طلاب امريكا ياحبكم للقلق والتخوف ادخلوا والا ترو مافيه بعثه

السلام عليكم ورحمة الله وبركاته
وشلونكم عامليييييييييييين ايه تمام
خير انشاء الله وش عندكم خوف وقلق وربكه ولجه وجع !!!!
بصراحه من يوم ادخل ملتقى امريكا يجيني مغص ورعشه واقعد اصيح وابكي لا وبعض الاحيان يتشنج خشمي وشلون مدري !!!:drool1: :drool1:

اللي يقعد ينزل موضوع وشوي يصيح انا وانا وانا ومدري وش صار وش حصل وش رايكم الا كذا الا جذي >>>>ياويلي على جذي :goof:
واللي يجيبلك هم وغم واللي يتفلسف ويعطي اراء وربي انه من جنبها واللي يطمن واللي يخوف
ياناس ياناسات .....(يعني جمع بنااااات!!!!!!!!!!:1eye: )بحكم خبرتي بالسفر والترحال والتجول في امريكا واوربا وشرق اسيا >>>>>>ماعمره تعدى كوبري الفحص حده قهوة الشلال لا ومخربها :drool1:

المفروض اي استفسار مال امه داعي لاتنزله وثاني شي اغلب المواضيع اللي تنزل تكون بصراحه خوف ماله مبرر او داعي
وبعد انت اللي تدخل على اي موضوع وتقرا وتنخرش وتتكركب كراعينك اركد شوي وترا الامور سهالات

يامبتعث الحين قدم على التأشيره انشاء الله بعد سنه انت قدم وخلاص الوزاره عارفه كل شي
وانت ياللي ماجاك قبول قالولك انهم بيرسلون لك مو ناسينك تراكم مقلقين انفسكم واللهي

تبي تعبي بيانات وامور القنصليه عبها وفيه في هالمنتدى مواضيع ومثبته ماقصروا سو مثل مايسووون

اما تقعد تلجنا هنا وماخليتنا ننام تروني مستأجر باخر المنتدى ماغير اصوات بواري واسعافات وحوادث وصياح واللي مضيع اولده واللي يدور موقف لسيارته واللي يبي يسافر بكره واللي مسطح كورته في ملتقى كندا واللي حاشر له وحدهد بملتقى بريطانيا واللي يغازل بقسم الترحيب واللي ماسكينه يفحط بشارع التأشيرات
خييييييييييييييييير من جد خييييييييييييييييييييير ماعندكم صبر

بذمتكم تذكروا المواضيع اللي قبل الملتقيات والله مواضيع بعضها تغث اللي يقول تأخروا واللي يقول نسونا واللي راح يدور ولايات واللي قام يجيب قبولات الله اكبر ياالحرص اللي فيكم اقول اهجدوا تروا الموضوع بسيييييييييييييييييييييط للغايه

الدوله ماقصرت والدوله عطت ويسرت وجابتلكم قبولات وريحتكم لا ومهتمه فيكم اكثر من انفسكم
وبعدين انتم رايحين لامريكا افضل دوله في العالم والله العظيم ان لي اقارب اطعووووووووس يعني مييييح مو عارفين شي واحد كان يغازل ناقه والثاني كان همه ددسن 97 والي مدري وشو يعني بالبر وهذاهم بامريكا مستانسين وعايشين ويبربرون انقلش لا وماعادهم يكلموني الله يرحم زمااان اول:drool1: :drool1:

المقصد من كلامي ان اغلب المبتعثين ماشاء الله فاهمين ومتحضرين لا ومنهم من سافر وشاف فاستغرب من خوفهم المفروض انا واشكالي اللي نخاف مو انتم

وبعدين الحرص الزائد عمره ماينفع بالعكس يعيشك قلق وخوف ورعب ويمكن يأثر فيك وتنكسل بعثتك

امريكا غير اللي نسمعه عنها بالعكس تمام وبتشوفون والله بتروحون وتتفاجؤون الحياه هناك حلوه اهلها احلى انظمتها اجمل كلهم حبوبين وتعيش وياهم

اذا كان هناك اجراءات معقده فهذا من حقهم بلدهم اكبر بلد واقوى دوله فلازم تكون اجراءتهم شوي متشدده مو معناها انهم مايبونك بالعكس بس هي اجراءات روتينيه
مثل السعوديه في اجراءات الحج للاجانب ...

