من معي على الخطوط البريطانيه 3/2 /2011 رياض لندن// وآشنطن ميآمي

انا جيت على الخطوط البريطانيه
رحلتي كانت الساعه 8ونص الصباح ركبنا الطياره واقلعنا طبعا كنت مواصل فاول ما اقلعنا غفيت لي ساعتين وعليها وصحيت
وقعدت اتفرج على المناظر وسبحان خالقها طبعا كان مسموح التصوير ومافوت ولا صوره ههههههه (انقره - اسطنبول - البحر المتوسط - بوخراست- كييف - فيينا - ميونخ - فرانكفورت - بحر الشمال - لندن)
وجا وقت الغدا وكان لكل راكب خيارين (باستا والا دجاج بالكاري) اكلهم حلو صراحه
وبعدها وصلنا لندن طبعا مظار هيثرو من اكبر مطارات العالم وشغلته شغله
بما انا احنا ترانزيت بس في لندن ساعتين لزم نروح على بواباتنا بسرعه فعرضوا لنا في الشاشه كيف نروح وكيف نجي
وكان فيه مضيفه مصريه لو الله ثم هي كان ضعنا هههه شرحتلنا كيف نروح وكيف نجي
اما المضيفين البريطانيين صراحه اشوف اهتمامهم بالركاب البريطانيين اكثر لكن بالطقاق هع
المهم اكثر شي اعجبني اننا مرينا من فوق لندن ويالبيييييه يالندن واحلى مافيها كلها اننا مرينا من فوق ملعب الامارات ملعب الارسنال
المهم نزلنا المطار واكتشفنا ان البوردنق مافيه رقم بوابه ورحنا سالنا اللي يشتغلون بالمطار وين بوابتنا قالوا انتظروا عند الشاشه لين تطلع بجنب رحلة واشنطن البوابه يعني للحين ماحددوا الاخوان
المهم قلنا خلنا نتسوق ونتشري من المطار عطورات وكذا لانها بدون تاكس نستغل الفرصه
بعدها رجعنا للوحتنا ولقيناهم حددوا البوابه وجلسنا ننتظر لين بدا الدخول
طبعا التفتيش موجود ولازم تطلع جميع السوائل اللي معاك في شنطة اللاب توب وشنطة اليد وتحطها في صندوق
واذا كان عندك اي سائل كريم او عطر فوق ال100 مل بيصادرونه عليك هههههه عشان كذا خلوها في شنطكم الكبيره اللي رايحه لامريكا
لانهم خذوا مني كريم وعطر بربري مافتحته بكرتونه الله لايسامحهم
وطلعنا طيارة امريكا وكنا 5 طلاب سعوديين تقريبا المهم الطياره كانت فاضيه مافيه الا حنا والباقي هنووووووود مادري من وين جو
المهم خذيتلي 3 كراسي وانسدح واطقها نومه انا واللي قدامي مسوي زيي 5 ساعات هههههههه وصحونا وجابولنا العشا وكان دجاج بالباربكيو وبطاطس مهروسه وحلى وخبز محلى ومشورب تختاره <<< احلى وجبه مرره رووعه وغريبه طبعا الاكل كله بريطاني
طبعا الرحله الثانيه من لندن لواشنطن مافيها اي مضيفه عربيه
اللي صار فيه وجبه خفيفه يعطوناها قبل الهبوط بساعتين الظاهر اللي هي سادنوتش توست ف كان واحد من اخويانا مفهي
وقالت له المضيفه ham قال اوكي طبعا مايدري وش السالفه هههههه اخذ الساندوتش (خنزير) والا المحه يفكك بالكييس
ههههه وانط عليه واقوله وبعدها بشوي جابولنا جبن
اعطونا ال i-94 وورقه ثانيه المهم قعدت اكتب وانواع الترقيع شوي الا جت المضيفه قالت حبيبي بجيبلك وحده ثانيه وارجع اكتبها زين بدون غلطات ههههههههههه عاد المعلومات كثيره مشوار شوي ههههههه
وجابولي ورقه ثانيه وكتبت وخلصت ووصلنا امريكا الساعه 7 بالليل بتوقيتهم

