شوف يااخوي.
اولا انا ماحب اللي يجي مطفي النور ويتكلم كلام ماهو عارف وش قاعد يتكلم فيه.
الشي الثاني الظاهر والله اعلم اني في كل رد كاتب بكل وضوح ان كلامي يعبر عن وجهة نظري شخصية بحتة قد تصيب وقد تخيب .(يعني باختصار هذي وجهة نظري انا وعليك انك تحترمها ولاتقعد تشكك في كلام الناس وتسوي انت اللي فاهم وخرابيط) اذا بتتكلم في شي لو سمحت قل ان هذي وجهة نظر وتكلم باحترام احطك على عيني وراسي واتقبل نقدك. اما انك تغلط في الكلام ف معليش روح اغلط في مكان ثاني.
انا لما تكلمت ماتكلمت الا من واقع وشي شفته بعيني واعرف هالناس وش يبون وليش . واقسم بجلال الله ان نظراتهم نظرات خبث ويتفحص البنت من راسها لساسها ويتكلم بالفاظ صراحة قلة حياء.
لما تجي انت وتقولي ان الشاب محاسب على النظرة اقولك معليش انا ماقلت الكلام ذا هذا كلامك انت وهذي مشكلتك. انا قلت البعض ولاعممت على احد . ياخي الرسول صلى الله عليه وسلم في احد الاحاديث في ما معناه قال ( النظرة الاولى لك ). انا ماقلت لحد يناظر . ناظر ياخي لكن على الاقل حشم البنت لاتاكلها بعينك يعني اذا شفتها محتشمة ف حق الله عليك انك تغض البصر عنها وتخليها في حالها .
بالنسبة لثقاقة الوسوسة فهذا يرجع للبنت نفسها ومعليش ماتدخل في نوايا الناس. اذا هي موسوسه او تحسب ان الشاب نظرته خبيثة او مدري وش ف هذي مشكلتها. وبعدين ممكن هي شافت موقف او عانت من شي عشان كذا وسوست وهذا من حقها مهما كان هي بنت وكافية خيرها وشرها.
الشي الثاني بالنسبة للمؤيدين لهذي لثقافة من الذكور وكلمة (مثلك) اقولك ياحبيبي افهم كلامي اول واستوعبه وفتح مخك وكبر عقلك شوي بعدين تعال ناقشني بمستوى ارفع من كذا. لاني ماعممت على الجميع ولاقلت الكل نظراته وصخه ولا أيدت احد ولاشي . انا قلت فيه (ناس) فئة يعني البعض بالعربي الفصيح البعض نظراته مو كويسة والبعض هذولي اعرفهم شخصيا. ف اعرف وش تتكلم فيه قبل لاتخلي لسانك ينطلق.
بالنسبة ل تنزيلة عينك اذا انك منزلها خوفا من ربك ف هذا شي طيب والله يجزاك خير عليه. وان كانك منزلها خوفا من كلام الناس ف هذا نقص فيك مع احترامي . لان الناس لو شافو انها نظرة عفوية بيسكتون ومحد بيتكلم الا خسيس وواطي ويبي يضرك. وان كانهم شافو نظرتك مهي طيبة ف الله يعينك. ( وعلى قولتي ياكلها بعينه اكل ف كل واحد عارف نفسه كويس واللي واثق من نفسه يرفع راسه ويمشي ^ــ*)
بالنسبة للي على قولتك تفسر نظرة السعودي انها شهوانية وتمشي مع مدري مين وتكلم مدري مين ف اقولك نصيحة لوجه الله اترك عنك هالحكي ولاتدخل نفسك في ذمة الناس ولاتخلي ذمتك وسيعة.
وبالنسبة لبعض الاجانب في السعودية ومدري وش هذي الامور تختلف عن اللي نتكلم فيه لاندخل بمواضيع ثانية مالها علاقة بموضوعنا.
شوف ياخوي كلمة الثقافة الوسواسية هذي تراها كبيرة وكلن يناظر الناس بعين طبعه. وافهم الفرق بين الواقع وبين الوسوسة وبعدين يصير خير.
انا مابرئت الاجانب ولاقلت شي عنهم ولاطريتهم. اذا احد طراهم لك روح تناقش معه وطيح اللي في راسك كله محد ماسكك. انا ماتكلمت عن الاجانب لان الغالبية منهم مو فاهمين ولاعارفين ديننا ولاعارفين سبب الحشمة والغطا ولاعليهم شرهه لكني تكلمت على فئة من السعوديين بشكل خاص بحكم انهم مسلمين وبحكم ان الشرع امرنا بغض البصر واننا نترك بنات المسلمات في حالهم . ويكفي صراحه نظرات خلو بنات المسلمين في حالهم.
طيب انت قلت بنفسك انك اعجبت فيها وانا يا أخ ماقلت انك ماكلها بعينك ف معليش لاتحط ان الموضوع كاني سبحان الله كاتبه عنك انت ك شخص. انت ادرى بنفسك. ودامك معجب فيها وطريت الخطبة ومالخطبة رح ورنا شطارتك واخطبها والله يوفقك.
انا ماقلت لك لاتعجب في احد ياخي اعجب وسو اللي تبي محد ماسكك . ولاقلت ان الواحد اذا اعجب صارت نظراته خبيثة ياخي افهم الكلام الله يرحم والديك بعدين تعال تكلم.
بعدين اي تناقض في كلامي ياخي . ياخي انا قلت في ناس تناظر نظرات خبث ماقلت انه اعجب فيها وبيخطبها.
وبعدين بالنسبة ان امك سورية هذا شي تفخر فيه عسى الله يطول عمرها ويعطيها الصحة والعافية ويخليها ويحفظها لك .
امين الله يرزقك بالزوجة الصالحه والمتفتحه . ( لكن اتمنى انك تفهم كلمة التفتح بكل معانيها). التفتح شي . والدين شي ثاني.
عموما اخوي. اتمنى انك اذا جيت تتكلم في شي انك تقول ان الكلام اللي بتقوله يعبر عن وجهة نظرك. واتمنى انك تستوعب الشي قبل تقوله. وترتقي بمستوى الحديث والنقاش.
في الختام العذر والسموحة ان كان كلامي فيه غلط والا شي . لكن لكل فعل ردة فعل.
تحياتي.