اسمعوا زين المفروض كلكم تحمدون الله وتشكرونه وتعيشون لحظة الفرح والنشوه لاتقلقون والله بتندمون خذو الامور بشكل مبسط تماما لاتشحنون انفسكم وتعقدونها وهي اسهل مماتتخيل

كثير من الاعضاء والمبتعثين والله ترحمهم خايف وقلقان ياخي ماقلنا شي من حقك والحرص واجب بس مو بهالطريقه الحين ينقز لي واحد ويقولي انت غير جدي وانت ماخذها فله ..:fever: :fever:


ياعزيزي وياعزيزتي انا اقول كل الامور سهله ومبسطه كل ماعقدتها تعقد وكل مابسطها تبسط وتنفرج

مااشوف ان فيه شي يخوف او يقلق او يستاهل الاستفسار في بعض الامور ركز في بعض الامور

يعني هي مسألت وقت اصبر والله انك بتروح اذا اراد الله سبحانه

اغلبنا قبل مايطلع اسمه في البعثه يقول ياعمي اي ولايه اهم شي اطلع
ويوم طلع اسمه قام يتفلسف والولايه الفلانيه وليش وكيف ومالهم حق ...

ياخي قمة التناقض وياشين التفلسف والاجتهاد الكاذب

في الاخير اقول لكم افرحوا فأنتم ذاهبين لامريكا اقوى دول العالم علميا وثقافيا وياااارب تجون بالشهادات اللي ترفع الراس بس بليييييييييييييييييز بلا قلق


خذوها مثلي وناسه ماغير سهرات وبسطات والبسمه شاقه خشتي الحمد لله ليش القلق والله اني داااج بس في الاخير طالع بأذن الله وكل قلقكم ذا بتشوفون اذا ماندمتم عليه !!

عيشوا لحظات الفرح واحلموا احلامكم وابنوا مستقبلكم ونبسط ياعم :drool1:

على العموم يامراحب ويالله اقضب الباب انت وياه ابي انام ولا عاد اسمع احد يتفلسف او يقلقنا ترو فيه ناس اقلوبها هواوي هههههههههههههههه


الله يوفقكم وييسر لكم امركم ويهدي بالكم يارب

تحياتي
مراسل منفوحه ومن قلب سوق اعتيقه اششششششششششششششش >>>>> يعني الارسال ضعيف:joystick:

تصلح dr phill
ترفع المعنويات

LoOoOOoOoOoooool
مره عجبني الكلام وصحيح لازم نخفف على نفسنه كلنا طالعين بإذن الله
وان شاء الله مافي خوف
وتوكلوا على الله
بس لان الشي جديد علينا بس من جد امريكا ما تخووف انا جربتها سياحه من زمان
والكل قال الييي
بس شوي الي قالقني متى راح يجيني القبول والله عندي فضول اعرف انا وين موقعي من الاعراب
ومين راح يكون معايا في نفس الولايه عشان نتساعد
ويعطيك الف عافيه
:)

أقول اظاهر انك جالس في استراحة مع الشباب وقدامك الاب توب وتنفخ بهالشيشة وفالها على الاخر:bounce8: والناس على أحر من جمر علشان البعثة:rocket: أتوقع بيجون الناس وبيعصبون عليك الحين بالتعليقات مااقول الا الله يعينكم يالي يبي البعثة:sadwalk: كاسرين خاطري

هههههه

عجبني اسلوبك

ياخي وش هاللجه والزحمه .. ياخي وش هالهرجه والعفسه هههه

حلو الكلام ... مافي شي يخوف .. كل شي رح يكون مثل ما نبغى ..