الحين اللي بقوله ماله دخل بالطيران لكن لازم الكل يعرف هالشي
طبعا كنت كلي خوف من سالفة المقريشن وبنقعد 5 ساعات ومدري وشو والله يسامح اللي قال هالشي
اللي صار اني دخلت وكان فيه صف فيه وحده قدامي اجنبيه وانا وراها قاعد اشوف وش يسوون لها وش يطلبون منها
المهم بصموها عين وصابع وجا دوري وسالني وش تبي هنا قلت بدرس قال وين وجاوبته وقالي خلاص رح للمكتب رقم 1
انا خفت وارتبكت صراحه ليه مابصمني زي اللي قبلي وقعدت انتظر خويي لين خلص وشفتهم مابصموه ارتحت ههههه
المهم الكتب رقم 1 اعطونا اغراضنا وقالوا الله معاكم خذينا شناطنا ولا احد اتعرضنا لين وصلنا الصاله ولقينا سواق الملحقيه ورحنا للفندق وكانت جلستنا بالمطار ماتعددي ال10 دقايق.

الرحله الثانيه كانت من واشنطن دي سي لسياتل مدينة دراستي وكانت على خطوط اليونايتد والله يلعنهم على خطوطهم
اول شي بالمطار كنت انا وواحد كالب سعودي انا فتشوني تفتيش نفضوني نفش وخويي والله ماسووله شي هههههه
مرروني على جهاز وخلوني ارفع يديني ومدري ايش كانهم يعرفوني من قبل
المهم على الخطوط الزفت هذي انسى شي اسمه اكل اشوى اني مالي شنطتي من قبل والا عشان مابخسهم اعطوني كولا اقصد انا رحت واخذته هههه طبعا الاكل عندهم بفلوس بالكردت كارد<< مدري وش هالنظام البايخ
كراسي ضيقه وتكسر الظهر وعلما ان الرحله كانت 6 ساعات
وللمعلوميه تذكرتي من وشنطن لسياتل بنفس قيمة تذكرتي من الرياض لواشنطن (شي غريب)

الملاحظات:

1-الخطوط البريطانيه تسمح بشنطه واحده فقط وزنها مايزيد عن 23 كيلو + شنطة لاب توب+ شنطة يد
اذا تبي تزود شنطه ادخل موقعهم وحط رقم حجزك وزودلك شنطه ب185 ريال وتقدر تزود لك شنطه بالمطار بس راح ياخذون 230 ريال الظاهر

2-يوزعون ساندوتشات بلحم الخنزير فانتبهوا تغلطون

3- تقييمي لها متوسط وافضل شي فيها الراحه تقريبا مو بذاك الزود بس مريحه يعطونك ذاك الشي اللي تغطي فيه عيونك زي النظاره ومخدات ولحاف << اوووم الوصف ههههههههههه
يعني حلوه بس ماتوقع انها الافضل

4- بما اني حجزت قبل سفرتي بيومين كانت الخطوط البريطانيه ارخص خطوط متاحه لي عشان كذا رحت فيها والسعوديه كانت ب7000 ريال وعليها بس من الرياض لواشنطن
والبريطانيه ب3000 + اليونايتد من واشنطن لسياتل 3000 = 6000 ريال

5- بالنسبه للتراانزيت في لندن كان مفيد لنا وكانه طوق نجاه لاننا جد تعبنا وطفشنا بالطياره فالتمشيه بمطار هيثرو ساعتين مو كثيره وحلوه وتحرك فيها جسمك بس المشكله انتبه تضيييييييع لانه يدوخ شوي وخاصه للي مامعه لغه

6-خطوط يونايتد الامريكيه كانت اسوا مما يكون ف ما انصح فيها

واعذورني حاولت انزل بعض الصور للوجبات في الطياره لكن النت بطيئ عندي وماضى يرفع الصور

واعذورني على الاطاله واتمنى ان الكل يستفيد

المصدر: http://www.mbt3th.us/vb/forum8/threa...#ixzz1CUDIws5X
حفاظاً على حقوق الكاتب نرجو عدم حذف المصدر مبتعث