو كل شخص فكر بنفس طريقتك عز الله مانتب لاقي احد مكمل طريقة وناجح هذا الفرصة لسى قدامك طالما حسيت بخطأ مافعلت ومانحرفت اكثر من كذا وصارت لك مصيبة اكبر
اما بالنسبة لاصحاب السوء احنا في 2011 والناس فهمت يعني يفترض مانعيد هالغلطات ونستفيد من تجارب الاخرين ولا نجعل من الاخرين شماعه لاخطائنا مانبرر بظروف اي ظروف ناس فقدت اهلها قدام عيونها ومانحرفت ولكن هو يعتمد على مدى تقبل الشخص كل هذا لايهم صار وانتهى الله يغفر لك ويهدينا جميعا
هذا كلام رائع لشيخ خالد الجبير في كيفية الاقلاع عن المعاصي راح يفيدك كثير

‫أقوى الطرق في ترك المعاصي الشيخ خالد الجبير.flv‬‎ - YouTube

أخوي ،،
القناعه كنز لا يفنى لو وضعت لنفسك قناعه كانت حالتك افضل ،،
لن اتكلم عن الماضي ،، لكن يجب ان تجلس مع نفسك وتخطط من جديد وتأخذ قرارات تاريخيه وتعود للدراسه فقط ،،
البنات لن يقدموا ولن يؤخروا ،، وان رفضت وحده ،، ستأتيك 6 بنات يعرضون نفسهم عندك ،،
أهم شيء القناعه الله يرزقك بها ،،

فكر مرة ثانية وارجع لربك وتوب توبة نصوحة رجعتك للسعودية ما راح تغير في الموضوع شي ....
اخلك حاطين املهم فيك صحيح بمكن الحين فرحانين انك بينهم بس هما يبغون الافضل لك وانت ما شاءالله متفوق وان شاءالله بار في اهلك صدقني منت محتاج اكثر من كذا
البنات كثير ولما تخلص الدراسة ان شاءالله بتلاقي اللي تشيلك في عيونها
والله ما يهون عليا اشوفك تنهي حلمك وحلم اهلك عشان بنت وعشان شرب ، فكررررر مرة ثانية

بالتوفيق

ياخوي اذكر الله ولا تحبط نفسك وترميها للتهلكه بكل بساطه

ضياع نفسك في البارات والشرب بشكل يومي هو بسبب الضيقه والصدمه اللي تلقيتها من البنت ولكن عادي حاول تنسى الموضوع وتدور لك بديل اشغل نفسك في الدراسه

والبنت بدالها الف ليس كل مايتمناه المرء يدركه ولا تنسى انك جاي هنا عشان هدف سامي وطموح ولاتضيع هالفرصه من يدك عشان موقف صار بحياتك

انصحك تفتح صفحه جديده مع نفسك وتعالج اخطائك خطاء خطاء والبنت حاول ترجع علاقتك فيها اذا ماتقدر ابد تنساها وتخليها مجرد صداقه وبس حتى تخفف من الألم بداخلك

والشرب خفف منه اذا ماتقدر تتركه او حاول بعزيمتك تتركه والله يعصمك عنه يارب

لكن تكفى لاترجع السعوديه حرام والله تكسر خاطر اهلك وتخلي الناس يتشمتو فيك وسمعتك تصير في الحظيظ

الله ييسر امورك ويشرح لك صدرك

الله يستر عليك ويوفقك

اول شي النك تبعك يبشر بالخير و حلو
الاعضاء ابدا ماقصروا وانت عرفت المكان الصح اللي تكتب فيه مشكلتك
والدليل انهم كلهم واعين و ماتكلموا باللي مضى وقالوا انت و انت و انت
انا رايي يختلف ومدري ليه كلهم ضد رجوعك السعودية انت جرب هنا شهر واذا ماقدرت ارجع
كثير ناس رجعوا ومو لانهم فاشلين لا لانهم صار لهم ظروف والظروف كثيييييييييرة وانتم ادرى
الحياة هناك تختلف عندك معارف واكيد بتنسى بس هنا واضح من كلامك ان معارفك مو كثير والدليل هذا الشخص الله يسامحه

مدام انت عرفت الحق وعرفت انك على خطا ورجعت لربك ان شاء الله ربي يوفقك وييسر امرك بس حرام اهلك مبسوطين فيك

لا تكسرهم كمل وشد حيلك حتى لو حسيت بصعوبه بس عشانهم وعشان احلامك اللي كنت تتمنى تتحقق وان شاء الله مع الوقت

تنسى ... نصيحه من اخت اصبر والا حاول تنقل لمكان ثاني وكمل دراستك ولا تهدم احلامك عشان البنت والشباب الخايسين انت رجال بينشد ظهر امك واخواتك فيك بكره...