خل عندكم طاقه ايجابيه ..
: )
شكرًا ياخوي ع موضوعك الي يرفع المعنويات

:groupwave:

والله انك فله تحية حلووةة لك ولكلامك

اتمنى الكل يقرأ الموضوع ويستمتع

بالبعثه على قولتك :drool1:

الظاهر تو وصلتك البضاعة والطماط ومبسووووط عالآخر
فيه ناس عندها امور ناقصة وفيه ناس كملت اجراءات وماتدري وش الاجراءات اللي بعدها

وناس تساعد ناس اما بمعلومة او تكملة جزء
والله لو تكمل نومك بالغرفة اللي استاجرتها انه احسن لك وتنفخ بالشيشة بس انتبه لا تحرق المنتدى

خلنا نكمل شغلنا احسن

اقتباس:

---

المشاركة الأصلية كتبت بواسطة RoOoMaNcE

الظاهر تو وصلتك البضاعة والطماط ومبسووووط عالآخر
فيه ناس عندها امور ناقصة وفيه ناس كملت اجراءات وماتدري وش الاجراءات اللي بعدها

وناس تساعد ناس اما بمعلومة او تكملة جزء
والله لو تكمل نومك بالغرفة اللي استاجرتها انه احسن لك وتنفخ بالشيشة بس انتبه لا تحرق المنتدى

خلنا نكمل شغلنا احسن

---

بس في ناس تحط مواضيع بدون ما تفكر حتى في ان تقرا المواضيع المثبته ع الاقل

deep
البحث عن المعلومة لها دور

واكثر شيء يفقع قلبي وضغطي
بعض الناس الله يهديهم

يفتح موضوع تاااافه جدا ويسأل ويستفسر عن شيء بخارج موضوعه 360 درجة 180 ماتكفي

يعني المشكلة ان فيه مواضيع كثيرة وخصوصا بالفترة الاخيرة جدا مالها اي داعي
واكثر شيء ثلاث من الاشخاص يفتحون مواضيع بنفس الاستفسار ولكن بصيغ ثانية
والا يجيك واحد تو يسجل بالمنتدى ويفتح موضوع يسال وش صاير
ولا يقرأ مواضيع قبله ولا شيء

اتمنى من الاخوة الاعضاء الانتباه لهذه الامور ليس لأن المنتدى ملكي او بمزاجي

ولكن لنرتب المواضيع للاستفادة وعدم التخبط

مع التحية

اقتباس:

---

المشاركة الأصلية كتبت بواسطة RoOoMaNcE

deep
البحث عن المعلومة لها دور

---

اوكي ما قلنا شي .. لكن تشوفين في القسم 3 ولا 4 مواضيع كلها تتكلم عن نفس النقطه .. مع انو فيه موضوع يرد على الاسئله ..

لازم قبل اي موضوع تعبوا على نفسهم ويقروا اشوي

اخوي صح كلامك ومعليش عدلت ردي متأخر وانت رديت بعدي

بس تراي شنب الله يرجك خخخخخخخخ

اقتباس:

---

المشاركة الأصلية كتبت بواسطة RoOoMaNcE

اخوي صح كلامك ومعليش عدلت ردي متأخر وانت رديت بعدي

بس تراي شنب الله يرجك خخخخخخخخ

---

ايه كلامك بعد التعديل ممتاز جداً ..
هذا الي انا اقصده .. والي يقصده صاحب الموضوع
يعني اذا قريت وما لقيت لأسئلتك جواب حط مووضوع
لكن كل اشوي احد حاط نفس موضوع بنفس السالفه هذي مشكله


صصصصصج عاد آسفين فكرتك بنت لان شفتك انقهرت من الموضوع .. عاد انا مافيني شنب
يعني اختك يا ماما:arrowhead: :arrowhead:

اقتباس:

---

المشاركة الأصلية كتبت بواسطة ArroGanT

تصلح dr phill
ترفع المعنويات

---

:tiredsmiley: :tiredsmiley: هو فعلا انا عندي برنامج اقدمه على قناة الساحه اسمه ((قف هنا !!)) والحمد لله حقق نجاح باهر جدا >>>>>>>>امحق ....
الله يوفقك وييسر لك امورك

اقتباس:

---

المشاركة الأصلية كتبت بواسطة meme83

LoOoOOoOoOoooool
مره عجبني الكلام وصحيح لازم نخفف على نفسنه كلنا طالعين بإذن الله
وان شاء الله مافي خوف
وتوكلوا على الله
بس لان الشي جديد علينا بس من جد امريكا ما تخووف انا جربتها سياحه من زمان
والكل قال الييي
بس شوي الي قالقني متى راح يجيني القبول والله عندي فضول اعرف انا وين موقعي من الاعراب
ومين راح يكون معايا في نفس الولايه عشان نتساعد
ويعطيك الف عافيه
:)

---

انشاء الله بيجيك القبول وبتكونين بولايه زينه وبتلقين الناس الطيبه معك والفضول عطليه ازيلك الفتره هذي

الله يعينك ويوفقك

اقتباس:

---

المشاركة الأصلية كتبت بواسطة deep sea

هههههه

عجبني اسلوبك

ياخي وش هاللجه والزحمه .. ياخي وش هالهرجه والعفسه هههه

حلو الكلام ... مافي شي يخوف .. كل شي رح يكون مثل ما نبغى ..

خل عندكم طاقه ايجابيه ..
: )
شكرًا ياخوي ع موضوعك الي يرفع المعنويات

---

العفو وابد انا في الخدمه

وعندي برنامج مثل ماقلتلكم قبل على قناة الساحه بلس واسمه قف هنا لحظه .....
سأكون سعيد بمشاركاتكم .>>>>>>اقول على شحم!!!

الله يوفقك وييسر لك امرك

اقتباس:

---

المشاركة الأصلية كتبت بواسطة lolycat

:groupwave:

والله انك فله تحية حلووةة لك ولكلامك

اتمنى الكل يقرأ الموضوع ويستمتع

بالبعثه على قولتك :drool1:

---

هلا فيك واتمنى لك وللجميع السعاده والوناسه ياااارب

واستمتعوا تروا العمر مره

عليك اسلوووووووب
هههههههههههههههههههههه

الله يجزاك خير يااخوي على ها الموضوع بصراحه اعجبتي روحك وانا اوافقك الراي لأنه ربنا ماراح يخترلنا الا الطيب
والأحسن فليش القلق اذا لنا خير فشىء ربنا راح يعطينا هو
انا بعد ماجاني القبول ولا شفت شىء الين الحين بس مطمنه ومتأكده انه خير وكل تأخيره فيها خيره
وربي مااخرني الاخير وماراح ازعل ولا انقهر سواء سافرت ولا قعدت لأنه خير فكل الحالات
ماعلينا غير الدعاء انه ربي يسير امورنا وبس
الله يسير امور كل المبتعثين وتحققو احلامكم

هههههههههه

اعجـــبني كلامكـ ...

يسسلم فومكــ ....

يعطيك الف عافية اخوي
رفعت معنوياتنا

اقتباس:

---

المشاركة الأصلية كتبت بواسطة مبتعث وافلقني لاطلعت

السلام عليكم ورحمة الله وبركاته

وشلونكم عامليييييييييييين ايه تمام
خير انشاء الله وش عندكم خوف وقلق وربكه ولجه وجع !!!!
بصراحه من يوم ادخل ملتقى امريكا يجيني مغص ورعشه واقعد اصيح وابكي لا وبعض الاحيان يتشنج خشمي وشلون مدري !!!:drool1: :drool1:

اللي يقعد ينزل موضوع وشوي يصيح انا وانا وانا ومدري وش صار وش حصل وش رايكم الا كذا الا جذي >>>>ياويلي على جذي :goof:
واللي يجيبلك هم وغم واللي يتفلسف ويعطي اراء وربي انه من
.
.
.
.
.
.
.
.

