====> موضوع غريب شـوي بس والله اعاني ماخاب من استشار !!!

السلام عليكم ورحمه الله وبركات

ياجماعه ارجوكم خذوا الامر بجديه وافيدوني والله اني اعاني منها اشد المعاناه ا
والي بيستهبل ويتريق اقوله اتق الله من دعوه المظلوم

ياجماعه انا اعاني معانه شديده من ضياع بطاقات الصراف الى الآن مطلع 9 بطاقات خلال 8 شهور مادري كيف تضيع !!!
اليوم ضاعت وحصلتها ويوم اخذتها وشريت غداء ورجعت البيت ماحصلتها ضاعت !!!
دورت في كل مكان ماحصلتها عموماً مادري وش السبب بس بطايق البنك هي الي تضيع مني وبشكل مكرر اكثر بطاقه تجلس معاي شهر بعدين تضييع !!
جلست افكر واكتشفت ان فيه شخص بيني وبينه اتفاق اني اعطيه 60 دولار ولا عطيته من سنه لإني نقلت من الولايه هل تتوقعون دعوه منه هي السبب !!!
والله اني استحي اروح للبنكـ والبنك ملووا من كثر ماقول لهم ارسلوا لي بطاقه !!
الي يقهرني عندي بطاقتين من البنك بطاقه الي تقدر تسحب فيها فقط من صرافه ماقد ضاعت معاي موجوده معاي ومتى مابغاها احصلها لكن البطاقه المتنقله الي فيها الفيزه دائماً تضيع بششكل خلاني تقل مجنون !!
خلال8 شهور 9 بطايق وصلت لي على البريد حقت البنك تقوولي وتضحك !! يالله ماقد صارت لي في السعوديه 3 سنوات بطاقه وحده ولا قد ضاعت مني !!
تتوقعون وش السبب ! وهل لو اروح البنك وطلب بطاقه بيقلون ذا خبل ويشكون بوضعي وتصير احراجات !!
وغير كذا نفسيتي زفت اليوم احد والبنوك مسكره وخاف احد يحصل بطاقتي ويستخدمها تكفووون ادعوا اني احصلها في السياره لإني دورت وماحصلتها بسسس ممكن بعد دعاويكم وتوفيق الله احصلها

الله يثبت عقلك على دينك انا مشكلتي زيك بس مو صرافه جوال ماكمل الا جوالي ضايع لدرجه مليت منهم

واتوقع عشانك تستخدمها وانت مهتم بشي اللي بتشتريه عشان كذا تنسها وتستانس باللي شريته
او انك طلبت وانت مرررره جيعان واكلت ونسيتها وممكن الستين حولها له وبطاقتك الجديده سوى لها فتحتها من الفوق واشبكها مع مفتاح السياره بالميداليه عشان مرره ماتضيع
ويارب تحصلها بسيااره بس سامحني لاني ضحكت عليك

انا ضايع من يوم كنت بالسعودية ويوم وصلت هنا ضيعت الايفون مرتين بكن الحلال مايضيع الحمدلله مصيرة يرجع لي
بخصوص بطاقة الصراف انصحك تسوي مثلي

خلي جيبك خالي من اي شي ماعدا الجوال . المحفظة خلها بالبيت ولاتشيل الا بطاقة صرافك وسلامتك

السبب هو الاهمال بكل اختصار

ماراح اقول اني ما اغلط فقدان اي شي شي طبيعي انا عن نفسي من اول مافتحت حساب بنكي قبل 10 سنوات ما ضيعتي بطاقتي الا مرة واحدة بس تضيع البطاقة مرة كل شهر هذا شي غريب

اتبع هذه القاعدة , عند استخدام البطاقة للشراء او السحب اول شي تسويه بعد استخدام البطاقة هو ارجاعاها في المحفظة وما عمرها راح تضيع



انتبه بس لا تضييع اشياء اهم من بطاقة البنك

يا حبيبي هدي و روق

البنك مسكر اليوم موهب مشكله دق على رقم البنك و الغي البطاقه و اذا ما تعرف انقليزي مره اطلب مترجم منهم في المكالمه

طلب بطاقه الصراف لو تطلب الف بطاقه و يشكون فيك كل يوم لا تشيل هم , اذا ما عندهم حد معين من البطاقات مفروض ما تتعداه ريح بالك ولا عليك الا تضيع و تطلب وحقك هذا .

في امريكا لا تنحرج من احد , لانهم حتى هم في المقابل لو يقدر يطلع منك سنت واحد بالشحاذه بيسويها بدون ما يستحي و هذا طبعهم الي من حقك حتى لو ما يرضي الطرف الثاني ما احد يقولك لا و اهم شي القانون .

و الرجال الي اخذت منه 60 دولار و نسيته تراه ما نساها , ولكن سبحان الله هذا طبع بني ادم في التعامل المالي يذكر كل ريال له و ينسى كل الي عليه الين يطالب راعي الدين بحقه .

ولا تستحي من البنك في اي خدمه , الشخص الي جالس ما يدفع لك من جيبه ولا يخدمك في بيته هذي فلوسك و خدمات دافع قيمتها بانك فاتح حساب عندهم و يطلعون منها فوائد .