السلام عليكم

اخوي الله يحفظك رب العالمين يقول ( احسب الناس ان يتركو ان يقولو امنا وهم لايفتنون)
يااخي هذي الفتن والابتلاءات الي تمر على الشخص سواء تجاوزها او وقع فيها لا تمنعه من الاستمرار في حياته ...انت شخص ناجح وواعي ماشاء الله عليك ولكن جا رفيق السوء في ساعة كنت ضعيف فيها وتحتاج الي يساعدك ...لكن الحمد لله انك انتبهت لنفسك وحاس بغلطلك ....

نصيحتي لك يااخي اول شي توب الى الله واستغفر وادعي كثير وقول يارب ابعدعني الحرام واهله..
اقولك ارجع ولكن ارجع لدراستك وجامعتك لانك انسان ناجح فلا تخسر فرصة عظيمة للتميز.....وبالنسبه للبنت كل ماشفتها تذكر ان عندك ناس اغلى واعز منها امك وابوك الي ينتظرونك ترجع ناجح ومميز ..ويارب ان الله يرزقك بزوجه صالحه تملئ حياتك وتسعدك ..

الله يوفقك ويهديك للصواب دائما ..

بعد ما تتخرج إن شاء الله وترفع راس أهلك
راح تحصصل كثير يتمنونك لبناتهم
لا تنسى انك مبتعث "سابك" مو أي بعثة
الأخوان ما قصروا , و المفترض بما انك جازم على التغيير للأفضل
انك ترسم لنفسك استراتيجية أو بمعنى اصح (خارطة طريق) خاصة فيك
الهدف الأول و الأخير الحصول على الشهادة و ضبط النفس
و الله يوفقك و ييسر لك أمرك ويستر عليك

حلو انك عرفت خطأك واتراجعت عنو
بس لاتاخد قرار ممكن تندم عليه
لاتنكنسل بعثتك اذا مو قادر تقعد بنفس المكان السابق بامكانك تغير مدينتك او الجامعه ام انك تكنسله صعبه وقرار حتندم عليه كل حياتك
وقبل كل شي استخير ربك والله يسرلك وعدت اصعب سنه الباقي سهل شغل قران اقراء قران خصصلك اوراد يوميه ادعي ربك
والله يسهلك ويوفقك ويكتبلك الهدايه والثبات
استشير اخصائي نفسي حيساعدك كثيررر

هذه أحد فوائد الابتعاث .. تعرف أين أنت بكل ذاتتك/قيمك/أخلاقك/دينك في هذا العالم الفسيح والكبير !
تعرف مدى قوة ومتانة وعمق اللي أكتسبته طوال السنين ومدى صبرها في تحمل الابتعاث !
الآن أنت لا تحتاج إلا صدمة إيجابية في حياتك وكل شيء سيرجع أفضل مما هو عليه !
أفضل الصدمات الإيجابية التي أفضل لها لك .. الزواج .. وهو دفعة عاطفية / نفسية / اجتماعية .. تغنيك عن الحرام أولا وعن الذين تظن أنهم رفقاء سوء !
حل إلغاء البعثة يسمى هروب من الواقع أو إنبطاح للأحداث القوية التي تعرضت لها .. وهذا من الممكن أن يشكل لك عقدة طوال حياتك !
الله يوفقك وييسر لك أمورك ..