---

يقووووله المرتســـي (المرتكي) :D <<<< مثل حايلي


المرتسي = هو الشخص المتبنطش على مركا و حاط رجل على رجل :D

والله انك فله ...من جد روقتناااااااااااا عالاخرررررررررررر..

البعض في هالمنتدى يروقك عالاخر.. والبعض يخليك مبسوط عالاخر ..

تشكراتي لك .. بس مو كأن اسمك لحاله يجيب القلق ...

مبتعث وبفلقك لاطلعت



قسم انت اول واحد بهالمنتدى ...اقراه وافطس ضحك


هخخخخخخخخخخخخخخخخخخ



انصحك بالطياره ..اجلس بالوسط وخذ مكبر وسولف


عالاقل نلاقي احد يوسع صدورنا




وسلمت وصح لسانك

اقتباس:

---

المشاركة الأصلية كتبت بواسطة REAL_LOVE

عليك اسلوووووووب
هههههههههههههههههههههه

---

هلا وغلا وياعساك دوم مستانس

وليش ماتستانس انت رايح امريكا

:drool1: :drool1: :drool1:

اقتباس:

---

المشاركة الأصلية كتبت بواسطة عاشقة السعوديه

الله يجزاك خير يااخوي على ها الموضوع بصراحه اعجبتي روحك وانا اوافقك الراي لأنه ربنا ماراح يخترلنا الا الطيب
والأحسن فليش القلق اذا لنا خير فشىء ربنا راح يعطينا هو
انا بعد ماجاني القبول ولا شفت شىء الين الحين بس مطمنه ومتأكده انه خير وكل تأخيره فيها خيره
وربي مااخرني الاخير وماراح ازعل ولا انقهر سواء سافرت ولا قعدت لأنه خير فكل الحالات
ماعلينا غير الدعاء انه ربي يسير امورنا وبس
الله يسير امور كل المبتعثين وتحققو احلامكم

---

اميييين والله ييسر لك امرك وييسر امور كل اخوانا واخواتنا المبتعثين

وانشاء الله بيجيك قبولك وتكمل الفرحه مع ان الفرحه مكتمله :drool1: :drool1: :drool1:

اقتباس:

---

المشاركة الأصلية كتبت بواسطة مبتعث وافلقني لاطلعت

خذوها مثلي وناسه ماغير سهرات وبسطات والبسمه شاقه خشتي الحمد لله ليش القلق والله اني داااج بس في الاخير طالع بأذن الله وكل قلقكم ذا بتشوفون اذا ماندمتم عليه !!

عيشوا لحظات الفرح واحلموا احلامكم وابنوا مستقبلكم ونبسط ياعم :drool1:

تحياتي
مراسل منفوحه ومن قلب سوق اعتيقه اششششششششششششششش >>>>> يعني الارسال ضعيف:joystick:

---

اعتقد ان كلام مثل هذا يعكس مستوى الجدية والاهتمام عند صاحبه ويضع علامات استفهام على استحقاقه للبعثه .. تفضيلا على ناس مجتهدين ومجدين .. وقلقين على مستقبلهم .. ويتعاملون مع الامر بجد .. لانه مستقبل وضياع سنين دراسه وفي ناس بتستقيل من شغلها يعني قرارات مصيريه وحاسمه في حياتهم ...

يمكن انت اخذ الموضوع سهاله ومعتبرها تمشيه .. اما لان عندك بدائل ثانيه او انك ماشلت هم نفسك للحين يعني توك محفول مكفول في هالدنيا ... بس غيرك يخطط لمستقبله .. ومو رايح تمشيه .وعلية مسئوليات وعنده طموح ويحق له يشيل هم .. خصوصا مع تخبطات الوزراه وعشوائيتها ..