اولا فلوس الناس وجع راس
رجع لـ صاحبك الـ 60 دولار تبعه هذا اول شيء عشان ما يكون بعدين دين معلق بـ ذمتك
بطايقك اتعود انه مجرد ما تخلص منها داااااااااااااااااااااااااااايركت على المحفظة ,, لاتشيلها في جيب بنطلونك ولا في ايدك
عود نفسك انك تكون منظم في اي مكان تروح له سواء سوق او مطعم
تطلب اللي تبغاه تسحب ببطاقتك وقبل ما تاخذ اغراضك ترجعها دااااااااااااااااااااااااااااااايركت لـ المحفظة

بـ صراحة ما استبعد انه راعي الفلوس دعى عليك بـ ضياع رزقك وما تقدر تلومه الحق حق
الله يصلح حالك وامورك

صح كلامكم اخواني رجع فلوس الرجل وترا الامر عادي هدي لبى قلبك
انا ولد عمي معي كل يوم ضايع جوال امس ضاع ع الحين ما حصلنه وش نسوي كل يوم مضيع جوال ونشتري
اهم شي لا تشيل هم وتقدر تاخذ من البنك كشاف حساب وانت بمريكاااا تقدر تشوف كل شي
ربي يوافقك ويوافق الجميع

الله يوفقك يارب

والله ان ضميرك حي!!!! الله يوفقك بس

اقتباس:

---

المشاركة الأصلية كتبت بواسطة يا ميسر الامور

والله ان ضميرك حي!!!! الله يوفقك بس

---

وش قصدكـ !!!!! اتمنى تردي

ياكثر مشاكلك بس اقولك الحياة مدرسة تعلم من اخطائك

قول ( سبحانك اللهم اني كونت من الضالمين )

ورجع 60 دولار حق الرجال

ذكرك للستين دولار تدل على ضميرك الحي
احسن الظن يا اخي!!!

اخوي .........ززز خل معك محفظة خاصة بالبطاايق

اول ماتسحب على طول ترجعها في المحفظة

لأنك لو حطيتها بجيبك بدون محفظة تأكد انها راح تطيح من اقل حركة

ياجماعه تدرون ايش صار اليوم !!!

طبعاً اليوم كان من اسوا ايامي في امريكا والحمد لله الأمل في بكره والايام الجايه يكون افضل اليوم فتحت ايملي لقيت رساله من شخص الي يطلبني فلووس يقوووولي فقدتك وحشني ويقولها بجد ولا جاب طاري الفلوووس وهو ماقد ارسل لي رساله ابداً في حياته هذا تنبيه من الله اني ارجع له فلوووسه وبإذن الله راح ارجع له فلوووسه

سبحان الله،، الله أراد لك خير.. بس ثاني مرة لاتأخذ من أحد فلوس وماترجعها لأن الانسان اللي أعطاك فلوس وثق فيك وفك عليك أزمة ومن الواجب الوفاء له...

وبالنسبة للبطايق لو تخليها مربوطه بشي كبير تحسه وتفقده بسرعه يكون أحسن حتى لو ربطتها في بنطلونك وحطيت لها حبل مطاطي والا سلسلة يكون أحسن

بالتوفيق للجميع

قص زاوية البطاقة بخرامه على شكل داره وندخل سلسله وعليها على رقبتك ونتهت المشكله

اذا جيت تشتري اشخط وما يحتاج ترجعها اتركها في الهواء وهي ترجع بنفسها وحليت مشكلتك

وثاني شي 60 دولار وقبل سنه وتبي الرجال يتذكرها لو 600 قلنا يمكن بس شي غريب

شكلك متسلفها من مكسيكي الزبده ماعلينا سو الي قلتله عليه وخذلك دش ورح ارقد

ذكرتني بمشاكل واحد من اعضاء المنتدى هنا كان اسمه غربه,, عموما الله يسهل امورك و رجع الفلوس لصاحبها

لا حول ولا قوه الا بالله..

انا ما ادري انت وش منتظر مننا يعني
تبينا نعطيك حل سحري
و لا تبينا نقول انك مسحور
الموضوع و ما فيه انك يبي لك تركز و تصير حريص
وش اللي كل شهر و الثاني ضايعة لك بطاقة
الحل عندك انت
خلك حي و مركز و حريص
و عوّد نفسك على عادات جيدة و درّب نفسك عليها
و مع الوقت تبي تصير عادة تلقائية عندك
مثلا
البطاقات كلها و الفلوس في محفظة واحدة
المحفظة هذي اعتبرها قطعة من جسمك
و لا فصخت الثوب و لا البنطلون لا بد تعلق هذا اللبس و عارف مكانه و حاط المحفظة فيه
و ان اضطريت تشيل المحفظة ، شلها من الجيب و حطها مع المفاتيح و كل الاغراض اللي كانت في جيوبك في مكان واحد آمن
لا جيت تشتري بالبطاقة عود نفسك انك تكون عينك على البطاقة ، و ما تشيل عينك منها الا لما تخلص منها و تحطها في المحفظة و تحط المحفظة في جيبك
شوية عادات و سلوكيات جيدة تعود نفسك عليها و تدربها و تصير مركز عليها
و مع الوقت تبي تصير عادة تلقائية من دون تفكير
مع قلب حي و عين مركزة و مخ شغال و فاتح الرادارات حقتك 360 درجة و من جميع الجهات