ماني فاهم شي من هالمعهد

هلا كيفكم

الله لايهينكم انا في معهد لغة (التابع لجامعة انديانا) وصارلي فية اكثر من شهر و اروح كل يوم للمعهد و المدرسين يتكلمون و يتكلمون وما افهم اي شي قسم بالله احس اني ابرجع مثل ما جيت !!
طبعا الطلاب الي معاي يردون معاهم وفاهمين كل شيء ما عدا انا :(
حتى الواجبات ماني فاهم شي منها
مع العلم اني في المستويات عادي وليس متطور

اكيد بعضكم مريتوا بهالفترة او هالشعور كيف قدرتوا انكم تتفوقون علية ؟ ابي نصايحكم الكآبة سيطرت علي !!!
لا تقولون غير معهدك لان هالمعهد من أفضل المعاهد في امريكا
لكن ابي نصيحتكم .. كيف اصير افهم وانا بالمحاضرة ؟

شكرا

لا شـك انك مبتـدئ في اللغـة
صحيح ؟؟

لااتركز وتحط ببالك انك ماتفهم لااااا اذااا فكرت بهالشي مستحيل تمشي امورك انسى كل شي وحط ببالك انك تبي تفهم وانك تغربت وتعبت عشان هالشي

ولاتنسى حاول تحفظ كلمات الربط والكلمات الشائعة اكثر احفظ بدون توقف و رح تفهم ان شاء الله ونم عندك مهارة الاستماع في برامج هنا كويسة كثير

اذا انت مهو بـ اول مستوى , كلمهم و ارجع لاول له

اما اذا انت بـ اول مستوى و مع كذا منت فاهم يبغالك تشد حيلك فالمعهد و برا المعهد بعد , ذاكر و اهرج و احفظ لين تطفش

السلام عليكم
اذا عملو لك في البدايه اختبار تحديد مستوى وانت في الليفل هذا على اساس الاختبار فصدقني ان كل الي معاك مثلك يعني وضعك طبيعي وفي اثناء الدرس اسالهم قول ما فهمت ويعيدلك مره وثنتين وثلاث انت جاي تدرس لغه جديده عليك فطبيعي ما تستوعب كل شي ...لاتقلق
لكن اذا هم حطوك في مستوى بدون اختبار اوشي فاذا تبغى روح قلهم انك تحس الدروس صعبه عليك ويمكن ينزلونك مستوى اقل شوي ..فلاتشيل هم هالامور لانه شويه شويه وبتصير تفهم كل كلمه يقولونها ...بس ذاكر الدروس الي تاخذها يوميا والكلمات الجديده يعني قول مثلا احفظ خمس كلمات مع جمل وبقية الكلمات الي اخذتها في اليوم مثلا اقراها اكثر من مره وهكذا بس اهم شي ركز كل يوم على خمس كلمات جديده وراجع في نهاية الاسبوع كل الكلمات.
وبالتوووفيق يارب

طبيعي جدا كلنا مرينا بنفس الحالة لكن عليك بحفظ الكلمات الي تسمعها بوميا و الضرورية بحياتك اليومية في المعهد والشارع

- اجتهد في الدروس الي يعطيك اياها المعهد ولا تكون خجوول .

- تابع لك مسلسل امريكي تحبة او فلم

- هذا موقع راح يساعدك في اساسيات اللغة اتمنى زيارته لان راح يفيدك كثير engVid · Free English Video Lessons

واتمنى لك التوفيق

شوي شوي وراح تفهم

شوف درس بكرة ايش هو

وحاول تقراه في البيت وترجم اغلب المفردات لأنها بتمر بكرة عليك اكيد

وبكذا مارح تضيع حتى اذا ماعرفت ايش يقول المحاضر لكن راح تفهم عن ايش يتكلم

وشوي شوي راح تقدر تفهم اكثر

اذا انت في مستوى غير الاول ...ارجع للاول .

والمشكلة هذي طبيسعية جدا لكن تجاوزها تختلف من شخص لاخر .

حاول تجلس مع نفسك في البداية وحاول تكلم نفسك في بالانقلش وفكر في الكلام اللي تبغى تقوله بالانقليزي واعمل له ترجمة وهكذا ....لين تكون عندك محصلة .

وفي الكلاس اذا قال المدرس كلمة حاول تلقطها واكتبها عربي وارجع البيت وحاول تتهجاها لين تجي معك واسمعها اكثر من مره عشان المرات الجاية تعرف وش يقول .