اقتباس:

---

المشاركة الأصلية كتبت بواسطة abu_omar

اعتقد ان كلام مثل هذا يعكس مستوى الجدية والاهتمام عند صاحبه ويضع علامات استفهام على استحقاقه للبعثه .. تفضيلا على ناس مجتهدين ومجدين .. وقلقين على مستقبلهم .. ويتعاملون مع الامر بجد .. لانه مستقبل وضياع سنين دراسه وفي ناس بتستقيل من شغلها يعني قرارات مصيريه وحاسمه في حياتهم ...

يمكن انت اخذ الموضوع سهاله ومعتبرها تمشيه .. اما لان عندك بدائل ثانيه او انك ماشلت هم نفسك للحين يعني توك محفول مكفول في هالدنيا ... بس غيرك يخطط لمستقبله .. ومو رايح تمشيه .وعلية مسئوليات وعنده طموح ويحق له يشيل هم .. خصوصا مع تخبطات الوزراه وعشوائيتها ..

---

اخوي ابو عمر اولا السلام عليكم وثانيا هدي اعصابك وتعوذ من ابليس

اخوي ابو عمر اذا تكونت عندك علامات الاستفهام عن مدى استحقاقي للبعثه من عدمه فهذا الشيء اولا بتوفيق الله عز وجل ونعمته التي انعمها علي بحصولي على البعثه
ثم ان علامات الاجتهاد ليس ان تكون قلق ومتوتر توتر لايضيف او يعطي المدى الايجابي لقراراتك
او تفكيرك وبالتالي سيصبح هذا التوتر او الاجتهاد المضمون في منطقك الذي يشوبه كثير من الخطأ عائق وعامل محبط لتجاوز المحن الذي صنعها توترك وبالتالي لاتصل لقمة مرادك

ابو عمر انا اقول لاتقلق مو لاتفكر واتخاذ قرار مصيري اما بأستقاله او ماشابه فهذا قرار اتخذته بعقلانيه وتفكير عميق واتوقع بأن العقلانيه لاتجتمع مع القلق والخوف
فأذا اتخذت قرار مصيري وانت على حالتك فأتمنى ان تعيد حسابتك لانك فعلا اتخذت قرار خاطيء

ابو عمر اود ان اوضح شي مهم لك وهو ان الامور اذا اخذتها بسهاله وهذا يعني بأنك اخذتها بعين ايجابيه فسيظهر امامك الطريق الصحيح للوصول لطموحك ومستقبلك
ابو عمر اذا اخذت الامور بقلق وهم ونظره سلبيه فوالله لاتصل لما تريد بل ستتعب كثيرا


واخير اين تخبطات الوزاره سامحك الله وش اللي صار بذمتك وين التخبط اللي تقوله ياخي للحين ماظهر الا كل خير
بصراحه الله يعينك ويهديك وينور حياتك بالبساطه والايجابيه والسعاده

وعلى فكره انا عندي خيار ثاني وهو بسطتي بسوق عتيقه والحمد لله والصلاة والسلام على نبينا محمد وعلى اله وصحبه اجمعين
واعذرني اخوي ابو عمر بس تراك جدي وبزياده وترا هالصفه مو زينه والله خذ الامور ببساطه

وعلى قولتهم(( هونها تهون صعبها تصعب))

تحياتي/
اخوك مبتعث ايجابي بأفكاره وحياته

هههههههههه حبيت موضوعك والله انت الصادق على اني انولدت اهناك ورحت اهناك وياكثر مانسافر وانقليزيتي اوكي نسبيا وهم خايفه !!كل يوم احوس بالولايات ابي ولاية زينه جامعه زينه كل شي مريح !كل ولاية ولازم يحطون فيها عيوب ماتبينا نخاف!انا ودوني على بورتلامد اورغن يقولون السعوديين يجيبون الشيب اهناك وهم بعيده ويقولون ماتونس!ووالجامعه ودوني بتكسس وانا اكرها لييش بالضبط مادري!بس حرررر وانا مابي حر فيعني لازم نخاف لاتلومنا وثانكس عالموضوع والله يهدي نفوسنا

يسسسسسسسسسسسسسسسسسسسسسسسسسلم فومك والله ريحتنا شوي ونستنا الهم;

,,,

والله انك صادق :goof:

لانه من كثرة كلامهم واسئلتهم يعقدون الامور

وهي بسيطه ومافي اسهل منها كل واحد يدخل ويعطي راي وحل

وبالاخير كل كلامه غلط يلخبطون نفسهم وغيرهم معاهم ..

