نصائح ان شا الله تكون مفيدة (تم التعديل واضافة معلومات)

December 8th, 2008, 01:14 AM

السلام عليكم ورحمة الله وبركاته

هذا موضوعي الثاني وهو عبارة عن نصائح اقدمها لاخواني واخواتي المبتعثين وخصوصا طلاب الدفعة الاخيرة

1- اذا تبغى تدفع الايجار ادفعه بشيك. اكتب شيك باسم صاحب البيت واكتب فيه انه هذا المبلغ هو ايجار شهر كذا عشان ما يقدر ينصب عليك ويقول انه انت ما دفعت و وقتها ما راح تثبت انك دفعت اذا دفعت الايجار كاش

2- اذا انت جاي وتبغى تحجز على امريكا, احجز على الخطوط السويسرية او اللوفتهانزا
بإختصار على اي خطوط اوروبية وحيكون خط سيرك جدة او الرياض ل فرانكفورت او اي مدينة اوروبية بعدين على اقرب مدينة كبيرة في امريكا والسبب انه لما تجي عن طريق اوروبا حتكون الطيارة كلها اوروبيين وانت السعودي الوحيد وما راح تطول في الايمقريشن
والله مجرب وهذي رابع مرة ادخل فيها امريكا
وكمان اختي واصحابي وكلنا جربنا هذا الشي و والله في فرق كبيييييير لما تكون طيارة سعودية ولما تكون اي خطوط ثانية

وبعدين ترى مسموح تجيب معاك اي شي
انا جبت معايا جبن, شابورة, معمول، تمر, آيس كريم طبعا امزح
نعناع لاني كنت احسب مافي هنا نعناع المدينة

المهم كل شي تقريبا اكل سوني 2
الوالدة الله يخليها ويحفظها ويطول عمرها حطت كل شي في الشنطة عشان لا اتعب
حطت معجون اسنان وفرشة اسنان اعواد الاذن اعواد الاسنان اي شي يخطر في بالك
حتى المضرب حق الذباب
حتى قلتلها بأمزح معاها
ترى انا رايح امريكا مو الباكستان او الصوماال
ترى هناك في كل شي وفي اللي مو موجود في السعودية
ياحبيلك يا ام محمد

بس اعملوا حسابكم يا جماعة لو جبتوا معاكم كمية كبيرة من نوع واحد زي مثلا جبتو معاكم كرتون جبن او اي شي
ممكن ياخذو عليكم تاكس على حسب الموظف
عشان كذا خلو معاكم كاش


3- للي ما جرب البنوك الامريكية قبل كذا
اقله انتبه وحاول تشوف حسابك كل فترة اون لاين وتشوف كم الرصيد وانتبه ترى كل ما تجي تشتري يقلك الكاشير تبغى تدفع ديبيت (depit) ولا كريديت (credit)

والفرق انه الكريديت ما يطلع وما يبان في حسابك انه انت دفعت هذا المبلغ الا بعد يومين او 3 على ما اعتقد

وترى الحسابات في امريكا لو صار حسابك 30 دولار مثلا وانت اشتريت بمبلغ 50 دولار
ينزل حسابك بالسالب ويصير سالب 20 دولار
وياخذ على كل عملية سويتها آخر الايام 35 دولار
فجأة تلاقي حسابك يمكن سالب 300 او 400 دولار
يعني مو زي السعودية اذا جيت تشتري او تسحب يقلك ترى الرصيد غير كافي
لااااااااااا هنا يخليك تشتري بس ياخذ 35 دولار على العملية الوحدة


4- اللي يبغى يشتري سيارة وناوي هذي الايام
يستنى شوية لانه معظن الشركات الامريكية حتعلن افلاسها وحتنزل قيمة سياراتها النصف تقريبا
ومنها كرايسزلر ويمكن جنرال موتورز
وهذي سمعتها من كثييييييييييييييييييير امريكان وكمان سعوديين وفي الاخبار


يعني استنى الين بعد شهر يناير 2009 والله اعلم

5- للي يحب الشوبينق
ويحب الماركات هذا موقع خطييييييييييير فيه كل الاوت ليت
SEARCH ALL OUTLET STORES & OUTLET MALLS IN US