والله انك راح تندم اشد الندم وانا اخوك
انتبه وفكر زيين وشوف انت ويين رايح
كلنا جالسن نمر باللي اتت مريته اللي هو الهوم سيك
لاكن الواحد لازم يصبر ويفكر الف مرره قبل الخطوه
انت جاي هينا لهدف معين لاترجع الا وانت محققه
وفكر بأمك وابوك زيين وش بيقولون للناس اذا رجع ولدهم من غير شهاده
السنين وانا خووك تركض وان شاء الله نرجع كلنا بشهادات ترفع روس اهالينا
اذا ضاق صدرك خذ مصحفك واقرأ ما تيسر لك وصل
وان شاء الله فتره وتعدي ...

برافو عليك لاتبيع دينك عشان وحدة مسيحية ماتسوى

فعلا فالخارج الواحد بيختبر قوة ايمانه كيف يقدر يمسك نفسه عن المعاصي واكيد بنات وشباب برا حلوين وجمال اشكال وانواع بس ايش الفايدة تعيش مع لوحة فنيه بدون ماتحس بمعناها يعني شكل بس بدون مضمون وبدون عقل
انصحك ترجع لبعثتك و اتزوج اذا حسيت حسيت تحتاج ونيس فغربتك ......والله يوفقك ياااااااااارب

أحييك على فتحة الصفحة الجديدة مع الله أولاً ثم مع نفسك ثانياً .
إلزم طريق الله عز وجل ، ثم ابحث عن الصحبة الصالحة لأنها خير معين بعد الله في الثبات والاستقامة .
دعواتي لك بالتوفيق

هلا اخوي
الله يهديك ويوفقك لكن انا عندي رأي اذا رجعت السعودية تزوج وباذن الله راح تعيش حياة سعيده وبعدين تذكر فراق اهلك لك وحزنهم .
الله يسعدك ويوفقك (احفظ الله يحفظك) ولاتنسى قول الله تعالى (إنَّ الصَلاَةَ تَنْهَى عَنِ الفَحْشَاءِ وَالْمُنْكَرِ وَلَذِكْرُ اللهِ أَكْبَرُ )
(لا تضيع مستقبلك عشان كلام فاضي)
الله يوفق الجميع

لا حول ولا قوة الا بالله

لا تعليق

الله يهديك ويرجعك لطريق الصواب

دعواتكم له ي شباب هذا الشي الوحيد الي راح يفيده

مو عيب انك تخطي العيب هو الاستمرار بالخطاء

تبي نصيحه !! اطلب من اهلك يزوجوك

الله يهديك ان شاء الله


تذكر الله في كل خطوة تخطوها


وصدقني راح تتغير الى الافضل

صدقني انت اكبر من الامور هذي وانت قادر ترجع افضل من اول بعد

بعدين خذ الفكره بمنظور اخر لو البنت ماقالت اللى قالته الى اين راح يوصل الموضوع شهر اثنين ثلاثه...الخ
وتلقاها راحت مع احد ثاني
وانت عارف انه في النهايه انت من طريق وهي من طريق (((عاشر من تعاشر ولابد من الفراااق)))

وصدقني انه خيرهـ من ربك يمكن انها مريضه وتبتليك بعمرها >>بعدين قصدها ان العلاقه بينكم مابتنجح لانه كل واحد له ثقافته لكن صدااااقه عادي<<<هم كذا وحده تتزوج يطلقها زوجها بعدين عادي يكون بينهم صداقه

اتمنى لك التوفيق وان شاءالله اشوفك من افضل مهندسين سابك
انت لها يابطل >>>الشهادهــ

الله يصلحنا ويصلحك ان شاء الله
ابدا ابدا ابدا
لا تفكر بانك ترجع بدون شهاده, هذي فرصة العمر الي يتمناه الكثير ولا تفشل نفسك قدام اهلك وامك وابوك الله يحفظهم لك ولاهلك والله يجزاه الخيررر ابونا ابو متعب وفر كل السبل المريحه والجيده لخدمة الشعب فلا تفرط في هده الهديه.
وانت رايح هناك:-
اولا: لخدمة الاسلام والمسلمين
ثانيا: فين الروح القتاليه وهذا كان اختبار من الله بالمصيبه الي حصلت لك والصبر الصبر (الصبر مفتاح الفرج) وهدا درس بانك تمشي مع الصحبه الصالحه الي تعينك في دينك ودراستك ولو ترى مصائب الناس لهونت مصيبتك عليهم واحمد الله واشكره على النعمه
واخرا وليس اخيرا: الزواج نعمه وان كان تستطيع انك تتزوج فخير وبركه وانا ارى بان هدا هو الحل ان شاء الله والله ييسرها لك
والله يوفقك دنيا واخره وييسر امرك ويسدد خطاك.