لاشك ان المستويات الاولي يجب ان يضاعف جهوده الطالب ويجلس مع نفسه كثير حتى يحدد مشكلته

هلا فيك أخوي

هالشئ طبيعي يالغالي وخصوصا اول شهرين تقريباً لأن هذي لغة جديدة عليك
اول شئ شيل من بالك انك ماتفهم شئ خلال هالفترة
صدقني انت قاعد تستفيد بس مو حاس بالفائدة يمكن لانك تستفيد شوي شوي
كل يوم راح تفهم شئ جديد من المدرسين ولاتحاول تجهد نفسك مرة وفي نفس الوقت لاتتراخي وتقول مافهمت
استخدم الديكشنري في كل كلمة ماتعرف معناها والكلمات اللي تترد عليك دائما وماتعرف او الكلمات الجديده اكتبها في نوتة
اي كلمة جديدة اكتبها في نوتة ومو شرط كل يوم تحفظها بس قبل تنام اقرأها قراءة مو لازم حفظ وكرر هالشئ كل ماطفشت
في الباص في وقت الفراغ ....
فيه شئ مهم جدأ وهو الاستماع حاول تسمع الكلمات جيداً وتحاول تفهم الجملة من عدد الكلمات اللي فهمتها
يعني بالعربي تخمين وهذا بيساعدك كثير ان شاء الله ...مثلا لقيت جملة فيها ٨ كلمات وفهمت ٤ اكيد راح تخمن الباقي من خيال سياق الجملة
حتى لو كان خطاء مو مشكلة اهم شئ انت خمن معاني باقي الكلمات وبعدين ترجم اللي مافهمته اذا كان نفسك تخمينك ان شاء الله راح يطبع في مخك
واذا العكس برضوا ان شاء الله راح تبقى في ذاكرتك فترة اطول من الترجمة السريعه وطبعاً يبغالك تراجع الكلمات وتحفظ كلمات جديدة يومياً


اما مسألة تابع مسلسلات وافلام انا اشوف انك ماراح تستفيد كثير منها حالياً وخصوصا انك في مبتدئ في اللغة
ركز على بناء الفكابلري واحفظ كلمات جديدة ولما تحس انك بديت تستفيد وقتها تابع افلام ومسلسلات وحاول تفهم
لانك حاليا بتشوش على نفسك اذا سعيت في اكثر من شغلة ومثل مايقولون راعي بالين كذاب

بالتوفيق ان شاء الله يالغالي

اذا حطوك في مستوى اعلى من متسواك
وجت با الحظ لان اختباراتهم كلها اختياري
اطلب منهم يحولوك الى مستوى -1 اذا تقدر
لا تقول ابي اختصر الوقت لان هذا مو من مصلحتك
واذا كنت اقل مستوى حول على معهد تجاري وابدا من الصفر افضل لك

اقتباس:

---

المشاركة الأصلية كتبت بواسطة المتوكله على الله

السلام عليكم
اذا عملو لك في البدايه اختبار تحديد مستوى وانت في الليفل هذا على اساس الاختبار فصدقني ان كل الي معاك مثلك يعني وضعك طبيعي وفي اثناء الدرس اسالهم قول ما فهمت ويعيدلك مره وثنتين وثلاث انت جاي تدرس لغه جديده عليك فطبيعي ما تستوعب كل شي ...لاتقلق
لكن اذا هم حطوك في مستوى بدون اختبار اوشي فاذا تبغى روح قلهم انك تحس الدروس صعبه عليك ويمكن ينزلونك مستوى اقل شوي ..فلاتشيل هم هالامور لانه شويه شويه وبتصير تفهم كل كلمه يقولونها ...بس ذاكر الدروس الي تاخذها يوميا والكلمات الجديده يعني قول مثلا احفظ خمس كلمات مع جمل وبقية الكلمات الي اخذتها في اليوم مثلا اقراها اكثر من مره وهكذا بس اهم شي ركز كل يوم على خمس كلمات جديده وراجع في نهاية الاسبوع كل الكلمات.
وبالتوووفيق يارب

---

للاسف غالب اختبارات تحديد المستوى مهي صحيحة

انا القرامر عندي ضعيف مرة مرة مرة ما اعرف شي

لما اختبرت حطوني فـ المستوى 5 من اصل 6 !!يعني فاللي قبل الاخير !!

و كلمتهم و قالوا انهم عارفين ان اختبار تحديد المستوى مهو ذاك الزود و انهم الحين يطوروا اختبار افضل و اقوى من اللي قبل