والاوت ليت هذا زي المول يكون فيه كل الماركات بس بتخفييييييييييييض
وهذا الموقع يقلك فين اقرب اوت ليت وكيف تروحله
وايش الماركات اللي فيه
يعني مثلا بربري ارماني زي كذا

طبعا في اشياء كثيييييييييييييرة ما راح تعجبك
بس والله برضو في اشياء كثيرة حلوة ورخييييييييييصة


6- هذا الموقع فيه ديكشنري مرة خطير وحلاوته انه لما تكتب الكلمة ومنت متأكد من السبلينق
هو يوريك الكلمات تحت وتقدر تشوف اذا هيا منهم ولا لأ

Express English Dictionary



7- اخر شي للي يبغى يتصل على السعودية
انا جربت كل البطاقات وكل المواقع
وهذي البطاقة الافضل مقارنة بسعرها والوضوح

Welcome to Smart Phone Cards - Card Rates

والله كويسة مرة
تكلم جوال على السعودية 53 دقيقة ب 5 دولار فقط
واذا على تلفون البيت حيكون ارخص بكثير
يمكن 3 ساعات


8- اللي يبغى يسافر في داخل امريكا ويبغى يحجز فندق
هذا الموقع اسمه هوت واير
www.hotwire.com
والله اني جربته بنفسي

تدخل وتختار المدينة اللي تبغاها ويجيبلك قائمة بالفنادق على حسب النجوم
بس ما يقلك ايش اسم الفندق
بس يقلك انه 4 نجوم او 5 وايش الخدمات اللي فيه يعني في مسبح او لأ في مطعم او لأ وزي كذا

وانا رحت لونق بيتش وسكنت في الهيلتون ب 80 دولار
وهيا اصلا كانت الغرفة تقريبا 170 دولار يعني الخصم كان اكثر من 50%

يعني العيب الوحيد انك ما راح تعرف اسم الفندق بس يوريكهو في الخريطة ويبغالك تدور في قوقل في خريطة المدينة وتشوف نفس المكان اللي طلع الفندق اللي اخترته ويمكن تعرف اسمه
بس مو مهم لانه حيقلك ترى 5 نجوم الفندق او 4 او 3 وزي كذا
وما راح يغشك ابدا

يعني لو ميزانيتك حقت الفندق 100 دولار الليلة
ليش تحطها في فندق 3 نجوم او 4
وانت تقدر تسكن في 5 نجوم !!!!!!!!!!!!!!!!!!!!!!!!!!!!
بعدين اذا انتم 3 او اكثر وتبغوا تسكنو في نفس الغرفة اكتب انه انتم اثنين بس لانه ممكن يزيد السعر
بس مو اكيد انه يزيد

10- اللي يبغى يجي امريكا وهو عمره اكثر من 21 سنة وناوي لما يجي يستأجر سيارة في مدينته ولا في اي مكان في امريكا مؤقتا طبعا
لازم يجيب معاه بطاقة ائتمانية من اي بنك في السعودية
في البنك الاهلي يعطوا بطاقة ماستر كارد بس مسبقة الدفع
يعني تحط فيها فلوس كاش وتقدر تستخدمها هنا كأنها بطاقة ائتمانية
لانه ترى ما يأجروا اي احد الا ببطاقة ائتمانية او بطاقة بنك امريكي هنا في امريكي مو سامبا

او الواحد يسوي زيي انا
انا لما جيت اسافر الوالد الله يعطيه الف عافية كانت عنده بطاقات ائتمانية واصدرلي بطاقة فيزا مدرجة تحت بطاقته
بطاقة لاحد افراد العائلة واعتقد كل بنك يسويها
تصير بطاقة الابن تحت بطاقة الوالد ولما اسحب انا ببطاقتي على طول ينسحب من حساب الوالد

ترى زوج اختي لما جا هنا ما قدر يستأجر سيارة مع انه عمره 30 سنة
لانه ما جاب معاه بطاقة ائتمانية
كان معاه بس كاش

واهم شي اللي ناوي يستأجر السيارة باسمه
هو اللي لازم تكون البطاقية الائتمانية باسمه

يعني لما جيت عند زوج اختي عشان استأجرله السيارة قالولي لازم انت تستأجر السيارة باسمي انا لانه مايصير واحد يستأجر السيارة ويستخدم بطاقة اخوه ولا صاحبه


11- اللي دفع رسوم الفيزا الامريكية في بنك سامبا
اكيد البنك اعطاك الكربون الاصفر (الريسيت) هذا اذا تبغى الملحقية ترجعلك قيمة الرسوم
لازم تصوره وتاخذ الصور معاك ولما تجي هنا ترسل الصورة للملحقية مع صورة الفيزا وهم يعوضوك
مو لازم طبق الاصل عادي صورة عادية تصورها قبل ما تروح السفارة لانه السفارة راح تاخذ منك هذا الكربون الاصفر

بعدين لاتنسوا اللي معاه مرافقين لازم كل واحد له كربون باسمه
يعني مثلا انا واختي مسافرين
هيا لها ايصال اصفر باسمها ورقم جوازها
وانا ليا كمان واحد اصفر باسمي ورقم جوازي
يعني كل شخص تدفعله الرسوم يكون منفصل في ايصال لحاله

12- اللي في السعودية وناوي يجي
لازم يتعلم كم كلمة تفيده لما يجي
والله في ناس مساكين تعبوا مرة لانهم صفر في الانجليزي
انا كنت امشي حالي لاني درست صيدلة في جدة وكانت بالانجليزي طبعا

عشان كذا لو عندك وقت اقرالك كم كلمة واحفظها
ادخل المواقع وشوف الكلمات االي ممكن تستخدمها

زي كلمة حجز

او خنزير اكرمكم الله
او اي كلمة تجي في بالك ممكن تستخدمها

13- هذي اهم نقطة انا معايا جهاز جوال N78 واصحابي كلهم عندهم N95 و واحد منهم عنده سوني اريكسون اللي شاشته باللمس
وكلها طبعا تشتغل مع شركة AT & T وهذي الشركة تقريبا الاقوى في الارسال والاحسن لانه في كل امريكا تشتغل تقريبا

اما الشركات الثانية تكون ارخص شوية بس مشكلتها انه لازم تشتري الجهاز من عندهم
يعني اذا ناوي على الشركات الرخيصة اللي تقريبا تدفع 50 دولار شهريا ويكون كل الاتصالات ببلاش
لاتجيب جهاز معاك


14- ال لاب توب الكمبيوتر المحمول
انا ابغى اقول نقطة انه اللي يبغى يشتري لا ب توب ترى اللي من السعودية حيكون مطبوع فيه حروف عربية على الكيبورد
هذي الميزة الوحيدة بس

اما من هنا من امريكا حيكون اول شي عندك خيارات كثيييييييييييييييييييييييييييييييييييييييييييييييي يييييييييييييرة
وارخص من اللي في السعودية تقريبا ب 300 دولار هذا اقل شي طبعا

انا اشتريت واحد من جرير والله اني لقيته هنا نفس المواصفات بس مافيه حروف عربية ارخص ب 310 دولار تقريبا

موقع hp.com هذا الموقع تقدر تختار فيه اول شي مقاس الشاشة وبعدين تقدر تغير في المواصفات
يعني تزود الرام او الهارد ديسك

ويجيك مضمون من الشركة طبعا
يعني انت تسوي لاب توبك بنفسك

نصيحتي الواحد يجي هنا ويشتريه
او انه على الاقل يدخل على الموقع هذا ويشوف ال لاب توب واسعارها وهو يقارن بنفسه عشان لا احد يجيني يقول انت ضحكت عليا ولا انت تاخذ ارباح من شركة hp
انا والله بقول رأيي الشخصي
بعدين اللي ناوي يجيب معاه لاب توب من السعودية لازم يسوي فورمات للجهاز
او على الاقل يمسح اي برنامج مو اصلي
حتى الاغاني الانجليزية لازم تتسمح كلها اتياط علشان لا يسولك مشكلة
ترى فيها غرامة وسجن على حسب اللي قرأته في النت
بس العربي عادي

15- ارفقت ملف فيه كلمات تلاقوه في الصفحة الخامسة من الردود من نفس هذا الموضوع
الكلمات الانجليزية اللي استخدمتها في حياتي

ممكن ما تكون كثيرة بس تمشي الحال
واذا احد شاف شي غلط يكلمني اعدله لاني والله ماني فاضي اقراه ثاني



وبالتوفيق للجميع يا رب

• نشر عبر تويتر
• نشر عبر فيسبوك
• نشر عبر جوجل