تكفون الي عنده خبره بالمطارات والعفش يدخل ولا أي واحد قد راح ماليزيا يدخل بعد

السلام عليكم جميعا

عزيز المحتار يعود إليكم من جديد :D
بس الحمدلله ألحين منب محتار

أهنئ الجميع بقرب عيدالأضحى المبارك

أول شي أبشركم ترى قبولي جاء وان شاء الله عن قريب أبطلع ماليزيا<<على الخطوط السعودية :)

بس عندي استفسار بالنسبة للمأكولات الي آخذها معي<<أهم ماعليه بطنه :D

قررت انا وامي الله يحفظها
اني آخذ قهوة وهيل وتمر!
ولزّمت علي أمي تعطيني كمّون<<خايفة علي لا يوجعني بطني :D

السؤال: هل يلزم ان المأكولات الي آخذها معي في العفش يكون مكتوب عليها تاريخ الصلاحية؟
ولا مايدققون بذا الأمور؟

وفيه سؤال ثاني بعد: كم الوزن المحدد للعفش بالنسبة لدرجة الضيافة؟

وآخر سؤال:وش الماكولات الي تنصحوني آخذها<<يعني ماتوجد بماليزيا

تكفون أبغى إجابة شافية الله لايهينكم

بالنهاية عيدكم مبارك قبل الزحمة ووفق الله كل القائمين على نجاح هالمنتدى من إدارة ومشرفين وأعضاء

والسلام خير الختام :)

با السلامه انشاء الله
قهوه وتمر فقط خذ معك اما باقي الامور موجوده هنا في ماليزيا
حتى القهوه والتمر موجود لاكن اكيد النوع الجيد في السعوديه وارخص في السعوديه
مافي تفتيش على تاريخ الصلاحه ابدا لاكن اكيد ماراح تجيبهم منهيه صلاحيتهم

العفش بيختلف م طيران لاخر فههو بين 20-30 كيلو للشخص

با التوفيق

هلا أخوي ..

بما إني طبيت ماليزيا قبل شهرين , فأنصحك تجيب أكلك معك , الملابس لا تشيل همها أبدا , هنا الملابس مليانه وسعرها تقريبا نفس السعودية ..

الأكل أنصحك تجيب تمر .. وإن كنت تحب جبنة كرفت برضه ترى تفك أزمة , ووش إسمه ذا ؟! ..

إيه , شابورة وأخواتها , المهم حاول تجيب معك أكلك اللي يمشيك فترة لين تتأقلم مع البلد وتعرف الزين من الشين , وإن كنت تقدر العلوك (-- مثلي يعني :laughing: كثّر منها لأن أسعارها هنا غالية ..

وفي الأخير .. لا تشيل هم أبد , الأكل متوفر بشكل كبير , لكن الأسعار هي المشكلة , ولا الأكل ولله الحمد ملياااان :fez:

والوزن في الخطوط السعودية , 40 كيلو جرام , لكن ترى الخطوط السعودية يمشووون الطلاب بشكل كبيييير , إلا إن خانك حظك ذاك اليوم وجيت على واحد شين فالله يعينك :gatekeeper:

هلا اخوي ومبروووووووووووووووك على القبول والله يوفقك

اهم شي جيب البن والهيل اهم شي والشابوره والاجبان نصيحه والرز لو بتطبخ لانو هنا الرز مره مو زين ماعجبني صراحه

اممم وبهارات جيب

اما الوزن والله يمشونك انا شنطتي لحالها كانت 37 من غير الباقيه ولاقالو لي اي شي ولاوزن زايد ولا شي الحمد لله
وبالتوفيق ..,,

وعليكم السلام ورحمة الله وبركاته
ألف ألف مبروك على القبول . ماقصرو الأخوان وأزيد عليهم التالي
1- حلاوه طحينيه
2-تونه, لأن تونتنا غير
3- نعناع مجفف
4- عسل
5- شطة كريستال
6- أندومي أذا كنت من عشاقها
هذا بالنسبه للمواد الغذائيه , أما الأشياء الأخرى المهمه وقد ينساها الأنسان مع الأستعجال فهي سجادة الصلاه والمصحف .
مع تمنياتي لك وللجميع النجاح والتوفيق.

هلا اخوي ,,

الحاجات المهمه تقريباً والي مو موجوده او موجود بس جودتها أقل هي , اللبن , التمر , القهوه , الرز وبهارات مع اني افضل تاخد بهارات من هنا لأن بهارات ماليزيا من أفضل البهارات . بخصوص الأكل , راح تتعود عليه خخخ , مثل ماتعودنا عليه , اكلهم حلو صراحةً والأحلى والأفضل إنك تتعود عليه دام إنك جالس كم سنه هنا في ماليزيا فـ لابد تتأقلم مع ثقافه ماليزيا بالنسبه للأكل .


الوزن المسموح مابين 20 الى 30 كيلو , انا عندي عقده مع الوزن , لأني لازم ولابد يصير عندي زياده وزن إن كانت لما راجع السعوديه أو جاي لماليزيا , وأظطر أدفع 500 ريال تقريباً :( .. بس النزله اللي بتجي ان شاء الله أزبط اموري .. حاول الأغراض المو مهمه لاتجيبها معك ,,


سجادة الصلاة مع القرآن والمسبحه أهم شيء كمان ,, وبالنسبه لتاريخ الإنتهاء ماراح يسألونك أكيد .. كم مره وانا جاي لماليزيا وماسألوني


وكل التوافيق لك ..

اقتباس:

---

المشاركة الأصلية كتبت بواسطة ali o b

6- أندومي أذا كنت من عشاقها

---

الإندومي متوفر هنا وبكثرة بعد , وأسعاره بعد رخيصة . أنا أشتري 5 حبات إندومي بـ 3رنجت و75 سنت ..

وللمعلومية .. يوم كنت في الرياض كنت ما أطيق شيء إسمه إندومي , لما جيت هنا , ومع الوقت صرت مدمن عليها :tongue4: