التوصية العلمية وترجمة الوثيقة الجامعية والسجل الاكاديمي

بسم الله الرحمن الرحيم*

السلام عليكم ورحمة الله وبركاته*

كيف تترجمين الوثيقة؟*

1-لازم تكون الوثيقة الاصلية معك وصورة لها*
2- وصورة من جواز سفرك

تروحين لقسم شؤون الطالبات تعطين الاوراق للإدارية المسؤولة عن قسمكم ,, بتاخذها منك وبتطلب منك خطاب تكتبينه للعميدة انك تبين وثيقتك تترجم للانجليزي (الخطاب كله على بعضه سطر او سطرين او ثلاثة يعتمد عليك ,, الى المكرمة العميدة فلان بنت فلان افيدكم بانني انا الطالبة .... ساكمل دراستي في .... واريد وثيقتي ان تترجم توقيعك والتاريخ ),,*
بتاخذ الادارية منك الاوراق وبتقول تعالي خذيها بعد 3 اسابيع او يعتمد على فضاوة العميييييييييد ,,, انتهى

في طريقة ثانية انك تروحين لمكاتب ترجمة معتمدة ,,, انا ترجمت شهادتي عند مكتب معتمد (وكمان يترجم ابحاث بالانجليزي معتمدة) المترجمة بنت سعودية قمة في الاخلاق الله يوفقها ,,,

ارسلت لها بالايميل صورة لوثيقتي وصورة لحسن السيرة والسلوك واسمي في الجواز ,, بعدين ارسلت لي رسالة وقالت لي اجي استلم الاوراق بعد ما ترجمتها وعليها ختم المكتب وهو ختم معتمد ,,*

اسم المكتب (مكتب عائشة عبدالرحمن الدوسري للترجمة) وعنوانه (الدمام طريق الملك فهد مجمع باب رزق جميل) يفتح من الساعة 8 الصباح حتى الساعة 2 الظهر..

كيف تطلعين و تترجمين السجل الاكاديمي؟*

الوثيقة الاصلية لازم تكون معك*

وجواز سفرك*

تروحين لشؤون الطالبات وتعطيك الادارية المسؤولة عن قسمك ورقة مختوم عليها انك تبين تطلعين السجل تبعك.. بعد كذا تروحين لقسم تبويب المعلومات تعطينهم الورقة المختوم عليها وصورة من جواز سفرك (لانه ضروووووري يكون اسمك في السجل مطابق لاسمك في الجواز) ... الموظفة في قسم التبويب راح تطلع لك السجل وتترجمه في اقل من ساعة او اكثر يعتمد على سرعة الموظفة ,, ارجعي للادارية في شؤو ن الطالبات عشان تطابق السجل اللي ترجمتيه مع السجل الاصلي وتوقع عليه واخيرا روحي للعميدة عشان توقع وتختم لك السجل ,,, انتهى

التوصيـــــــــــــــــــــــــــــــــــــــــــة*

(التوصية عبارة عن وجهة نظر الدكتورة في كفائة الطالبة وهل تستحق الطالبة انها تكمل دراستها للماجيستير ,, وترى التوصية حاجة اساااااااااااااااسية في طلبات التقديم للالتحاق ببرنامج الحصول على شهادة الماجيستير بعض الجامعات بالذات الامريكية والبريطانية ما ترضى باي توصية لهم شروطهم الخاصة عشان يقبلونها,, غالبا ما تطلب الجامعات توصيتين او ثلاث وانتي اذا تقدرين تاخذين اكثر خير وبركة ,, ويا حبذا لو تكون علاقتك بالدكتورة كويسة مثلا تكونين طالبة ممتازة عندها او كنتي تشاركين معها في الانشطة اللامنهجية للجامعة او تاخذين وتعطين معها ومن هالكلام عشان اذا رحتي لها ,, تكتب لك توصية مميييييييزة وتكون مخلصة وهي تكتبها ,, مو تكتب لك توصية عامة تفشل ويمكن ما تستفيدين منها *,, عموما التوصية من حق اي طالبة حتى لو انها ماخذة جيد ولكن تعتمد على مزاج الدكتورة ونظرتها ونحاستها .. )

نصيـــــــــــــــــــــــــــــــــــــــــــحة*

اول ما تتخرجين خذي لك توصيـــــــــات من كذا دكتورة لانك ما تدرين عن المستقبل سبحان الله ربي ييسر لك وتكملين دراسة خارج المملكة فراح تحتاجين التوصيات ,,,

ثانيا وجدا مهم الدكتوراااااااااااااات وما ادراااااك ما الدكتورات وينقسمون الى اربع اقسام :

•الدكتورات الاجنبيات ( انا كنت محتاجة توصية من بروفسورة مصرية لان درجاتي عندها جيد جدا وتعرفون المصريات جدا متعاونات وطيبات مو مثل بعض السعوديات الله يهدهم بالاضافة انها بروفسووووورة المهم رحت للقسم اسال عنها قالو انها سافرت للاسف الشديد وطارت توصية البروفسوووورة)

•في بعض الدكتورات قلبها اسود وحسودة ما تبي الخير لأحد (اعوذ بالله منهم) اذا تعرف انك بتكملين دراسة يجيلها مغص ببطنها عندها احساس قوي انك راح تاخذين مكانها وتتعذر باي عذر سخيف حتى لو انك ماخذة امتياز حجتهم الابدية انها مااااااااااا تعرفك و ما تذكرك ؟؟؟؟؟! ومثل هالدكتورات ما يستاهلون المكان اللي هم فيه لانهم ببساطة ما يبون الخير لهالوطن ولبناته والقهر انك بترجعين بعد عشر سنوات وتلاقينهم موجودات هم نفسهم ما تغير الطاقم !!! وهذا للأسف الشديد اللي صار بالضبط لكاتبة هالموضوع اللي هي انا *!!! اذا رحتي لها دايركتلي بعد ماتاخذين الوثيقة ما راح يكون عندها حجة مع ان هالاشكال بتطلع بمليون حجة حتى ما تعطيك التوصية استغفر الله العظيم,,,*

•دكتورات ما يقبلون الا طالبات امتياز يقال عندهم ضمير واتمنى يكونون صادقات ما يكون عذر عشان يحرمون هالطالبة المسكينة من انها تكمل حلمها!!! مع انه ما يحق لهم انهم يحرمون اي طالبة انها تكمل دراستها وطموحها حسبنا الله عليهم ..

•الدكتورات اللي مختفيات طوال العام وما ينشافون الا وقت المحاضرات وكمان ما يحضرون المحاضرة الا متاخرات هذول متى يمديهم يكتبون لك توصية !!!! ( هذول اللي علو كبدي لان في 3 دكتورات كنت ماخذة عندهم امتياز وكل ما سالت السكرتيرة عنهم قالوا ما شفناهم اليوم ولما رحت لمكاتبهم قعدت انتظرت بالساعات ماجوووا غثوووووني والمشكلة اني بعيدة عن الجامعة واخوي مو فاضي لي كل شوي انط لهم )

عموما عن نفسي حصلت على 3 توصيات من ثلاث دكتورات خلوقات جدا (د.ليلى باطوق ,, د. لمياء المبارك ,, د.حصة الكهلان ’’) الله يعطيهم العافية ويكثر من امثالهم من جد مثال مشرف للدكتورات السعوديات والله يوفقهم وين ما راحوا ويعطيهم على قد نياتهم .*

كيف تحصلين ع التوصيات ؟

لازم يكون معك السجل الاكاديمي*

ونموذج توصية من الجامعة ويكون انجليزي (تاخذينه من سكرتيرة القسم)

وشوز رياضي اكرمكم الله لانكم راح تراكضون ورا الدكتورات من قسم لقسم*

اول شي تسوينه تكتبين اسمك في نموذج التوصية وضروووووووري يكون نفس اسمك بالجواز جدا مهم نادرا ما ينبهون الدكتورات على هذي الشغلة لان في جامعات ترفض التوصية اذا ما كان اسمك مطابق لاسمك بالجواز تروحين للدكتورة اللي انتي ماخذه عندها امتياز (مو شرط امتياز بس يفضل) وتعبي لك هالنموذج وتوقع لك عليه وتكتب ايميلها ان وجد وبعدين تروحين لسكرتيرة قسمك عشان تختم لك التوصية واخيرا تروحين للعميدة (القسم قال لي ما يحتاج ختم العميدة ختم القسم يكفي لكن ختمته عند العميدة الاحتياط واجب)... انتهى*

للاسف للاسف للاسف دايما البنات يتبهذلون في كل شي الله يعينهم ,,, تعرفون كيد النساء حتى بالجامعات كيدهن عظيم ,, الله اكببببر ,,, والله يازين الرجال زينااااااااه ,,, وثيقة زوجي انجليزية وحتى السجل بالانجليزي ’’’ ولما طلبت الجامعة منه التوصية ارسل ايميل لسكرتير جامعتهم قال ابي توصية من كذا دكتور وكتب اسماء الدكاترة اللي يبي منهم التوصية وارسلها لسكرتير قسمهم وبعدين رد عليه السكرتير(الله يكتب اجره) وحدد له اليوم اللي يجي فيه عشان ياخذ فيه التوصيات ما شاء الله كذا باردة مبردة ؟! وحنا سكرتيراتنا شايفات نفسهم علينا واخلاقهم زفت على طول ,, ذول لو كانوا بروفيسورات وش بيسون؟! ,,,*

والدكتورات لازم نرز لهم طولنا كاننا رايحين نطلبهم عرسان مو توصيات ,,, ولازم تقلب بشرتنا لبرونزي وننزل 3 او 4 كيلو من الفرارة في هالجامعات عشان توصية ولا وثيقة ,, والله جامعات البنات مهزلة للاسف الشديد.

كتبت هذا الموضوع لاني من جد عانيت عشان الشغلات اللي فوق ,,, لان ما في احد في النت تكلم عن تجربته بالتفصيل الممل من شان هيك كتبت لكم بالتفصيل الخطوات بدل ما تقوقلون كل شوي وتصدع رووسكم,, وعشان اسهل ع البنات اللي ان شاء الله ناوية تكمل ماجستير ,,

ان شاء الله يكون هالموضوع صدقة جارية يستفاد منه ,,واتمنى من كل بنت تقراء هالموضوع وتستفيد منه انها تدعي ربي ان يحفظ امي وابوي وان ويشفيهم يااااارب ,,, وتدعي ربي ان يوفقني وزوجي وابني واخواتي واخواني ,, وان يوفق جميع المسلمين والمسلمات في كل مكان ,,, وفقكم الله ,,