محبك في الله:ma22hm

لا ترجع مهما كان

كل انسان تصير في حياته نزوات وهذي طبيعة البشر

وانت الحمد لله عديتها وما صار إلا الخير

حرام ترجع

واصل دراستك,,وقل لأمك تخطب لك وارجع في اقرب اجازة تزوج وواصل دراستك

صدقني بتستانس

أهم شي انك تؤمن إنها نزوة وعدت على خير وانت الحمد لله وبصحة و عافية وهذا أهم شي

أتمنى لك التوفيق

اقتباس:

---

المشاركة الأصلية كتبت بواسطة ABDULAZIZ1406

هذه أحد فوائد الابتعاث .. تعرف أين أنت بكل ذاتتك/قيمك/أخلاقك/دينك في هذا العالم الفسيح والكبير !
تعرف مدى قوة ومتانة وعمق اللي أكتسبته طوال السنين ومدى صبرها في تحمل الابتعاث !
الآن أنت لا تحتاج إلا صدمة إيجابية في حياتك وكل شيء سيرجع أفضل مما هو عليه !
أفضل الصدمات الإيجابية التي أفضل لها لك .. الزواج .. وهو دفعة عاطفية / نفسية / اجتماعية .. تغنيك عن الحرام أولا وعن الذين تظن أنهم رفقاء سوء !
حل إلغاء البعثة يسمى هروب من الواقع أو إنبطاح للأحداث القوية التي تعرضت لها .. وهذا من الممكن أن يشكل لك عقدة طوال حياتك !
الله يوفقك وييسر لك أمورك ..

---

+1

يالغالي اول شي انا معجب بشخصيتك لانك قدرت توقف نفسك بعد ما بدأت تغوص

وخوفك من الحرام خلاك تفكر انك تلغي بعثتك وكل احلامك عشان تستر نفسك

لكن ياخوي راجع نفسك .. اسوأ حل في هذه الفترة انك تلغي بعثتك

اذا رجعت توظفت مابتلاقي وظيفة على مستوى لان شهادتك ثانوية .. وبتتذكر كل يوم الحلم اللي كان تقدر تحققه

انت مو في بعثة الملك بحيث لو رجعت ان شاء الله مافي مشاكل .. انت في بعثة سابك يعني مستقبلك جااااااااااهز

وغيرك وانا منهم تمنييييت الفرصة هذه لكن مالله كتب .. لا تضيعها وارجع وكمل دراسة

بالنسبة للحلول عندك حلين كلهم ممتازين .. الزواج منها تستر نفسك وومنها تلاقي اللي يملي الفراغ العاطفي اللي كل شخص موجود عنده

الحل الثاني غير الجامعة والولاية اذا تقدر عشان لا تشوفها

والله يوفقك يالغالي ويغفرلك ويبعدك عن الحرام واهله

واحب اشيد بردود الاعضاء العقلانية جدا

نادرا تلقى منتدى بهذه الطريقة

تقدر تتعلم الدرس وتتوب لله عز جل وانت هناك

اذا تقدر تستمر بالبعثة حاااااااااااااااول

وصدقني الدهب ما يصدي ,,, الشخص اللي كان يوم متفوق

يقدر يرجع للتفوق بسهولة


توب عن الشراب والبنات

ولو تقدر تخلي اهلك يخطبوا لك يكون احسن

ويصير تتزوج كمان وتستقر عاطفيا وكله في وجه الاغراء


ولا تنسى اهم شي

الدعاء الكثير - الصلوات الخمس بوقتها - لو صفحتين من القرآن يوميا
واذكار الصباح المساء

القرب من الله اكبر عاصم
والله عز وجل ارحم الراحمين

أولاً منت إنسان فاشل والدليل على ذلك نسبتك بالثانوية والمسيرة الدراسية :)

أنت توك بسن صغير وتخيل معي تبي وظيفة محترمة ودخل محترم وأنت شايب ؟ ولا وأنت صغير بالسن ؟
طبعاً وأنت صغير بالسن :) .. عشان تستمتع بحياتك والأهم من ذلك تمتع وتعوض أهلك عن كل الأيام المرّه الي فاتت ..

أنت الحين ماشي صح ومستقبلك مرسوم ومضمون إن شاء الله ب شركة سابك وهذا شي حلو بس عليك تتمسك ولا تستلم ..
كلنا وحتى المبتعثين والمبتعثات المتزوجين الكبار في السن يمرون في الهوم سيك ..

شوفني ياخوي أنا صارت لي ظروف والحين لازم اطلع فيزا جديدة ولي بالسعودية 5 أشهر ..
وصدقني وأنا بأمريكا كنت أقول وش باني أمريكا لو إني عند أهلي كاني مرتاح وظيفة ومدري ايش ..

بس يوم جيت عند أهلي الحين وطولت عندهم والله حسيت بقيمة البعثة !
والله حسيت بقيمة أمريكا !

أقسم لك بالله إني زهقان من حياتي هنا وودي ارجع اليوم قبل بكرة !
أحسني صحيت من كابوس ؟ أو من نوم عميق ؟

مدري كنت كيف أفكر !
كنت أقول اوكي راح ادرس اي تخصص سهل ومدري ايش !

جلست بيني وبين نفسي وأفكر بالمستقبل وكيف أبدل حياتنا للأفضل
الحمدلله بعد تفكير مدري كيف أقولك شعوري - إحساس محد يفهمه -

الحين برجع إن شاء الله لأمريكا بكل قوة وبتخطيط

أخوي أنت قلتها ودك تمتلك سيارة ب 200 ألف و قصر لك ولأهلك
هذا الشي مايجي إلا من تعب ولا تضيع هذي الفرصة دامك جاتك لحدك

يكون بعلمك ماشاء الله شركة سابك أفضل بالرواتب من أرامكو :)
بترجع بعد خمس سنين وأنت تملك سيارة فخمة وقصر لكم وعمرك 25 !! صغير :)

والحين من رجعتك لأهلك اعتبره تغيير روتين وهم وانزاح بشوفة اهلك واسترجع الذكريات وأنت بالمعهد
والجامعة وادرس أخطائك وحاول تصححها

صدقني بترجع رجعة قوية للأسباب الي ذكرتها سابقاً :)
وهذي سنة جديدة يعني إنسان جديد وتذكر إن الله غفور رحيم وباب التوبة مفتوح والله يوفقنا وإياك

والله ما ادري وش اقول لك ..
أنت مهندس
اخذت اللغة في زمن قياسي
تدرس في جامعة كولومبيا .. ما شاء الله تبارك الله
وبتشتغل في سابك
لا اله الا الله ،، اللهم لا حسد
يعني انسان زيك لابد ان يكون ذكي ومتميز ونااااادر
معقوله (تهرب) الى السعودية لاسباب تافهه مثل هذي !!
عندك مشكلة ؟ .. واجهها .. تخلص منها .. لا تهرب .. أنت أكبر منها
مــن اليــوم .. البنت ، الشراب .. خلفك .. والمجد امامك :)

شفت !
شفت الأعضاء إيش يقولون ياسلام كلامهم عسل ~ :)




تبغى تنسى البنت ؟!

أقولك إدعي الله في كل صلاتك إنه ينسيك البنت والله ولاراح تتذكر إنك تعلقت فيها يوم من الأيام وبتشوفها كأي طالب عادي بالجامعه :)

ونفس الشيء مع الخمر :)


إنت شجاع وذكي وكلنا شجعان وأذكياء بس إذا شغلنا مخنا .

يلا لا تضيع وقتك إبدا الحين أهلك وشركة سابك ينتظرونك تراهم متحمسين مره :o


ماتدري يمكن هذي بدايه وإختبار لك هل تصمد أم لا ؟!


الله يوفقك ~

اشكر جميع الاخوان على الردود
وفعلا ردود ناس واعيه
بحاول اتراجع عن قراري وبروح عند طبيب نفسي مثل ما قالت احد الاخوات
لان الزواج ما اظن اقدر اتزوج حاليا