الله يوفقكم ويوفقني معاكم

,,,

صحيح كلامك.. الناس تعشق المبالغة بالكلام عن امريكا .. بس حتى لو صح ! تستحق التعب :)

صح لسااااااااااااااااااااانك ، هذا الكلام السنع

ما تقول إلا مبتعثيننا على ((((جوانتانامو))))

إخواني فعلاً الوزارة أحرص مننا على أنفسنا ولا أصلاً ما كانت فتحت لنفسها باب دوشة

الصبر ثم الصبر ثم الصبر

في العجلة الندامة

ونقطة أخيرة المنتدى نبه عليها

ألا وهي :
المفروض كل شخص عنده استفسار أول شيء يبحث عنه قدددددددددد ما يقدر (((في المنتدى ، في منتدى آخر ، في المواااااااقع و أعتقد ((جوجل)) ما خلى حسرة في قلب أحد ))) حتى لو تبغى أكتب اسمك ويطلع لك كل شيء عن نفسك

في الأخيييييييير ... إذا مالقيت مرادك إسأل في المنتدى ويالييييييييييييييت تكتب موضوع وااااااااااضح عشان لا تخلي الناس تدعي عليك بدل ما تساعدك لأنه المنتدى بهذه الطريقة صار 999999999999 ألف صفحة ((والله حرااام))

بصراحة موضوع حلو
لكن كان المفروض تجمعنا عندك في استراحة
وتكلمنا من قريب لأني حاس انك وانت تكتب شوي وطب علينا مع الشاشة<<واحدينكت هو ووجهه .

الله يسعدك وحنا بحاجة دعم معنوي صدقوني ياشباب
لان الشخص اذا كان عنده عزيمة صدقوني ما شي يصعب عليه وان يجيب اللي في باله

ذكرتني في مقوله وحطوها في بالكم يامبتعثين (هدية مني)
$$$هم بلا همة سقوط من القمة $$$

الله ييسر للجميع
مشكور

ما عليهم شرهه ياخوي (بدوي طاح له في مريسه):roflmao: وبعدين احلف انك ما سويت كذا زي الربع ايام بعثتك وتوك طالع بقراطيسك ، اما انا بصراحه والله والله والله ما شلت همها واني مبسوط وفالها وكني رايح لصبلوووخ ماعندي ادنى مشكله:fez:

اقتباس:

---

المشاركة الأصلية كتبت بواسطة s-GOAHEAD

صح لسااااااااااااااااااااانك ، هذا الكلام السنع

ما تقول إلا مبتعثيننا على ((((جوانتانامو))))

إخواني فعلاً الوزارة أحرص مننا على أنفسنا ولا أصلاً ما كانت فتحت لنفسها باب دوشة

الصبر ثم الصبر ثم الصبر

في العجلة الندامة

ونقطة أخيرة المنتدى نبه عليها

ألا وهي :
المفروض كل شخص عنده استفسار أول شيء يبحث عنه قدددددددددد ما يقدر (((في المنتدى ، في منتدى آخر ، في المواااااااقع و أعتقد ((جوجل)) ما خلى حسرة في قلب أحد ))) حتى لو تبغى أكتب اسمك ويطلع لك كل شيء عن نفسك

في الأخيييييييير ... إذا مالقيت مرادك إسأل في المنتدى ويالييييييييييييييت تكتب موضوع وااااااااااضح عشان لا تخلي الناس تدعي عليك بدل ما تساعدك لأنه المنتدى بهذه الطريقة صار 999999999999 ألف صفحة ((والله حرااام))

---

صح بدنك ويالله حيه ارحب تراحيب المطر

واعجبتني مقولتك الصبر ثم الصبر وبعدين الصبر >>>>>>>والله ماقالها كذا!

