اجراءات الفيزا الاسبانية

هلا بك تاخذها وتترجمها طبعا الرياض كللله ما حصلت فيه ترجمه اسباني غير بمكتب لفته الي بالتخصصي

وبعدها تجيب فحص طبي من اي مستشفى وتصدقه من المديريه العامه للشؤون الصحيه وتصدقه من الخارجيه وتترجمه

بعدين تاخذ الفحص وترجمته وشهاده السوابق وترجمتها وتروح السفاره


بس تحذييييييييير اذا كنت عايش برا او مبتعث السنوات اللي رحوا انتبه تقوللهم ابددددد

انا صارت لي مشكله لاني كنت برا اخر اربع سنوات وطلبو مني اجيب شهادة خلو سوابق من الدوله اللي كنت بها وهذا مستحيل لحد ما تدخلت السفاره السعوديه بمدريد ووافقو ع فيزتي

حتا الموظفه قالت لي اي احد كان برا لا يقول لنا انو كان برا عشان ما نطلب منه شهاده خلو من السوابق من البلد اللي كان به



موفق

مشاري ماقصرت ع المعلومات ..
بسالك تاخذ ورقة الفحص من السفارة والا طبعتها من خدمات الابتعاث ؟
خابرك بتوصل ٢٠يناير ،، خبرنا كيف الاوضاع هناك وش الاوراق اللي تحتاجها هناك والاقامة واوراق الملحقية كيف بداية اللغة معك
الله يوفقك


( تمت المشاركة باستخدام تطبيق مبتعث )

هلا ابو مازن

ما تاخ ورقه فحص ولا شي لانو السفاره قالو ما عندنا ورقه للفحص

تروح اي مستشفى وتقولله بسوي فحص شامل يسوونه بساعه بس اهم شي لازم لازم ينكتب بالورقه انو الشخص المذكور خالي من الامراض المعديه ضرووووري هالكلمه للسفاره وبعد لازم يكون الفحص مكتوب بالكمبيوتر مطبوع مو مكتوب باليد لان المديريه رفضو فحصي لان الطبيب كاتب بخط يده ورجعت وطبعوه لي


اما الدراسه ما عليه انشالله تساهيل شد حيلك وكلو يجي انشالله ،، هذا ثاني اسبوع لي

اما الاقامه جب اوراقك كامله معك وبعد جب الفحص الاصلي وشهادة الخلو من السوابق اذا استلمت انشالله الفيزا خذها منهم لانهم يطلبونها للاقامه

والامور الباقيه انشالله سهالات

اخ المشاري اليوم رحت السفارة وطبعا بهدلوني اشوي بس الحمدلله اخذوا الاوراق والجواز ودفعت رسوم الفيزا بس مادري ما خلوني ابصم بس اخذو الاوراق والجواز وقالوا راح نتصل عليك الي ودي استفسر هل هناك اجراءات اخر للسفارة او لا وشكرا

اسبانيا ٨٨

لا اذا انهم اخذوها وقالو روح خلاص

انا اسبوع واتصلوا علي

موفق انشالله

السلام عليكم .. صباح الخير للجميع !
هل صحيح مافيه تقديم للتأشيرة الدراسية الا بالرياض 😔😔
اليوم رحت مكتب التأشيرات بجدة قالوا لي كذا
نقطة اخرى تأمين السفر كم المدة المطلوبة؟
التصديق بوزارة الخارجية متساهلين والا الوضع معقد؟
شاكر للجميع وبالتوفيق لكم


( تمت المشاركة باستخدام تطبيق مبتعث )

ابو مازن

اتوقع لازم بالرياض ،،،، ما ادري لاني سويتها من الرياض

تامين السفر ما احتجته لانو الموظفه قالت لي مو لازم لانو الضمان المالي مكتوب فيه انو عندك تامين لكن تحتاج تامين تبع الملحقيه عشان تسوي اجراآءات الاقامه اول ما توصل

انا اول ما جيت راسلت الملحقيه وخاطبت الشركه المتعاقده مع الملحقيه وارسلو لي التامين،،، برضو عشان تتاكد كلم السفاره واسالهم لازم او لا ،،، انا عن نفسي ما عندي ثقه في كلامهم وسويت تامين من السعوديه لمده سنه اتوقع ب ٣٥٠ ريال

وزاره الخارجيه تصدق اوراقك بخمس دقايق وانت واقف فيه شباك للتصديق ما يكون فيه زحمه ابدد لاني جيتهم اكثر من ٤ مرات وشغلهم عالسريع

شباب الله يعافيكم هل ضروري ترجمة المستندات للإسباني أو يمشون الإنجليزي ؟

لأن في متطلبات الفيزا مشترطين الترجمة للإسباني لكن لما كلمتهم حسيت من كلام الموظفة انه موب ضروري لكن يفضل.

فأسعفونا الله يعافيكم بالجواب ..

انا كلمت الموظفة قالت ترجمهم اسباني بعد ماتختمهم من الخارجية ..
الادلة الجنائية والكشف الطبي .
بعد مكتوب بالشروط ترجمة للاسباني .. تاكد من اللي راحو قبل
متى موعدك ؟


( تمت المشاركة باستخدام تطبيق مبتعث )

شكرا ابو مازن على الرد السريع

الثلاثاء القادم ان شاء الله موعدي ، فخايف تتأخر الترجمة

وعندي سؤال بالنسبة للفحص الطبي لاهنت ، رحت لأكثر من مستشفى قالوا مانعرف وش فحص السفارة لازم تعطينا الفحوصات المطلوبة ، فهل عندك معلومة بخصوص الفحص ؟

وشكراااا جزيلا