المهم الله يوفقك ياخوي

اقتباس:

---

المشاركة الأصلية كتبت بواسطة احساس مبتعث

بصراحة موضوع حلو
لكن كان المفروض تجمعنا عندك في استراحة
وتكلمنا من قريب لأني حاس انك وانت تكتب شوي وطب علينا مع الشاشة<<واحدينكت هو ووجهه .

الله يسعدك وحنا بحاجة دعم معنوي صدقوني ياشباب
لان الشخص اذا كان عنده عزيمة صدقوني ما شي يصعب عليه وان يجيب اللي في باله

ذكرتني في مقوله وحطوها في بالكم يامبتعثين (هدية مني)
$$$هم بلا همة سقوط من القمة $$$

الله ييسر للجميع
مشكور

---

والله ياخوي تعرف الاستراحه انسرقت هالايام يعني لاتلفزيون ولا شيشه ولا فحم ولاحطب حتى الفرش اخذوه

وهذانا نجمع بالقطه من جديد اذا بتدخل معنا حياك القطه من 213 ريال ههههههههههههههه هي بصراحه اطلعت 212.65بس خلينا الباقي للازمه لاسمح الله

وصح لسانك هم بلاهمه تطبيح من القمه

الله يوفقك يابتاع كالفورنيا

اقتباس:

---

المشاركة الأصلية كتبت بواسطة الكونقرس

ما عليهم شرهه ياخوي (بدوي طاح له في مريسه):roflmao: وبعدين احلف انك ما سويت كذا زي الربع ايام بعثتك وتوك طالع بقراطيسك ، اما انا بصراحه والله والله والله ما شلت همها واني مبسوط وفالها وكني رايح لصبلوووخ ماعندي ادنى مشكله:fez:

---

ياخي ليش الاحراجات والاستلكاع لا انا متطور شوي

قبل لا اطلع سويت بروفه وعشت على اني بأمريكا
رحت واشتريت طقم رياضه النصر اللي في الوسط خريطة الجزيره العربيه لا وفيها درجة حرارة المدن
وكنادر الله يكرمك ويكرم الاعضاء والملائكه ام دبابيس وطاقيه منخله

وابد وعشيات بكنتاكي وهارديز وكتشب وحركاات تعرف خفت من الصدمه الحضاريه

وبعدين ترى صلبوخ بعيده خلك حول العماريه العيينه تراها احلى واجراءاتها اسهل !!!!!


تحياتي منفوحه دي سي

والله انك صادق
المشكلة مو الخوف والقلق الا قلة دبرة
اجل واحد كبر جدي بيروح ماستر ولا دكتوراه يسأل اسئلة تااافه بموضوع كاااامل
(ابي اعرف التخصص الفلاني هو بالجامعة العلانية؟)

ياخي بتسافر وتتغرب ومو قادر تفكر وتدخل موقع الجامعة
طبعا غييير اسئلة المدن المتكررررررره ولا يبووون يبحثون ابد هذولي وشلون بيسوون بحوووث واجارات وفواتير

والله اعتمدوا على نفسكم وتتسهل امور كثيرة

وبالتوفيق للجميع

مشكور مبتعث على الحكي الحلو لكن ترى عذر سرقة الاستراحة
مايمنع تعزمنا عندك في البيت << وايش اللي بلانا في هالنشبة هههههه
الله يعطيك العافية يا بتاع كلية المعلمين العظمى << حلوة مرة
بصراحة هذي بلا بوك ياعقاب
لو خارجنا ربي من هذي الكلية ان كان حنا مع الناس في هذي الوظائف الطيبة
لكن بلوى وحلت .

بالتوفيق للجميع

كلام كليم والله يعطيك العافيه حبيبي ان شاء الله ما في خوف ولو وجود الخوف في الاشياء هذي ترى شي كويس لان المثل وش قال من خاف سلم

وبالتوفيق